Papaanga Ou no te Uipaanga a te Putuputuanga
1, 2. Eaa te au tauianga ka raveia ki te au uipaanga i te akamataanga ia Tianuare 2009?
1 I te epetoma o Aperira 21-27, 2008, kua akarongo te au taeake taokotai i te ao katoa i tetai akakiteanga mataora. “Akamata mai mei ia Tianuare ra 1, 2009, ka raveia te Apii Puka a te Putuputuanga i te taime rai e raveia ra te Apii Orometua Teokaratiki e te Uipaanga Tavini Anga. Ka tauiia te ingoa o te Apii Puka a te Putuputuanga ki te Apii Pipiria a te Putuputuanga.”
2 Papaanga no Teia Uipaanga o te Epetoma: Te katoaanga o te ora no teia uipaanga, kapitiia mai te au imene e te au pure, e 1 ora e e 45 miniti. Ka akamata te uipaanga ma te imene e te pure (5 mini.), e ka aru mai te Apii Pipiria a te Putuputuanga (25 mini.). I muri ake i te reira, ka aru mai te Apii Orometua Teokaratiki (30 mini.). E oti, ka akamata mai te imene (5 mini.) no te Uipaanga Tavini Anga (35 mini.). Ka akaoti te uipaanga ma te imene e te pure (5 mini.). E tauturu ei ia koe i te akapapa no teia au uipaanga, ka neneiia te papaanga no te Apii Pipiria a te Putuputuanga, te Apii Orometua Teokaratiki, e te Uipaanga Tavini Anga mei tetai marama ki tetai marama i roto i Ta Tatou Angaanga Patireia.
3. Ka akapeea te Apii Pipiria a te Putuputuanga me raveia?
3 Apii Pipiria a te Putuputuanga: Ka raveia teia uipaanga mei te tu rai e raveia ana te Apii Punanga Tiaki. Kare e anoanoia kia uriuri akaou i te apii o te epetoma i topa akenei. Mari ra, e tapoto tikai i te tuatua akamataanga no teia uipaanga. Na teia e akatika mai kia rava te taime no te katoatoa kia oronga mai i ta ratou au pauanga poto ua. Na te akaaere akatere e akanoo i te au tuanga a te aronga pakari, kia tauiuiia te aronga pakari i te rave anga i teia uipaanga, e e tuketuke te tangata pakari ka rave i te apii i te au epetoma.
4. Na roto i teea tu ka tauiia ai te Uipaanga Tavini Anga?
4 Uipaanga Tavini Anga: Kare te Uipaanga Tavini Anga e taui, inara ka tapotoia te au tuanga. Mei tetai rima miniti me raveia te au akakiteanga. Ka rava ua teia ora no te au akakiteanga puapinga e tetai au reta no ko mai i te opati manga. Te au akakiteanga mei te akanoonooanga no te angaanga tutuanga, te papaanga no te tama, te au ripoti akaoniti, e te au reta matauia no ko mai i te opati manga, kare e anoanoia kia tatauia mei mua mai i te paata, inara, ka tamouia te reira ki runga i te papa akakiteanga kia tatau te au taeake. Te aronga e e tuanga ta ratou i runga i te porokaramu o teia uipaanga kia akapapa meitaki ratou e kia aru meitaki i te ora tei akanooia e kia aru i te au ikuikuanga tei orongaia mai.
5. I te epetoma o te atoroanga a te akaaere kotinga, eaa te papaanga no te uipaanga a te putuputuanga?
5 Atoroanga a te Akaaere Kotinga: Kare te papaanga epetoma a te akaaere kotinga e taui. I te Ruirua ka raveia te Apii Orometua Teokaratiki e te Uipaanga Tavini Anga e ka aru mai tetai imene. E oti, ka oronga te akaaere kotinga i tetai akoanga e 30 miniti. Mei tei raveia ana i teianei i te tuatau o tana atoroanga i te epetoma, ka akanooia tetai po no te Apii Pipiria a te Putuputuanga e ka aru mai te imene e te akoanga tavini a te akaaere kotinga. Ka akamutu te uipaanga na roto i tetai imene e te pure.
6. Eaa te apainga a te akaaere o te pupu?
6 Au Uipaanga no te Angaanga Tutuanga: Na te pupu o te aronga pakari e akanoo i tetai au akaaere kia akono ratou i to ratou pupu no te angaanga tutuanga e te tiakianga i te aronga i roto i te reira pupu. Me ka anoanoia tetai tavini orometua kia apai i te reira tuanga, kia ikiia aia ei “tavini no te pupu.”
7. Eaa ta tatou ka tapapa atu no ta tatou papaanga ou no te uipaanga a te putuputuanga?
7 Mei tei akakiteia mai no runga i ta tatou papaanga ou, ka rauka ia tatou te atianga kia akamanako i te au akakiteanga puapinga e te akamaroiroianga te ka tauturu ia tatou kia rauka tetai pirianga ketaketa kia Iehova. Na teia e tauturu ia tatou kia riro ei aronga karape i te tutu aere e ei puapii karape, tei tereniia kia puapinga maata atu i roto i te angaanga orometua.—Ephe. 4:13, 14; 2 Timo. 3:17.
8. Akapeea te akapapa vave anga a tetai e riro ei ei mea puapinga kia tatou e pera katoa ki tetai ke?
8 I te apii vave anga no teia au uipaanga e tauturu ei ia tatou kia tamou meitaki i te au tumu manako maata tei akakiteia mai i ko i te au uipaanga. Ka rauka ia tatou pouroa te atianga kia paupau, na te akamaroiroi atu anga i tetai e tetai. (Roma. 1:11, 12; Ebe. 10:24) To tatou akakoroanga, koia oki ‘kia kiteia te tupuanga o to tatou kite’ na te “akono meitaki anga i te tuatua mou.”—1 Timo. 4:15; 2 Timo. 2:15, NW.
9. Eaa ta tatou ikianga, e no teaa ra?
9 Mataora tikai tatou no teia tauianga puapinga maata no ta tatou au uipaanga a te putuputuanga. Kia taangaanga ua rai tatou katoatoa i te aratakianga ta “te tavini akono meitaki e te pakari” i oronga mai, e kia noo vaitata tatou ki to tatou Tiaki Maata, iaia e akapapa ra ia tatou no te “tumatetenga” maata te vaitata maira.—Mata. 24:21, 45; Ebe. 13:20, 21; Apo. 7:14, NW.