Eaa te Apiianga no Tatou Mei te Atinga Oko?

1. Eaa i puapinga ai kia aere tatou ki te Akamaaraanga o te mate o Iesu i te au mataiti ravarai?

E MEA papu ka āriki koe e e apinga aroa te atinga oko! (2 Kori. 9:15) No te mea kua mate a Iesu no tatou, ka rauka tetai pirianga vaitata noou kia Iehova. Ka rauka katoa ia koe i te noo i te enua e tuatau ua atu. Ka tau rai tatou i te akameitaki ia Iehova, koia tei oronga mai i te atinga oko o Iesu no tona aroa ia tatou! (Roma 5:8) Auraka e ngaropoina i ta Iehova e Iesu i rave no tatou, kua akaue a Iesu kia aere tatou ki te Akamaaraanga o tona mate i te au mataiti ravarai.—Luka 22:​19, 20.

2. Eaa te ka uriuriia i roto i teia atikara?

² A teia mataiti, ka raveia te Akamaaraanga a te Maanakai, rā 12 o Aperira, 2025. Kare e ekoko te tapapa nei tatou no tera tuatau. Ka puapingaia tatou me akapou tatou i tetai tuatau no te akamanako oonu i ta Iehova e Iesu i rave no tatou. I teia atikara, ka uriuri tatou eaa ta te atinga oko e apii maira no runga ia Iehova e tana Tamaiti. I te atikara ka aru mai, ka kite tatou akapeea tatou e puapinga ai mei te atinga oko e akapeea tatou me akaari i te aroa takinga meitaki no te reira.

TA TE ATINGA OKO E APII RA IA TATOU NO RUNGA IA IEHOVA

3. Akapeea te mate o tetai tangata apa kore te akarangatira anga i te mirioni ua atu tangata? (Akara katoa i te tutu.)

³ Te apii ra te atinga oko ia tatou no runga i to Iehova tu tau. (Deu. 32:4) Akapeea ra? Te akarongo kore anga a Adamu i te Atua, kua iri mai te ara e te mate kia tatou. (Roma 5:12) Kia akarangatiraia tatou mei te ara e te mate, kua oronga mai a Iehova ia Iesu ei atinga oko. Inara, akapeea te mate o tetai tangata apa kore te akarangatira anga i te mirioni ua atu tangata? Akakite te apotetoro ko Paulo: “Mei te tangata katoa e manganui i akariroia ei tangata ara i te akono kore o te tangata okotai ra [ko Adamu], manganui oki tei akariroia ei tangata tuatua-tika i te akono a te tangata okotai ra [ko Iesu].” (Roma 5:19; 1 Timo. 2:6) Karanga a Paulo, kua ara te tangata ravarai e kua mate no te mea kua akarongo kore a Adamu ia Iehova. E akarangatira mai ei ia tatou mei te ara e te mate, ka anoanoia te tangata okotai ko Iesu kia akarongo ki te Atua.

4. Eaa a Iehova i kore ei i akatika i ta Adamu uanga tei tiratiratu Kiaia kia ora e tuatau ua atu?

⁴ Ka anoanoia ainei a Iesu kia mate e rauka ai i te akaora ia tatou? Eaa a Iehova i kore ei i akatika i ta Adamu uanga tei tiratiratu Kiaia kia ora e tuatau ua atu? Penei ka manako tatou e ravenga meitaki teia no te akatikatika i te manamanata. Inara, kia Iehova kare teia i te ravenga meitaki no tona tu tau. Mei te mea atura e kare a Adamu e tana uanga i ara ana. Kare ra te reira i te mea tika.

5. Eaa te akapapu maira kia tatou e ka rave ua rai a Iehova i te mea tika?

⁵ Akapeea me kare a Iehova i oronga mai i te atinga oko, inara kua āriki aia i te au tamariki ara a Adamu kia ora e tuatau ua atu? Ka manako i reira te tangata e kua kopae te Atua i te akaari i te tu tau i roto i tana au kaveinga. Ei akaraanga, penei ka ekoko te tangata me ka akatupu rai a Iehova i tana i taputou? Eiaa tatou e manamanata. Eaa te tumu? No te mea ka rave a Iehova i te mea tika e te tau, kua akaatinga aia i tana uaorai Tamaiti. No reira, te akapapu maira aia kia tatou e ka rave ua rai aia i te mea tika.

