Anoanoia te “Akakoromaki”

TE RIRO anga a Anita ei Kite no Iehova kua riri tikai tana tane.a (Akara i te tataanga rikiriki i raro ake.) Tauta aia te arai ia Anita eiaa e aere ki te uipaanga. Akakite aia auraka rava e taiku i te ingoa o te Atua. Me rongo aia i te ingoa o Iehova, ka riri tikai aia.

Tetai kare aia e inangaro kia apii a Anita i ta raua tamariki no runga ia Iehova e kia aere ki te uipaanga. E mea ngata teia no te mea te inangaro nei a Anita i te apii ngaro ua i te tamariki kia kore tana tane e kite.

Mei tei tupu kia Anita, penei ka arai tetai o toou ngutuare tangata ia koe eiaa e tavini ia Iehova. Me kore e turanga ngata ke atu toou, e roa toou maki anga, kua mate taau tamaiti, taau tane e taau vaine. E penei kua akaruke tetai o toou ngutuare tangata ia Iehova. I roto i teia au turanga, eaa te ka tauturu ia koe kia vai tiratiratu kia Iehova?

Ka anoanoia te “akakoromaki,” i na Paulo ei. (Ebera 10:36) Eaa te ka tauturu ia koe kia akakoromaki?

PURE KIA IEHOVA NO TE TAUTURU

Me te taitaia ra koe, irinaki kia Iehova kia rauka te akakoromaki. Pure kiaia no te tauturu. Ta Ana tera i rave te mate poitirere anga tana tane. E 30 mataiti te roa to raua akaipoipo. Akakite a Ana e: “Kare aia i oki mai ana ki te kainga mei te ngai angaanga. E 52 rai ona mataiti.”

E maata ta Ana angaanga, kare ra tera i apai ke i tona mamae. Eaa tana i rave? Akakite aia e: “Kua akakite au i toku manako kia Iehova ma te ngakau katoa, i te pati i tana tauturu.” Kua kite aia i te tauturu a Iehova no te mea te kite nei aia i te tu au e te maru. Karanga aia e: “Papu iaku e ka akatuakaou mai a Iehova i taku tane.”​—Philipi 4:6, 7.

Kua taputou a Iehova e ka akarongo mai aia i te pure a tona au tavini. (Salamo 65:2) Ka oronga mai aia i te au mea ravarai ka anoanoia kia tavini iaia e ka tauturu ia koe kia vai tiratiratu i te au tuatau ngata.

NOO VAITATA KI TE AU TAEAKE E TE AU TUAINE

E mataara ke mai ta Iehova ei tauturu ia tatou kia akakoromaki. Oronga mai aia i te au taeake e te au tuaine i roto i te putuputuanga. Ka kite tatou te akaraanga o te au taeake i Tesalonia i te tauturu i tetai e tetai i to ratou takinokino angaia. Taua taime ra, kua anoanoia ratou kia akamaroiroi tetai e tetai. (1 Tesalonia 2:14; 5:11) Tauturu ratou i te au taeake kia vai tiratiratu kia Iehova na roto i te uipaanga e to ratou pirianga oa. Eaa ta tatou ka rave kia vai tiratiratu mei te au taeake i Tesalonia?

Akaoa atu ki te au taeake, akamaroiroi tetai e tetai i te au tuatau manamanata. (Roma 14:19) Kua takinokinoia a Paulo inara kua oronga a Iehova i te maroiroi kia rauka iaia te akakoromaki. Ei akaraanga, kua oronga a Iehova i te maroiroi kia akakoromaki, na roto i te au taeake. Akakite a Paulo: “Ko ratou tei akapumaana mai iaku nei.” (Kolosa 4:10, 11) Inangaro tikai to te au taeake ia Paulo. Me inangaro tauturu aia, ka akapumaana e ka akamaroiroi mai ratou iaia. Penei te maara ra ia koe te au taime i akamaroiroi mai ana te au taeake na roto i te tauturu anga ia koe.

PATI I TE ARONGA PAKARI KIA TAUTURU IA KOE

Oronga mai Iehova i te aronga pakari o te putuputuanga. Ka akamaroiroi e ka oronga mai ratou i te au ako tau a te Pipiria. Ka riro ratou ‘mei te punanga i te uriia, mei te pipinianga i te matangi maata; mei te au vai taʼe i te ngai keremarō, mei te marumaru o tetai mato maata i te enua papamarō.’ (Isaia 32:2) Pumaana tatou e kua papa ua teia au taeake i te tauturu mai. Me ngata te oraanga, aravei i te aronga pakari. Ka tauturu ratou ia koe kia tavini ua atu ia Iehova.

Kare e rauka i te aronga pakari i te akakore i toou au manamanata pouroa. E aronga apa ua ratou mei ia koe. (Angaanga 14:15) Ka pumaana toou ngakau me pure tetai tangata pakari kia Iehova no runga i toou manamanata. (Iakobo 5:14, 15) Akamaroiroi te aronga pakari i tetai taeake no Itaria mai kua roa te maki anga. Karanga aia: “Riro te tu aroa, te tu akaperepere o te au taeake ei tauturu iaku kia akakoromaki.” Me te kite ra koe te tu ngata, ka inangaro a Iehova ia koe kia pati i te aronga pakari kia tauturu ia koe.

AKAMOU TE MANAKO I TE TAVINI IA IEHOVA

Me akamou tatou ki te tavini anga ia Iehova, ka tauturu mai aia ia tatou. Ta John ïa i rave. Tae anga tona mataiti ki te 39, kitea mai e kua tuia aia e te maki cancer. Tumatetenga tikai aia e e āka maki tona i te mea e te mapu nei rai aia. Kua manata aia i tana vaine e ta raua tamaiti e toru mataiti. Karanga aia: “Ka tiaki taku vaine i ta maua tamaiti e ka akono katoa aia iaku e taku au akanoonooanga i te are maki.” Roiroi aia, kinokino tona kopu no te vairakau e rapakauia ra aia. Kare ko te reira ua, kua maki katoa tona papa e ka anoanoia tetai tangata ei akono iaia.

Eaa tei tauturu ia John e tona ngutuare tangata i teia tuatau taitaia? Noatu tona roiroi, rauka iaia te akamou ki te tavini anga ia Iehova. Akakite aia: “Tae matou ki te au uipaanga pouroa, te tutu evangeria i te au epetoma, rave putuputu i ta matou akamorianga a te ngutuare noatu te ngata.” Kite a John i te puapinga o te akaketaketa i tona pirianga kia Iehova. I te akamataanga kua manamanata aia, muri mai ra kua maru mai aia. Kite aia e te inangaro maira e te oronga maira Iehova i te maroiroi. Me manamanata e me mataku koe ka tauturu katoa a Iehova ia koe. Karanga a John: “Ka rauka ia Iehova i te akamatutu ia koe, mei iaku rai.”

Me ngata te oraanga, akamaara e kua karanga a Paulo e ka anoanoia te “akakoromaki.” Irinaki kia Iehova, pure kiaia. Noo vaitata ki te au taeake i roto i te putuputuanga, pati i te tauturu a te aronga pakari, akamou ki runga i te akamorianga ia Iehova. Ka tauturu aia ia koe noatu eaa te manamanata taau e kite nei e ka aro atu a te tuatau ki mua.