Ta Iehova Akakoreanga Ara​—Akaperepere Tatou i te Reira

1-2. Akapeea te turanga o te tangata i aite ei ki te mapu tane i roto i te parakarapa 1?

AKAMANAKO ana i tetai mapu tane, tei utuutuia ki roto i tetai kopu tangata apinganui. I tetai rā, kua tupu tetai tumatetenga kua mate poitirere tona nga metua. Kua taitaia tikai te mapu tane. Inara, e nuti kino akaou tetai. Kua kite aia e kua kaimoumou tona nga metua i ta raua moni e e maata ta raua kaiou. No reira, kare ana moni e kua anoanoia aia kia tutaki i te au kaiou a tona nga metua e te māro nei te tangata iaia kia tutaki viviki i te reira. Kare ra e rauka iaia i te tutaki i te kaiou.

² Kua aite katoa to tatou turanga ki tera mapu tane. E nga tangata apa kore to tatou nga metua mua ko Adamu e Eva, tei noo i roto i tetai parataito manea. (Gene. 1:27; 2:​7-9) E manakonakoanga to raua no te oraanga mataora e tuatau ua atu. Inara kua tupu te tumatetenga. Kua ngere raua i to raua kainga Parataito e te oraanga mutu kore. Eaa ta raua i akaruke no ta raua tamariki? Karanga te Pipiria: “No te tangata okotai ra [ko Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Kua iri mai te ara e te mate ki te uanga a Adamu. Mei tetai āka kaiou rai kare e rauka ia tatou i te tutaki.—Sala. 49:8.

3. Eaa te ara i akaaiteia ai ki te “kaiou”?

³ I roto i te Pipiria, kua akaaiteia te ara ki te “kaiou.” (Mata. 18:​32-35) Me ara tatou, mei te mea rai e kaiou ta tatou kia Iehova. Ka anoanoia tatou kia tutaki i te utunga no te ara. Me kare tatou e tutaki i te kaiou, na te mate anake e takore i te reira.—Roma 6:​7, 23.

4. (a) Eaa te ka tupu ki te aronga ara pouroa naringa kare o ratou tauturu? (Salamo 49:​7-9) (e) I roto i te Pipiria, eaa te aiteanga o te “ara”? (Akara i te pia “Ara.”)

⁴ Ka rauka akaou ainei ia tatou ta Adamu e Eva i ngere? Kare e rauka ia tatou. (E tatau ia Salamo 49:​7-9.) Naringa e kare o tatou tauturu, ka ngere tatou i te manakonakoanga no te oraanga mutu kore e te tuakaouanga. Ka aite i reira to tatou mate mei to te manu rai.—Kohe. 3:19; 2 Pete. 2:12.

5. Akapeea to tatou Metua aroa te tutaki anga i te kaiou o te ara? (Akara katoa i te tutu.)

⁵ Akamanako i te mapu tane tei taikuia i te akamataanga. Eaa tona manako me akakite mai tetai tangata apinganui e ka tutaki pouroa aia i te kaiou? Kare e ekoko ka āriki rekareka te mapu tane i teia apinga aroa. Mei te reira rai, kua oronga mai to tatou Metua aroa ko Iehova i tetai apinga aroa no te tutaki i te kaiou, te ara tei iri mai ki runga ia tatou mei ia Adamu. Kua akamārama a Iesu: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioa. 3:16) Ka tauturu teia apinga aroa ia tatou kia akatupu i tetai pirianga meitaki kia Iehova.

6. Eaa te au tuatua Pipiria ta tatou ka uriuri i roto i teia atikara e no teaa ra?

⁶ Eaa te puapinga o teia apinga aroa umere no te akakore i ta tatou au ara? Ka pauia teia uianga me akara tatou i te au tuatua i roto i te Pipiria mei te akaongi, tapokiangaara, tarangaara, oko, akaoraanga e te tu tika. I roto i teia atikara, ka uriuri tatou i te aiteanga o teia au tuatua. Me akamanako oonu tatou i ta Iehova i rave no te akakore i ta tatou ara, ka akaperepere maata tatou iaia.

TE AKAKOROANGA: KIA AKAONGIIA TATOU KIA IEHOVA

7. (a) Eaa atu ta Adamu e Eva i ngere? (e) Ei uanga na Adamu e Eva, eaa ta tatou ka anoanoia kia rave? (Roma 5:​10, 11)

⁷ Kua ngere a Adamu e Eva i te oraanga mutu kore e to raua pirianga akaperepere ki to raua Metua, ko Iehova. I te akamataanga e tamariki a Adamu e Eva na te Atua. (Luka 3:38) Inara i te akarongo kore anga raua kia Iehova, kua akaateaia raua ki vao i tona ngutuare i mua ake ka anau tamariki ei raua. (Gene. 3:​23, 24; 4:1) Ei uanga na raua, ka anoanoia tatou kia akaongiia kia Iehova. (E tatau ia Roma 5:​10, 11.) Tera te aiteanga, ka anoanoia tatou kia akatupu i tetai pirianga meitaki kia Iehova. Kia tau ki tetai puka, ko te tuatua Ereni no te “akaongi,” tona aiteanga kia “akariro i tetai enemi ei oa.” Te mea umere, na Iehova i akanoo i teia ravenga kia riro akaou tatou ei oa nona. Akapeea?

