Akamaata Atu i to Tatou Karape i te Tutu Aere—Akaari i te Inangaro Ngakau Tae

Tumu i Puapinga Ai: E akamanako ana a Iesu i te tu o te tangata tataki tai, e e akaari ana aia i te inangaro ngakau tae no ratou. Ei akaraanga, tetai atianga kua kite a Iesu i te tu akama o tetai tangata turi, no reira i te rapakau anga aia i tera tangata, kua arataki a Iesu iaia ki tetai ngai ke ko raua ua kia kore te urupu tangata e akara mai. (Mare. 7:31-35) Kua akaari aia i tu akangateitei no tana au pipi na te akamanakoanga i to ratou turanga e kare aia e akakite ana i te au mea pouroa kia ratou. (Ioa. 16:12) Pera katoa iaia i runga i te rangi, te akaari maira a Iesu i tona inangaro ngakau tae. (2 Timo. 4:17) Ei au pipi na Iesu, ka inangaro tatou i te aru i tona akaraanga. (1 Pete. 2:21; 1 Ioa. 3:16, 18) E tetai, ka meitaki ta tatou angaanga orometua me akaari tatou i te tu akangateitei no te tangata ngutuare e me akamanako tatou i tona au turanga, tana au mea e reka ra, e tona au manamanata. Kare e kore ka akarongo mai aia me kite aia e kare tatou i aere mai i te kave ua i tetai karere me kore i te akaruke i tetai puka nana, mari ra kua aere mai tatou no to tatou inangaro ngakau tae.

Peea me Rave i te Reira:

Akapapa meitaki. Akaari i te mata katakata, te tu oaoa e eiaa e ru.
Akara meitaki. E au apinga ainei tetai ei akaari mai e e tamariki tana? e reka ana aia i te tanutanu me kore e au manu tana? e irinakianga akonoanga tana? Penei ka rauka ia koe i te taui i taau ka tuatua kia tau ki tona au turanga.
Ui i tona manako e kia akarongo meitaki me pau mai aia, e eiaa e tamanamanata. Akara i tona tutu mata ei akaari e te akarongo ra koe kiaia. Akangateitei i tona manako e kia akameitaki iaia me ka rauka ma te ngakau tae. Kopae i te taumāro atu.
Rauka ua i te taui. Me ka anoanoia, akatano i taau ka tuatua kia tau ki ta te tangata e manako ra. Penei ka mama ua teia no te mea i roto i to tatou au aenga pepa, poroutia, e te makatini e maata te au manako tuketuke. Me kua aere atu koe i te taime e manamanata ra aia, akaari i te tu akangateitei e kia tapoto i taau ka tuatua.

No Teia Marama, Tamata i Teia:

I te tuatau o te akamorianga a te ngutuare tangata me kore i roto i te angaanga orometua, e apiipii e ka akapeea me taui i te tuatua akamataanga kia tau ki te manako o te tangata ngutuare.
I ko i te uipaanga no te angaanga orometua, ka rauka i te taeake e akono ra i te pupu kia uriuri me kore kia akatutu mai i tetai au mataara kia akaari i te inangaro ngakau tae no te tangata ngutuare.