Tauturu a Iehova ia Tatou Kia Akakoromaki

1. Eaa i ngatā ai ia tatou i te akakoromaki, inara naai e tauturu ia tatou? (1 Petero 5:10)

TUKEKE te au manamanata e tupu ana kia tatou, no reira ka ngatā rai i te akakoromaki. Tetai pae, te na roto ra i te au maki kino. Tetai kua takake to ratou au akaperepere. E tetai pae, te takinokinoia ra e to ratou ngutuare tangata e te kavamani. (Mata. 10:​18, 36, 37) Noatu te au kino e tupu ra kia koe, papu e ka oronga mai a Iehova i te maroiroi kia koe.—E tatau ia 1 Petero 5:10.

2. Eaa i rauka ai ia tatou i te akakoromaki?

² Te aiteanga kia akakoromaki, koia oki kia vai tiratiratu kia Iehova e te tavini iaia ma te rekareka noatu te manamanata, te takinokinoanga e te timataanga. Ka rauka ia tatou i te akakoromaki me irinaki tatou e ka oronga mai a Iehova i te “mana maata meitaki.” (2 Kori. 4:7) I teia atikara, ka uriuri tatou e ā au ravenga e tauturu ana a Iehova ia tatou kia akakoromaki. E eaa ta tatou ka rave kia puapingaia.

PURE

3. Eaa te pure i riro ei e ravenga umere i te karangaranga kia Iehova?

³ Oronga mai a Iehova i tetai ravenga umere kia akakoromaki tatou. Noatu e aronga ara, ka rauka ia tatou i te tuatua kiaia e te akarongo maira aia. (Ebe. 4:16) Akamanako ana: Ka pure tatou kia Iehova i te au taime ravarai. Ka akarongo mai aia noatu to tatou reo e te ngai e pure ra. (Iona 2:​1, 2; Anga. 16:​25, 26) Me taitaia tatou, e kare e kite i ta tatou ka tuatua, te mārama ra a Iehova. (Roma 8:​26, 27) E ravenga umere te karangaranga na roto i te pure kia Iehova!

4. Akapeea tatou i kite ei me pure tatou kia Iehova, ka tauturu mai aia?

⁴ I roto i tana Tuatua, akapapu mai a Iehova e “kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioa. 5:14) Ka pati ainei tatou kia akakoromaki? Ae! Te anoano maira a Iehova i te tauturu kia akakoromaki tatou. Akapeea tatou i kite ei? Akakite a Iehova me vai tiratiratu tatou kiaia, te akaari ra tatou e pikikaa a Satani te Tiaporo. (Mase. 27:11) Karanga te Pipiria, inangaro a Iehova i te ‘oronga mai i te maroiroi ki te aronga i tika te ngakau iaia.’ (2 Para. 16:9) No reira, papu ia tatou e ka oronga mai a Iehova i tona mana e te maroiroi kia akakoromaki tatou.—Isa. 30:18; 41:10; Luka 11:13.

5. Akapeea te pure me tamarū ia tatou? (Isaia 26:3)

⁵ Karanga te Pipiria me pure akatenga tatou ‘na te au o te Atua, ko tei maata ua atu i te kite tangata, e akamaroiroi mai i to tatou ngakau e to tatou manako.’ (Phili. 4:7) Akamanako ana eaa te aiteanga. E tupu ana te manamanata ki te aronga kare e tavini ana ia Iehova, no reira ka rave ratou i te au peu tukeke kia ngaro to ratou manamanata. Ei akaraanga, ka tauta tetai pae i te takore takiri i to ratou manako taitaia kia marū ratou. Me rave tetai tangata i teia, ka akatereia aia e te au temoni. E peu kino tikai. (Akaaite kia Mataio 12:​43-45.) Noatu ka marū tetai pae mei teia, kare ra ratou e kite i te ’au o Iehova. Irinaki pu tatou kia Iehova, no reira ka pure e ka pati tatou i tona ’au. Taputou mai aia i te “au nuingangare” kia tatou. (E tatau ia Isaia 26:3.) Na roto i te akamaara anga i te au irava pumaana ka akamaroiroi ia tatou.—Sala. 62:​1, 2.

6. Eaa taau ka pati me pure koe kia Iehova? (Akara katoa i te tutu.)

⁶ Taau ka rave. Ia koe e akakoromaki ra “e tuku koe i taau apainga kia Iehova” e te pati katoa i tona ’au. (Sala. 55:22) E pati i tona pakari kia tauturu ia koe kia akakoromaki i toou manamanata. (Mase. 2:​10, 11) Inara, auraka e ngaropoina i te akameitaki ia Iehova. (Phili. 4:6) E akamanako tana tauturu anga ia koe i te au rā e te akameitaki iaia no te reira. Noatu te mamae nei koe ka tauturu ua rai a Iehova ia koe.—Sala. 16:​5, 6.