TE AKANOONOOANGA: TAPOKIANGAARA

8. Eaa te (a) tapokiangaara? (e) tarangaara?

⁸ Ko te tapokiangaara e akanoonooanga na Iehova no te aronga ara kia akatupu i tetai pirianga meitaki kiaia e kia riro ei au oa nona. Te ō maira te mono anga i tetai nga apinga e aiteite to raua turanga. Na roto i teia ravenga, ka rauka i te akaokiia mai tetai apinga tei ngaro. Te taangaanga ra te Tuatua Tapu Ereni Kerititiano i te tuatua aiteite no te “tapokiangaara,” koia oki ko te tarangaara. (Roma 3:25) Ko te tarangaara te ravenga e rauka ai te pirianga ’au ma te Atua e kia riro ei oa nona.

9. Eaa te ravenga ta Iehova i akanoo no te akakore i te ara a te ngati Iseraela?

⁹ E ravenga ta Iehova i akanoo no te ngati Iseraela kia akakoreia ta ratou ara e kia rauka tetai pirianga meitaki kiaia. I Iseraela, kua akono ratou i te oroa no te Rā Tapokiangaara i te au mataiti. I te reira rā, ka oronga te taunga maata i te atinga manu no te iti tangata. Inara, kare e rauka i te atinga manu i te takore i te ara a te tangata no te mea e puapinga atu te tangata i te manu. Me tataraara te ngati Iseraela e me oronga i te au atinga ta Iehova e umuumu maira, ka akakore aia i ta ratou ara. (Ebe. 10:​1-4) Pera katoa, kua riro te Rā Tapokiangaara e te au atinga manu ei tauturu i te ngati Iseraela kia kite i to ratou tu ara e kia rauka tetai ravenga ke atu no te takore takiri i te reira.

10. Eaa ta Iehova akanoonooanga tinamou no te akakore i te ara?

¹⁰ E akanoonooanga tinamou ta Iehova no te akakore i te ara a te tangata. Kua oronga mai aia i tana Tamaiti akaperepere ei atinga kia “apai ke aia i te ara a te tangata e manganui.” (Ebe. 9:28) Kua “oronga [a Iesu] i tona ora ei oko no te tangata e manganui.” (Mata. 20:28) Eaa te oko?

TE TUTAKI: KO TE OKO

11. (a) I roto i te Pipiria, eaa te oko? (e) Naai anake e tutaki i te oko?

¹¹ I roto i te Pipiria, ko te oko te tutaki no te tapoki i te ara e te akatupu akaou i te ’au.a Kia Iehova, ko te ravenga anake teia no te akaoki mai i ta Adamu e Eva i ngere. Akapeea ra? E akamaara, kua ngere a Adamu e Eva i to raua tu apa kore e te oraanga mutu kore. No reira, ko te oko te tutaki tei aite ki ta raua i ngere. (1 Timo. 2:6) Ka tutakiia te reira e tetai tangata (1) apa kore; (2) tei rauka te ora mutu kore i te enua nei; e te (3) tei puareinga i te oronga e te akaatinga i tona ora no tatou. Na roto i teia ravenga, ka riro te ora o tera tangata ei mono e ei akaoki mai i ta Adamu i ngere.

12. Eaa i rauka ai ia Iesu i te tutaki i te oko?

¹² E akamanako ana e toru tumu i rauka ai ia Iesu i te tutaki i te oko. (1) E tangata apa kore aia, “tei kore roa i rave i te ara.” (1 Pete. 2:22) (2) No te reira, kua rauka iaia te ora e tuatau ua atu i te enua nei. (3) Kua puareinga ua aia i te mate e te oronga i tona ora no tatou. (Ebe. 10:​9, 10) Ei tangata apa kore, kua aite a Iesu ki te tangata mua ko Adamu, i mua ake ka ara ai a Adamu. (1 Kori. 15:45) Na roto i to Iesu matenga, kua tapoki aia i te ara a Adamu koia oki kua mono aia i ta Adamu i ngere. (Roma 5:19) Kua riro a Iesu e ko “te Adamu openga.” Kare e anoano akaouia tetai tangata apa kore kia tutaki i ta Adamu i ngere. No reira, kua mate a Iesu e “okotai rava” taime.—Ebe. 7:27; 10:12.

13. Eaa te tuke i rotopu i te tapokiangaara e te oko?

¹³ Eaa i reira te tuke i rotopu i te tapokiangaara e te oko? Ko te tapokiangaara te ravenga e akatupu akaou ei te Atua i te pirianga meitaki i rotopu iaia e te tangata. Ko te oko te tutaki no te tapoki i te ara a te tangata. Kua akatutuia te reira e te toto o Iesu tei akamaringiia no tatou.—Ephe. 1:7; Ebe. 9:14.

