Tamou i to Tatou Maroiroi no te Angaanga Orometua
1 I te au mataiti ravarai mei te mataiti 1992, kua akapou maroiroi te Au Kite o Iehova e tere atu e tai pirioni ora ki te angaanga tutu anga i te Patireia e te akariroanga i te tangata ei pipi. Mei teaa atura to tatou mataora i te raukaanga tetai tuanga meangiti i te piri atu ki roto i te reira akatupuanga manea!—Mata. 28:19, 20.
2 E tika, ka tau te au akameitakianga e te au akapaapaaanga kia Iehova, tei turuturu ia tatou i roto i ta tatou angaanga orometua i teia au tuatau “kino maata.” (2 Timo. 3:1) Eaa te umuumuia ra ia tatou me ka piri maroiroi ua atu rai tatou ki roto i teia angaanga puapinga maata?
3 Tumu no te Maroiroi: Ko te aroa oonu no te Atua e no te tangata tupu, e pera katoa i te inangaro ngakau tae kia akatupu i ta tatou akatapuanga, tei akakeu ia tatou i roto i ta tatou tavinianga Patireia. (Mata. 22:37-39; 1 Ioa. 5:3) Kua akakeu te aroa ia tatou kia akono i te au akaatinga kia rauka ia tatou i te piri maata atu ki roto i te angaanga tutu anga.—Luka 9:23.
4 Angaanga kia Tamou i te Maroiroi: Te tauta pakari nei to tatou enemi te Tiaporo kia akaparuparu i to tatou maroiroi no te angaanga orometua. Te tu manako kore i roto i ta tatou ngai tutuanga, te au akavareanga o teianei ao, te au taomianga o te oraanga i te au ra tataki tai, e te manako no runga i to tatou uaorai oraanga kopapa e kino atura, ko tetai nga mea ua teia tana e taangaanga ana i te tauta kia akataitaia ia tatou.
5 No reira, kia angaanga pakari tatou kia akaoraora ua i to tatou maroiroi. E mea puapinga no tatou kia tatanu i “to [tatou] inangaro mua.” Te o maira te reira i te tatau e te akamanako putuputu anga i te Tuatua a te Atua te Pipiria, e te taangaanga meitaki anga i te au tauturu pae vaerua katoatoa a “te tavini akono meitaki e te pakari.”—Apo. 2:4; Mata. 24:45; Sala. 119:97.
6 Mei ta te au totou Pipiria e akataka meitaki maira, te vaitata viviki maira to Iehova ra no te takoreanga i te au tangata kare i tau ki te Atua. (2 Pete. 2:3; 3:10) I te akamanako meitakianga i te reira, kia angaanga pakari tatou i te akono tamou i to tatou maroiroi no te angaanga orometua, i te piri katoa anga i roto i te angaanga tutu anga i te Patireia e te akariroanga i te tangata ei pipi, e raveia nei i te ao katoa!