Akaari i te Inangaro Uaorai—Na te Akapapa Anga
1 Te akapapa meitaki anga no te angaanga orometua te tauturu maira ia tatou kia akaari i te inangaro uaorai i roto i tetai ke. Akapeea ra? Me papa meitaki tatou, kare tatou e akamanako maata roa i ta tatou tuatua akamataanga e no reira ka rauka i te oronga maata i te manakoanga ki te ngutuare tangata. Pera katoa, te tauturu maira te reira ia tatou kia autu i te ru anga e te akatika ra te reira ia tatou kia tuatua mei roto mai i te ngakau. Akapeea, ra, e rauka ai ia tatou i te akapapa i tetai tuatua akamataanga puapinga tikai?
2 Taangaanga i Tetai Tuatua Akamataanga te Tau Ra: E iki mei Ta Tatou Angaanga Patireia o Tianuare 2006 e tai o te au tuatua akamataanga tamanakoia te tau ra ki toou ngai, e e akamanako koe e akapeea i te tukuanga i te reira i roto i taau uaorai au tuatua. Akatano i te reira ki taau ngai e angaanga ra. Ei akaraanga, me i te akaraanga ka aravei koe i te au tangata mei tetai tupuanga akonoanga me kore te tu eteniki, e akamanako e akapeea taau tuatua akamataanga e rekaia e ratou. Te akatanoanga i taau araveianga ki te aronga takitai taau e tuatua ana te akaari ra i te inangaro tikai i roto ia ratou.—1 Kori. 9:22.
3 Ia koe e akamata ra i te taangaanga i te tuatua akamataanga, e tauta ua atu i te akameitaki atu i te reira. Mei te mea e puapinga tikai te au tuatua i te akamataanga, e akara e akapeea te au tangata e ariu maira ki taau akamataanga tuatua. Te rekareka ra ainei ratou i te tumu manako? Te akakeu ra ainei te au uianga taau e tuku ra i tetai pauanga? Me kare, e akono i te au tauianga e kite roa mai koe i tetai araveianga te angaanga meitaki ra.
4 Au Tauturu Akamaara Anga: E manganui te kite maira e e ngata te maara anga i tetai tuatua akamataanga ia ratou i ko i te ngutupa. Me te kite ra koe e ko te reira ia, kua tauta ana ainei koe i te rave i te au tuatau apiipii anga e te tuatua maata ra koe i te tuatua akamataanga ki tetai tangata ke? Ka tauturu teia ia koe kia rauka taka meitaki mai te au manako e kia oronga i te reira na roto i te tu mama ua, e te tau. Ka akapapa katoa te reira ia koe kia akono i te au ariuanga tukeke ka kite mai koe.
5 Tetai tauturu akaou mai koia oki kia tata i tetai tataanga poto ua o te tuatua akamataanga i runga i tetai kati meangiti ua e akara atu i te reira i mua ua ake ka aere atu ei koe ki te ngutupa. E kite mai ana etai e e tauturu ana teia akamaaraanga poto ua ia ratou kia maru mai e kia rauka i te tuatua meitaki ki te au tangata. Na roto i teia au mataara, ka tauturu te akapapaanga meitaki ia tatou i te akaari i te inangaro uaorai i roto i tetai ke e ka akameitaki atu i reira i ta tatou tuatua akamataanga no te tuatua meitaki.