Pia Uianga

◼ Eaa te tu o te kakau ka tau me atoro atu i te au ngai e taangaangaia ra no ta Iehova tavinianga?

Takapini i te ao nei, e au ngai takake rava te au Are Uipaanga Patireia, au Are Uipaanga Akaputuputuanga, au kainga Betela, e te au ngai o te manga, tei akatapuia no ta Iehova tavinianga. E au ngai tau, e te ma, e te akono meitakiia, i te akaataanga i te tu akaraanga ngateitei. E aka tuke tikai ki tei kite putuputuia i roto i ta Satani akatereanga o te au mea nei. Te aronga e atoro atura i te au ngai e taangaangaia ra no ta Iehova tavinianga, kia kite katoaia ei aronga no Iehova, e te rave ra i tona anoano.

Ei au Kerititiano, te ‘akakite ua nei ra tatou ia tatou uaorai e e rave angaanga na te Atua’ i roto i te au tu ravarai, kapiti mai to tatou kakau e te akamaneaanga mako meitaki. (2 Kori. 6:3, 4) Te inangaro katoaia ra tatou kia akono tamou i te tu akonoanga tau. I te au taime ravarai kia akaata to tatou kakau e te akamaneaanga i te tu mako e te ngateitei e tau ra i te au tavini o te Atua ko Iehova. E tika tikai teia me atoro atu i te au ngai o te opati maata i New York e pera katoa i te au manga takapini i te ao.

I te uriurianga i te puapinga no te kakau e te akamaneaanga tau, te akakite maira te Akaaereia kia Rave i to Iehova Anoano no runga i te anoano no te tu ma i te pae kopapa, te kakau tau, e te akamaneaanga meitaki, me piri atu tatou ki roto i te angaanga tutu anga e te aere ra ki te au uipaanga Kerititiano. E oti, i te kapi 138, parakarapa 3, te karanga ra te reira e: “Kia maara ra, te aiteanga o te ingoa Betela koia oki te ‘Are o te Atua.’ No reira, kia aite to tatou kakau, te akamanea anga e te tu te inangaroia maira no tatou me aere tatou ki te au uipaanga no te akamorianga i ko i te Are Uipaanga Patireia.” Kia aruia teia turanga teitei e te au papuritia Patireia i te pae mai e atoro atura i te Betela e pera katoa i te aronga mei te au ngai mamao. Na roto i teia tu, te akaari ra te manuiri i te arikianga e te akangateiteianga tau.​—Sala. 29:2.

Kia akataka to tatou kakau ia tatou ei aronga e “akatutu ra i te akangateitei tikai i te Atua.” (1 Timo. 2:10) E akakeuanga meitaki tikai te kakau e te akamaneaanga tau i te tu e akamanako maira etai ke i te akamori mou a Iehova. Inara, kua kitea mai e, i te atoroanga i te au ngai e taangaangaia ra no ta Iehova tavinianga, kua akatutu mai tetai au taeake e te au tuaine i te tu mako kore, tau kore, me kore kua aao mai i te au kakau e akaariari ra i te kopapa. Kare e tau ana te reira tu kakau no te au Kerititiano i tetai ua atu taime. No runga i teia manako, mei te au tuanga pouroa o to tatou oraanga Kerititiano, te inangaro nei tatou i te akono tamou i te au turanga teitei te akatakake ra i te au tangata o te Atua mei te ao, i te raveanga i te au apinga ma te akakaka i te Atua.​—Roma 12:2; 1 Kori. 10:31.

No reira me atoro atu i te au opati maata e te manga o te New York State me kore tetai atu au ngai o te au manga, me kua parani ke ana i te atoro atu me kore te orote ra i roto i te au ngai turoto, e ui koe kia koe uaorai e: ‘Te akaata ra ainei toku kakau e te akamaneaanga i te tu tau, te tu ma, e te tu ngateitei o te ngai ka atoro atu au? Te akaata meitaki ra ainei te reira i te Atua taku e akamori ra? Ka turori ke ia me kore ka manamanata ainei tetai ke i toku tu akaraanga?’ Na to tatou kakau e te akamaneaanga, kia akamanea ua rai tatou i ‘te tuatua a te Atua a to tatou Ora i te au mea katoa’!​—Tito 2:10.