“Kia Akakeuia ra e te Vaerua”
1. Eaa te tu tei riro ei akairo no ta tatou angaanga tutu aere?
1 Eiaa tetai tuanga o ta tatou angaanga Kerititiano kia kore e raveia. Te akamaroiroiia nei ra tatou “kia akakeuia e te vaerua” e kia “tavini ia Iehova.” (Roma 12:11, NW) Inara, e maata te apinga ka akaiti mai to tatou tu toto mapu no ta tatou angaanga orometua. Akapeea tatou me “akaaraara” i to tatou tu toto mapu e te rekareka no ta tatou angaanga Patireia?—2 Timo. 1:6, 7.
2. Eaa te pirianga o te apii Pipiria uaorai ki te angaanga orometua toto mapu?
2 Apii Pipiria Uaorai: Ko te tangata uua i te tutu aere i te Patireia, e tangata inangaro i te ture a te Atua e tei akakeu oonuia e ta te reira tuatua mou. (Sala. 119:97) Me kite tatou i te tuatua mou o te Pipiria i roto i ta tatou uaorai apii, ka akakeuia to tatou ngakau e ka akamaata atu i to tatou toto mapu. Na te aroa no Tei Oronga mai i taua tuatua mou ra, e to tatou inangaro kia akakite i te tuatua meitaki ki etai ke, e akakeu ia tatou kia akapaapaa i te Atua e kia akakite i tona ingoa ki te katoatoa. (Ebe. 13:15) Te taka ua ra e, ko te oronga anga i te tuatua meitaki ma te ngakau tae, te akaata maira te reira i to tatou ngakau rekareka no tona puapinga maata.
3. Akapeea te vaerua o te Atua i te akakeu anga ia tatou i roto i ta tatou angaanga orometua?
3 Pure no te Vaerua o te Atua: Kare te angaanga orometua uua, e oti i to tatou uaorai maroiroi. E rauka ana te tu toto mapu tika tikai na roto i te vaerua o te Atua. (1 Pete. 4:11) Na te akapiri vaitata atu anga ki te Tumu o te “ririnui,” e oronga mai te ngakau toa kia akakitekite aere tatou ma te mataku kore. (Isa. 40:26, 29-31) To Paulo kite anga i te tu ngata i roto i tana angaanga orometua, kua ‘turuia maira aia e te Atua.’ (Anga. 26:21, 22) Ka tauturu te vaerua tapu ririnui o Iehova i te akakeu ia tatou i roto i ta tatou angaanga orometua, no reira e pure no te reira.—Luka 11:9-13.
4. Eaa te au tu meitaki ta te tu toto mapu ka akatupu, inara, eaa te akamatakiteanga ka anoanoia?
4 Ko te tu toto mapu ngakau tae i te tutu aere i te Patireia, ka akamaata roa atu te reira i te maroiroi o te au oa Kerititiano. (2 Kori. 9:2) Roto i te ngai tutuanga, ka ariu mai te tangata ki te karere e orongaia atura ma te rekareka, e te akarongo maata. Inara ko te tu toto mapu, kia tarotai uaia rai te reira ki te tu matakite e te maru. (Tito 3:2) I te au taime pouroa, ka umuumu ua rai tatou kia akangateitei i te tangata ngutuare e tana ka iki.
5. Eaa te ako akauruia ka tauta pakari tatou i te taangaanga?
5 Ei aronga akakite aere i te Patireia ‘kia akakeuia tatou e te vaerua.’ E akatupu tatou i te tu toto mapu na roto i te apii Pipiria uaorai e te pure akatenga kia Iehova, nana e oronga mai i te vaerua tapu ririnui. Na teia mataara, ka rauka ia tatou te rave toto mapu i ta tatou angaanga orometua ‘ma te mana katoa, e te vaerua tapu.’—1 Tesa. 1:5.