Akamaroiroi Anga Pae Vaerua e Toru Ra
1. Eaa ta tatou ka tapapa atu kia rauka mai mei teia uruoaanga tapere?
1 I roto i teia enua kino pae vaerua o te ao o Satani, te akamaroiroi nei rai a Iehova i tona au tavini. (Isa. 58:11) E tai apinga ta Iehova e taangaanga ana ei akamaroiroi ia tatou, ko te uruoaanga tapere i te mataiti. E vaitata maira te uruoaanga no teia mataiti, akapeea tatou me akapapa kia rauka mai e kia oronga atu i te akamaroiroianga pae vaerua?—Mase. 21:5.
2. Eaa te au akapapaanga ta tatou ka rave?
2 Me kare koe i rave ake i te reira, e akapapa i teianei taau uaorai papaanga e te angaanga moni kia rauka ia koe i te aere atu ki te uruoaanga e toru ra. Kua tare ainei koe i te ora ka aere koe ki te uruoaanga i te ra tataki tai kia tae vave koe e kia rauka tetai nooanga noou i mua ake ka akamata ai te porokaramu? Ka inangaro tatou kia rauka mai te au kaikai pae vaerua akamaroiroi anga ta Iehova i akapapa no tatou! (Isa. 65:13, 14) Kua oti ainei ia koe i te akanoo i toou ngai nooanga e te apinga akaoro?
3. Eaa te au manako te ka tauturu ia tatou e to tatou pamiri kia puapingaia tikai mei te porokaramu?
3 Eaa te ka tauturu ia koe kia mou toou manako i te tuatau o te porokaramu? Me ka rauka, kia maata te akangaroi i te au po i te tuatau o te uruoaanga. Akara ki te vaa tuatua. Akara i te au irava i roto i taau Pipiria. Tata poto i te au manako. Meitaki no te au pamiri kia noo kapiti kia rauka i te au metua i te tauturu i ta ratou tamariki kia akarongo meitaki. (Mase. 29:15) Penei ka uriuri kapiti kotou i te au manako maata o te porokaramu i te au aiai ei pamiri. Ei akamaroiroianga i toou pamiri i muri ake i te uruoaanga, taangaanga i tetai tuatau o ta kotou Akamorianga a te Ngutuare i te aiai kia uriuri i te au manako tikai ei taangaanga anga na toou pamiri.
4. Akapeea tatou me tauturu i tetai ke i roto i ta tatou putuputuanga kia akamaroiroiia i te pae vaerua?
4 Tauturu i Tetai kia Akamaroiroiia: Ka inangaro tatou i tetai ke kia akamaroiroi katoaia. E au papuritia pakarikari ainei tetai me kore e aronga ke i roto i te putuputuanga te anoano ra i te tauturu kia tae ki te uruoaanga? Ka rauka ainei ia koe i te tauturu ia ratou? (1 Ioa. 3:17, 18) E akapapu te aronga pakari, te pupu akaaere tikai, kia tauturuia te au papuritia.
5. Akapeea tatou me tua aere i te au patianga i te uruoaanga? (Akara katoa i te pia i runga akenei.)
5 I te au tuatau i topa, e toru epetoma i mua ake ka akamata ai ta tatou uruoaanga, ka piri atu tatou ki roto i tetai kamupeini i te pati i etai ke kia aere mai. E akanoo te au putuputuanga i tetai akakoroanga kia tua atu i te au patianga pouroa e kia angaanga atu i te au ngai tutu anga ravarai. Me ka toe mai tetai au patianga a toou pamiri i te openga o te kamupeini, apai mai te reira ki te uruoaanga ei taangaanga naau me rave i te akakitekite ua anga. Ka orongaia atu tetai akakiteanga no runga i teia i te tuatau o te porokaramu i te Varaire. Me e au patianga tetai kare toou pamiri e taangaanga i roto i te oire o te uruoaanga, e oronga atu i te reira ki tetai tavini tauturu me aere atu koe ki te ngai o te uruoaanga. E akono e tai kopi naau uaorai, ine, no te mea ka anoano koe i te akara akaou i te reira i te tuatau o te akoanga openga i te Tapati.
