“To Kotou Mārama, Kia Kakā”
1. Eaa te tikaanga ngateitei te piri nei tatou ki roto?
1 Mei te popongi maiata ki te aiai po, te akameitaki ra te manea o te marama e ata maira i te Atua ko Iehova. Inara, e marama ke atu tetai ta Iesu e pati ra kia rauka mai i tana au pipi—te “mārama ora.” (Ioa. 8:12) E tikaanga ngateitei me rauka mai teia marama pae vaerua, kapiti mai i te au apainga puapinga. Kua ikuiku mai a Iesu e: “To kotou mārama, kia kakā ïa ki mua i te aroaro o te tangata nei,” te ka akapuapinga i tetai ke. (Mata. 5:16) I roto i te turanga poiri pae vaerua i teia tuatau, ka anoanoia teia marama kia akakitekiteia, e te anoano maataia nei teia! Akapeea tatou mei ia Karaiti rai, me aka kaka i to tatou marama?
2. Akapeea a Iesu te akaari anga i te puapinga no te akakitekite anga i te marama pae vaerua?
2 Tutu Anga: Kua taangaanga a Iesu i tona taime, maroiroi, e te tareni kia akakite i te marama o te tuatua mou ki te au tangata i to ratou kainga, i te ngai tangata, i runga i te maunga—i te ngai ua atu ka kiteaia ratou. Kua kite mai aia i te puapinga mutu kore no te oronga anga i te marama mou i te pae vaerua. (Ioa. 12:46) E rauka ai i te itae i te maata o te tangata, kua akapapa a Iesu i tana au pipi ei “mārama o te ao nei.” (Mata. 5:14) Kua aka kaka ratou i to ratou marama na te rave anga i te mea meitaki ki to ratou tangata tupu e na te akakitekite anga i te tuatua mou.
3. Akapeea tatou me ariki ngakau tae i te marama o te tuatua mou?
3 E manako pakari ana te iti tangata o te Atua i te apainga ‘kia tau te aerenga ei tamariki no te mārama,’ e kua tutu aere ratou i te ngai ka kiteaia te tangata. (Ephe. 5:8) Na te tatau anga i te Pipiria e te au puka Kerititiano i te tuatau kaikai i te angaanga me kore i te apii ka akakeu i tetai uriurianga Tuatua Tapu. Kua aru tetai tuaine mapu i teia, na te akamata anga i tetai apii Pipiria e kua oronga atu e 12 puka ki tona oa apii!
4. Eaa ra to tatou tu meitaki i piri mai ei ki ‘to tatou mārama, kia kakā’?
4 Au Angaanga Meitaki: Te o maira te aka kaka anga i to tatou marama i to tatou tu i te au ra. (Ephe. 5:9) E riro ana te au tu tau o tetai Kerititiano i te angaanga, apii, e te ngai tangata ei atianga no te akakitekite anga i te tuatua mou Pipiria. (1 Pete. 2:12) Ei akaraanga, no te tu meitaki o tetai tamaiti e rima mataiti, kua akakeuia tona puapii kia ringi i tona nga metua. Kua karanga aia e, “Kare rava au i kite ana i tetai tamaiti no tona irinaki papu i te tu akono tau!” Ae, e akakeuia ana te tangata kia inangaro i te “mārama ora” no ta tatou angaanga orometua e to tatou tu meitaki e te akameitakianga i to tatou Atua.