Paruru Anga i Toou Manako

1. Eaa te tumu manako maata o te akaputuputuanga kotinga o te mataiti tavinianga 2013, e eaa te akakoroanga no teia porokaramu?

¹ Kua apii a Iesu i tana au pipi kia aroa atu ia Iehova ma to ratou ngakau, vaerua e te manako katoa. (Mata. 22:37, 38) Kua akapapaia te au porokaramu o te au uruoaanga e te au akaputuputuanga kotinga ei tauturu i te akaketaketa ia tatou uaorai. Kia akamaara e ko te tumu manako maata o ta tatou uruoaanga tapere, ko te “Paruru i Toou Ngakau!” Ko te tumu manako maata o te porokaramu o te ra akaputuputuanga takake no te mataiti tavinianga 2013 ko te “Paruru Anga i Toou Akava Ngakau.” E ka akaari mai te au akaputuputuanga kotinga te ka akamata i te marama ka aru mai i te tumu manako maata kia “Paruru Anga i Toou Manako,” tei akatumuia ki runga ia Mataio 22:37. Kua akapapaia teia porokaramu ei tauturu ia tatou tataki tai kia akara meitaki i to tatou au manako no te akamareka atu anga ia Iehova.

2. Eaa te au pauanga ki te au uianga ta tatou ka akara i te tuatau o te porokaramu?

² Te ka Uriuriia Mai: Ia tatou e akarongo ra ki te akaputuputuanga kotinga, kia akara i te au pauanga no teia au uianga e oronga maira i te au tumu manako:

• Akapeea tatou me kopae i te ‘manako tangata’?

• Akapeea tatou me kiriti i te arai tei akapoiri i te manako o te au tangata arongo kore?

• Eaa te tu manako ta tatou e inangaro ra?

• Eaa te au mea puapinga ka rauka mai ia tatou me akamanako oonu tatou?

• Akapeea tatou me tuku ia Iehova kia akatikatika mai i to tatou manako?

• Akapeea te au tane, au vaine, au metua, e te tamariki e akatupu i te mataora i roto i te pamiri?

• Akapeea tatou e papa ai no te ra o Iehova?

• Eaa te aiteanga e kia akapapa tatou i to tatou manako no te angaanga?

• Eaa te puapinga ka rauka mai i te aronga te taangaanga ra i ta ratou i apii mai?

3. Eaa ra i puapinga ai kia tae tatou ki te nga ra o te akaputuputuanga kotinga, kia akarongo meitaki e kia taangaanga i ta tatou i kite mai?

³ Te tauta pakari ra a Satani i te takino i to tatou manako. (2 Kori. 11:3) No reira kia paruru e kia akatere meitaki tatou i to tatou manako. Kia akaari ua rai i te tu manako o Karaiti e kia patoi pakari atu i te au akakeuanga o teia ao kino. (1 Kori. 2:16) E kia akapapa tatou kia tae atu ki te nga ra o te akaputuputuanga kotinga e kia akarongo meitaki. Ka riro te taangaanga anga i te au manako e orongaia maira ei tauturu ia tatou kia akapapa i to tatou manako no te tutu maroiroi anga i te Patireia.​—1 Pete. 1:13.