Pia Uianga

◼ Akapeea te imene akamataanga no te Apii Orometua Teokaratiki, te Uipaanga Tavini Anga, te Uipaanga Papuriki, e te Apii Punanga Tiaki i te akakiteia anga, e naai e rave i te reira?

Te au ikianga no te imene akamataanga no te epetoma tataki tai o te Apii Orometua Teokaratiki, kua papaia i roto i te Akapapaanga Apii Orometua Teokaratiki i roto i te kapi i roto ake o Ta Tatou Angaanga Patireia o Okotopa. Te au imene akamataanga e te au imene openga no te epetoma tataki tai o te Uipaanga Tavini Anga, e akakiteia mai ana i te kapi 2 o Ta Tatou Angaanga Patireia. Pera katoa, te au numero imene no te Apii Punanga Tiaki i te au epetoma, e kiteaia ana i te kapi 2 o te itiu tataki tai o Te Punanga Tiaki. Te au imene akanooia kua manakoia ei tuanga o te uipaanga taokotai katoaia e ka tau i reira kia akakiteia e te taeake e akono ra i te uipaanga auraka e na te tiamana o te uipaanga i mua atu.

Ei akaraanga, ka turou te akaaere no te Apii Orometua Teokaratiki i te katoatoa, ka akakite mai i te imene akamataanga, ka akono mai i te apii, e oti ka pati atu i reira i te vaa tuatua mua o te Uipaanga Tavini Anga kia aere mai ki runga i te paata. Ko te taeake e nana te tuanga i runga i te Uipaanga Tavini Anga ko te tangata ia e akakite atu i te imene no te akamataanga i te Uipaanga Tavini Anga.

Mei tera katoa rai, ko te tiamana te ka kapikiia kia akamata i te Uipaanga Papuriki. Ka turou maanaana aia i te katoatoa tei tae mai e ka pati atu ia ratou kia piri mai ki roto i te imene anga i te imene akamataanga tei ikiia e te vaa tuatua. Na te tiamana (me kore na tetai atu taeake tau tei akanooia i mua atu) e akatuera i te uipaanga na roto i te pure. Ka akakite mai aia e koai te vaa tuatua e ka akakite mai i te tumu manako o tana akoanga. I muri ake i te akoanga, kare te tiamana e taiku poto mai i tei tuatuaia e te vaa tuatua, mari ra ka oronga aia i tetai akameitakianga poto ua no te ikuikuanga. Ka akakite aia i te tumu tuatua o te akoanga papuriki no te epetoma ka aru mai, e oti ka pati atu aia i te katoatoa tei tae mai kia noo mai no te Apii Punanga Tiaki. Kare te tiamana e anoanoia i te pati atu me ka inangaro te katoatoa i te tuku atu i to ratou aroa e te au turouanga ki te putuputuanga o te vaa tuatua tei atoro mai. Aru mai, ka pati atu te tiamana i te akaaere o te Apii Punanga Tiaki kia aere mai ki runga i te paata.

Ka akakite mai te akaaere no te Apii Punanga Tiaki i te imene akamataanga te ka taangaangaia te piri atura ki te apii. Ka akono aia i te apii i te aruanga i te au ikuikuanga neneiia e oti ka akakite aia i te imene openga. Tei matauia ka pati atu te akaaere o te Apii Punanga Tiaki i te taeake tei oronga i te akoanga papuriki kia oronga i te pure openga.

Na te aruanga i teia au akauenga noa ua, ka tauturu i te akapapu e ka akonoia ta tatou au uipaanga putuputuanga i roto i tetai tu taokotaiia.