E Puapinga Kia Mako te Kakau e te Akamanea Anga

Tukeke te ikianga no runga i te kakau ka aao e te akamanea anga. Me aru tatou i te au kaveinga Pipiria, ka akamanea tatou kia tau e ka akamareka ia Iehova. Akara ana tatou i teia au kaveinga.

1. Eaa te au kaveinga te ka tauturu ia tatou kia iki i te kakau e te akamanea anga tau?

Ka iki tatou i te “kakau e tau ra, ma te akatietie kore, e te akono meitaki,” e kia mako te akamanea anga tei akaari i te tu “akono i te Atua.” (1 Timoteo 2:9, 10) E akamanako i teia kaveinga e a: (1) Kia “tau” to tatou kakau. Mei taau i kite i te au uipaanga, e tukeke te inangaro o te iti tangata o Iehova, inara kia akaari to tatou akamanea anga kakau e te rauru e te akangateitei ra tatou i te Atua. (2) Akamanea ma te “akatietie kore” tera te aiteanga kare tatou e aao i te kakau akameamea, e kare e akaariari i te kopapa. (3) Ka akaari tatou i te tu “akono meitaki” e kare e aru i te peu akamanea anga kakau tei matauia. (4) Ka akaari to tatou akamanea anga i te tu “akono i te Atua,” e ka kite mai tetai pae e te akamori ra tatou i te Atua mou.​—1 Korinetia 10:31.

2. Akapeea te akamanea anga me akakeu i te au taeake irinaki?

Noatu e tikaanga to tatou kia aao i te kakau ta tatou e inangaro ra, kia akamanako tatou i tetai ke. Ka tauta pakari tatou kare e akariri i tetai, mari ra, ‘e akarekareka tatou i tetai ke, kia meitaki aia e kia maroiroi.’​—E tatau ia Roma 15:1, 2.

3. Akapeea te akamanea anga me akakeu i tetai ki te akamorianga mou?

Ia tatou e akamanea ra ma te tau no te au atianga ravarai, kia matakite tatou i te akamanea anga me aere ki te au uipaanga e te tutu aere. Kare tatou e taruri ke i te manako o tetai mei ta tatou karere puapinga. Mari ra, ka akakeu to tatou akamanea anga i tetai kia āriki i te tuatua mou e ‘kia manea te tuatua a to tatou Ora.’​—Tito 2:10.

KIMI OONU

4. Akaari to tatou akamanea anga i te tu ngateitei kia Iehova

Eaa te tumu maata ka akamanako tatou i to tatou akamanea anga? E tatau ia Salamo 47:2, e oti uriuri i teia au uianga:

• Akapeea to tatou akamanea anga me akaari e te akamanako ra tatou ia Iehova?

• I toou manako e tau ainei kia akamanako tatou i to tatou akamanea anga me aere tatou ki te uipaanga e me rave i te angaanga tutu aere? Eaa ra, e eaa ka kore ei?

5. Me iki i te au ikianga tau kia mako te kakau e te akamanea

Akatangi i te VITIO.

VITIO: “E Rave Anake ïa ma te Akakakā i te Atua” (10:18)

Noatu e kakau oko maata me e oko māmā to tatou, kia mā te reira e kia tau ki te au turanga tei akakoroia. E tatau ia 1 Korinetia 10:24 e 1 Timoteo 2:9, 10. E oti, uriuri i te tumu kare tatou e aao i te au kakau . . .

• mako kore e te tautau.

• pipiri, angiangi, e te akameamea.

Noatu kare te au Kerititiano i raro i te Ture a Mose, te akaari maira te reira i to Iehova manako. E tatau ia Deuteronomi 22:5, e oti uriuri i teia uianga:

• Eaa tatou ka kopae ei i te kakau e te akamanea anga o te au tane ei vaine me kore te au vaine ei tane?

E tatau ia 1 Korinetia 10:​32, 33 e 1 Ioane 2:​15, 16, e oti uriuri i teia au uianga:

• Eaa tatou ka manata ei me ka riro to tatou akamanea anga ei akariri i tetai i te ngai tangata e te putuputuanga?

• Eaa te au tu kakau e te akamanea anga tei matauia i toou ngai?

• I toou manako e tau kore ainei teia au tu kakau no tetai Kerititiano? Eaa ra, e eaa ka kore ei?

APIIANGA

Me rave tatou i te au ikianga meitaki no to tatou akamanea anga, te akangateitei ra tatou ia Iehova e tetai ke.

Uriurianga

• Eaa i puapinga ai kia mako to tatou kakau e te akamanea anga kia Iehova?

• Eaa te au kaveinga te ka tauturu ia tatou kia iki i te akamanea anga tau?

• Akapeea to tatou akamanea anga me akakeu i tetai ki te akamori anga mou?

KIMI KIMI

Akara eaa ta toou au kakau e akakite ra no runga ia koe.

“E Manea Ainei Au?” (Web atikara)

Apii i te tumu kia akamanako na mua, i mua ake ka tātatau ei i toou kopapa.

“Eaa ta te Pipiria e Karanga ra no te au Tātatau?” (Web atikara)

E akamanako i tetai atu au kaveinga te ka arataki i ta tatou iki anga.

“Akakakā ra Ainei Taau Akamanea Anga i te Atua?” (Te Punanga Tiaki, Tepetema 2016)

Akapeea tetai vaine ngakau tae i te akaari anga i te manako tau no te akamanea anga o tetai pae?

“Turoriia Au e te Kakau e te Akamanea Anga” (E Ara!, Titema 22, 2003)