TE OPENGA: TE AKAORAANGA E TE TU TIKA

14. Eaa ta tatou ka uriuri e no teaa ra?

¹⁴ Eaa te ka rauka mai no teia akanoonooanga o te tapokiangaara? E maata te au tuatua Pipiria tei akataka mai i te au akameitakianga. Akapeea tatou e puapinga ai mei ta Iehova i rave no tatou? Ei pau i te reira uianga, ka uriuri tatou i te aiteanga o te nga tuatua Pipiria te ka tauturu ia tatou kia mārama i te tumu me akakore a Iehova i ta tatou ara.

15-16. (a) I roto i te Pipiria, eaa te aiteanga o te tuatua “akaoraanga”? (e) Eaa te puapinga no te reira?

¹⁵ I roto i te Pipiria, te akataka ra te akaoraanga i te akamataraanga e te akakoreanga ara tei tutakiia no te oko. Kua akamārama te apotetoro ko Petero: “Kua kite oki kotou e, kare kotou i okoia i te mea kino ua ra, mei te ario, e te auro, i ta kotou tuatua marikonga kore i tukuia mai e to kotou ai metua ra. I te toto apinga maata ra o te Mesia ra, mei to te punua mamoe kino kore e te maki kore.”—1 Pete. 1:​18, 19.

¹⁶ Na roto i te atinga oko, ka akarangatiraia tatou mei te ara e te mate. (Roma 5:21) E tumu anga puapinga ta tatou kia akameitaki ia Iehova e Iesu no tei akaora mai ia tatou na roto i te toto o Iesu me kore tona oraanga apa kore.—1 Kori. 15:22.

17-18. (a) Eaa te aiteanga kia kapikiia ei aronga tuatua tika, e ei au tavini no Iehova? (e) Eaa te puapinga no te reira?

¹⁷ Karanga te Pipiria, e ko te au tavini o Iehova e tu tika to ratou. Ko tera te aiteanga kare aia e anoano ia tatou kia tutaki i te utunga no ta tatou ara. Noatu te reira, te akono nei rai a Iehova i tana au kaveinga tuatua tau. Kare no to tatou maroiroi, i kapiki ei a Iehova ia tatou ei aronga tuatua tika. E rikarika ana Aia i te ara. Inara, kua puareinga a Iehova i te akakore i ta tatou ara no te mea kua irinaki tatou i te akanoonooanga no te tapokiangaara e te oko ta raua ko Iesu i rave kia akakore i ta tatou ara.—Roma 3:24; Gala. 2:16.

¹⁸ Eaa te au akameitakianga no tatou? No te aronga tei ikiia kia tutara ma Iesu i te rangi, kua ārikiia ratou ei tamariki na te Atua. (Tito 3:7; 1 Ioa. 3:1) Kua akakoreia ta ratou au ara. Mei te mea rai e kare rava ratou i rave ana i te ara e no reira ka tau ratou no te Patireia. (Roma 8:​1, 2, 30) No te aronga ka noo i te enua nei e tuatau ua atu, no te mea kua kapikiia ratou ei aronga tuatua tika e ei au oa no te Atua kua akakoreia ta ratou au ara. (Iako. 2:​21-23) Ko te urupu maata te ka ora ia Aramagido, kare rava ratou e mate. (Ioa. 11:26) Pera katoa, e tuakaouanga to tei mate “te aronga tuatua-tika” e “te aronga tuatua-tika kore.” (Anga. 24:15; Ioa. 5:​28, 29) Ka rauka i reira i te au tavini akarongo o Iehova i te enua nei “te rangatira meitaki o te tamariki a te Atua.” (Roma 8:21) Te tapapa nei tatou i te tuatau me riro tatou ei tamariki apa kore no to tatou Metua ko Iehova!

19. Akapeea to tatou turanga i meitaki atu ei, no ta Iehova e ta Iesu i rave? (Akara katoa i te pia “Te Puapinga no Tatou.”)

¹⁹ Ae, kua aite to tatou turanga ki te mapu tane tei taikuia i mua ana. Kua ngere aia i te apinga e kua anoanoia aia kia tutaki i te āka kaiou a tona nga metua. Inara ka tauturu a Iehova ia tatou. Na te tauianga i to tatou turanga na roto i te oronga anga mai i te ravenga no te akakore i ta tatou ara. Kua tutaki a Iesu i te reira na roto i te oko. No to tatou akarongo ia Iesu Karaiti, kua akarangatiraia tatou mei te ara e te mate. Me akakore a Iehova i ta tatou ara, mei te mea rai e kare te reira i tupu ana. Inara, ko te mea puapinga rava atu ka rauka ia tatou tetai pirianga meitaki ki to tatou Metua aroa i te rangi ko Iehova.

20. Eaa ta tatou ka uriuri i te atikara ka aru mai?

²⁰ Me akamanako oonu tatou i ta Iehova e Iesu i rave no tatou, ka inangaro tatou i te akameitaki ia raua ma te ngakau katoa. (2 Kori. 5:15) Naringa kare raua i tauturu mai ia tatou, kare takiri o tatou manakonakoanga! Inara, eaa te puapinga o ta Iehova akakoreanga ara no tatou tataki tai? Ka pau te atikara ka aru mai i teia uianga.