Akatangi Imene te Akamareka ra i te Atua

Kua akatakaia te akatangi imene e ko “tetai mea taito roa atu e te mea tau o te au ati meitaki ravarai.” Mei te reo rai, e apinga aroa umere tikai te reira te akatakake ra i te au tangata mei te au manu aaere. Te akakeu ra te akatangi imene i te au manako ngakau. Ka rauka i te reira i te akareka i te taringa, ka noonoo ua ki roto i te manako e, tei maata rava atu, ka akamareka te akatangi imene i te Atua.

MEI ta te Pipiria e akaari ra, e iti tangata akatangi imene tikai to Iseraela. E “ati maata tikai te akatangi imene i te tuatau Pipiria taito,” i tuatuai te Unger’s Bible Dictionary. Ei tuanga no te oraanga i te au ra, kua raveia te imene anga e te akatangi anga apinga imene i roto i ta ratou akamori anga. Inara ko te reo tangata tei taangaanga maataia.

Kua akataoonga te Ariki ko Davida i te au komono i roto i te ngati Levi “i te angaanga imene” i te tapenakara, i mua ake te iero tei patuia e Solomona, tana tamaiti, i te akatapu angaia. (1 Paraleipomeno 6:​31, 32) I te tae anga atu te aruna koreromotu, te komono ra ia Iehova i reira, ki Ierusalema, kua akapapa a Davida i etai o te ngati Levi ‘kia tuatua, e kia akameitaki, e kia akapaapaa ia Iehova.’ Kua kapiti atu ratou ma to ratou reo akapaapaa anga “te au nabala e te au kinura, . . . i te au sumebalo ra, . . . i te au pu.” Kua “akaikiia [teia au tangata] te ingoa, ei akameitaki ia Iehova, no te mea e tu tona aroa e rimua.”​—1 Paraleipomeno 16:​4-6, 41; 25:1.

Te pee ‘to Iehova tu aroa e rimua’ te mama maira e manganui te taime i roto i te Salamo, te puka Pipiria te taiku maata ra i te akatangi imene. Ei akaraanga, te akanoo ra i te tuanga rua o te 26 irava tataki tai o Salamo 136. “Te oronga maira tona poto anga i te reira tei akatauia ki te au ngutu o te tangata,” i tuatuai tetai tangata kite Pipiria. “Ko te katoatoa, te akarongo ra i te reira, ka maara i te reira.”

Te au tataanga i runga ake i te taramo te akakite maira i te taangaanga maata anga o te au apinga akatangi. Te taiku ra a Salamo 150 i te pu, te kinura, te tophe, te koe, e te sumebalo, kapiti mai i te nabala. Noatu rai, ko te apinga manako maataia ko te reo tangata. Te raurau maira te irava 6: “Ko tei uti i te aʼo ra, kia akapaapaa anake ïa ia Iehova. Alelu Ia.”

I te mea te akakite ra te akatangi imene i to tatou au manako ngakau, kua akakeu te au manako mii i te tuatau Pipiria i te au pee me kare imene aue. Inara, kua kotingaia teia tu imeneanga, i roto i te au papaanga akatangi imene a Iseraela. “I roto ua i tetai pee me kare aueanga ka tau ei tetai tu atu anga ki te akatangi imene me kare te tangi anga e te akamaata anga o te tuatua ma,” i akakite ei te enetaikoropitia Pipiria te Insight on the Scriptures.a

Kua imene a Iesu e tana au apotetoro tiratiratu i te au imene akapaapaa kia Iehova i te po i mua ake i to Iesu matenga, kare e ekokoanga e kua taiku i te au tuatua o te Salamo Aleluia. (Salamo 113-118) Mei teaa atura te riro anga teia ei akamaroiroi i te au pipi a Iesu kia autu ua atu noatu e ka ngere ratou i to ratou Pu! Maata atu i te reira, ko to ratou akakoroanga kia vai tiratiratu ei au tavini o te Ngateitei Rava i te ao katoa e pini ua ake, ko Iehova, penei kua akaoonuia ia ratou e imene ra i te pee e rima taime “ka tu oki tona aroa e rimua.”​—Salamo 118:​1-4, 29.

