Ta Tatou au Uruoaanga Tapere—Akakite Anga Ririnui no te Tuatua Mou
1. Te oronga maira te au oroa i te atianga ki te ngati Iseraela kia akamanako e kia uriuri i teea au tuatua mou puapinga?
1 E taokotai putuputu ana te ngati Iseraela i taito e toru taime i te mataiti no te au oroa. Noatu e ko te au tane ua te umuumuia ra kia tae, maata anga o te taime e aere ana te pamiri katoa ki Ierusalema kia rekareka i teia au uruoaanga mataora. (Deu. 16:15, 16) Kua oronga mai taua au tupuanga i te atianga kia akamanako oonu e kia uriuri i te au tuatua mou puapinga. Eaa ra tetai o teia au tuatua mou? E tai, no runga i Tei Oronga aroa ua mai, ko Iehova. (Deu. 15:4, 5) Tetai mai, ka rauka i te irinaki iaia no te aratakianga e te paruruanga. (Deu. 32:9, 10) Ka rauka katoa i te ngati Iseraela kia akamanako e e au tangata ratou no to Iehova ingoa, e te umuumuia ra ratou kia akaari meitaki i tona au tu tuatua tika. (Deu. 7:6, 11) Te puapinga katoaia nei tatou i teia tuatau mei ta tatou au uruoaanga tapere o te mataiti.
2. Akapeea te porokaramu o te uruoaanga tapere te akamarama mai anga i te tuatua mou?
2 Te Akamarama Maira te Porokaramu i te Tuatua Mou: I ko i ta tatou au uruoaanga tapere, e mataora ana tatou i te akarongo ki te au akoanga, nuku, au akatutuanga, e te au uiuianga, te akamarama maira i te tuatua mou puapinga o te Pipiria. (Ioa. 17:17) Maata te au angaanga tei raveia no te akapapa anga i te au uruoaanga e vaitata maira. Te akapapa ra te akaaereanga o Iehova i tetai porokaramu tei tau meitaki ki te au anoano o teia tuatau no te ngai tutuanga i te ao katoa. (Mata. 24:45-47) Te tapapa ra ainei koe kia kite e kia akarongo atu i te ka orongaia mai?
3. Eaa ta tatou ka rave kia puapingaia mei te porokaramu?
3 E tika, ka puapingaia tatou me tae atu e me akarongo meitaki ki te porokaramu no te au ra e toru. Me kare koe i akapapa ake no te reira, e pati ki toou pu kia oronga mai i tetai nga ra va mei te angaanga. Akapapu e kia rava te akangaroianga i te au po kia oraora koe i te tuatau o te porokaramu. Maata tei kite mai e me akara ua ratou ki te vaa tuatua e te tata anga i te au manako, ka tauturu ia ratou kia akarongo meitaki. Auraka e tuku i taau terepaoni apaipai me kore te pager kia tamanamanata ia koe e tetai ke. Auraka e tuatua, tuku karere, kaikai, me kore e inu vai i te tuatau o te porokaramu.
4. Akapeea te au metua me tauturu i ta ratou tamariki kia puapingaia i te tuatau o te uruoaanga?
4 I te au mataiti o te Sabati, me akaputuputu mai te au pamiri o te ngati Iseraela kia akarongo ki te Ture e tatauia ra i te tuatau o te Oroa Patia Anga Puakapa, tei reira katoa ta ratou “tamariki” kia rauka ia ratou ‘te akarongo, e te apii.’ (Deu. 31:12) E akamaroiroi anga tikai i te kite atu i te au pamiri e noo kapiti ra i te tuatau o te uruoaanga e te au tamariki e ara ua ra e e akarongo meitaki ra! I te au aiai, e akara akaou i taau i tata ana e kia uriuri kapiti i te au manako o te porokaramu taau e reka ra. “Kua mou rava te neneva ki roto i te ngakau o te tamariki,” no reira kia akara meitaki te au metua i ta ratou tamariki, pera katoa te au tamariki mapu, i te tuatau kaikai anga e i te ngai o te motera, kia kore e “akaruke takiriia” ratou.—Mase. 22:15; 29:15.
