Ta Iehova i Rave no te Akaora i te Tangata

1-2. (a) Eaa te ara, e akapeea tatou me autu atu i te reira? (Akara katoa i te “Akamārama Anga Tuatua.”) (e) Eaa ta tatou ka uriuri i teia atikara e tetai atikara i roto i teia Punanga Tiaki? (Akara katoa i teia makatini, “Ki te Aronga Tatau.”)

KA INANGARO ainei koe i te kite i to Iehova aroa maata ia koe? E apii no runga i tana i rave no te akaora ia koe mei te ara e te mate. E enemi te araa e kare e rauka ia tatou te autu i te reira. E ara ana tatou i te au rā, e no te ara i mate ei tatou. (Roma 5:12) Inara e nuti meitaki tetai. Ma te tauturu a Iehova ka rauka ia tatou te autu i te ara. E mea papu te reira!

² Kua tauturu te Atua ko Iehova i te tangata kia autu i te ara no tetai 6,000 mataiti. No teaa ra? No tona akaperepere ia tatou. No reira, ka tauturu aia ia tatou kia autu i te ara. Kua kite te Atua e ka akatupu te ara i te mate, no reira kare aia e inangaro kia mate tatou. Mari ra, kia ora tatou e tuatau ua atu. (Roma 6:23) Ko tana te reira i inangaro noou. I teia atikara, ka uriuri tatou e toru uianga: (1) Eaa te manakonakoanga ta Iehova i oronga ki te au tangata ara? (2) Eaa ta te aronga ara i te tuatau taito i rave no te akamareka ia Iehova? (3) Akapeea a Iesu te akaora anga i te aronga ara?

EAA TA IEHOVA MANAKONAKOANGA NO TE ARONGA ARA?

3. Akapeea to tatou nga metua mua i te ara anga?

³ Te anga mai anga a Iehova i te tane e te vaine mua, kua inangaro aia kia mataora raua. Kua oronga aia i tetai kainga manea no raua, te oraanga akaipoipo e tetai angaanga umere. Kia akaki i te enua ki ta raua uanga, e kia akariro i te enua ei parataito mei te aua o Edene. Kua oronga aia e tai rai akauenga. Me kare raua e akarongo ka mate raua. Kua kite i reira tatou eaa tei tupu. Kua timata tetai angera kino ia Adamu e Eva kia ara. E kua akarongo raua kiaia, kare ki to raua Metua. Mei ta tatou i kite mai ko ta Iehova au tuatua e mea tika te reira. Mei te reira rā mai, kua tupu te kino kia raua, kua pakari e i te openga kua mate raua.—Gene. 1:​28, 29; 2:​8, 9, 16-18; 3:​1-6, 17-19, 24; 5:5.

4. Eaa a Iehova i rikarika ai i te ara e kua tauturu ia tatou kia autu i te reira? (Roma 8:​20, 21)

⁴ Kua tata a Iehova i teia i roto i te Pipiria kia puapingaia tatou. Kia mārama tatou i te tumu i rikarika ai aia i te ara. Kua akatakake te reira i to tatou pirianga kia Iehova e kua akatupu i te mate kia tatou. (Isa. 59:2) No reira a Satani i reka ai i te ara e te timata nei aia i te tangata kia rave i te reira. Inara, kua manako aia e kua autu aia no tana i rave i te aua o Edene. Kare ra aia i kite i to Iehova akaperepere maata i te tangata. Kare te Atua i taui i tona akakoroanga no te uanga a Adamu e Eva. Akaperepere aia i te tangata e kua oronga aia i te manakonakoanga no te katoatoa. (E tatau ia Roma 8:​20, 21.) Kua kite a Iehova e ka inangaro tetai pae o te uanga iaia e ka kauraro kiaia. Ei Metua no ratou ka rauka iaia i te akavaitata mai ia ratou kiaia e kia ora mei te ara e te mate. Eaa ta Iehova ka rave no te akatupu i te reira?

5. Akapeea a Iehova te oronga anga i te manakonakoanga no te aronga ara? Akamārama mai. (Genese 3:15)

⁵ E tatau ia Genese 3:15. Kua karanga a Iehova e ka takore aia ia Satani e ka rauka te manakonakoanga no te au tangata ravarai. Ka akaora aia i te tangata na roto i tetai uanga. Ka akaparuparu aia i te mimiti o Satani e ka takore i te au manamanata. (1 Ioa. 3:8) Inara, ka tamateia te uanga e Satani e ka taitaia maata a Iehova. Noatu ra, ka āriki ua a Iehova e kia tupu teia e rauka ai te ora i te katoatoa.

