Akamorianga ia Iehova ei Pamiri
1 I roto i te au tuatau Pipiria, e rave kapiti ana te au mema pamiri i te au apinga e manganui. Kua rave ratou i te au angaanga i te au ra ravarai e tei puapinga maata atu kua akamori ratou ia Iehova ei pamiri. (Levi. 10:12-14; Deu. 31:12) I teia tuatau, i roto i te au ngai e manganui, kare te au mema pamiri e angaanga kapiti ana. Inara, te kite ra te au Kerititiano i te puapinga no te piri atu anga ki roto i te au angaanga ei pamiri, me tae mai ana ki te akamorianga tikai. Kare e ekokoanga te akamareka ra te reira i Tei Akamata i te pamiri, i te kite anga i te au pamiri e akamori taokotai ra iaia!
2 Tutu Kapiti Anga: I te angaanga kapiti anga i te tutu anga i te tuatua meitaki, te akaketaketa ra i te pirianga pamiri. No reira, kapiti mai i te aruanga i te aronga i roto i te putuputuanga ki runga i te angaanga tutu anga, ka angaanga kapiti putuputu katoa te tangata pakari ki tana vaine e tana tamariki. (1 Timo. 3:4, 5) Noatu e e maata tana au tuanga angaanga, e akanoo katoa ana te au akaaere tutaka i tetai tuatau kia angaanga kapiti atu ki ta ratou au vaine i roto i te angaanga orometua.
3 Te au metua e tutu kapiti atura ki ta ratou tamariki, ka rauka i te tauturu ia ratou kia tere ki mua ei tangata tutu evangeria. Kare e ka kite ua atu te au tamariki i te rekareka e te mataora o to ratou au metua i roto i te angaanga orometua, inara ka kite katoa mai ratou i to ratou metua e akakite ra i to ratou uaorai inangaro no Iehova e no te au tangata. (Deu. 6:5-7) Kare te puapinga o teia apiianga e kore ana me mamaata mai te tamariki i roto i te ngutuare. Tetai tokorua e toru a raua tamaroa i rotopu i te mataiti 15 e te 21, e aru putuputu ana rai raua ia ratou i roto i te angaanga orometua. Kua karanga te papa e: “I te au taime ravarai, e apii ua ana maua i tetai apinga kia ratou. E e tauta ana maua kia riro te reira ei tupuanga mataora e te akamaroiroianga.”
4 Akapapa Kapiti Anga: E kite mai ana te au pamiri i te puapinga kia akapapa kapiti ratou no te angaanga orometua. E reka ua ana te au tamariki i te au tuatau akamatauanga, ma te au mema pamiri e tuku taime ra no te oronga anga i te akakiteanga me kore i te akatutuanga i te tangata ngutuare. E taangaanga ana tetai pae i nga mea miniti ua i te openga o tetai apii pamiri kia rave i te reira.
5 Ka maata atu to tatou mataora me piri kapiti atu tatou ki te aronga e akaperepereia e tatou, ki roto i te au angaanga puapinga e te mataora. E mataora tikai no te au mema pamiri kia angaanga kapiti atu ki roto i te angaanga orometua mei tera are ki tera are e pera katoa i te akonoanga i te au atoroanga e te akonoanga i te au apii Pipiria! Ia koe e akamori ra ia Iehova ma toou pamiri, ka rauka ia koe i te akakite rekareka e: “Kareka au e toku ra ngutuare, e akamori ïa matou ia Iehova.”—Iosua 24:15.