Āriki i to Iehova Aroa ia Koe

1. Eaa koe i akatapu ei ia koe kia Iehova? (Akara katoa i te tutu.)

MAARA ainei ia koe i toou akatapuanga ia koe kia Iehova? Kua rave koe i te reira no toou inangaro iaia. Taputou koe i te tavini ia Iehova ma toou ngakau katoa, vaerua, manako e te ririnui katoa. (Mare. 12:30) Mei reira mai, kua maata atu toou akaperepere iaia. Akapeea koe me pau, me ui mai tetai kia koe, “E inangaro ainei toou ia Iehova?” Ma te papu ka karanga koe: “Akaperepere maata au iaia!”

2-3. Eaa ta Iehova e akapapu maira, e eaa te apiianga? (Ieremia 31:3)

² Akapeea koe me pau me ui mai tetai tangata, “Eaa koe i papu ei te inangaro maira a Iehova ia koe?” Ka emiemi ainei koe i te pau ma te manako e puapinga kore koe kiaia? Karanga tetai tuaine tei ngatā te oraanga: “Irinaki au e te akaperepere ra au ia Iehova ma toku ngakau katoa. Inara, kua ekoko au i tetai taime me te inangaro maira a Iehova iaku.” No reira, eaa te ka tauturu ia koe kia kite i to Iehova inangaro?

³ Inangaro a Iehova kia kite koe e te aroa ra aia ia koe. (E tatau ia Ieremia 31:3.) Kua akavaitata Aia ia koe kiaia. Te akatapuanga koe ia koe e kua papetito, kua oronga mai aia i tona inangaro mutu kore kia koe. Tera te aiteanga, akaperepere maata aia ia koe e kare rava aia e akaruke ia koe. Aroa aia i tona au tavini tiratiratu e koe katoa “ei apinga meitaki rava.” (Mala. 3:17) Inangaro a Iehova kia irinaki koe i tona aroa ia koe mei te apotetoro ko Paulo. Tei tata: “Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua.” (Roma 8:​38, 39) I teia atikara, ka uriuri tatou i te puapinga kia āriki i to Iehova aroa e eaa te ka tauturu ia tatou.

EAA TATOU I ĀRIKI EI I TO IEHOVA AROA NO TATOU

4. Akapeea tatou me patoi atu i ta Satani au ravenga?

⁴ Na te ārikianga i to Iehova aroa, ka patoi atu tatou i ta Satani au “ravenga.” (Ephe. 6:11) To Satani inangaro kia akamutu tatou i te tavini ia Iehova. Ko tetai o tana ravenga, pikikaa aia kare a Iehova e aroa mai ana ia tatou. Ka akavare ua rai aia i te tangata. Ka akaparuparu aia i to tatou akarongo na roto i te au mea kino tei tupu e te au manamanata i teianei e a te tuatau ki mua. (Mase. 24:10) Kua akaaite te Pipiria ia Satani mei tetai riona, tei kimi i te au manu paruparu kare e rauka i te paruru iaia. No reira, ka tauta aia i te akaparuparu i to tatou manako kia tuku tatou i te ’au. Inara me irinaki papu tatou i to Iehova aroa, ka rauka ia tatou i te “patoi atu” ia Satani e tana au ravenga.—1 Pete. 5:​8, 9; Iako. 4:7.

5. Eaa i puapinga ai kia kite i to Iehova aroa no tatou?

⁵ Na te ārikianga i to Iehova aroa, ka akavaitata atu tatou kiaia. Eaa tatou i tuatua akapera ai? Kua anga a Iehova ia tatou kia aroa i tetai e kia aroaia mai tatou. Me aroa mai tetai ia tatou ka akakeuia tatou kia akaari katoa i te aroa. No reira ko te maata atu i to Iehova aroa e te akaperepere ia tatou, ka pera katoa tatou kiaia. (1 Ioa. 4:19) Me ketaketa atu to tatou aroa iaia, ka ketaketa katoa tona aroa ia tatou. Karanga te Pipiria: “E akavaitata atu ki te Atua, e nana e akavaitata mai kia kotou.” (Iako. 4:8) Eaa tatou ka irinaki ei e te aroa maira a Iehova ia tatou?

EAA TE KA TAUTURU IA TATOU KIA ĀRIKI I TO IEHOVA AROA?

6. Kia āriki i to Iehova aroa, eaa taau ka pure?

⁶ Kia taka meitaki e kia putuputu taau pure. (Luka 18:1; Roma 12:12) E pure putuputu kia Iehova no te tauturu i te au rā ravarai. Tetai taime ka akaapa koe ia koe uaorai ma te irinaki kare a Iehova e inangaro ana ia koe. Inara e akamaara e maata atu to Iehova aroa ia koe. (1 Ioa. 3:​19, 20) Kite meitaki aia ia koe e taau ka rauka i te rave. (1 Samu. 16:7; 2 Para. 6:30) No reira, “e riringi” i toou ngakau kiaia e te pati i tana tauturu. (Sala. 62:8) E oti, e taangaanga i teia au ravenga.