Kua imene te au Kerititiano mua o Ephesia e Kolosa i te ‘salamo e te imene i te Atu’ (tika tikai, “te au pee”). Ki teia kua kapiti ratou i te ‘imene a te Vaerua’ kia imeneia i roto i to ratou ngakau. (Ephesia 5:19; Kolosa 3:16) Na roto i te imene e te tuatua, te taangaanga tau ra ratou i to ratou au vaa kia akakite i te akapaapaaanga. Kare ainei a Iesu i akakite e “no te ki oki o te ngakau ra e tuatuaʼi te vaa”?​—Mataio 12:34.

Akatangi Imene te Akamareka Kore ra i te Atua

Kare te katoa anga o te akatangi imene i roto i te Pipiria e akamareka ana i te Atua. Ka akamanako ana i te kite anga tei tupu i te Maunga Sinai, te ngai i raukai ia Mose te Ture, kapiti mai te Ture Ngauru. I te eke mai anga a Mose ki raro i te maunga, eaa tana i rongo atu? “Kare tera ra i te reo maeva tamaki,” “kare oki i te aue eke anga,” e “reo peʼe ra.” E akatangi imene teia te piri atura ki te akamori anga itoro, e ravenga tei akakeu i to te Atua tu mareka kore e kua tupu mai i roto i te matenga vaitata i te 3,000 o te aronga akatupu akatangi imene.​—Exodo 32:​18, 25-28.

Noatu ka rauka i te au tangata i te atu, te akatangi, e te rekareka i etai au tu akatangi imene, kare e tupu ana e ka akamareka pouroa te reira i te Atua. No teaa ra? Te akamarama maira te apotetoro Kerititiano ko Paulo e: “Kua rave katoatoa oki i te ara, e kua ngere i te akameitaki a te Atua.” (Roma 3:23) Te au rave anga matauia anuanu peikani, te apiianga mate kore o te meta tangata, e te akamori anga ia Maria e ko te “metua vaine o te Atua” te akatutu putuputuia ra i roto i te au tumu tuatua o te au atu anga akatangi imene taito. Inara, te akangateitei kore ra teia au irinaki anga e te au rave anga i te Atua mou, no te mea te patoi ra ratou i tei akakiteia mai i roto i tana Tuatua akauruia, te Pipiria.​—Deuteronomi 18:​10-12; Ezekiela 18:4; Luka 1:​35, 38.

Akonoanga i te Iki Anga Tau no te Akatangi Imene

E umere tikai te iki anga no te akatangi imene te vai nei. Kua akakoroia te vai o tetai au compact disc e kia akakeu i tetai tangata oko kia oko i etai tu au imene tei rekotiia. Inara me te inangaro ra tei akamori i te Atua i te akamareka Iaia, ka akono aia i te tu matakite e ka iki pakari tikai i te kopae i te akatangi imene tei akakeuia e te au irinaki anga akonoanga pikikaa me kare te tou tika ra i te tu akono tau kore e te apiianga temoni.

Ko Albert, tei tavini ana ei mitinari Kerititiano i Aperika, kua aaki e kua meangiti tona tuatau no te akatangi anga i te piani i reira. Inara, e akarongo ripiti ua ana aia i te au rekoti anga akatangi roaia tana i apai atu ma ia. I tona enua kainga, te atoro nei a Albert i te au putuputuanga Kerititiano ei akaaere tutaka. Kua kotingaia tona tuatau no te akarongoanga i te akatangi imene. “Ko taku tangata atu reka roa atu ko Beethoven,” i akakite mai ei aia. “I te au mataiti ravarai, kua akaputuputu au i tana au rekotianga te au symphony, te au concerto, te au sonata, e te au quartet.” I te akarongoanga ki teia kua apai mai i te tuatau rekareka maata kiaia. E tikai, e tuke rai to tetai tangata inangaro i te akatangi imene, inara ei Kerititiano te akamanako ra tatou i ta Paulo ako anga: “E teianei, te kai ra e te inu ra oki, e te au mea ravarai ta kotou e rave na, e rava anake ïa ma te akakakā i te Atua.”​—1 Korinetia 10:31.

