Porokaramu Ou no te Ra Akaputuputuanga Takake

Te upoko tuatua no te porokaramu no te ra akaputuputuanga takake no te 2008 mataiti tavinianga koia oki ‘E Karakaraea Tatou​—Ko Iehova Tei Anga ia Tatou,’ tei akatumuia ki runga ia Isaia 64:8. Te akoanga Tuatua Tapu tei orongaia mai i roto i teia porokaramu, ka akamaata atu i to tatou akangateitei no to Iehova kite pakari, tu tika, mana, e te aroa ko Tei Anga Ngateitei.

Ka akaari mai te akoanga a te akaaere tutaka, “Tavini Anga ei Au Ariki Meitaki i Roto i te Angaanga Orometua,” e akapeea te au tangata e manganui e mataora nei i te akameitakianga maata i te kiteanga i te tuatua mou e te akakiteanga i te reira ki tetai ke. Ka akaari mai te akoanga “Ka Paruru te Akamanako Anga Oonu ia Koe” e akapeea te akamanako oonu anga ki runga i te au kaveinga tuatua tau a Iehova, ei paruru ia tatou. Ka tuatua atu te vaa tuatua atoro ki te katoatoa no runga i te au upoko tuatua “Auraka e ‘Aru i Teia Akatereanga o te Au Mea Nei’” e “Kia Akatikatikaia e Tei Anga Ngateitei.” Ka kite mai te au metua e te au mapu i te akamaroiroianga i roto i te au tuanga “Au Mapu e Puapinga ra kia Iehova” e te “Tuanga Puapinga a te Au Metua i Roto i te Ravenga Akatikatikaanga.” Na roto i te au akatutuanga e te au uiuianga, ka mataora tatou i te akarongo anga e te kite atu anga i tei akatupuia e to tatou au taeake e te au tuaine i roto i ta ratou angaanga orometua. Te aronga e inangaro ra i te akairo i to ratou akatapuanga ki te Atua na roto i te papetitoanga vai, kia viviki ratou i te akakite atu ki te akaaere akatere. E apai mai i taau kopi o Te Punanga Tiaki itiu te ka apiiia i te epetoma o te ra akaputuputuanga takake.

Noatu te au akakoroanga a Tei Anga Ngateitei, ka akatupu aia i te reira. Inara tei runga ia tatou tataki tai i te iki e akapeea tatou i te ariu atu anga ki tana akatikatikaanga ia tatou. Te aronga tei kauraro kite pakari ki te au turanga e te au akatanotanoanga a Iehova, ei potonga karakaraea i runga i te paata uira a tei anga mai, ka rauka i te akatanoia, te tamaia, e kia tauiia ei au ariki puapinga. Me taokotai tatou kia Iehova, te akapaapaa ra tatou i tona turanga ngateitei e te rauka ra i te au akameitakianga e manganui.