6. Eaa tetai ravenga te akaari maira te atinga oko i to Iehova aroa ia tatou? (1 Ioane 4:​9, 10)

⁶ Noatu ka tauturu te atinga oko ia tatou kia kite i to Iehova tu tau, ka tauturu katoa te reira ia tatou kia kite meitaki i tona aroa. (Ioa. 3:16; e tatau ia 1 Ioane 4:​9, 10.) Kua tono mai a Iehova i tana tamaiti kia mate no tatou no tona inangaro kia ora tatou e tuatau ua atu e kia riro tatou ei tuanga no tona ngutuare. E akamanako: Te ara anga a Adamu, kua akaatea a Iehova iaia mei tona ngutuare. E tei tupu, kare tatou i anauia ei tuanga no te ngutuare o te Atua. Inara, na roto i te atinga oko o Iesu, ko te aronga tei irinaki e tei akarongo iaia, ka riro ratou ei tuanga no te ngutuare o te Atua. I teianei, ka akakore a Iehova i ta tatou ara e ka rauka tetai pirianga vaitata kiaia e to tatou au taeake. E mea papu, e aroa maata to Iehova ia tatou!—Roma 5:​10, 11.

7. Akapeea to Iesu mamae e te mate te tauturu anga ia tatou kia mārama i to Iehova inangaro ia tatou?

⁷ Ka mārama meitaki tatou i to Iehova inangaro ia tatou me akamanako tatou i tona mamae te kite anga i tana Tamaiti e tamamaeia ra. Akaapa a Satani e kare te au tavini e tiratiratu kia Iehova me ngatā te reira. Kia akapapu e pikikaa a Satani, kua akaruke a Iehova ia Iesu kia takinokinoia e kia mate. (Iobu 2:​1-5; 1 Pete. 2:21) Kua kite a Iehova i te tangata e aviri ra ia Iesu, kua papaia e te au vaeau e kua patiaia aia ki runga i te rakau. E oti kua akara ua a Iehova i tana Tamaiti akaperepere e tamamaeia ra e kua tamateia. (Mata. 27:​28-31, 39) E mana to Iehova i te tāpu i teia kia kore e tupu. Ei akaraanga, karanga te aronga patoi: “E akaora [te Atua] iaia i teianei,” e tika ka rauka ia Iehova i te rave i te reira. (Mata. 27:​42, 43) Inara naringa te Atua i akapera, kare i reira e rauka ia Iesu i te oronga i tona oraanga ei atinga oko e kare katoa o tatou manakonakoanga. No reira, kua akatika a Iehova i tana Tamaiti kia akakoromaki i te au mamae e tae ua atu ki tona matenga.

8. Kua mamae ainei a Iehova te kite anga i tana Tamaiti e tamamaeia ra? Akamārama mai. (Akara katoa i te tutu.)

⁸ Eiaa tatou e manako no te mea e mana ririnui to te Atua, kare aia i kite i to tatou mamae! Kua anga aia ia tatou i tona uaorai tu e tona uaorai manako, no reira kua kite meitaki a Iehova i to tetai ke mamae. Akataka ra te Pipiria e kua “akaongoongo” me kore kua mamae tikai te Atua. (Sala. 78:​40, 41) Akamanako i te akaraanga o Aberahama e Isaaka. Akakite a Iehova kia Aberahama kia oronga i tana tamaiti ei atinga. (Gene. 22:​9-12; Ebe. 11:​17-19) E akamanako tatou i to Aberahama au tu taitaia iaia e akapapa ra no te tamate atu i tana tamaiti. Mei tera katoa te taitaia maata o Iehova te kite anga i tana Tamaiti e takinokinoia ra e kua tamateia!—Akara i te vitio i runga i te jw.org Imitate Their Faith—Abraham, Part 2.

