Kia Tere ki Mua ei Orometua
1 E mareka ana to tatou Metua i te rangi me tere tona au tavini ki mua i te pae vaerua. Te kapiti maira te tereanga ki mua ei orometua pakari e te tukatau no te tuatua meitaki. Kua akamaroiroi a Paulo i te akaaere ko Timoteo kia rave maroiroi uatu rai kia kitea te tupu anga o tona kite. (1 Timo. 4:13-15) Kia tauta uatu rai tatou katoatoa i te akameitaki atu i te tu o ta tatou angaanga orometua, noatu ko tatou tetai au papuritia tukatau.
2 Akanoo Tetai Au Akakoroanga Uaorai: E tere ei ki mua, ka anoanoia te akanoo i tetai au akakoroanga uaorai. Eaa tetai au akakoroanga kia akanoo tatou na tatou uaorai? Penei e tauta tatou kia rauka te tu karape i te taangaanga i ta tatou koke vaerua, te Pipiria. (Ephe. 6:17) Penei ka anoanoia tatou kia akameitaki mai i tetai atu tuanga o te angaanga orometua, mei te tutuanga i te pae mataara, i runga i te terepaoni, me kore i te ngai pitiniti. Penei ka rauka ia tatou te akapuapinga mai te au atoro akaouanga. Tetai akakoroanga puapinga, kia akameitaki mai i to tatou tu kite i te akamata e te raveanga i te au apii Pipiria.
3 Au Tauturuanga: Kua akonoia te au uipaanga putuputuanga, ko te Apii Orometua Teokaratiki e te Uipaanga Tavini Anga tikai, ei tauturu ia tatou kia tere ki mua ei au orometua. Te maata atu te taime ka akapou tatou i te akapapa anga e te tae anga atu ki teia au uipaanga e te taangaanga anga i te au manako tei orongaia mai, ka puapinga maata atu tatou.—2 Kori. 9:6.
4 Ka anoano katoaia tatou i te tauturu atu i tetai e tetai kia tere ki mua. (Mase. 27:17) Na te akarongo meitaki anga ki te orongaanga a tetai ke te angaanga kapiti ra tatou i roto i te angaanga orometua, ka tauturuia tatou kia meitaki atu. Kapiti mai, penei ka akanoo to tatou akaaere apii puka kia rauka tetai tauturuanga no tatou uaorai. E akameitakianga tikai me rauka te tauturuanga a tetai painia tukatau me kore a tetai atu papuritia, kia tukatau atu tatou e kia maata rava atu te mataora i roto i te angaanga orometua! E papuritia ou ainei to roto i ta tatou ngai apii puka? Penei kia manako uatu tatou i te pati iaia kia angaanga kapiti mai kia tatou.
5 Ko te angaanga orometua Kerititiano, te angaanga puapinga rava atu te raveia nei i teia tuatau. Ia tatou e oronga ra kia Iehova ta tatou ‘atinga akameitaki,’ kia oronga tatou uaorai i te mea meitaki rava atu kiaia. (Ebe. 13:15) Me aruaru tatou kia tere ki mua i roto i te angaanga orometua, ka riro tatou ei aronga angaanga “kare e akama anga, e te tika oki i te tua i te tuatua-mou ra.”—2 Timo. 2:15.