AKAPEEA ME TAKORE I TE TU MAKITAKITA

1 | Akaari i te Tu Papakitai Kore

Karanga te Pipiria:

“Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”—ANGAANGA 10:34, 35.

Te Aiteanga:

Kare te Atua, ko Iehova,a e akara i to tatou reo, peu, kara e to tatou enua. Mari ra, ka akamou aia ki runga i te mea puapinga atu—ko te ngakau. Karanga te Pipiria: “E akara oki te tangata ki te tu i vao ake, karekā Iehova e akara ïa i te ngakau.”—1 Samuela 16:7.

Taau ka Rave:

Kare tatou e kite i te tangata mei ia Iehova rai, inara ka rauka ia tatou i te aru i tona tu papakitai kore. Tauta kia kite meitaki i te tu o te au tangata tataki tai. Me akamata koe i te manako kino i tetai ke—penei no tona enua me kore tona reo—e pure ki te Atua no te tauturu kia takore i teia tu manako. (Salamo 139:23, 24) Me pure akatenga koe kia Iehova no te maroiroi kia takore i te tu papakitai, e mea papu e ka akarongo aia ki taau pure e ka tauturu katoa ia koe.—1 Petero 3:12.

a Ko Iehova te ingoa o te Atua.—Salamo 83:18.

“Kare rava au i noo au ua ana e tetai tangata papaa i mua ana . . . Teianei ra, kua riro au ei tuanga no tetai taokotaianga taeake i te pa enua katoa.”—TITUS

Tua Oraanga—TITUS

Takore Aia i te Tu Makitakita

Kua piri ana a Titus ki tetai pupu tā ua no tona mareka kore i te ture iriiri tangata i tona enua. Karanga aia: “E aere ana matou ki te au ngai o te oire kare e arikiia ana te kerekere, mei te au otera e te au are kava, te akatupu ta.” Karanga katoa aia: “Me o au ki roto i tetai taumaro ki tetai ua atu tangata, me kore e vaine, ko au ua rai te na mua ana i te ta atu.”

Kua taui te tu o Titus te apii anga aia i te Pipiria ki te Au Kite o Iehova. Te tatau anga aia i te Pipiria, kua taui tona aerenga manako. Kua akakeuia tona ngakau e te taputou no te ao ou, tei karanga “e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:3, 4.

I te akamataanga, kua ngatā ia Titus i te takore i te tu makitakita mei tona ngakau. Karanga aia: “Ngata tikai te taui i toku aerenga manako e toku tu.” Inara kua kite mai aia i roto ia Angaanga 10:34, 35, e tu papakitai kore to te Atua.

Eaa tei tupu? Karanga a Titus: “Papu tikai iaku e te akono ra te Au Kite o Iehova i te akonoanga mou tikai toku kite anga i te aroa i rotopu ia ratou, noatu eaa te iti tangata e te kara. I mua ake ka papetitoia ai au ei Kite, kua pati mai tetai mema papaa o te putuputuanga iaku ki tona ngutuare i te kaikai. Mei te moemoea rai. Kare rava au i noo au ua ana e tetai tangata papaa i mua ana, e kare katoa i kaikai ana i tona kainga. Teianei ra, kua riro au ei tuanga no tetai taokotaianga taeake i te pa enua katoa.”