7-8. Akapeea te tata Salamo i te akapapuanga i to Iehova inangaro ia tatou?

⁷ Irinaki i ta Iehova tuatua. Kua akauruia te aronga tata i te Pipiria kia akakite i to Iehova tu tikai. Tuatua a Davida: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Sala. 34:18) Me maromaroa koe, ka manako koe e ko koe anake ua. Taputou a Iehova i te tauturu ia koe no te mea kua mārama aia i toou anoano. Kua tata katoa a Davida: “Ka tuku ana koe i toku nei roi-mata ki roto i taau ra āriki.” (Sala. 56:8) Te kite maira a Iehova i toou mamae. Akaperepere maata aia ia koe e kare aia e inangaro kia mamae koe. Mei tetai topata vai i roto i te āriki, kua aite katoa te reira ki toou roimata tei akaperepereia e Iehova. Karanga a Salamo 139:3 e: “Kua kite koe [e Iehova] i toku au aerenga katoa.” Kite pouroa a Iehova i taau e rave ra e ka akamou aia ki runga i toou tu meitaki. (Ebe. 6:10) Eaa te tumu? Akaperepere aia i taau angaanga maroiroi no te akamareka iaia.a

⁸ Akakite a Iehova na roto i te au irava akapumaana i tona inangaro e te akaperepere ia koe. Inara i mua ana kua pikikaa a Satani e kare a Iehova e inangaro ana ia koe. No reira, me ekoko koe i to Iehova inangaro e ui, ‘Koai taku ka irinaki, ko te ‘metua o te pikikaa’ me ko “te Atua tuatua-mou”?’—Ioa. 8:44; Sala. 31:5.

9. Eaa ta Iehova i taputou ki te aronga tei inangaro iaia? (Exodo 20:​5, 6)

⁹ Akamanako i to Iehova inangaro ia koe. Akara eaa ta Iehova i tuatua kia Mose e ki to Iseraela. (E tatau ia Exodo 20:​5, 6.) Taputou a Iehova e ka aroa aia i te aronga tei inangaro iaia. No te mea e Atua tiratiratu a Iehova, mea papu ka akaperepere ua rai aia i tona au tavini. (Nehe. 1:5) I tetai au atianga me te manako ra koe e kare a Iehova e inangaro ia koe e ui, ‘Akaperepere ainei au ia Iehova?’ Me tauta koe i te akamareka iaia, ka akaperepere a Iehova ia koe. (Dani. 9:4; 1 Kori. 8:3) Tera te aiteanga, auraka e ekoko i to Iehova inangaro no te mea kare rava aia e akaruke ia koe.

10-11. Eaa ta Iehova e inangaro ra ia tatou kia akamanako no te atinga oko? (Galatia 2:20)

¹⁰ Akamanako i te atinga oko. Ko te atinga oko o Iesu e apinga aroa na Iehova ki te tangata. (Ioa. 3:16) Inara kua mate ainei a Iesu noou? Ae! Akamanako i te akaraanga o te apotetoro ko Paulo. Kua rave aia i te au ara kino i mua ake ka riro mai aia ei Kerititiano, e kua anoano ua rai aia i te tauturu no tona tu apa. (Roma 7:​24, 25; 1 Timo. 1:​12-14) Inara, kua papu iaia kua oronga mai a Iehova i tana tamaiti ei atinga oko. (E tatau ia Galatia 2:20.) E akamaara kua akakite a Iehova kia Paulo kia tata i teia au tuatua. E ko te au mea pouroa i roto i te Pipiria kua orongaia mai te reira ei apii ia tatou. (Roma 15:4) Inangaro a Iehova kia irinaki koe e ko te atinga oko o Iesu e apinga aroa Nana kia koe. Me akamanako koe i te reira, e akapapuanga ïa te akaperepere ra a Iehova ia koe.

¹¹ Akameitaki tatou ia Iehova no tei tono mai i tana tamaiti ki te enua nei kia mate no tatou. Akakite katoa a Iesu i te tika no runga i te Atua. (Ioa. 18:37) Apii katoa aia i te tuatua mou no runga i to Iehova akaperepere maata ia tatou.

TAUTURU A IESU IA TATOU KIA ĀRIKI I TO IEHOVA AROA

12. Eaa tatou ka irinaki ei i ta Iesu i akakite no runga ia Iehova?

¹² Ia Iesu i te enua nei, kua akakite ua rai aia ia Iehova ki te tangata. (Luka 10:22) E tumu anga meitaki to tatou i te irinaki i ta Iesu i akakite no runga ia Iehova. No te pae ana aia i tona Metua i te rangi no tetai tuatau roa. (Kolo. 1:15) Kite a Iesu i to Iehova akaperepere iaia e tana au tamariki tiratiratu i te rangi e te enua. Akapeea a Iesu me tauturu i tetai ke kia āriki i to te Atua aroa?

