Akapeea me Taangaanga i te Au Manako no te Uriuri

Mei ia Tianuare 2018, kua tukuia te au manako no te uriuri i te kapi mua o te Puka Angaanga no te Uipaanga—Oraanga Kerititiano e te Angaanga Orometua. Akapeea me taangaanga i te reira?

Me Rave i Tetai Tuanga Apii: Ka anoanoia koe kia taangaanga i te uianga, te irava e te uianga oki akaou i roto i te au manako no te uriuri. Inara, kare te aiteanga e ka tuatua koe i te au tuatua katoa i roto i te vitio akatutuanga. Ka rauka ia koe i te taui i te akanoonooanga, te tuatua akamataanga, te manako ka uriuri, e te vai atura. Ka rauka katoa ia koe i te oronga i tetai puka mei roto i te au Apinga Apii, noatu kare te reira i taikuia i roto i te puka angaanga.

Roto i te Angaanga Tutu Aere: Kua akapapaia te au manako no te uriuri ei tauturu ia tatou. Me akaari mai tetai tangata i te inangaro kia kite maata atu, e rave ua atu i taau pukapuka anga, penei e taangaanga i te akatutuanga no te atoro akaou. Ka rauka ia koe i te taui i te au manako no te uriuri me kore e taangaanga i tetai manako ke. Ka tano ainei te taangaanga akaou i te manako no te uriuri o tetai marama ke mai, me kore tetai irava ke ki toou ngai? Te inangaro ra ainei ratou i te uriuri i te au mea e tupu ra i toou ngai me kore i runga i te nuti? Noatu eaa taau ka iki kia taangaanga, ko toou akakoroanga, kia akakite aere i te nuti meitaki o te evangelia ki tetai ke.—1 Kori. 9:22, 23.