Na Teaa e Akapapu i Tetai Oraanga Tinamou Noou?
Irinaki te maata anga o te tangata e na te au ririnui kitea koreia e akatere ana i te oraanga. No reira ratou i irinaki ei i te au peu te ka akameitaki atu i to ratou oraanga.
TA TE MANGANUI E IRINAKI RA
AKARA ETU: Irinaki tetai pae e kua akamouia to ratou oraanga ki runga i te au etu i te anau anga. Ka akara ratou i te au akakite anga etu, me kore te au akairo etu, kia kitea eaa te ka tupu e kia matakite atu i te reira me kore kia kitea te manuia.
FENG SHUI: Irinaki tetai pae, me aru ratou i te au ririnui kitea koreia i roto i te au apinga natura ka manuia ratou. Karanga a Lo Wing,a i Hong Kong e, “Akakite mai te feng shui master kiaku e me tuku au i te toka iʼo ki roto i toku are toa e maata ua atu taku moni ka rauka.”
AKAMORI UI TUPUNA: Irinaki tetai pae e ka akamori ratou i te ui tupuna tei mate me kore te au atua tukeke kia rauka te paruru anga e te akameitakianga. Karanga a Van, i Vietnam e, “Irinaki au e me akamori au i toku ui tupuna, ka mataora atu toku oraanga i teianei e te tuatau ki mua pera taku tamariki.”
ANAU AKAOU ANGA: Irinaki te manganui i te ora mutu kore, te mate, e te anau akaou anga. Irinaki ratou e ko te meitaki e te kino e tupu ra i teianei, ko te oraanga ïa i mua ana.
E manganui tei irinaki e e peu purepure te reira. Inara ka rave rai ratou i te au peu akara ira rima, akara akairo etu, te Ouija® board, te pere tarot, e te vai atura. Penei na roto i teia au ravenga ka kiteaia to ratou tu oraanga a te tuatau ki mua.
EAA TEI TUPU?
Kua kitea ainei te oraanga meitaki e te tinamou na roto i teia au irinakianga e te au peu?
Akamanako i te tua o Hào, i Vietnam. Kua rave aia i te peu akara etu, te feng shui, e te akamori i te ui tupuna ei arataki iaia. Kua manuia ainei aia? Karanga a Hào, “Kua puapinga kore taku pitiniti, kua o au ki roto i te kaiou, tupu te manamanata i te ngutuare, e kua taitaia toku ngakau.”
Irinaki katoa a Qiuming, i Taiwan, i te peu akara etu, te anau akaou anga, te peu taumaa, te feng shui, e te akamori i te ui tupuna. I muri ake i te akara matatio anga i teia au manako, karanga aia: “Kite mai au kare teia au apiianga e te au peu e rotai ana e e oripu ua te reira. Kite mai au kua tarevake te au akairo akara etu. Kite mai au no te peu anau akaou anga, me kare e maara ia koe toou oraanga i mua ana, akapeea koe me taui i te reira kia rauka tetai oraanga meitaki atu?”
“Kite mai au kare teia au apiianga e te au peu e rotai ana e e oripu ua te reira.”—QIUMING, TAIWAN
Mei ta Hào, Qiuming, e tetai pae i kite mai, kare to tatou oraanga i akamouia ki runga i te peu taumaa, te au etu, e te au ui tupuna tei mate, me kore te peu anau akaou anga. Ko te aiteanga ainei kare e rauka ia tatou i te akameitaki atu i to tatou oraanga no te tuatau ki mua?
E manganui tei manako e ka rauka te oraanga meitaki atu na roto i te apii teitei e te apinganui. Eaa tei tupu ki te aronga tei manako i teia?
a I teia atikara e te ka aru mai, kua tauiia tetai au ingoa.
b Na te Pipiria Tapu teia tuatua ia Galatia 6:7. Aiteite teia ki te au tuatua Asia Tanu i te mereni, tupu mai e mereni; tanu i te pi, tupu mai e pi.