E Tu Tangi Aroa to te Taunga Maata ko Iesu

1-2. (a) Eaa a Iehova i tono ei i tana Tamaiti ki te enua nei? (e) Eaa ta tatou ka uriuri i roto i teia atikara? (Ebera 5:​7-9)

E 2,000 mataiti i topa, kua tono mai a Iehova i tana Tamaiti akaperepere ki te enua nei. No teaa ra? Tetai tumu, kia akamatara mai i te tangata mei te ara e te mate e kia akakore i te au manamanata ta Satani i akatupu. (Ioa. 3:16; 1 Ioa. 3:8) Kua kite katoa a Iehova e ka riro to Iesu oraanga i te enua nei ei tauturu iaia ei Taunga Maata, kia mārama meitaki atu i to tatou turanga. Kua rauka iaia i te akaari i te tu tangi aroa kare i aite mei to mua ana. I muri ake i tona papetitoanga i te 29 T.N.a, kua akamata a Iesu i te tavini ei Taunga Maata.

² I roto i teia atikara, ka uriuri tatou akapeea to Iesu oraanga i te enua nei, te tauturu anga iaia kia riro mai ei Taunga Maata meitaki rava atu. E mea puapinga kia mārama tatou i teia, no te mea ka māmā atu no tatou i te pure e kia akavaitata atu kia Iehova. I te au tuatau tikai me tupu te taitaia no to tatou au tarevake.—E tatau ia Ebera 5:​7-9.

AERE MAI TE TAMAITI AKAPEREPERE A TE ATUA KI TE ENUA

3-4. Eaa te au tauianga ta Iesu i na roto te aereanga mai aia ki te enua nei?

³ E na roto ana tatou i te au tauianga o te oraanga. Penei kua akaruke tatou i to tatou kainga e te ngutuare tangata, kia neke ki tetai ngai ou. Kare teia i te mea māmā. Inara kare tetai ua atu tangata i na roto ana i te au tauianga mei ta Iesu i na roto. Iaia i runga i te rangi, koia te tama mua e te angera maata rava atu. Kua akaperepereia aia e Iehova e kua mataora ua aia i te angaanga kapiti ki tona Metua. (Sala. 16:11; Mase. 8:30) Inara, karanga a Philipi 2:7 e kua puareinga ua aia i te akaruke i teia au mea katoatoa, e kia aere mai ki te enua tei kī i te aronga ara ua.

⁴ Akamanako katoa i te au mataiti mua o to Iesu oraanga i te enua nei. Kua anauia a Iesu i roto i tetai ngutuare tangata putaua. Ka kite tatou i teia, no te mea e atinga meangiti ua ta tona nga metua i oronga i ko i te iero. (Levi. 12:8; Luka 2:24) Te kiteanga te ariki kino ko Heroda e kua anauia a Iesu, kua tauta aia i te tamate iaia. No reira, kua oro to Iesu ngutuare tangata ki Aiphiti e kua noo ratou ki reira no tetai au tuatau ei tuitarere. (Mata. 2:​13, 15) E ākā tauianga tikai teia mei to Iesu oraanga i runga i te rangi!

5. Eaa ta Iesu i kite iaia i te enua, e akapeea teia te tauturu anga iaia kia riro ei Taunga Maata meitaki rava atu? (Akara katoa i te tutu.)

⁵ Iaia i te enua nei, kua kite a Iesu i te mamae o te tangata. Kua na roto ana aia i te tu taitaia me mate tetai tei akaperepereia, mei tona metua tane rai ko Iosepha. Kua aravei a Iesu i te aronga maki, te matapo, te pirikoki e te au metua kua mate ta ratou tamariki, e kua tangi aia ia ratou. (Mata. 9:​2, 6; 15:30; 20:34; Mare. 1:​40, 41; Luka 7:13) E tika, kua kite a Iesu i te tangata e mamae ra iaia i runga i te rangi. Inara i teianei, iaia ei tangata i te enua, kua mārama meitaki atu aia i te mamae o te tangata. (Isa. 53:4) Kua mārama tikai aia i te turanga o te tangata e to ratou taitaia, no te ngatā o te oraanga. Mei te tangata rai, kua na roto a Iesu i te tu roiroi, te maromaroa e te taitaia.

