Ka Rauka Ainei ia Koe i te Taui i Taau Papaanga?
1. Eaa tatou ka taui ei i ta tatou papaanga no te tutu anga?
1 Ei au Kerititiano mou, kua ariki tatou i te patianga kia riro mai ei “ravakai tangata.” (Mata. 4:19) Mei te au tangata ravakai tikai, i te akaraanga ka meitaki atu ta tatou au tupuanga i roto i te angaanga no te ravakai tangata me akapapa tatou i te tuatau kia tutu aere i te taime me kiteaia mai te au tangata. E puapinga tika teia i te au marama no te angaanga takake. I te avatea roa e i te aiai avatea, tei te kainga te maata anga o te au tangata. E maata te taime, te akangaroi ra ratou e penei ka akakeu maataia kia ariki mai i te aronga e atoro atura. Ka rauka ainei ia koe i te taui i taau papaanga kia tutu aere i taua au tuatau?—1 Kori. 9:23.
2. Eaa tetai au mataara e rauka ai ia tatou i te itae maata atu i te au tangata ma te tuatua meitaki?
2 Akakitekiteanga i te Aiai: Te paranianga i mua atu ana kia tutu aere i te au ora i te aiai penei ka rauka ia tatou i te itae maata atu i te au tangata ma te tuatua meitaki. (Maseli 21:5) Penei ka rauka i te au mapu i te tutu aere i muri ake i te apii. Penei ko tetai pae ka rauka ia ratou i te rave i te reira i muri ake i te angaanga. Ka rauka i tetai au pupu no te apii puka i te akanoo kia tutu aere e tai ora i mua ake i te apii i te au epetoma.
3. Na roto i teea au mataara e rauka ai ia koe i te tutu aere i te au ora i te aiai roa e te aiai avatea i roto i taau ngai e angaanga ana?
3 Te tutu anga mei tetai are ki tetai are i te aiai roa e i te au ora i te aiai avatea penei ka akatupu i te tuatua atu anga ki te aronga tei matauia e kare i te kainga. I roto i te au ngai angaangaia e manganui, te angaanga i runga i te mataara e tetai atu au tu akakitekite aere anga i te ngai tangata ka rauka katoa i te raveia i te aiai. E manganui tei kite e e taime meitaki te aiai i te rave i te au atoro akaouanga e i te akamata i te au apii Pipiria.
4. Eaa i puapinga ai kia akaari i te akara meitakianga e kia akamanako me te piri atura ki roto i te akakitekiteanga i te aiai?
4 Umuumuia te Kite Pakari: Te umuumuia ra te akava meitaki me te piri atura ki roto i te tutu anga i te aiai. Tei matauia, e mea meitaki atu i te kotinga i te akakitekite aere anga i te au ora i te aiai avatea, auraka e aere atu me te akapapa ra te au tangata ngutuare i te akangaroi no te po. (Philipi 4:5) Me topapa koe i te ngutupa, e tu i te ngai ka kiteaia mai koe, e akataka meitaki atu e koai koe. Kia viviki i te akakite atu i te akakoroanga o taau atoroanga. Me aere atu koe i tetai ora kare e tau ana, mei tera e te kaikai ra te ngutuare tangata, e pati kia oki akaou mai a tetai taime ke. Kia akamanako ua rai tatou.—Mata. 7:12.
5. Akapeea tatou i te kopae anga i te au kino te ka tupu mai ia tatou e tutu aere ra?
5 Ka inangaro katoaia tatou kia matakite i te au kino ka tupu mai. Me te akakitekite aere ra koe i te taime e akapoiri atura me kore kua poiri, e mea pakari kia aere taki rua me kore ei pupu. E noo ua ki runga i te au mataara e marama meitaki te ai e kare koe e akatakakeia. E tutu aere ua i te au ngai e kite mai koe e ka meitaki ua koe. Kopae i te au ngai penei e kare e meitaki roa ana i te po.—Maseli 22:3.
6. Eaa tetai atu au akameitakianga te ka aere mai mei te akakitekiteanga i te avatea roa me kore te aiai avatea?
6 Penei te akakitekiteanga i te avatea roa me kore te aiai avatea te akatika ra ia tatou kia angaanga i roto i tavinianga ma te au painia tauturu e te au painia tamou. (Roma 1:12) Ka rauka ainei ia koe i te taui i taau papaanga kia piri atu ki roto i teia tutu angaanga no te tavinianga?