Akaari i te Inangaro Uaorai—Na te Taui ua Anga
1 Kua akanoo te apotetoro ko Paulo i tetai akaraanga meitaki i te taui ua anga i tana tuatua akamataanga no te tuatua meitaki ki te tupuanga e te manakoanga o tana aronga e akarongo maira. (1 Kori. 9:19-23) Kia tauta katoa tatou kia rave akapera rai. Ma tetai manga akamanakoanga i mua atu ana, ka rauka ia tatou i te taui putuputu ua i ta tatou au akaraanga no te au tuatua akamataanga tei kiteaia mai i roto i Ta Tatou Angaanga Patireia kia tau ki te au inangaro o te au tangata i roto i ta tatou ngai e angaanga ra. Ia tatou e aere atura ki tetai ngutupa, penei ka kite mai tatou i te au akakiteanga o te au inangaro o te tangata ngutuare e ka kapiti atu i teia i roto i ta tatou tuatua akamataanga. Inara, te vai atura tetai mataara ke e rauka ai ia tatou i te taui ua i roto i ta tatou angaanga orometua.
2 Patu Anga ki Runga i ta Tetai e Tuatua Ra: Me te oronga ra i te tuatua meitaki, e ui putuputu ana tatou i tetai uianga e kua pati atu i te au tangata ngutuare kia pau mai. Eaa toou manako ki te pauanga? Te akakeuia ra ainei koe kia oronga atu i tetai arikianga kare e manako maataia ana e oti kua rave atu i taau tuatua akamataanga i akapapa ei? Me te akaata ra ainei taau e tuatua ra e te akamanako ra koe i te au pauanga a te tangata ngutuare? Me akaari koe i te inangaro tikai i roto i ta tetai ke e tuatua ra, penei ka rauka ia koe i te taangaanga i tetai atu au uianga tau i te kite meitaki eaa tikai to runga i to ratou manako. (Maseli 20:5) I reira e rauka ai ia koe i te akamou ki runga i te au tu o te karere Patireia te akamanako tika maata ra i te au manamanata o te tangata akarongo.
3 Te umuumuia ra tatou kia inangaro i te tuatua no runga i te au tumu manako ke i te pae mai i ta tatou i parani mua ana i te uriuri. Me akamata tatou na te tuatua anga i runga i tetai manamanata i runga i te nuti e kua taiku mai te tangata ngutuare i tetai manamanata i te reira ngai me kore kiaia uaorai te tamanata ra iaia, na to tatou inangaro tikai i te akonoanga i te au umuumuanga o te tangata ngutuare e akakeu ia tatou kia akamou i te uriurianga Pipiria ki runga i te au mea puapinga maata kiaia.—Philipi 2:4.
4 Akatanotanoanga i ta Tatou Aravei Anga: Me ui mai te tangata ngutuare i tetai uianga, penei ka kite mai tatou e mea meitaki atu i te rave i te uriurianga a tetai tuatau ke i muri ake te akarakara anga tatou i tetai manako akaou mai no runga i te tumu manako. Ka rauka katoa ia tatou i te oronga i te au puka te akamanako maata atura i te tumu tuatua. Te akaata pouroa ra teia i to tatou inangaro ngakau tae i te tauturu anga i tetai ke kia kite mai ia Iehova.—2 Kori. 2:17.