Kua Kite Ainei Koe?

Eaa i puapinga ai te imene i Iseraela i taito?

E TUANGA puapinga te imene no te ngati Iseraela i taito. Te taiku putuputu ra te Pipiria i te au apinga akatangi imene e te aronga imene. E tuanga maata te au imene i roto i te Pipiria. Ei akaraanga, kua ’atuia te au imene i roto ia Salamo, te Pe’e o Solomona e te Aue a Ieremia. Karanga tetai puka Music in Biblical Life e kua “taangaanga putuputu te ngati Iseraela i te imene i roto i to ratou oraanga.”

Imene i te au rā ravarai. Kua akaari to Iseraela i to ratou au manako na roto i te imene. (Isa. 30:29) Kua akatangi te au vaine i te tophe ma te imene e te uraura i te tuatau o te au ariki ou, me autu i te tamaki e i ko i te au oroa. (Aka. 11:34; 1 Samu. 18:​6, 7; 1 Ari. 1:​39, 40) Ka akaari katoa te ngati Iseraela i to ratou manako taitaia na roto i te imene me mate tetai. (2 Para. 35:25) Taka meitaki e “kua inangaro tikai to Iseraela i te imene,” tei taikuia e McClintock e Strong’s Cyclopedia.

Imene i roto i te are ariki. Kua mataora te au ariki o Iseraela i te imene. Kua akaue te Ariki ko Saula ia Davida kia tavini iaia ei tangata imene. (1 Samu. 16:​18, 23) I muri mai te riro anga a Davida ei ariki, kua maani aia i te au apinga akatangi, kua ’atu i te au imene reka, e kua akanoo i tetai pupu imene i ko i te iero o Iehova. (2 Para. 7:6; Amo. 6:5) Kua iki te Ariki ko Solomona i te au tane e te au vaine kia imene i ko i te are ariki.—Kohe. 2:8.

Imene no te akamorianga. Ko te imene tetai apinga puapinga ta te ngati Iseraela i rave no te akamori ia Iehova. E 4,000 tangata tei akatangi i te imene i ko i te iero i Ierusalema. (1 Para. 23:5) Kua akatangi ratou i te sumebalo, nabala, te kinura e te au pu. (2 Para. 5:12) Inara kare ko teia aronga karape imene anake tei akamori ia Iehova na roto i te imene. E maata to Iseraela tei imene i te au Pe’e Akanukanuka me teretere ratou ki Ierusalema no te au oroa. (Sala. 120-134) E kia tau ki te au tataanga ngati Iuda, kua imene to Iseraela i te au Salamoa i te tuatau o te kaikai anga Pasa.

E puapinga katoa te imene ki to te Atua iti tangata i teia tuatau. (Iako. 5:13) E tuanga te reira no te akamorianga. (Ephe. 5:19) Ka taokotai te reira ia tatou ei au Kerititiano. (Kolo. 3:16) E ka akamaroiroi ia tatou me taitaia. (Anga. 16:25) Ko te imene tetai ravenga puapinga no te akaari i to tatou irinaki ia Iehova e to tatou inangaro iaia.