6. Na roto i teea au mataara ka rauka ia tatou i te akaari i te au tu meitaki i ko i te uruoaanga?
6 E Akamaroiroianga te Tu Meitaki: I te tuatau e maata te tangata i te “akaperepere ia ratou uaorai” e kare e manako atu ana i te manako o tetai ke, e akamaroiroianga tikai i te piri atu ki te au taeake Kerititiano tei tauta pakari i te akaari i te tu meitaki! (2 Timo. 3:2) Te akaari ra tatou i te tu meitaki i te tomo anga ki roto i te uruoaanga ma te tu maru e te tau ua me ngaa te ngutupa i te ora 8:00 i te popongi e te tapaoanga i te au nooanga no te aronga e tai o kotou are e noo ra me kore tei aru mai ia koe i runga i toou apinga akaoro me kore ta tatou au tangata apii Pipiria. Ka aru tatou i te aratakianga a te tiamana me pati mai aia ia tatou kia noo i to tatou nooanga i te akarongo ki te akatangianga imene ei akamataanga i te porokaramu tataki tai. E tu meitaki i te tamate i ta tatou terepaoni apaipai me kore pager kia kore e tamanamanata i tetai ke i te tuatau o te porokaramu. E akaari katoa tatou i te tu meitaki na te kore anga e tuatua, tuku karere, kaikai, me kore ori aere anga i te tuatau o te porokaramu.
7. Akapeea e rauka mai ei ia tatou e te oronga anga i te akamaroiroianga ia tatou e kapiti ra ki to tatou au taeake?
7 Kapitianga Akamaroiroi: Te oronga maira te au uruoaanga i te au atianga kia mataora tatou i te taokotaianga akamaroiroianga Kerititiano o te au taeake. (Sala. 133:1-3) Eaa ka kore ei e rave na mua i te ‘akamaora’ atu e te aravei atu i te au taeake e te au tuaine tei tae mai mei tetai au putuputuanga ke? (2 Kori. 6:13) E akariro ei akakoroanga naau kia kite meitaki i tetai tangata ou me kore i tetai pamiri ou i te au ra. E atianga meitaki te kaikaianga i te tuaero no te rave i teia. No reira e apai mai i tetai manga kai e kia kaikai mataora e te kapitianga ki tetai ke i reira, kia kore e oko mai i tetai kai me kore e kaikai atu i te ngai kaikaianga i te pae mai. Ka taki atu teia ki tetai akameitakianga no tetai au pirianga oa ou e te mutu kore.
8. Eaa tatou ka tauturu ei i te angaanga i ko i te uruoaanga, e akapeea tatou me rave i teia?
8 E akamaroiroianga tikai i te angaanga kapiti ki to tatou au oa akamori i roto i te angaanga tapu. Ka rauka ainei ia koe i te tauturu atu i roto i tetai tipatimani me kore i taau putuputuanga no te rave anga i te tama? (Sala. 110:3) Me kare aau tuanga angaanga, e aravei atu i te Tipatimani o te Angaanga Tauturu i ko i te uruoaanga. Me maata te aronga tauturu ka mataora e ka mama te angaanga.
9. Eaa tatou ka akamanako ei i to tatou tu e te akaraanga i te tuatau o te uruoaanga?
9 Ka Akamaroiroi to Tatou Tu i te Aronga Akarakara: E pupu tangata tatou tei aere atu ki te uruoaanga e toru ra, kare no te tuatau ua o te porokaramu. Kia kite mai te aronga e akara maira ia tatou i roto i te oire o te uruoaanga, i te tuke i rotopu ia tatou e te aronga kare i te Au Kite. (1 Pete. 2:12) Kia riro to tatou kakau e te akamanea anga i te ngai o te uruoaanga, te ngai e noo ana tatou, e te ngai kaikaianga ei akangateiteianga ia Iehova. (1 Timo. 2:9, 10) Me tamou tatou i to tatou kati uruoaanga, ka kite mai te aronga e akara maira e e Au Kite tatou no Iehova. E ka oronga mai i tetai atianga no tatou kia akakite atu no runga i ta tatou uruoaanga e kia rave atu i tetai akakitekite anga.
10. Akapeea tatou me akapapu e te manako meitaki maira te aronga angaanga o te motera e te ngai kaikaianga i ta tatou uruoaanga?
10 Akapeea tatou me taokotai atu ki te aronga angaanga o te otera e te ngai kaikaianga? Auraka tatou e tapao kia maata atu te au pia moe i ta tatou ka taangaanga, no te mea kare e rauka tetai au pia moe no te au taeake, e kare te pitiniti o te motera e puapingaia. Me te maata ra te angaanga i roto i te motera i te tuatau e aere maira tatou ki roto me kore e akaatea ra, e akaari tatou i te tu akakoromaki e te tu meitaki.—Kolo. 4:6.
11. Eaa te au tupuanga tei riro ei akakitekite anga meitaki no to tatou tu Kerititiano?
11 Eaa te manako o te aronga e akara maira i to tatou tu meitaki i te tuatau o te uruoaanga? Te akakite ra tetai atikara o te nuti pepa e kua tuatua te manitia o tetai ngai tei taangaangaia no te uruoaanga e: “E tu meitaki tikai to te au tangata. E mataora ana matou me aere mai ratou i te au mataiti.” I te mataiti i topa kua ngaro te kiri moni a tetai tangata kare i te Kite i ko i te otera tei reira te au taeake o te uruoaanga. Te akaokiia mai anga te kiri moni ki te manitia o te otera e te au mea ravarai i roto, kua akakite te manitia ki te tangata nana te kiri moni e: “E meitaki tikai e kua aere mai te Au Kite o Iehova ki ta ratou uruoaanga i te pae mai, e kua ki te otera ia ratou. Naringa kare, kare e akaokiia mai taau kiri moni.”