TE PIPIRIA

7. Akapeea te Pipiria me tauturu ia tatou kia akakoromaki?

⁷ Oronga mai a Iehova i tana Tuatua ei tauturu ia tatou kia akakoromaki. Te akapapu maira te au irava i roto i te Pipiria e ko tera ta Iehova ka rave. Ei akaraanga, karanga a Mataio 6:8 e: “Kua kite ana to kotou Metua i te au mea e tau ia kotou, ou kotou i pati atu ei.” Tuatua a Iesu i te reira no te mea kua kite meitaki aia ia Iehova. No reira, mea papu me mamae tatou kua kite a Iehova akapeea me tauturu ia tatou. Te akaari maira te Pipiria i to Iehova manako akapumaana.—Sala. 94:19.

8. (a) Oronga mai i tetai kaveinga Pipiria te ka tauturu ia tatou kia akakoromaki. (e) Eaa ta tatou ka rave kia maara ia tatou te au kaveinga Pipiria?

⁸ Tauturu te au kaveinga Pipiria ia tatou kia akakoromaki. Oronga mai te reira i te au akoanga pakari te ka tauturu ia tatou kia rave i te au ikianga meitaki. (Mase. 2:​6, 7) Ei akaraanga, te akamaroiroi maira te Pipiria ia tatou eiaa e manamanata i to apopo, mari ra e irinaki kia Iehova i te au rā ravarai. (Mata. 6:34) No reira, me tatau tatou i te Pipiria i te au rā ma te akamanako i te reira, ka māmā ua ia tatou i te akamaara i te au kaveinga Pipiria kia akakoromaki.

9. Me tatau tatou i te Pipiria akapeea a Iehova te tauturu anga i tona au tavini, eaa ta tatou ka rave?

⁹ I roto i te Pipiria, ka tatau tatou i te oraanga o tetai tei irinaki kia Iehova no te tauturu. (Ebe. 11:​32-34; Iako. 5:17) Me akamanako tatou i ta Iehova tauturu anga ia ratou, ka akaketaketaia to tatou irinakianga. Koia to “tatou akapuanga e te maroiroi, e tauturu vaitata roa ïa kia rokoia e te tumatetenga.” (Sala. 46:1) No reira, me akamanako tatou i te tu tiratiratu o te au tavini o Iehova, ka akakeuia tatou kia aru i to ratou akaraanga.—Iako. 5:​10, 11.

10. Eaa taau ka rave kia tauturu te Pipiria ia koe?

¹⁰ Taau ka rave. E tatau i te Pipiria i te au rā e te tata i te au irava akapumaana. E maata te tangata e tatau ana i te tia i te popongi e ka akamaara ratou i te reira. Kua kite mai a Mariea i te puapinga o te reira, iaia e akono ra i tona nga metua e maki cancer to raua. Eaa tei tauturu ia Marie kia akakoromaki? Karanga aia, “I te au popongi ka tatau au i toku tia i roto i te puka Akara Matatio i te Tuatua Tapu i te au Rā ma te akamanako marie i te reira. Kua tauturu teia iaku kia akamou ki runga ia Iehova e tana au apiianga e kare ki toku uaorai au manamanata.”—Sala. 61:2.

TE AU TAEAKE E TE AU TUAINE

11. Eaa te akapapuanga e kare ko tatou anake ua te akakoromaki ra?

¹¹ Oronga mai a Iehova i te au taeake e te au tuaine kia tauturu ia tatou kia akakoromaki. Te kite anga e te na roto ra “to [tatou] au taeake katoa i te ao nei taua au mate,” te akapapu maira te reira e kare ko tatou anake ua te mamae ra. (1 Pete. 5:9) Tera te aiteanga, kua vai tiratiratu te au taeake e te au tuaine kia Iehova noatu to ratou au mamae. No reira, ka rauka katoa ia tatou i te akakoromaki!—Anga. 14:22.

12. Akapeea te au taeake e te au tuaine me tauturu ia tatou, e eaa ta tatou ka rave? (2 Korinetia 1:​3, 4)

¹² Na roto i ta ratou tuatua e ta ratou angaanga, ka akamaroiroi to tatou au taeake e te au tuaine ia tatou. Kua kite te apotetoro ko Paulo i teia. I roto i tana au reta, kua akameitaki e kua taiku aia i te ingoa o te au taeake tei tauturu iaia no te mea kare aia i akatikaia kia akaruke i tona ngutuare. Kua tuatua marū te au taeake kia Paulo e kua oronga i te au apinga tei anoanoia. (Phili. 2:​25, 29, 30; Kolo. 4:​10, 11) I teia tuatau, ka akapumaana e ka tauturu katoa to tatou au taeake e te au tuaine ia tatou kia akakoromaki i te au mamae. E ka pera katoa tatou kia ratou.—E tatau ia 2 Korinetia 1:​3, 4.