5. Akapeea to tatou tu meitaki te akakaka anga i te tuatua mou ia tatou i ko i te otera?
5 Ka Akakaka te tu Meitaki i te Tuatua Mou: Ka riro to tatou tu meitaki i roto i te oire o te uruoaanga ei akakaka anga i te tuatua mou. (Tito 2:10) E kite ana te aronga angaanga motera me aru tetai pupu tangata i te au ture a te motera e te akaari anga i te tu akakoromaki e te tu meitaki ki te aronga angaanga. (Kolo. 4:6) Te rave anga te au komono o te opati manga i tetai akanoonooanga ki tetai akaaere o te otera i te mataiti i topa akenei, kua akakite mai aia e: “Te inangaro nei matou i to kotou au tangata kia aere mai ki to matou otera no te mea e aronga meitaki ratou. E aronga mako ratou e te meitaki, e e akaari ua ana ratou i te tu akangateitei ki to matou aronga angaanga e te akono meitaki i to matou ngai.”
6. Akapeea tatou me akakaka i te tuatua mou na roto i to tatou tu akamanea anga i roto i te oire o te uruoaanga?
6 Me aao tatou i to tatou kati uruoaanga, ka riro teia ei akakitekite anga i te uruoaanga e te tauturu anga i te au taeake tei tae mai kia kite mai e koai tatou, pera katoa ka riro te reira ei akakitekite anga ki te aronga e akara maira. Ka akara mai te aronga i roto i te oire o te uruoaanga i te aronga e aao ra i te kati uruoaanga e e manea tikai ratou e te mako, kare e aao ra i te au kakau mako kore e te akaariari kopapa mei tei matauia i teianei ao. (1 Timo. 2:9, 10) No reira, kia akamanako meitaki tatou i to tatou kakau e te akamanea anga ia tatou i roto i te oire o te uruoaanga, pera katou me tomo tatou ki roto i te motera. Kare te aao anga i te au piripou poto e te au piriaro e akaari maira i te tu akangateiteianga. Noatu e tei te ngai atea ua te uruoaanga, kia riro to tatou kakau ei akangateiteianga. Me ka taui tatou i to tatou kakau i muri ake i te porokaramu e ka aere ki tetai ngai kaikaianga, kia akamaara tatou e e au tereketi tatou no te uruoaanga e kia kore e aao i te kakau kare e tau ana.
7. Eaa tetai mataara kia mataora tatou i te taokotaianga Kerititiano i te tuatau o te uruoaanga?
7 I te tuatau o te au oroa, e mataora ana te ngati Iseraela i te kapiti akamaroiroianga ki te au taeake akamori mei tetai atu au tuanga o te enua i teianei ao, e te turuturu ra teia i te taokotaianga. (Anga. 2:1, 5) I te tuatau o te au uruoaanga tapere, ka akaraia mai to tatou au tu meitaki tikai ei au taeake Kerititiano taokotaiia. E mareka mai ana te aronga e akarakara maira i teia atianga mataora o to tatou parataito pae vaerua. (Sala. 133:1) Kia kore e akaruke i te ngai o te uruoaanga i te tuatau kaikaianga no te oko mai anga i tetai kai, e mea meitaki atu kia apai mai i tetai manga kai na tatou e kia aravei e kia pukapuka atu ki te au taeake e te au tuaine i te pae mai ia koe!