12. E vaitata maira te uruoaanga, eaa ta tatou akakoroanga, e no teaa ra?
12 Te vaitata maira te uruoaanga o teia mataiti. Maata te taime e te maroiroi i te akanooanga i te porokaramu e te uruoaanga kia riro ei akamaroiroianga. E tauta kia tae mai koe ki te au ra e toru, e kia akapapa no ta Iehova e ta tona akaaerenga i akanoo noou. Akamaroiroi i tetai ke na roto i toou tu mako, te kapitianga mataora e te tu meitaki. Ka kite mai koe e tetai ke mei ta tetai taeake i tata i te mataiti i topa e: “Kare rava aku tupuanga mataora tikai i kite mai ana!”
[Tataanga i te kapi 4]
I te au tuatau i topa, e toru epetoma i mua ake ka akamata ai ta tatou uruoaanga, ka piri atu tatou ki roto i tetai kamupeini i te pati i etai ke kia aere mai
[Tataanga i te kapi 6]
Kia riro to tatou kakau e te akamanea anga i te ngai o te uruoaanga, te ngai e noo ana tatou, e te ngai kaikaianga ei akangateiteianga ia Iehova
[Tataanga i te kapi 7]
Akamaroiroi i tetai ke na roto i toou tu mako, kapitianga mataora e te tu meitaki
[Pia i te kapi 4-7]
Au Akamaara Anga no te Uruoaanga Tapere 2011
◼ Au Ora no te Porokaramu: Ka akamata te porokaramu i te ora 9:20 i te popongi i te au ra katoatoa e toru. Ka ngaa te ngutupa i te ora 8:00 i te popongi. Me akakiteia mai e ka akamata te akatangi imene, kia noo pouroa tatou ki to tatou au nooanga kia akamata te porokaramu i roto i te tu tau. Ka oti mai te porokaramu i te ora 4:55 i te aiai Varaire e te aiai Maanakai, e i te ora 3:40 i te aiai Tapati.
◼ Paka Anga: I roto i te ngai uruoaanga kare e tutakiia ana te ngai paka anga e akatereia ra e tatou, ko te aronga mua ka tae mai ka peke ia ratou te reira ngai. Ko te aronga ua e Kati Tikaanga no te Paka Anga to ratou te ka akatikaia kia paka i te ngai tapaoia no te aronga pakipakitai. I te mea e kare e maata ana te ngai paka anga, e tauta kia na roto mai e tai ua motoka.
◼ Tapaoanga i te Au Nooanga: Ka rauka te au nooanga i te tapao no te aronga ua e tai o kotou are e noo ra me kore tei aru mai ia koe i runga i toou apinga akaoro me kore ta tatou aronga apii Pipiria.—1 Kori. 13:5.
◼ Kaikaianga Avatea: E apai mai i tetai kai ine, eiaa e akaruke i te ngai uruoaanga kia tiki atu i tetai kai i te ora kaikai i te avatea. E apai mai i tetai pia akaanu meangiti kia rauka i te tauru ki raro ake i toou nooanga. Kare e akatikaia te au pia akaanu mamaata, te au kakapu io i roto i te ngai uruoaanga.
◼ Moni Tauturu: Ka rauka ia tatou i te akaari i to tatou ariki rekareka i te au akanoonooanga no te uruoaanga na te oronga ua anga i te au moni tauturu ki te angaanga i te ao katoa i ko i te uruoaanga. Tetai au tieki kia tataia ki te “Christian Congregation of Jehovah’s Witnesses.”
◼ Au Tupuanga Kino e te Au Manamanata Tupu Poitirere Ua: Me tupu ake tetai manamanata tupu poitirere ua i te pae rapakau i te ngai o te uruoaanga, e aravei atu i te tavini tauturu vaitata ua mai kia koe ine, e nana e akakite viviki atu ki te Tipatimani Tauturu Rapakauanga kia rauka i to tatou tangata tauturu tukatau i te akara i te tu kino o te turanga e kia oronga atu i te tauturu. Me ka umuumuia, e ringi atu ratou i te Numero 111 o Nu Tireni, me kore te Numero 998 o Rarotonga. Kare i reira e maata te ringi anga i te ngai tauturu viviki.
