Taangaanga Meitaki i te au Makatini Takere
No te mea kare e puapinga ana kia akaputu me kore kia titiri i te au makatini takere, e tauta tatou i te oronga atu i te au makatini takere ki te tangata. Ka rauka i tetai makatini okotai i te akakeu i tetai tangata kia inangaro i te tuatua mou e kia kapiki i te ingoa o Iehova. (Roma 10:13, 14) Teia tetai au mataara kia taangaanga meitaki i te au makatini takere.
Me tutu aere tatou i te au ngai kare tatou e aere putuputu ana, e akaruke i tetai makatini i tetai ngai tau ua me kare e tangata i te kainga.
Me tutu aere i te ngai te tiaki ra te tangata i te bus me kore i te rerue, pati e me ka inangaro ratou i te tatau i tetai makatini, e oti e akaari i tetai au makatini takere kia iki ratou e ko teea ta ratou ka inangaro.
Me aere ki te ngai pua kakau, te are no te aronga ruaine, me kore i tetai au ngai mei te reira rai te tu i roto i te ngai tutuanga a toou putuputuanga, e akaruke i tetai au makatini takere i roto i te ngai noonoo anga. E me tei reira te manitia e pati kiaia na mua. Me kite atu koe e e au makatini tetai i reira, eiaa e akaruke i taau.
Me akapapa koe i te atoro akaou i tetai aronga tei akaari mai i te inangaro, e akamanako i te au mea ta ratou e reka ana. E ngutuare tangata ainei tona? E reka ana ainei aia i te aere orote? E reka ana ainei aia i te tanutanu? Akara ki roto i te au makatini takere me e atikara tetai ka reka aia i te tatau, e me oki atu koe, e akaari i te reira kiaia.
Me kite akaou koe i te tangata taau i tuatua ana, i muri ake i toou tauta ua anga kia atoro iaia, e akaari kiaia i tetai au makatini takere kare aia i tatau ake.