9. Ia Roma 8:​32, 38, 39, eaa ta tatou ka apii maata atu no runga i to Iehova inangaro ia koe e te au taeake?

⁹ Te apii maira te atinga oko o Iesu i to Iehova inangaro maata ia tatou, e kare i aite mei to tatou inangaro i to tatou au akaperepere e te oa piri mou. (E tatau ia Roma 8:​32, 38, 39.) Mea papu e maata atu to Iehova inangaro ia tatou. Ka inangaro ainei koe i te ora e tuatau ua atu? Ko ta Iehova tera e anoano maira noou. Ka inangaro ainei koe kia akakoreia taau ara? E inangaro maata atu to Iehova i te akakore i taau ara. E okotai apinga tana e pati maira ia tatou, kia āriki pumaana i tana apinga aroa na te irinaki e te akarongo anga kiaia. E apinga aroa te atinga oko tei akaari mai i to Iehova inangaro ia tatou. E i roto i te ao ou, ka apii maata atu tatou i tona inangaro.—Kohe. 3:11.

TA TE ATINGA OKO E APII RA IA TATOU NO RUNGA IA IESU

10. (a) Eaa a Iesu i taitaia ei no runga i tona mateanga? (e) Akapeea a Iesu te akangateitei anga i te ingoa o Iehova? (Akara katoa i te pia “Akangateiteiia te Ingoa o Iehova e te Tu Tiratiratu o Iesu.”)

¹⁰ E anoano maata to Iesu kia kite i te manako o te tangata no runga i tona Metua. (Ioa. 14:31) Kua taitaia tikai a Iesu no te mea me akaapa e me tamateia aia, ka akakino te reira i te ingoa o tona Metua. No reira aia i pure ei: “E taku Metua, kia tika, kia apai keia teianei kapu iaku nei.” (Mata. 26:39) Na te vai tiratiratu anga kia Iehova e tae ua atu ki tona mateanga, te akangateitei ra a Iesu i te ingoa o tona Metua.

11. Akapeea a Iesu te akaari anga i tona akaperepere i te tangata? (Ioa. 13:1)

¹¹ Te apii maira te atinga oko ia tatou e te akaperepere ra a Iesu i te tangata e pera tikai tana au pipi. (Mase. 8:31; e tatau ia Ioane 13:1.) Ei akaraanga, kua kite a Iesu e ka ngatā i te rave i te angaanga tutu aere i te enua e pera katoa te akaatinga anga i tona oraanga kia mate. Noatu te ngatā i ta Iesu angaanga, kua rave aia i te reira no tona inangaro i te tangata. Kua akaperepere a Iesu i te tangata na te tutu aere anga, te apii e te tauturu ia ratou. I te rā ka tamateia ai aia, kua orei a Iesu i te vaevae o tana au apotetoro, kua akamaroiroi e kua akapumaana ia ratou. (Ioa. 13:​12-15) E oti, iaia i runga i te rakau, kua tuatua a Iesu ki te tangata rave kino i te pae iaia, ka aravei raua i te Parataito, e kua pati a Iesu kia Ioane kia akono i tona mama. (Luka 23:​42, 43; Ioa. 19:​26, 27) No reira, kua akaperepere tikai a Iesu i te tangata na roto i te akono anga ia ratou ma te aroa e te takinga meitaki e kua mate katoa aia no ratou.

12. Eaa ta Iesu e rave ra no tatou i teianei?

¹² Noatu kua mate a Iesu e “okotai ua” taime, te rave nei aia i te au akaatinga anga no tatou. (Roma 6:10) Akapeea ra? Te angaanga nei rai aia kia oronga i te au mea meitaki ei puapinga no tatou. Eaa te angaanga? Te tavini nei aia ei Ariki, Taunga Maata e ei upoko no te putuputuanga. (1 Kori. 15:25; Ephe. 5:23; Ebe. 2:17) Te akaputu nei aia i te aronga akatainuia e te urupu maata, e angaanga te ka akaotiia i mua ake ka ope ei te mate maata.a (Mata. 25:32; Mare. 13:27) Te tauturu katoa ra aia i te au tavini akono meitaki kia oronga i te au kai pae vaerua kia tatou i teia tuatau openga. (Mata. 24:45) E me tutara aia i te tauatini mataiti, ka tavini ua rai aia ia tatou. No reira, kua oronga mai a Iehova i tana Tamaiti no tatou!