8. Eaa te au tumu kia tauturu atu i te angaanga me ka rauka ia tatou?
8 E mareka mai ana te aronga e akara maira i ta tatou au uruoaanga akapapa meitakiia e te mako, me kite tikai ratou e na te aronga oronga tauturu i rave i te au angaanga. Ka rauka ainei ia koe i te oronga “puareinga” ua ia koe uaorai kia tauturu atu i ko i te uruoaanga? (Sala. 110:3) E tauturu mai ana te au pamiri katoa i te angaanga ei tereni anga i ta ratou tamariki kia oronga puareinga ua mai ia ratou. Me e tangata akama ua koe, e mataara meitaki i te angaanga i ko i te uruoaanga e te aravei atu anga i tetai atu au taeake. Kua akakite mai tetai tuaine e: “Kare e maata rava ana taku aronga i kite i reira, ko toku pamiri ua rai e tetai au taeake. Inara i toku tauturu anga i te tama, e maata te au taeake e te au tuaine taku i aravei ana. E mea mataora tikai te reira!” Ka mataora tikai tatou me piri tatou ki tetai atu au taeake na te tauturu anga i ko i te uruoaanga. (2 Kori. 6:12, 13) Me kare rava koe i tauturu atu ana, pati ki te aronga pakari e akapeea koe e tau ei no te tauturu atu anga.
9. Akapeea tatou me pati i tetai ke kia tae mai ki te uruoaanga?
9 Pati i Tetai ke Kia Akarongo i te Tuatua Mou: E toru epetoma i mua ake ka akamata ai ta tatou uruoaanga, ka piri atu tatou ki tetai kamupeini mei te mataiti i topa akenei i te pati atu i tetai ke kia tae mai. Ka anoanoia te au putuputuanga kia rave maata i ta ratou ka rauka i te tua aere i te patianga i te ngai tutuanga. (Akara i te pia “Akapeea Tatou me Oronga i te Patianga?”) Me e au patianga tetai e toe ra, kia apai mai ki te uruoaanga. Ka taangaangaia teia e te au tereketi ei akakitekite ua anga, ia ratou i roto i te oire o te uruoaanga.
10. Akakite mai i tetai au tupuanga tei akapapu mai e e tupu ana te au mea meitaki mei ta tatou patianga o te mataiti.
10 E ariu mai ana ainei te au tangata ki teia kamupeini o te mataiti? I tetai uruoaanga, kua arataki atu tetai taeake tauturu i tetai nga tokorua ki tetai nga nooanga. Kua akakite raua kiaia e e mea orongaia mai ta raua patianga e “kua manako e ka reka teia.” Kua akaoro atu raua mei tetai 320 kiro mita te mamao kia tae atu ki reira! I tetai mai atianga, kua oronga tetai tuaine e aere ra mei tera are ki tera are i tetai patianga ki tetai tangata tei ui mai no runga i te uruoaanga. E kua uriuri atu aia no runga i te patianga kiaia. Tetai nga ra i muri mai i ko i te uruoaanga, kua kite atu te tuaine i taua tangata ra e tona oa i te uruoaanga e mou ra i tetai puka ou!
11. Eaa ra i puapinga ai kia tae ki te au uruoaanga tapere o te mataiti?
11 E apinga aroa te tuatau o te au oroa no ko mai ia Iehova ei tauturu i te ngati Iseraela kia “akamori oki iaia ma te pikikaa kore, e ma te tuatua-mou.” (Iosu. 24:14) Pera katoa, ka tauturu mai te tae anga ki te uruoaanga tapere o te mataiti ia tatou kia “akono i te tuatua-mou.” E e tuanga puapinga te reira no ta tatou akamorianga. (3 Ioa. 3) Kia akameitaki mai a Iehova i te au tauta anga a te aronga te inangaro ra i te tuatua mou, kia tae e kia puapinga meitakiia mei te reira!
