Puapinga Tikai Taau Uaorai e ta te Ngutuare Apii Pipiria!
1. Eaa ta te Pupu Akaaere e manako tikai ra no tatou i teia tuatau, e no teaa ra?
1 Mei te anere mataiti mua rai, te manako oonu tikai maira te Pupu Akaaere i te oraanga o te iti tangata o Iehova. (Anga. 15:6, 28) E te vaitataanga mai te tumatetenga maata, e mea puapinga tikai kia rauka i te au papuritia o te Patireia tetai pirianga ngaueue kore kia Iehova. Ka akapeea koe i te taangaanga anga i te taime tei akanooia i mua ana no te Apii Puka a te Putuputuanga? Te akamaroiroiia nei te katoatoa kia taangaanga i teia taime no te akamorianga a te ngutuare. Te taangaanga meitaki anga i teia taime ka akatika te reira ia tatou kia apii meitaki tikai i te Tuatua akauruia a te Atua, e kia puapingaia tatou mei ta te reira apiianga.—Sala. 1:1-3; Roma 11:33, 34.
2. Akapeea ta tatou uaorai akamorianga a te ngutuare i te aiai me akanooia?
2 Akamorianga a te Ngutuare i te Aiai: Te akamaroiroiia maira te au upoko o te ngutuare kia akono ratou i ta ratou apainga i mua ia Iehova, kia akapapu e te rave putuputu ra ratou i tetai porokaramu puapinga no te Apii Pipiria a te ngutuare. (Deu. 6:6, 7) Te au taeake e te au tuaine kare i akaipoipo ake e kare a ratou apainga i roto i te ngutuare, ka rauka ia ratou te taangaanga i teia taime no ta ratou uaorai apii Pipiria e te kimikimianga. E puapinga tikai no tatou katoatoa kia “taporoporo marie i te tuatau” no te apiianga e te akamanako oonu anga kia akono tamou i te maroiroi i te pae vaerua te anoanoia ra i teia “tuatau kino.”—Ephe. 5:15, 16.
3, 4. Eaa te au tuatua tei akakiteia mai no runga i te apinga ta tatou ka apii, e na te akamanakoanga i teaa?
3 Te Apinga ka Apiiia: Ka rauka i te Watch Tower Publications Index me kore te Watchtower Library i runga i te CD-ROM i te tauturu ia koe i te kimikimi i tetai au manako te ka tauturu i toou ngutuare kia mataora i te au tuatau o ta kotou au apii Pipiria. Penei ka akara mai te au ngutuare i te au atikara i roto i Te Punanga Tiaki, mei te au atikara matauia “Au Taviri kia Mataora te Pamiri,” “Apii i Taau Tamariki,” e te au atikara “No ta Tatou Au Mapu.” Pera katoa, tei roto i te makatini E Ara! te au papaanga no te au atikara e “Ui te Au Mapu e,” e te au atikara umere no runga i te au mea angaia.
4 Na te tatauanga i te Pipiria ma te kore e rapurapu, ka tauturuia te katoatoa i roto i te ngutuare kia maara e kia taangaanga i te au kaveinga a te Atua i roto i to ratou oraanga. (Ebe. 4:12) I tetai atu au atianga, penei ka akara koe e ka uriuri i tetai o te au vitio ta te akaaerenga i nenei. E maata te au atianga no te akanoonoo meitakianga e te ikianga e eaa te ka apiiia e akapeea te apiianga i te reira. E pati atu ki te au mema o toou ngutuare e eaa ta ratou ka inangaro i te apii?
5. Eaa ra ei mea puapinga tikai taau uaorai e ta te ngutuare apii Pipiria i roto i to tatou oraanga i teianei?
5 Puapinga Tikai i Teianei: Na te akaketaketaanga i to tatou pirianga kia Iehova ka akapapa te reira ia tatou kia “noo ua, e akara i te ora a Iehova.” (Exo. 14:13) Te anoano ra te au metua i te aratakianga a te Atua no te utuutuanga i ta ratou tamariki “i rotopu i te uki piko e te māro.” (Phili. 2:15) Te anoano ra te tamariki i te tauturu kia autu meitaki ratou i te au tu tau kore i roto i te au apii i teia tuatau. (Mase. 22:3, 6) E mea meitaki no nga tokorua kia akaketaketa raua i “te taura e toru enui” ma Iehova. (Kohe. 4:12) No reira, kia taangaanga meitaki tatou i teia taime e toe nei kia akamaroiroi tatou i to tatou uaorai “akarongo tapu maata”!—Iuda 20.