13. Eaa ta Iesu e inangaro maira ia tatou kia mārama no runga ia Iehova?

¹³ Inangaro a Iesu ia tatou kia kite i to Iehova manako no tatou. I roto i te au Evangeria, kua kapiki a Iesu i tona “Metua” ko Iehova e 160 tuma taime. Iaia e pukapuka ra ki tana au pipi, ka kapiki aia ia Iehova e ko “to kotou Metua” me kore “to kotou Metua i te ao.” (Mata. 5:16; 6:26) I mua ake ka aere mai a Iesu ki te enua, kua kapiki te au tavini tiratiratu o Iehova Iaia e ko te ‘Mana Katoatoa,’ ‘Tei Teitei,’ ‘Tei Anga,’ e te vai atura. Inara kua kapiki a Iesu ia Iehova e ko to tatou ‘Metua.’ Te akaari maira teia i to Iehova inangaro no tona au tavini kia akavaitata kiaia mei tetai tamaiti e tona metua tane. No reira, apii mai a Iesu i to Iehova akaperepere maata ia tatou ei Metua. Ka uriuri tatou e rua akaraanga i tuatua ai a Iesu i te taoonga “Metua” no te akamārama anga ia Iehova.

14. Akapeea a Iesu te akamārama anga i to Iehova akaperepere ia tatou? (Mataio 10:​29-31) (Akara katoa i te tutu.)

¹⁴ Mea mua, ka akara tatou i ta Iesu i tuatua ia Mataio 10:​29-31. (E tatau.) Akakite a Iesu e kua kite meitaki tona Metua i te au manu rikiriki. Inara kare te au manu e akamori ana ia Iehova. Me kua akaperepere a Iehova i te manu, mea papu te pera katoa ra aia ia tatou! Ko te aerenga tuatua “te rauru oki o to kotou na upoko, kua ope ïa i te tatauia,” i roto i te au manako ke o te irava 30, karanga ra: “Te akapapu maira to Iehova kite no runga i teia au mea rikiriki tataki tai e, te manako tika maira aia i te au pipi ravarai a Iesu Mesia.” Mea papu, inangaro a Iesu ia tatou kia irinaki e te akaperepere ra to tatou Metua i te rangi ia tatou.

15. Eaa te au tuatua a Iesu i roto ia Ioane 6:44 te akakite maira no runga i to tatou Metua i te rangi?

¹⁵ Teia te rua o te akaraanga ta Iesu i tuatua no te taoonga “Metua.” (E tatau ia Ioane 6:44.) Kua tauturu toou Metua ko Iehova i te rangi ia koe kia kite e kia aroa iaia. Eaa aia i rave ei i teia? No te mea kua kite aia i toou au tu meitaki. (Anga. 13:48) Akakite te au manako ke no te irava ia Ioane 6:44 i ta Iesu i tuatua i roto ia Ieremia, e akakite ra: “I akatae mai ei au ia koe i te aroa takinga-meitaki.” (Iere. 31:3; akaaite kia Hosea 11:4.) Akamanako eaa te aiteanga. Te kite maira to tatou Metua aroa i te rangi i to tatou au tu meitaki.

16. (a) Eaa ta Iesu e apii ra e eaa tatou ka irinaki ei iaia? (e) Eaa te akapapuanga e ko Iehova te Metua meitaki rava atu? (Akara i te pia “Te Metua Meitaki Rava Atu.”)

¹⁶ Kua apii a Iesu e Metua a Iehova nona e noou katoa. Inangaro a Iesu kia papu ia tatou to Iehova aroa e ka akono aia ia tatou. No reira me ka ekoko koe e kare a Iehova e inangaro ia koe e akamaara i ta Iesu tuatua e kia irinaki iaia, no te mea te akakite ra aia i te tika e koia tei kite meitaki i tona Metua.—1 Pete. 2:22.

KIA PAPU IA KOE TO IEHOVA AROA NOOU

17. Eaa tatou ka akapapu ei i to Iehova aroa ia tatou?

¹⁷ Ka anoanoia tatou kia akapapu meitaki i to Iehova aroa ia tatou. E akamaara ka tauta ua rai a Satani kia akamutu tatou i te tavini ia Iehova. Inangaro aia i te akaparuparu ia tatou e kia irinaki kare a Iehova e aroa ia tatou. No reira, auraka e akarongo i ta Satani pikikaa!—Iobu 27:5.

18. Eaa taau ka rave kia papu ia koe i to Iehova aroa?

¹⁸ I teia atikara, kua apii koe i taau ka rave kia papu i to Iehova aroa. E pati i tana tauturu kia kite mai aia i toou meitaki e kia mārama koe i tona aroa ia koe. Akamanako i te au irava no tona akaperepere i te aronga tei inangaro iaia. E akamaara kua oronga mai a Iehova i tana Tamaiti ei atinga oko no tatou. No reira, e irinaki i ta Iesu tuatua e ko Iehova toou Metua. Me ui mai tetai: “Papu te inangaro maira a Iehova ia koe?” ka pau koe: “Ae, papu iaku! E ka tauta rai au i te akaari i toku inangaro iaia!”