[Tataanga i te kapi 4]
Ka akakaka to tatou tu meitaki i te tuatua mou i roto i te oire o te uruoaanga
[Tataanga i te kapi 7]
E toru epetoma i mua ake ka akamata ai ta tatou uruoaanga, ka piri atu tatou ki tetai kamupeini i te pati atu i tetai ke kia tae mai
[Pia i te kapi 3-4, 7-8]
Au Akamaara Anga No Te Uruoaanga Tapere 2012
◼ Au Ora no te Porokaramu: Ka akamata te porokaramu i te ora 9:20 i te popongi i te au ra katoatoa e toru. Ka ngaa te ngutupa i te ora 8:00 i te popongi. Me akakiteia mai e ka akamata te akatangi imene, kia noo pouroa tatou ki to tatou au nooanga kia akamata te porokaramu i roto i te tu tau. Ka oti mai te porokaramu i te ora 4:55 i te aiai Varaire e te aiai Maanakai, e i te ora 3:40 i te aiai Tapati.
◼ Paka Anga: I roto i te ngai uruoaanga kare e tutakiia ana te ngai paka anga e akatereia ra e tatou, ko te aronga mua ka tae mai ka peke ia ratou te reira ngai. Ko te aronga ua e Kati Tikaanga no te Paka Anga to ratou te ka akatikaia kia paka i te ngai tapaoia no te aronga pakipakitai. I te mea e kare e maata ana te ngai paka anga, e tauta kia na roto mai e tai ua motoka.
◼ Tapaoanga i te Au Nooanga: Ka rauka te au nooanga i te tapao no te aronga ua e tai o kotou are e noo ra me kore tei aru mai ia koe i runga i toou apinga akaoro me kore ta tatou aronga apii Pipiria.—1 Kori. 13:5.
◼ Kaikaianga Avatea: E apai mai i tetai kai ine, eiaa e akaruke i te ngai uruoaanga kia tiki atu i tetai kai i te ora kaikai i te avatea. E apai mai i tetai pia akaanu meangiti kia rauka i te tauru ki raro ake i toou nooanga. Kare e akatikaia te au pia akaanu mamaata, te au kakapu io i roto i te ngai uruoaanga.
◼ Moni Tauturu: Ka rauka ia tatou i te akaari i to tatou ariki rekareka i te au akanoonooanga no te uruoaanga na te oronga ua anga i te au moni tauturu ki te angaanga i te ao katoa i ko i te uruoaanga. Tetai au tieki kia tataia ki te “Christian Congregation of Jehovah’s Witnesses.”
◼ Au Tupuanga Kino e te Au Manamanata Tupu Poitirere Ua: Me tupu ake tetai manamanata tupu poitirere ua i te pae rapakau i te ngai o te uruoaanga, e aravei atu i te tavini tauturu vaitata ua mai kia koe ine, e nana e akakite viviki atu ki te Tipatimani Tauturu Rapakauanga kia rauka i to tatou tangata tauturu tukatau i te akara i te tu kino o te turanga e kia oronga atu i te tauturu. Me ka umuumuia, e ringi atu ratou i te Numero 111 o Nu Tireni, me kore te Numero 998 o Rarotonga. Kare i reira e maata te ringi anga i te ngai ka tauturu viviki.
◼ Au Ua Vairakau: Me ka anoano koe i tetai ua no ko mai i te taote, akapapu kia apai mai i te reira kia rava noou, no te mea kare e rauka mai te reira i te ngai o te uruoaanga. E akono meitaki i te au nira no te toto vene kia kore e kino te oraanga o tetai ke, e kia kore e pei i te reira ki roto i te ngai vairanga teita i te ngai o te uruoaanga e te au motera.
◼ Tamaka: I te au mataiti ravarai e tupu ana te kino no te tamaka. E meitaki atu i te tauru i te tamaka tau e te tano meitaki te ka rauka i tetai i te aere meitaki ua i runga i te ngai ka kake ki runga, te au auri vaavaarua, e te vai atura.
◼ Kare e Akarongo Meitaki Ana: I ko i te au uruoaanga i Nu Tireni ka akakitekiteia atu te porokaramu i roto i te otitoriomu na runga i te ratio FM. Kia puapingaia mei teia akanoonooanga, ka anoanoia koe kia apai mai i tetai ratio FM meangiti ua ma te apinga akarongo no te taringa.
