Kia Vai Rai te Vaerua Okotai
KUA akamaroiroi te apotetoro ko Paulo i te au Kerititiano i Ephesia kia akakoromaki ua atu i tetai e tetai ma te aroa, ma te tauta tikai kia vai rai te vaerua okotai e te taokotaianga o te ’au.—Ephe. 4:2, 3.
Ko te taokotaianga ta tatou e mataora ra, no ko mai ïa i “te vaerua.” Te aiteanga, na te vaerua tapu o te Atua i akatupu i te tu taokotai. Inara mei ta Paulo i taiku, ka anoanoia tatou i te akono kia vai ua rai te reira. Naai teia e rave? Na te au Kerititiano tataki tai e tauta i te akono kia vai ua rai te vaerua taokotai.
Akamanako ana e kua oko tetai tangata i tetai motoka ou noou. I toou manako naai te reira e akono? Māmā ua te pauanga, naau. Me kino te motoka no te mea kare koe i akono ana i te reira, kare koe e akaapa i te tangata tei oronga mai i te reira kia koe.
Mei te reira katoa, noatu e apinga aroa to tatou tu taokotai no ko mai i te Atua, na tatou te apainga kia akono i te reira. Me e manamanata toou ki tetai taeake me kore tetai tuaine, e ui kia koe, ‘Te tauta ra ainei au kia vai rai te tu taokotai na te akatupuanga i te ’au i roto i te putuputuanga?’
TAUTA TIKAI KIA VAI TE VAERUA TAOKOTAI
Mei ta Paulo i tata, i tetai au taime, kare i te mea māmā kia vai ua rai te ’au me akakinoia mai tatou e tetai taeake me kore tetai tuaine. Ka anoanoia ainei koe kia tuatua ki tera tangata i toou manamanata? Kare. E ui kia koe, ‘Me tuatua au kiaia, ka meitaki atu ainei te manamanata me ka kino atu?’ Tetai taime, e meitaki i te akangaropoina atu i te manamanata e kia akakore i tana ara.—Mase. 19:11; Mare. 11:25.
Ui kia koe, ‘Me tuatua au kiaia, ka meitaki ainei te manamanata me ka kino atu?’
Mei ta te apotetoro ko Paulo i tata, kia akakoromaki ua atu i tetai e tetai ma te aroa. (Ephe. 4:2) Karanga tetai puka, ko tetai urianga o teia tuatua koia oki, e āriki ua i te tu o tetai tangata. Tera te aiteanga, e aronga apa ua to tatou au taeake mei ia tatou rai. E tika, te tauta nei tatou kia akameitaki atu i to tatou tu. (Ephe. 4:23, 24) Inara no to tatou tu apa ua, kare e rauka ia tatou i te rave meitaki i teia. (Roma 3:23) Me āriki tatou i te reira, ka māmā atu no tatou i te akakoromaki i tetai e tetai, akakore i te ara e kia akatupu ua rai i te vaerua taokotai.
Me akakore tatou i te ara a tetai ke e me akangaropoina atu i te reira, ka rauka ia tatou te vaerua taokotai i roto i te putuputuanga. Ko tetai aiteanga o te tuatua Ereni tei uriia no te taokotaianga i roto ia Ephesia 4:3, ko tetai uaua matutu tei kapiti i te ivi ki tetai ivi. Mei te reira katoa, ka tauturu te ’au e te aroa ia tatou kia piri vaitata ua ki te au taeake, noatu ka rave ratou i tetai apinga kare tatou e mareka.
No reira me tamamae e me akariri tetai taeake ia koe, auraka e akamou ki runga i te kino tana i rave, mari ra e tauta kia mārama i te tumu i pera ai aia. (Kolo. 3:12) E aronga apa ua tatou pouroa e ka tamamae tatou i tetai ke. Me maara ia tatou te reira, ka tauta tatou i te akono e kia vai ua rai te vaerua taokotai i rotopu ia tatou.