AKAPEEA TE ARONGA ARA I TE TUATAU TAITO ME AKAMAREKA IA IEHOVA?

6. Eaa ta Abela, Noa e tetai au taeake tiratiratu i rave no te akavaitata atu kia Iehova?

⁶ I te anere mataiti i aereia mai, kua akakite meitaki a Iehova akapeea te aronga ara me akavaitata atu kiaia. Ko Abela, te rua o te tamaroa a Adamu e Eva, koia te tangata mua tei irinaki kia Iehova i muri ake i te meameaau anga i Edene. Kua akaperepere aia ia Iehova, kua akamareka Iaia e kua akavaitata Kiaia, kua oronga i tana atinga kia Iehova. E tangata tiaki mamoe a Abela e kua oronga aia i tetai mamoe ou ei atinga kia Iehova. Eaa ta Iehova i rave? Kua “kite mairā Iehova ia Abela e tana atinga.” (Gene. 4:4) Kua mareka a Iehova i te au atinga a te tangata tei akaperepere e tei irinaki iaia, mei ia Noa rai. (Gene. 8:​20, 21) Kua akaari a Iehova e ka rauka i te aronga ara i te akamareka e te akavaitata atu Kiaia.b

7. Eaa ta tatou ka apii mei te akaatinga anga a Aberahama i tana tamaiti?

⁷ Kua pati a Iehova ia Aberahama kia akaatinga i tana tamaiti ko Isaaka, e ikianga ngatā tikai te reira. Kua taitaia a Aberahama noatu ra, kua akarongo aia kia Iehova. I muri mai, kua tāpu a Iehova iaia kia kore e tamate atu i tana tamaiti. Te apii maira teia akaraanga kia tatou i ta Iehova ka rave a te tuatau ki mua. Kua puareinga ua a Iehova i te akaatinga i tana Tamaiti akaperepere. No reira a Iehova i akaperepere maata ai i te tangata.—Gene. 22:​1-18.

8. Eaa ta te au atinga o te Ture e akaari maira? (Levitiku 4:​27-29; 17:11)

⁸ I te anere mataiti i muri mai, kua oronga a Iehova i te Ture ki te ngati Iseraela kia akaatinga i te au manu ei akakore i ta ratou ara. (E tatau ia Levitiku 4:​27-29; 17:11.) Akaari maira teia au atinga e ka oronga mai a Iehova i tetai atinga meitaki atu te ka akaora takiri i te tangata mei te ara. Kua akakeuia te au peroveta a te Atua kia akamārama no te uanga tei taputouia, koia te Tamaiti akaperepere a te Atua, ka tamamae e ka tamateia aia. Kua akaaiteia aia ki tetai mamoe tei akaatingaia. (Isa. 53:​1-12) Akamanako ana: Kua oronga a Iehova i tana Tamaiti akaperepere ei atinga kia ora te tangata e pera katoa koe mei te ara e te mate!

AKAPEEA A IESU TE ORONGA ANGA MAI I TE ORA?

9. Eaa ta Ioane Bapetizo i karanga no runga ia Iesu? (Ebera 9:22; 10:​1-4, 12)

⁹ I mataiti 29 T.N., kua kite atu a Ioane Bapetizo ia Iesu o Nazareta e kua karanga: “Ka akara na i te Punua-mamoe a te Atua, ko tei apai ke atu i te ara a to te ao!” (Ioa. 1:29) Kua akaari mai teia au tuatua e ko Iesu te uanga ta te Atua i taputou. Ka akaatinga aia i tona oraanga. E mea papu e kua tae mai te uanga a Iehova no te akaora i te tangata mei te ara.—E tatau ia Ebera 9:22; 10:​1-4, 12.

10. Akapeea a Iesu te akaari anga e kua tauturu aia i te aronga ara?

¹⁰ Kua akapou a Iesu i tona taime i te tauturu i te aronga taitaia no to ratou tu ara ua e ka pati ia ratou kia riro mai ei pipi nana. Kua kite aia no te ara i maki ei te tangata. No reira, kua tauturu aia i te au tane e te au vaine ara. Na roto i tetai akatutuanga, kua karanga aia: “Kare no te aronga ora te taunga, no te aronga maki ra. Kare oki au i aere mai e tiki i te aronga tuatua-tika, i te aronga ara ra, kia tataraara.” (Mata. 9:​12, 13) Ko tera ta Iesu i rave. Kua akakore aia i te ara a tetai vaine tei tamā i tona vaevae ki te roimata. (Luka 7:​37-50) Kua apii a Iesu ki te vaine Samaria i te au tuatua mou puapinga noatu kua kite aia i tona oraanga akaturi. (Ioa. 4:​7, 17-19, 25, 26) Kua oronga te Atua i te mana kia Iesu kia takore i te ara e te mate. Akapeea ra? Kua akatuakaou a Iesu i te tangata, te tane e te vaine, te tamariki e te aronga mamaata.—Mata. 11:5.