◼ Au Pereoo e te Au Nooanga Atuatu: Auraka e apai mai i te au pereoo pepe e te au nooanga atuatu ki roto i te ngai uruoaanga. Inara, ka arikiia te au nooanga pepe me ka akanoo meitakiia ki te pae i te nga metua. I roto i te maata anga o te au uruoaanga, e akanooia ana tetai ngai no te au pereoo pepe.
◼ Akari Pipi: Te maataanga o te au uruoaanga e raveia ana i roto i te au ngai topiriia e au matini akaangiangi matangi tetai. No reira, e mea meitaki kia kore tatou e pipi maata i te au akari pipi pakari te aunga, te ka akatupu i te kino ki te aronga kare e meitaki i te akaea me kore tetai atu manamanata mei te reira rai.—1 Kori. 10:24.
◼ Au Pepa Follow-Up (S-43): Kia taangaangaia te pepa Please Follow Up i te akakite mai no runga i tetai tei akaari mai i te inangaro no ta tatou akakitekite anga atu i te tuatau o te uruoaanga. Ka tau te au papuritia kia apai mai e tai me kore e rua pepa follow-up ki te uruoaanga. Kia tuku atu i te au pepa akaki meitakiia ki ko i te Pia Vairanga Puka kia akonoia te reira me kore ki te tekeretere o toou putuputuanga me oki atu koe.—Akara i Ta Tatou Angaanga Patireia o Me 2011, kapi 5.
◼ Au Are Kaikaianga: E akariro i toou tu meitaki i ko i te au are kaikaianga ei akangateitei i te ingoa o Iehova.
◼ Au Motera:
(1) Auraka e tapao i te au ngai nooanga me kare e anoanoia, e auraka kia tere atu te au tangata e akatikaia ra i te noo i roto i toou ngai nooanga.
(2) Auraka e takore atu i taau tapaoanga, kareka ra me tupu poitirere mai tetai mea, kia akakite viviki atu ki te aronga o te motera.—Mata. 5:37.
(3) E apai i te pereoo tari kiri kakau me kua papa tikai koe i te taangaanga i te reira e oti kia akaoki viviki atu koe i te reira kia rauka i tetai ke i te taangaanga atu.
(4) Auraka e tunu kai i roto i te au rumu kare e akatikaia.
(5) Auraka e rave maata i te au kai mei te au kaope, te au aiti tei oronga uaia mai i te popongi, e te vaira na te au manuiri ei kai na ratou i ko i te motera.
(6) Akaari i te au ua o te vaerua i te akono anga i te aronga angaanga o te motera. Te akono ra ratou i te au manuiri e manganui e te ariki rekareka maira i to tatou tu takinga meitaki, te akakoromaki, e te manako tau.
◼ Angaanga Tauturu: Tetai ua atu tei inangaro i te rave i te reira, kia ripoti atu ki te Tipatimani o te Angaanga Tauturu i ko i te uruoaanga. Ka rauka rai te au tamariki i raro ake i te 16 mataiti kia tauturu na te angaanga anga i raro ake i te akaaereanga a tetai metua me kore a tetai tangata tiaki me kore a tetai atu tangata mamaata tei arikiia e tetai metua me kore e tetai tangata tiaki.
[Pia i te kapi 8]
Akapeea Tatou me Oronga i te Patianga?
Kia kapi meitaki ta tatou ngai tutu anga, kia poto ua te tuatua. Penei ka tuatua tatou mei teia rai e: “Kia orana. Te piri nei matou ki roto i tetai angaanga i te ao katoa i te tua aere i teia patianga. Naau teia kopi. Ka kite atu koe i te au akakiteanga i roto i teia patianga.” E kia maoraora. Me piri atu ki te tua aere anga i te au openga epetoma, kia oronga katoa atu i te au makatini me ka tau.