Te Kakau Tau ka Akaari i te Akangateitei i te Atua
1. Akapeea tatou i te akaari anga i te akameitakianga no te uruoaanga tapere e tu mai nei?
1 Kare e roa atu, ka rauka ia tatou te akameitakianga o te riro anga ei manuiri na Iehova i te Uruoaanga Tapere “E Akakaka i te Atua” i te 2003. E akameitaki tatou ia Iehova no tei pati mai ia tatou ki tetai kaikaianga maata roa i te pae vaerua! Kia akaari tatou i te akangateiteianga nona e ta tatou akameitakianga no tana au apinga oronga i te pae vaerua na te tu o ta tatou akakakau anga e te akamanea anga ia tatou uaorai.—Sa. 116:12, 17.
2. No teaa i puapinga ai no tatou kia ma e te mako i te akamaneaanga?
2 Kia Ma e te Mako: E tau kia akaata mai to tatou tu akaraanga i te au turanga o to tatou Atua, ko tei ma e te mako. (1 Kori. 14:33; 2 Kori. 7:1) To tatou kopapa, te rauru, e te maikuku kia ma, e kia mako to tatou akamanea. E mea matau uaia te tu akamaneaanga mako kore i teia tuatau. Inara, no te mea e e akaraanga marikonga kore tetai tangata akatutu teata me kore tetai toa tarekareka rongonui kare ia i te tumu tau no tetai Kerititiano kia akapera. Me ka aru tatou i te au tu peu o te kakau, penei ka ngata i te tangata i te kite i te tuke i rotopu i te aronga e tavini ra i te Atua mou e te aronga kare e tavini ana iaia.—Malaki 3:18.
3. Akapeea tatou i te akapapu anga e kia au to tatou tu akaraanga ki te ako i roto ia 1 Timoteo 2:9, 10, NW?
3 Kakau Tei Tau i te Au Orometua Kerititiano: I te tata anga te apotetoro ko Paulo ki te akaaere Kerititiano ko Timoteo, i akamaroiroi aia “i te au vaine kia rakei ia ratou uaorai i te kakau tau, ma te tu mako e te manako tau, . . . na te tu tei tau i te au vaine ra e akatutu ra i te akangateitei tikai i te Atua, koia oki, na roto i te au angaanga meitaki.” (1 Timo. 2:9, 10, NW) Ei akapapu e te tau ra to tatou kakau ka anoanoia te akamanako meitaki. Kia tau te kakau, kia ma, e te mako—kare e marikonga kore, tatiaeae, me kore titautau.—1 Pe. 3:3.
4, 5. Eaa te au akamatakiteanga ka tau te au vaine e te au tane Kerititiano kia akarongo?
4 I akamatakite katoa mai a Paulo i te akamaata ua atu ei i “te au tu irianga o te rauru e te auro ra me kare te au poe me kare te au kakau oko maata ra.” (1 Timo. 2:9, NW) Ko te tu manako tau i te taangaanga anga i te au apinga akamanea, te akamanea anga o te mata, e te au rakei ke atu e tu pakari ia no te au vaine Kerititiano kia aru.—Maseli 11:2.
5 Ko te ako ta Paulo i tuku ki te au vaine Kerititiano ka tau katoa ei kaveinga ki te au tane Kerititiano. Kia kopae te au tungane i te au tu e akaata maira i te akaaerenga manako o te ao. (1 Ioane 2:16) Ei akaraanga, i tetai au enua e mea inangaroia te kakau karukaru, te kakau maatamaata roa, inara kare teia tu nei e oronga maira i te tu akaraanga tau no tetai orometua o Iehova.
6. No teaa tatou ka akono mou ei i te turanga teitei o to tatou kakau e te akamaneaanga i te aerenga atu ki ko e mei ko mai i te uruoaanga, i te tuatau o te uruoaanga, e te aru anga i te au porokaramu i te au ra tataki tai?
6 Tuatau o te Au Angaanga Akaangaroi: Me tae ki te porokaramu, e tuku ana te maataanga o te au tungane e te au tuaine i te akaraanga meitaki i te pae o te kakau e te akamaneaanga. Kareka ra, te akakite maira te au ripoti e e mako kore te tu o tetai papaki i te aerenga atu e te okinga mai mei te uruoaanga me kore ra me piri atu ki te au angaanga akaangaroi i muri ake i te porokaramu. Tikaanga, ko to tatou tu akaraanga—noatu i te taime o te porokaramu me kore i tetai ua atu taime—ka akakeu i te mataara e manako maira etai ke i to te Atua iti tangata. I te mea te aao ra tatou i te au kati uruoaanga, e tau kia akakakau ua rai ia tatou na te mataara tei tau i te au orometua Kerititiano. Ka putuputu teia i te akakeu i etai ke kia akameitaki mai ia tatou e te tauturu i te oronga i tetai akakiteanga.—1 Kori. 10:31-33.
7. Eaa ta to tatou kakau e te akamaneaanga mako ka akatupu ki etai ke?
7 Mei te tu katakata e akamanea maata atu i te akaraanga o to tatou mata, mei koia rai te kakau e te akamaneaanga mako i te akangateitei anga i ta tatou karere e apai nei e te akaaerenga ta tatou e mono nei. Tetai papaki e akara maira ia tatou i te Uruoaanga Tapere “E Akakaka i te Atua” i teia mataiti penei ka akakeuia kia ui eaa ra tatou i tuke ei penei i te openga ka karanga e: “Ka aru katoa matou ia kotou, no te mea kua rongo matou [e kua kite] e tei ia kotou na te Atua.” (Zeka. 8:23, NW) Kia akaari tataki tai tatou i ta tatou akangateiteianga ia Iehova na roto i to tatou kakau e te akamaneaanga.
[Pia i te kapi 5]
E Oronga i te Tu Akaraanga Ngateitei
▪ I te aerenga atu
▪ I ko i te uruoaanga
▪ I te tuatau o te au angaanga akaangaroi