Akatangi Imene e te Akatapuanga

Ko to Susie inangaro mua koia oki ko te akatangi imene. “Kua akamata au i te akatangi i te piani i te 6 mataiti, te violin i te 10, e i te openga ra te kinura i te 12,” i akamarama mai ei aia. I muri mai kua aere atu a Susie ki te Royal College of Music i London, Engarani, kia apii no runga i te kinura. Kua apii aia e a mataiti ma tetai vaine Paniora kite i te akatangi kinura e tetai atu mataiti i te Paris Conservatoire, te raukaanga mai te turanga teitei i roto i te akatangi imene e pera katoa e tetai au tiporoma no te akatangi anga i te kinura e te apiianga i te piani.

Kua taokotai atu a Susie ki te putuputuanga o te Au Kite o Iehova i London. I reira kua kitea e ia te inangaro ngakau tae e te aroa i roto i te Au Kite o Iehova. Ma te marie, kua tupu maata tona inangaro ia Iehova, e kua akakeu tona inangaro i tana angaanga kia kimi i etai atu au tu no te tavini anga iaia. Kua taki atu teia ki te akatapuanga e te papetitoanga. “I te rauka anga te akatangi imene ei angaanga e tu oraanga akatapu katoaia, no reira kare i matau koreia tetai oraanga akatapuia kiaku,” i akakite ei a Susie. Kua meangiti mai tona tuatau akatangi anga ki te tangata iaia e angaanga ra i roto i te angaanga orometua Kerititiano te tutuanga i te tuatua meitaki o te Patireia i te akarongoanga i ta Iesu au ikuikuanga.​—Mataio 24:14; Mareko 13:10.

I teianei te pou nei iaia e meangiti te taime no te akatangi imene, eaa tona manako? “I etai taime e manata ana au e kare e maata ana te tuatau no te akatangi ua,” i aaki ei aia, “inara te akatangi nei rai au i taku apinga akatangi imene e te rekareka ra i te akatangi imene. E apinga aroa te akatangi imene no ko mai ia Iehova. Te rekareka maata nei au i teianei e kua tuku au i tana angaanga i te ngai mua o toku oraanga.”​—Mataio 6:33.

Akatangi Imene te Akamareka ra i te Atua

Te akapaapaa putuputu ra a Albert raua ko Susie e tetai atu vaitata i te ono mirioni Au Kite no Iehova i te Atua ko Iehova ma te akatangi imene. I te au uipaanga Kerititiano tei raveia i te au Are Uipaanga Patireia i roto i te 234 enua, te akamata ra e te akamutu ra ratou i ta ratou au uipaanga, i te ngai ka rauka, na roto i te imeneanga i te au imene kia Iehova. I roto i te tangi anga teitei e te akaaka, te apai ra te au imene manea i te au imene akanooia ki runga i te Tuatau Tapu i te akapaapaaanga i te Atua ko Iehova.

Te akateitei ra tei tae atu i to ratou au reo i te imene pumaana anga e e Atua akono a Iehova (Imene 44). Te imene ra ratou i te imene akapaapaa kia Iehova (Imene 190). Te akakite ra ta ratou au imene i te au rekareka anga e te au apainga a te au akataeakeanga Kerititiano, te oraanga Kerititiano, e te au tu Kerititiano. Te kapitianga ki to ratou tu rekareka koia oki te tuke tuke i te tu o te akatangi imene tei atuia e te Au Kite no Asia, Autireria, Europa, e Marike Apatokerau e te Apatonga i taangaanga i te atuanga i te au imene.b

“E imene ia Iehova i te imene ou: e imene ia Iehova, e te pa enua katoa nei. E imene ia Iehova, e akameitaki i tona ingoa,” ko te au tuatua akamataanga o tetai imene ngateitei mekameka tei tataia i te tuatau o te tata taramo. “E akakite i te ora nana i tera rā i tera rā. E akakite i tona kakā i rotopu i te au etene; tana ra au angaanga taka ke i roto i te au tangata katoa ra.” (Salamo 96:​1-3) Ko teia ta te Au Kite o Iehova e rave nei i toou ngai, e te pati atu nei ratou ia koe kia kapiti mai i te imeneanga i te imene akapaapaa anga. Ka turouia mai koe i to ratou au Are Uipaanga Patireia, i reira ka apii koe e akapeea me akapaapaa ia Iehova ma te akatangi imene te akamareka ra iaia.

[Tataanga Rikiriki i Raro]

[Tutu i te kapi 28]

Imeneanga i te au akapaapaa anga kia Iehova