E APII UA ATU RAI

13. Akapeea te akamanako oonu anga me tauturu ia koe kia apii ua rai no runga i te aroa o Iehova e Iesu?

¹³ Ka apii ua atu rai koe i te aroa o Iehova e Iesu me akamanako oonu koe i ta raua i rave noou. Penei i te tuatau o te Akamaaraanga, e tatau meitaki i te au Evangeria e ā o te Pipiria. Eiaa e rapurapu i te tatau i te katoa anga o te au pene. Mari ra, e tatau marie e te akamanako i te au tumu kia akaperepere tatou ia Iehova e Iesu. E te akakite aere i taau i kite mai ki tetai ke.

14. Ia Salamo 119:​97, akapeea te kimikimi anga me tauturu ia tatou kia apii no runga i te atinga oko e tetai au apiianga ke? (Akara katoa i te tutu.)

¹⁴ Me kua papetitoia koe no tetai au mataiti, penei ka akamanako koe me e apiianga ou taau ka kite mai no runga i te tu tau o te Atua, tona aroa e te atinga oko. Ko te tika, e maata te au apiianga ou ka kite tatou. No reira, eaa taau ka rave? E tatau e te apii i te au akakiteanga i roto i ta tatou au puka. Me tatau koe i tetai irava e kare koe i mārama meitaki e rave i tetai kimikimi anga. E akamaara i te reira i te au rā e te akakite aere i taau i apii mai no runga ia Iehova e tana Tamaiti e to raua inangaro ia koe.—E tatau ia Salamo 119:97.

15. Eaa i puapinga ai i te kimikimi i te au apiianga ou i roto i te Pipiria?

¹⁵ Eiaa e akaparuparu me kare e kitea tetai apiianga ou me tatau e me kimikimi koe. E akamanako ia koe e kimi ra i tetai auro. Te maata anga o te taime, ka pou te ora me kore te rā i te kimi i te au auro rikiriki. Inara, kare koe e tuku i te ’au e ka kimi meitaki koe i te au auro. Tei maata atu i te auro, ko te kimikimi i te au apiianga ou i roto i te Pipiria! (Sala. 119:127; Mase. 8:10) No reira, e tatau ua rai i te Pipiria e te kimikimi i te au apiianga ou.—Sala. 1:2.

16. Akapeea tatou me aru i te akaraanga o Iehova e Iesu?

¹⁶ Ia koe e apii ra, e akamanako akapeea koe me taangaanga i taau e apii ra. Ei akaraanga, e aru i te tu tau o Iehova na te akono anga i tetai ma te papakitai kore. E aru i to Iesu inangaro i tona Metua e tetai ke, na te rave anga i ta Iehova e umuumu maira e te tauturu i te au taeake noatu me ngatā te oraanga. Pera katoa, e aru i te akaraanga o Iesu na te tutu aere anga ki tetai ke kia āriki ratou i ta Iehova apinga aroa o te atinga oko.

17. Eaa ta tatou ka uriuri i te atikara ka aru mai?

¹⁷ Me apii ua atu tatou no runga i te atinga oko, ka akaperepere maata tatou ia Iehova e Iesu. No to tatou aroa maata ia raua, ka maata atu to raua aroa ia tatou. (Ioa. 14:21; Iako. 4:8) No reira, e taangaanga ua rai tatou i te au mea ta Iehova i oronga mai kia apii ua rai no runga i te atinga oko. I te atikara ka aru mai, ka uriuri tatou i te au mea kia puapingaia tatou mei te atinga oko e akapeea tatou me akaari i te akameitakianga kia Iehova.