Peea me Tereni i te Aronga Ou kia Tutu Aere
1. Mei teaa ra toou manako i te taime mua i piri atu ei koe i te angaanga orometua?
1 Maara ainei ia koe te taime mua i piri atu ei koe ki te angaanga orometua, mei tetai are ki tetai? Kare e kore, kua ru tikai koe. Ia koe e angaanga kapiti ra e toou puapii me kore e tetai papuritia ke atu, kare ekoko e kua mataora koe no tana tauturu. Teianei ra, kua tukatau koe ei orometua, ka rauka ia koe i te tauturu atu i te aronga ou ua kia tutu aere.
2. Eaa ta te au papuritia ou ka anoanoia kia kite?
2 Ka anoanoia te au papuritia ou kia kite e akapeea me akamata i te pukapuka ki te pu ngutuare, te taangaanga i te Pipiria i ko i te ngutupa, te atoro akaou, e kia akamata e te rave i te au apii Pipiria. Kia kite katoa ratou e ka akapeea me tutu aere na roto i te au mataara tukeke, mei te akakitekite i te pae mataara e te atoro anga atu i te tangata i te au ngai pitiniti. Ka rauka ia koe te tauturu ia ratou kia meitaki mai i roto i teia nga mataara, na roto i toou akaraanga e taau au tuatua.
3. Akapeea tatou me tauturu i etai ke na roto i ta tatou akaraanga?
3 Apii na Roto i Toou Akaraanga: Kua akaari a Iesu ki tana au pipi, peea me tutu aere. (Luka 8:1; 1 Pete. 2:21) Me akanoo koe i te angaanga ki tetai papuritia ou ua, akapapa i tetai tuatua akamataanga mama ua, ka rauka i te papuritia i te aru, penei na te taangaanga i tetai akatauanga i roto i tetai puka a tatou. E oti e pati e naau te nga ngutupa mua e rua, kia akarongo te papuritia i taau e tuatua ra. Te aere anga mei tetai are ki tetai, penei e ui koe ki te papuritia i tona manako no runga i te puapinga o taau tuatua akamataanga. Na teia e tauturu iaia kia kite i te puapinga te angaanga atu ki etai ke i roto i te angaanga orometua, e ka ngoie ua iaia te ariki i tetai ua atu manako taau ka akakite i muri ake i tana tuatua.
4. Akapeea tatou me tauturu i tetai papuritia ou i muri ake i te akarongo anga ki tana tuatua?
4 Oronga Atu i te Manako: Kua oronga katoa a Iesu i te au ikuiku anga ki tana au pipi e ka peea me tutu aere. (Mata. 10:5-14) Ka rauka ia koe te tauturu i te papuritia ou na roto i taua tu. Me nona te taime tuatua, akarongo meitaki. I muri ake ka akaruke ei korua i te are, akameitaki atu iaia na roto i te tu papu e te tika, noatu e te kite ra koe ka anoanoia i te akameitaki mai i tetai au ngai o tana tuatua. I mua ake ka oronga atu i te manako, penei e tiaki me kua meitaki mai aia i roto i tera tuanga i ko i te are ka aru mai. Penei te ru ua ra aia. Akamanako katoa e, kare e aiteite ana te kite o te au papuritia katoatoa, e i tetai taime e maata rai te mataara tau i te rave i tetai mea.—1 Kori. 12:4-7.
5. Eaa ta tatou ka tuatua me rave i te takainga mua kia oronga i te au manako?
5 Tetai taime ka pati mai te papuritia ou i toou manako. Me kare ra, e rave koe i te takainga mua i te tauturu iaia. Akapeea me rave i teia na roto i te tu matakite? E ui ua ana tetai au papuritia tukatau, “Ka tika ia koe kia oronga atu au i tetai manako?” me kore, “Eaa toou manako i ta taua i tuatua i ko i tera are?” Penei ka karanga koe, “I toku ou anga ei papuritia, e ngata rai iaku . . . , inara, na teia i tauturu iaku. . . . ” Tetai taime e puapinga i te akara kapiti i te puka Reasoning. Kia kore e akateiaa iaia, e oronga atu i te au manako no runga e tai ua tuanga o tana tuatua.
6. No runga i te angaanga orometua, akapeea me ‘akakina te auri i te auri’?
6 Akakina te Auri i te Auri: Kua akamaroiroi a Paulo ia Timoteo, e orometua tukatau, kia akono ua rai i tana apiianga e kia kitea tona tupuanga. (1 Timo. 4:13, 15) Noatu kua roa te au mataiti mei toou taime mua i roto i te angaanga orometua, eiaa rava koe e akamutu i te akameitaki atu i toou kite. E apii mei te au papuritia taau e angaanga atura, e te aronga katoa kare e tukatau roa ana i roto i te angaanga orometua, e kia viviki te tauturu takinga meitaki i etai atu, te aronga ou tikai, kia riro mai ei au orometua karape no te tuatua meitaki.—Mase. 27:17