◼ Au Ua Vairakau: Me ka anoano koe i tetai ua no ko mai i te taote, akapapu kia apai mai i te reira kia rava noou, no te mea kare e rauka mai te reira i te ngai o te uruoaanga.
◼ Tamaka: I te au mataiti ravarai e tupu ana te kino no te tamaka. E meitaki atu i te tauru i te tamaka tau e te tano meitaki te ka rauka i tetai i te aere meitaki ua i runga i te ngai kake anga, te au auri vaavaarua, e te vai atura.
◼ Kare e Akarongo Meitaki Ana: I ko i te au uruoaanga i Nu Tireni ka akakitekiteia atu te porokaramu i roto i te otitoriomu na runga i te ratio FM. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Au Pereoo e te Au Nooanga Atuatu: Auraka e apai mai i te au pereoo pepe e te au nooanga atuatu ki roto i te ngai uruoaanga. Inara, ka arikiia te au nooanga pepe me ka akanoo meitakiia ki te pae i te nga metua.
◼ Akari Pipi: Te maataanga o te au uruoaanga e raveia ana i roto i te au ngai topiriia e au matini akaangiangi matangi tetai. No reira, e mea meitaki kia kore tatou e pipi maata i te au akari pipi e pakari te aunga, te ka akatupu i te kino ki te aronga kare e meitaki i te akaea me kore tetai au manamanata mei te reira.—1 Kori. 10:24.
◼ Au Pepa Follow-Up (S-43): Kia taangaangaia te pepa Please Follow Up i te akakite mai no runga i tetai tei akaari mai i te inangaro no ta tatou akakitekite anga atu i te tuatau o te uruoaanga. Ka tau te au papuritia kia apai mai e tai me kore e rua pepa follow-up ki te uruoaanga. Kia tuku atu i te au pepa akaki meitakiia ki ko i te Pia Vairanga Puka kia akonoia te reira me kore ki te tekeretere o toou putuputuanga me oki atu koe.—Akara i Ta Tatou Angaanga Patireia o Noema 2009, kapi 4.
◼ Au Are Kaikaianga: E akariro i toou tu meitaki i ko i te au are kaikaianga ei akangateitei i te ingoa o Iehova.
◼ Au Motera:
(1) Auraka e tapao i te au ngai nooanga me kare e anoanoia, e auraka kia tere atu te au tangata e akatikaia ra i te noo i roto i toou ngai nooanga.
(2) Auraka e takore atu i taau tapaoanga, kareka ra me tupu poitirere mai tetai mea, kia akakite viviki atu ki te aronga o te motera.—Mata. 5:37.
(3) E apai i te pereoo tari kiri kakau me kua papa tikai koe i te taangaanga i te reira e oti kia akaoki viviki atu koe i te reira kia rauka i tetai ke i te taangaanga atu.
(4) Auraka e tunu kai i roto i te au pia kare e akatikaia.
(5) Kare roa tatou e inangaro i te rave maata mai i te kai oronga uaia mai i te popongi, te kaope, te au aiti te vaira na te au manuiri ei kai, ia ratou i ko i te motera.
(6) Akaari i te au ua o te vaerua i te akono anga i te aronga angaanga o te motera i te au atianga ravarai. Te akono ra ratou i te au manuiri e manganui e te ariki rekareka maira i to tatou tu takinga meitaki, te akakoromaki, e te manako tau.
◼ Angaanga Tauturu: Ka maata rava atu to tatou mataora ka rauka mai mei te tae anga ki te uruoaanga, me tauturu atu tatou i te angaanga tei anoanoia i te rave. (Anga. 20:35) Tetai ua atu tei inangaro i te rave i te reira, kia ripoti atu ki te Tipatimani o te Angaanga Tauturu i ko i te uruoaanga. Ka rauka rai te au tamariki i raro ake i te 16 mataiti kia tauturu na te angaanga anga i raro ake i te akaaereanga a tetai metua me kore a tetai tangata tiaki me kore a tetai atu tangata mamaata tei arikiia e tetai metua me kore e tetai tangata tiaki.
[Pia i te kapi 5]
Akapeea Tatou me Oronga i te Patianga?
Kia kapi meitaki ta tatou ngai tutu anga, kia poto ua te tuatua. Penei ka tuatua tatou mei teia rai e: “Kia orana. Te piri nei matou ki roto i tetai angaanga i te ao katoa i te tua aere i teia patianga. Naau teia kopi. Ka kite atu koe i te au akakiteanga i roto i teia patianga.” E akakeuanga manea tikai a mua i te kapi o te patianga, no reira e oronga i te reira ki te tangata ngutuare kia kite mai aia i te reira. E kia maoraora. Me piri atu ki te tua aere anga i te au openga epetoma, kia oronga katoa atu i te au makatini me ka tau.