Teia Tuatau Akamaaraanga, ka Aru Ainei Koe i te tu Maroiroi o Iehova e Iesu?

1. Eaa ta te Au Kite o Iehova e rave ana i te tuatau o te Akamaaraanga?

¹ Akatupu a Iehova i tona akakoroanga ma te maroiroi. No te au akameitakianga o te Patireia o te Atua, te na ko ra a Isaia 9:6 e: “Na te maroiroi o Iehova Sabaota e rave i te reira.” Roto i tana angaanga orometua i te enua nei, kua akaari te Tamaiti a te Atua i tona inangaro maata no te akamorianga mou. (Ioa. 2:13-17; 4:34) Te tuatau Akamaaraanga i te au mataiti, mirioni ua atu taeake i te ao nei e aru ana i te tu maroiroi o Iehova e Iesu na te akamaata atu anga i to ratou taime i te tutu aere. Ko koe ainei tetai?

2. Eaa ta te tu maroiroi ka akakeu ia tatou kia rave i roto ia Mati 7?

² Angaanga Puapinga no te Akamaaraanga: Teia mataiti, ka akamata te akakite aere i te Akamaaraanga a te Maanakai, Mati 7. Parani i teianei kia piri maroiroi atu ki roto i te angaanga orometua. Ka mataora te au taeake i te rave i teia ia ratou e tutu aere ra kia kako te ngai tutuanga. Tauta pakari i te oronga i tetai patianga no taau aronga apii Pipiria, aronga e atoro ana koe, au oa angaanga, kopu tangata, au oa apii, me kore akaari kia ratou i te Web site jw.org.

3. Akapeea tatou i te akamaata atu anga i te taime i te tutu aere i roto ia Mati e Aperira?

³ Painia Tauturu: Ka tauturu katoa te tu maroiroi ia tatou kia akamaata atu i te taime i te tutu aere. Kare e ekoko e maata te ka rauka i te painia tauturu i roto ia Mati e Aperira no te mea e 30 rai ora ka inangaroia. Me rave i ta kotou akamorianga a te ngutuare me kore i taau uaorai apii, e pure ma te akamanako e ka akapeea koe me rave i teia. (Mase. 15:22) Ka riro toou tu maroiroi no teia angaanga puapinga ei akakeu i etai ke kia maroiroi i te rave i teia angaanga. Me akatanotano koe i toou turanga kia maata atu taau ka rave, te aru ra koe i te tu maroiroi o Iesu.​—Mare. 6:31-34.

4. Eaa te akameitakianga ka rauka me aru tatou i te tu maroiroi o Iehova e Iesu?

⁴ Me aru tatou i te tu maroiroi o Iehova e Iesu a te tuatau Akamaaraanga, e akameitakianga maata te ka rauka. Maata atu te tangata ka rauka ia tatou i te tuatua atu. Ka kite tatou i te rekareka e te merengo maata i te tavini ia Iehova e te tauturu i etai ke. (Anga. 20:35) Tei puapinga roa atu, ka akamareka tatou i to tatou Atua maroiroi e tana Tamaiti.