Rave i Tetai Aravei Anga te ka Angaanga
1. Eaa ta tatou i kite mai mei te au aravei anga tukeke a te au Kerititiano mua?
1 E tutu ana te au Kerititiano mua i te tuatua meitaki ki te au tangata e tukeke ta ratou au peu e te au akonoanga. (Kolo. 1:23) Noatu te aiteite ra te karere—te Patireia o te Atua—e tukeke te aravei anga te tau ra ki te au tangata. Ei akaraanga, te tuatua anga a Petero ki te ngati Iuda tei akangateitei oonu i te au Tuatua Tapu, kua taiku aia i te peroveta ko Ioela. (Anga. 2:14-17) Tetai tua, akara ana i te tu o ta Paulo uriuri manako anga ki to Ereni i roto ia Angaanga 17:22-31. Teia tuatau, te akangateitei ra te au tangata i roto i tetai au ngai tutuanga i te au Tuatua Tapu, e ka rauka ua ia tatou i te taiku i te Pipiria mei tera are ki tera are. Inara, kia matakite tatou me tuatua ki te aronga kare e inangaro mai ana i te Pipiria e te akonoanga me kore tei roto i tetai akonoanga kare i te Kerititiano.
2. Akapeea tatou me taangaanga i te au mea ka orongaia kia tauturu i te aronga e ariki maira i te Pipiria e te aronga kare e ariki maira?
2 Taangaanga Meitaki i te au Mea no te Oronga Anga: Ka taui te au mea ka orongaia i teia mataiti tavinianga i te au marama e rua, e ka akaariia mai te au makatini, au aenga pepa, e te au poroutia. Noatu e kare te au tangata e irinaki ana i te Pipiria i roto i ta tatou ngai tutu anga, ka rauka rai ia tatou i te oronga atu i tetai apinga ke te ka inangaro mai ratou. Penei kare tatou i tatau ana i tetai irava i te atoro anga mua me kore i taiku ana i te Pipiria, inara me akaariia mai te inangaro, ka rauka ia tatou i te oki akaou i te tauturu i te tangata ngutuare kia akaketaketa i tona irinaki ki roto i Tei Anga mai e i tana Tuatua akauruia. Tetai tua, me te tutu aere ra tatou ki te au ngai te akangateitei ra te au tangata i te Pipiria, e taangaanga tatou i tetai puka te ka arataki i te manako ki te Pipiria. E tika, ka rauka ia tatou i te oronga i te puka ta te Pipiria e Apii Maira me kore te poroutia Akarongo ki te Atua me kore Akarongo ki te Atua kia Ora e Tuatau ua Atu i tetai ua atu tuatau, noatu eaa te puka e orongaia ra i taua marama ra. Te mea puapinga, e rave i te aravei anga te ka angaanga.
3. Na teea tu e akaaiteia ra te ngakau o te au tangata i roto i te ngai tutu anga ki te one?
3 Akapapaanga i te Ngakau: Kua akaaiteia te ngakau o te tangata ki te one. (Luka 8:15) Te anoanoia ra tetai au ngakau mei te one rai kia akapapa meitakiia i mua ake ka aka ei e ka tupu ei te au ua tuatua mou Pipiria. Kua puapingaia te aronga tutu evangeria i te anere mataiti mua i te tanu anga te au ua tuatua mou ki roto i te au ngakau tukeke, e kua mataora tikai ratou i te reira. (Anga. 13:48, 52) Ka puapinga katoaia tatou na te akamanako meitaki anga i ta tatou aravei anga.