13. Eaa tei tauturu i te tuaine ko Maya kia akakoromaki?

¹³ I te 2020, kua tomo e kua eru te akava i Rutia i te ngutuare o te tuaine ko Maya. Kua aere atu aia ki te are akavaanga no te paruru iaia no tona akarongo. Karanga a Maya, “Kua riro te au taeake e te au tuaine i te akamaroiroi iaku i toku tuatau taitaia. Kua roiroi, apiapi e kua maromaroa au. Inara, kua ringi e kua tata mai te au taeake e te au tuaine i te au karere akapumaana. Akaperepere maata ratou iaku e e ngutuare tangata tikai noku. Mei reira mai, kua kite tikai au i to ratou aroa.”

14. Eaa ta tatou ka rave kia akavaitata ki to tatou au taeake e te au tuaine? (Akara katoa i te tutu.)

¹⁴ Taau ka rave. Ia koe e akakoromaki ra e mea puapinga kia pukapuka ki toou au taeake e te au tuaine ma te akamaroiroi i tetai e tetai. Eiaa e emiemi i te pati i te tauturu a te aronga pakari. “Mei te punanga i te uriia ra, mei te pipinianga i te matangi maata ra” ratou. (Isa. 32:2) E akamaara te akakoromaki katoa ra to tatou au taeake e te au tuaine i to ratou mamae. No reira, me rave koe i te au mea meitaki ki te au taeake, ka mataora e ka akakoromaki katoa koe i toou turanga ngatā.—Anga. 20:35.

TO TATOU MANAKONAKOANGA

15. Akapeea te manakonakoanga te tauturu anga ia Iesu e pera katoa tatou? (Ebera 12:2)

¹⁵ Kua oronga mai a Iehova i te manakonakoanga kia akakoromaki tatou. (Roma 15:13) E akamaara kua rauka ia Iesu i te akakoromaki i tona timataanga no tona manakonakoanga. (E tatau ia Ebera 12:2.) Kite a Iesu me vai tiratiratu aia, te akangateitei ra aia i to Iehova ingoa. Tapapa katoa a Iesu i te kapiti atu ki tona Metua i te rangi e te tuatau me akaarikiia aia e kia tutara kapiti ki tona au taeake. No reira, ka tauturu to tatou manakonakoanga ia tatou kia akakoromaki i te au turanga ngatā i roto i to Satani ao.

16. Akapeea te manakonakoanga te tauturu anga i tetai tuaine, e eaa taau i apii mei tana i tuatua?

¹⁶ Akara ana akapeea te manakonakoanga te tauturu anga i te tuaine ko Alla i Rutia, kua tapekaia tana tane e kua peiia aia ki roto i te are auri. Karanga a Alla: “E pure ana au kia Iehova no to tatou manakonakoanga e te akamanako ua rai i te reira. Tauturu teia iaku kia kore e taitaia. Kua kite mai au e ka tupu te au mea meitaki a muri ake. Ka upokotu a Iehova i tona au enemi, e ka tutaki aia ia tatou.”

17. Akapeea tatou me akaari kua akaperepere tatou i te manakonakoanga? (Akara katoa i te tutu.)

¹⁷ Taau ka rave. E akamanako i to tatou manakonakoanga manea ta Iehova i taputou. Akamanako katoa ia koe e toou ngutuare i te ao ou ma te oraanga mataora. Toou turanga ngatā e na roto ra e “mea ngiti poto” ua tera. (2 Kori. 4:17) E akakite aere ki tetai ke i ta Iehova taputou no te tuatau ki mua no te mea e ngatā te oraanga o te aronga kare e tavini ana ia Iehova. E maata to ratou au manamanata e kare ratou i kite i ta Iehova au akameitakianga no ratou. No reira e pukapuka kia ratou no runga i to Iehova Patireia e tana au taputou.

18. Eaa tatou ka irinaki ei i ta Iehova au taputou?

¹⁸ I muri ake te akakoromaki anga a Iobu i tona tumatetenga, karanga aia kia Iehova: “Kua kite au e, e tika ia koe te au mea katoatoa, e kare taau i manako ra e tika kia akakore.” (Iobu 42:2) Kite mai a Iobu e ka akatupu ua rai a Iehova i tana taputou. Ka akamaroiroiia tatou kia akakoromaki e te akamaara i ta Iehova ka rave. Ei akaraanga, akamanako ana i tetai vaine kua roa te maki anga e kare e rapakau. Kua aravei aia i tetai taote meitaki tei kite akapeea me rapakau i tona maki. No reira, kua pumaana aia ka akaoraia aia, noatu ka roa te tuatau i te tiaki. Ka akakoromaki aia no te mea ka maroiroi akaou aia. Mei te reira katoa, ka akakoromaki ua atu rai tatou, no te mea ka akatupu a Iehova i tana i taputou no te Parataito.

19. Eaa te ka tauturu ia tatou kia akakoromaki?

¹⁹ Mei ta tatou i apii mai, ka tauturu a Iehova ia tatou kia akakoromaki i te au turanga ngatā na roto i te pure, te Pipiria, to tatou au taeake e te au tuaine e to tatou manakonakoanga. Me taangaangaia teia au ravenga, ka tauturu ua rai a Iehova ia tatou, noatu te au mamae. No reira, kare e roa atu ka takoreia to Satani ao kino.—Phili. 4:13.