AKAPEEA ME TAKORE I TE TU MAKITAKITA

3 | Takore i te Tu Makitakita Mei Toou Ngakau

Karanga te Pipiria:

“Ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.”—ROMA 12:2.

Te Aiteanga:

E puapinga to tatou aerenga manako ki te Atua. (Ieremia 17:10) E maata atu ta tatou ka rave i te kopae ua i te tuatua e te rave i te kino. E akamata ana te tu makitakita ki roto i to tatou manako e te ngakau. No reira, ka anoanoia tatou kia kiriti tumu i te reira. I reira e rauka ai ia tatou i te takore takiri i te tu makitakita.

Taau ka Rave:

E akamanako meitaki i taau e manako ra no runga i tetai ke—te aronga tikai e tuke to ratou reo e to ratou enua. E ui kia koe uaorai: ‘Eaa toku manako no runga ia ratou? Kua kite meitaki ainei au ia ratou? Me e tu papakitai ainei toku?’ E kopae i te social media, te au teata e te au tamataora tā tangata e te tu makitakita.

Ka tauturu te Tuatua a te Atua ia tatou kia takore takiri i te tu makitakita mei to tatou manako e te ngakau

Kare i te mea māmā kia kite meitaki i to roto i to tatou uaorai manako e te ngakau. Inara, ka tauturu te Pipiria ia tatou kia ‘akara matariki i te manako e te vananga o te ngakau.’ (Ebera 4:12) No reira e apii ua atu i te Pipiria. E tauta i te akarotai i toou aerenga manako ki ta te Pipiria e apii maira. Ka tauturu te Tuatua a te Atua ia tatou kia takore takiri i te tu makitakita mei to tatou manako e te ngakau.—2 Korinetia 10:4, 5.

Tua Oraanga—STEPHEN

Taui Tona Aerenga Manako

Kua makitakitaia ana a Stephen e tona ngutuare tangata e tetai pupu tangata papaa. Tei tupu, kua aru aia i tetai pupu porotiki tei paruru i te tikaanga o te tangata. I muri mai, kua piri atu aia ki te angaanga takinokino tangata. Karanga a Stephen: “I tetai au atianga kua akara matou ko toku au oa i te au teata no runga i te au tuikaa Aperika tei takinokinoia i Marike i mua ana. Kua riri matou no te kino tei tupu, no reira kua tā matou i te au mapu papaa i roto i te are teata. E oti, kua aere matou ki te au oire e noo ana te au papaa, i te kimi i tetai aronga kia tā atu.”

Kua taui takiri te aerenga manako o Stephen te apii anga aia i te Pipiria ki te Au Kite o Iehova. Karanga aia: “No te mea e maata te tu papakitai taku i kite i roto i toku oraanga, kua kite au i te au tupu anga i rotopu i te Au Kite tei riro ei mea umere tikai kiaku. Ei akaraanga, te aere anga tetai Kite papaa ki tetai enua, kua akaruke aia i tana tamariki na tetai ngutuare tangata kerekere e akono.” Kua kite a Stephen i te aroa i rotopu i te Au Kite o Iehova, ta Iesu i totou e ka tupu i rotopu i te au Kerititiano mou.—Ioane 13:35.

Eaa tei tauturu ia Stephen kia takore i tona tu makitakita e te tā ua? Kua tauturu a Roma 12:2 iaia. Karanga aia: “Kua kite mai au e ka anoanoia kia taui i toku aerenga manako. Kua anoanoia au kia akamanako, kia rauka iaku i te akatupu i te au e kia kite mai e ko teia te oraanga meitaki roa atu.” No tetai 40 mataiti, kua mataora a Stephen i tona oraanga kare e makitakita.