11. Eaa i rauka ai i te aronga ara i te akavaitata atu kia Iesu?

¹¹ Ka mārama i reira tatou i te tumu i akavaitata atu ei te aronga ara kia Iesu. Kua kite aia i to ratou manako e kua akaari i te aroa takinga meitaki. Kua inangaro ratou i te noo ki te pae ia Iesu. (Luka 15:​1, 2) E kua akameitaki a Iesu ia ratou, te aronga tei akarongo kiaia. (Luka 19:​1-10) Kua aroa a Iesu i te tangata mei tona Metua rai. (Ioa. 14:9) Na roto i ta Iesu tuatua e te akono anga i te tangata, ka kite tatou i to Iehova aroa i te aronga ara e tona inangaro i te tauturu ia ratou. Kua tauturu a Iesu ia ratou kia taui i to ratou oraanga e kia aru iaia.—Luka 5:​27, 28.

12. Eaa ta Iesu i apii ki te tangata no runga i tona mate?

¹² Kua kite a Iesu e ka akaatinga aia i tona oraanga. Kua akakite putuputu aia i te reira ki tana au pipi e ka akaapaia e ka tamateia aia. (Mata. 17:22; 20:​18, 19) Kua kite aia e ka riro tona atinga ei apai ke i te ara mei to te ao, mei ta Ioane e te au peroveta i akakite. Kua apii katoa a Iesu i muri ake i tona akaatinga anga i tona oraanga, ka akavaitata aia i te au tangata katoa kiaia. (Ioa. 12:32) Ka akamareka te aronga ara ia Iehova na te āriki anga ia Iesu ei Atu no ratou e te aru i tona takainga vaevae. Me rave ratou i te reira, ka “matara [ra]tou i te kino.” (Roma 6:​14, 18, 22; Ioa. 8:32) No reira kua ngakau toa a Iesu e kua oronga ua i tona oraanga ei akaora i te katoatoa.—Ioa. 10:​17, 18.

13. Akapeea a Iesu te mate anga, e eaa ta teia e apii mai nei no runga ia Iehova? (Akara katoa i te tutu.)

¹³ Kua akaapaia, tapekaia, akakinoia, pikikaaia, akautungaia e kua tamamaeia a Iesu. I te openga, kua patitiia a Iesu ki runga i te rakau e kua tamateia atu aia. Iaia e akakoromaki ra i te au kino, kua mamae katoa tona Metua ko Iehova. Kua tāpu aia i tona mana ririnui no te akaora i tana tamaiti. Eaa te tumu? Kua akaperepere a Iehova i tana Tamaiti. No reira eaa aia i akatika ai iaia kia mate? No tona inangaro ia tatou. Kua karanga a Iesu: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioa. 3:16.

14. Eaa ta te atinga o Iesu e apii maira ia koe?

¹⁴ Kua riro to Iesu atinga ei akapapu i to Iehova inangaro i te uanga a Adamu e Eva. Te akaari maira te reira i to Iehova akaperepere maata ia koe. Kua akaatinga aia i te oraanga o tana tamaiti akaperepere e kua akakoromaki i te mamae no te akaora ia koe mei te ara e te mate. (1 Ioa. 4:​9, 10) Ae, ka inangaro a Iehova i te tauturu ia tatou tataki tai kia autu i te ara!

15. Eaa ta tatou ka rave kia puapingaia mei te atinga oko o Iesu?

¹⁵ Na roto i te atinga oko o ta Iehova Tamaiti akaperepere, kua akakoreia ta tatou au ara. Inara e rauka ai te reira, ka anoanoia tatou kia rave i tetai angaanga. Eaa te reira? Kua pau mai a Ioane Bapetizo e Iesu Karaiti i te reira: “Ka tataraara: te vaitata mai nei oki te basileia o te ao.” (Mata. 3:​1, 2; 4:17) No reira, ka anoanoia tatou kia tataraara e akakoreia ai ta tatou ara, e rauka ai ia tatou i te akavaitata atu kia Iehova. Inara eaa te aiteanga kia tataraara, e akapeea teia me tauturu ia tatou kia akamareka ia Iehova noatu to tatou tu ara? Ka pau mai te atikara ka aru mai i teia.