AKAARI A IESU I TE AROA KI TE TANGATA

6. Eaa ta tatou ka apii mai mei te totou i roto ia Isaia no runga i to Iesu tu tangi aroa i te tangata? (Isaia 42:3)

⁶ Kua akaari a Iesu i te tu tangi aroa ki te aronga tei takinga kinoia e te tangata. Na te akaarianga i teia tu, kua akatupu aia i te totou ta Iehova i akakite ki te peroveta ko Isaia. I roto i te Tuatua Tapu Epera, ko te aronga matutu to ratou akarongo i roto ia Iehova, kua akaaiteia ratou ki tetai aua tiare ruperupe me kore ki tetai tumu rakau teitei e te ketaketa. (Sala. 92:12; Isa. 61:3; Iere. 31:12) Kareka te aronga putaua e te aronga kare o ratou tauturu, kua akaaiteia ratou ki tetai rakau paruparu e ki tetai a’i i roto i te lamepa te mate atura. (E tatau ia Isaia 42:3; Mata. 12:20) Kua taangaanga a Iehova i teia au akatutuanga, kia apii no runga i to Iesu aroa e te tangi i te aronga tei akavaavaaia e tetai ke.

7-8. Akapeea a Iesu te akatupu anga i te totou a Isaia?

⁷ Kua tata te Evangeria a Mataio e kua akatupu a Iesu i te au totou a Isaia: “Te kakao paruparu ra, kare aia e aati; e te lamepa matemate ra, kare aia e tinai.” Kua rave a Iesu i te au temeio tei tauturu i te aronga tei akavaavaaia e te aronga kare o ratou manakonakoanga no tetai oraanga meitaki. Ei akaraanga, kua aravei a Iesu i tetai tangata kua tuia e te maki repera. Kare aia i manako ana e ka meitaki tona maki e ka rauka akaou iaia i te piri atu ki tona kopu tangata e te au oa. (Luka 5:​12, 13) Kua aravei katoa a Iesu i tetai tangata turi e kare e rauka i te tuatua meitaki. Akamanako ana i te tu o teia tangata e kite ra i tetai pae e pukapuka ra, inara kare aia e mārama ana i ta ratou e tuatua ra. (Mare. 7:​32, 33) E kare ko teia ua.

⁸ I to Iesu tuatau, kua irinaki te au ngati Iuda e ko te aronga tei maki e tei pirikoki, kua akautungaia ratou no ta ratou au ara me kore te ara a to ratou au metua. (Ioa. 9:2) No teia irinakianga tarevake, kua akavaavaaia ratou e te tangata e kua taitaia maata ratou no te reira. Kua akatupu aia i te totou ia Isaia, na te akaora anga ia ratou e te tauturu anga ia ratou kia kite e te inangaro maira te Atua ia ratou. Eaa ta teia e apii maira no runga i to Iesu manako no tatou?

9. Ia Ebera 4:​15, 16 akapeea to tatou Taunga Maata i te rangi me akaari i te tu tangi aroa ki te aronga ara?

⁹ E tatau ia Ebera 4:​15, 16. Ka papu ia tatou ka akaari ua rai a Iesu i te tu tangi aroa kia tatou. Eaa te aiteanga o teia? Ko te aiteanga o te tuatua tangi i te reo Ereni, koia oki ko tetai tangata tei mārama meitaki i te tu mamae o tetai ke. Me tatau tatou i te akaraanga o Iesu i roto i te Pipiria e akapeea aia te tauturu anga i te tangata, ka kite tatou e kua tangi tikai aia ia ratou. Kare aia i akaora ua i te tangata no te mea kua anoanoia aia kia pera. Mari ra, kua akaperepere maata aia i te tangata e kua inangaro i te tauturu ia ratou. Ei akaraanga, i tona rapakau anga i te tangata repera, ka rauka ua ia Iesu i te rave i te reira mei tetai ngai mamao. Inara no tona inangaro i tera tangata, kua akakeuia aia kia amiri iaia. Penei ko te taime mua teia i amiriia ai te tangata repera! Me kore te tauturu anga a Iesu i te tangata turi, kua apai aia iaia ki tetai ngai kare e maata ana te tangata e kua akaora atu iaia. E te akakino anga tetai Pharisea i te vaine tataraara tei orei i te vaevae o Iesu ki tona roimata, kua paruru a Iesu iaia e kua ako atu i taua Pharisea. (Mata. 8:3; Mare. 7:33; Luka 7:44) Kare a Iesu i akavaavaa ana i te aronga maki e te aronga tei rave i te tarevake. Mari ra, kua āriki puareinga ua aia i te tangata e kua aroa ia ratou. Mea papu e ka akaari katoa aia i teia aroa kia tatou.

