E Rua Moni Kare e Maata Ana te Puapinga

Tetai mataara puapinga e turuturu ana tatou i te au anoano o te Patireia na te oronga anga i te moni tauturu ki te angaanga tutuanga i teianei ao. Akapeea me kare e maata ana ta tatou moni?

Tetai atianga, kua kite atu a Iesu i tetai vaine takaua e oronga ra e rua moni repeta kare e maata ana te puapinga ki roto i te pia moni o te iero. No tona aroa ia Iehova kua akakeuia aia kia oronga kia “ope roa tona apinga rikiriki rava kore, i te tukuia e ia ki roto.” (Mare. 12:41-44) Kua kite mai a Iesu i te reira e kua akakite mai e e puapinga tikai tana i oronga ki te Atua. Kua akamanako katoa te au Kerititiano i te anere mataiti mua e e tikaanga ngateitei i te oronga i te au apinga materia. Kua oronga te au Kerititiano putaua e te au Kerititiano apinga nui i ta ratou ka rauka. Kua akakite mai te apotetoro ko Paulo i te akaraanga o te au taeake o Makedonia e noatu e ‘maata to ratou putaua, kua tuatua raurau mai e kia tuku atu i te au apinga.’​—2 Kori. 8:1-4.

No reira, me ka rauka ua ia tatou i te oronga mai e ‘rua moni kare e maata ana te puapinga,’ kia akamaara tatou e me maata te au oronga anga meangiti, ka maata rava atu te ka akaputuia. Ka riro ta tatou oronga ngakau tae anga i te akamareka i to tatou Metua oronga ua i te rangi, no reira “ko te tangata oronga ma te rekareka ta te Atua e inangaro” ra.​—2 Kori. 9:7.