ARU I TE TU O TO TATOU TAUNGA MAATA

10. Eaa ta tatou ka taangaanga i teia tuatau ei tauturu i te aronga turi e te matapo? (Akara katoa i te tutu.)

¹⁰ Ei au pipi na Iesu ka inangaro tatou i te aru i tona akaraanga, i te akaari anga i te aroa e te tu tangi ki tetai ke. (1 Pete. 2:21; 3:8) Noatu kare e rauka ia tatou te rave i te au temeio no te aronga turi e te matapo, ka rauka ia tatou i te apii ia ratou kia akavaitata atu kia Iehova. Ei akaraanga, kua uriia ta tatou au puka Pipiria i roto i te 100 tuma reo akairo. E kia puapingaia te aronga kare e kite meitaki me kore te matapo, kua uriia te au puka braille i roto i te 60 tuma reo. Pera katoa e au vitio ta tatou i roto i te 100 tuma reo, kua kapitiia mai tetai tangata te akataka ra i te au mea e tupu ra i roto i te vitio. Kua raveia teia au mea pouroa ei tauturu i te aronga turi e te matapo kia akavaitata kia Iehova e tana Tamaiti.

11. Akapeea ta Iehova akaaerenga i te akaari anga i to Iesu tu tangi aroa no te tangata ravarai? (Angaanga 2:​5-7, 33) (Akara katoa i te tutu.)

¹¹ Te tauta pakari nei te akaaerenga a Iehova i te tauturu i te au tu tangata i te au ngai ravarai, kia akavaitata atu kia Iehova. E akamaara, i muri ake i to Iesu akatuakaouanga i te rā Penetekote, kua riringi aia i te vaerua tapu kia rauka i te au tangata tei tae atu ki reira kia akarongo i te nuti meitaki, i ‘to ratou uaorai reo.’ (E tatau ia Angaanga 2:​5-7, 33.) I raro ake i te akatereanga a Iesu, e akapapa ana te akaaerenga i te au puka Pipiria i roto i te 1,000 tuma reo. E ko tetai au reo e iti ua te tangata e tuatua ana i te reira. Ei akaraanga, mei tetai au reo Amerindian. E reo teia no tetai pae aronga e noo ana i te North e te South America. Kare e maata ana te tangata e tuatua ana i teia reo. Noatu ra, kua akapapa te akaaerenga i te au puka Pipiria i roto i te 160 o teia au reo kia rauka i te tangata i te apii no runga i te nuti meitaki. Pera katoa, kua uriia ta tatou au puka i roto i te 20 au reo e tuatuaia ra e te iti tangata Roma. E e tauatini ua atu aronga tei tuatua i teia reo, kua āriki i te tuatua mou.

12. Eaa ta te akaaerenga a Iehova e rave nei kia tauturu i te tangata i teia tuatau?

¹² I te pae mai i te tauturu anga i te tangata kia apii i te nuti meitaki, kua tauturu katoa te akaaerenga a Iehova i te aronga tei rokoia e te tumatetenga natura. Kua puareinga ua te au taeake e te au tuaine i te tauturu i teia aronga. Pera katoa, kua oronga mai te akaaerenga i te au ngai akamorianga no te tangata kia apii no runga i to te Atua aroa no ratou.

KA TAUTURU TO TATOU TAUNGA MAATA IA KOE

13. Akapeea a Iesu me tauturu ia tatou?

¹³ No te mea e tiaki meitaki a Iesu, kua akapapu aia e ka rauka ia tatou te au mea pouroa i te pae vaerua kia akavaitata atu kia Iehova. (Ioa. 10:14; Ephe. 4:7) Tetai taime, ka taitaia maata tatou e ka aite ki tetai rakau paruparu e ki tetai a’i i roto i te lamepa te mate atura. Penei ka taitaia tatou no tetai maki kino, no tetai tarevake ta tatou i rave me kore kua pekapeka korua ko tetai taeake me kore tuaine i roto i te putuputuanga. Penei ka ngatā i te akamou ki runga i te manakonakoanga no te tuatau ki mua no te mea te manako ua ra tatou i te au manamanata i teianei. E akamaara, te kite maira a Iesu i taau e na roto ra e kua mārama meitaki aia ia koe. No to Iesu tu tangi aroa noou ka tauturu aia ia koe. Ei akaraanga, ka oronga mai aia i te vaerua tapu ei akaketaketa ia koe me tupu te taitaia. (Ioa. 16:7; Tito 3:6) Ka rauka katoa ia Iesu i te akakeu i te aronga pakari e toou au taeake e te au tuaine i roto i te putuputuanga kia akamaroiroi, akapumaana e kia tauturu ia koe.—Ephe. 4:8.

14. Eaa ta tatou ka akamaara me tupu te taitaia kia tatou?

¹⁴ Me kua taitaia koe e akamaara ko Iesu to tatou Taunga Maata. E akamanako oonu i te aiteanga o te reira. Kua tono mai a Iehova i tana tamaiti ki te enua nei kia mate no tatou e kia mārama meitaki atu aia i to tatou au manamanata ei aronga apa ua. Me taitaia tatou no ta tatou au ara me kore au tarevake, kua papa ua a Iesu i te oronga mai i te tauturu ‘i te tuatau tau.’—Ebe. 4:​15, 16.

15. Eaa tei tauturu i tetai taeake kia oki mai kia Iehova?

¹⁵ Te arataki katoa nei a Iesu i tona iti tangata kia kimi e kia akaoki mai i te au taeake e te au tuaine tei akaruke ia Iehova. (Mata. 18:​12, 13) Akamanako i te akaraanga o Stefano.b Kua akatakakeia aia mei te putuputuanga no tetai 12 mataiti. I tetai rā, kua iki aia i te oki akaou ki te uipaanga. Karanga aia, “Kare teia i te mea māmā noku, inara kua inangaro au i te tavini ia Iehova ma toku au taeake e te au tuaine. Kua akamaroiroiia au te atoroanga mai te aronga pakari. I tetai au atianga, kua taitaia au no taku au tarevake i rave i mua ana e kua akaparuparu tikai teia iaku. Inara kua akamaara te aronga pakari e te inangaro ra a Iehova e Iesu kia tauta ua atu rai au. Te oki anga mai au ki te putuputuanga, kua āriki pumaana mai te au taeake e te au tuaine iaku e toku ngutuare tangata. I muri mai, kua apii taku vaine i te Pipiria e i teia rā te tavini kapiti nei matou ia Iehova.” Mei teaa atura te mataora o to tatou Taunga Maata me kite aia i te putuputuanga e tauturu ra i te au taeake e te au tuaine tei tataraara kia oki mai kia Iehova!

16. Eaa koe i mataora ai e e Taunga Maata toou tei akaari i te tu tangi aroa?

¹⁶ Ia Iesu i te enua nei, kua oronga aia i te tauturu ki te tangata i te tuatau tau tikai. I teia rā, kua papu ia tatou e ka oronga mai aia i te tauturu me anoano tatou i te reira. E i roto i te ao ou e vaitata maira, ka akamatara takiri a Iesu ia tatou mei te ara. Akameitaki tikai tatou ia Iehova no tona inangaro maata ia tatou e no te oronga anga mai i tana Tamaiti ei Taunga Maata, tei akaari i te tu tangi aroa!