Aru Anga i te Atua Tuatua Mou
“E teianei ei aru kotou i te Atua, mei te tamariki akaperepere ra.”—EPHESIA 5:1.
1. Eaa ta etai e irinaki ra no te tuatua mou, e eaa ra i tarevake ei ta ratou akamanakoanga?
“EAA te tuatua-mou?” (Ioane 18:38) Ko taua uianga, tei ui aviriia e Ponotio Pilato vaitata i te 2,000 mataiti i topa, te akakite maira e e mea ngata roa te tuatua mou i te kimiia atu. E manganui i teia tuatau ka akatika. Te tu tikai o te tuatua mou te tamakiia nei. Penei kua rongo ana koe i te reira i te tuatua angaia e te tuku ra te katoatoa i ta ratou uaorai tuatua mou, me kore kua kotingaia te tuatua mou, e me kore te taui ua atura te tuatua mou. Kua tarevake taua akatakaanga. Te akakoroanga tikai o te kimikimi anga e te apiianga koia oki kia apii i te au tuatua tika, te tuatua mou, no runga i te ao e noo nei tatou. Kare te tuatua mou i te manako no tetai ke. Ei akaraanga, e mate kore te meta tangata me kore kare ra. Te vaira a Satani me kore kare ra. E akakoroanga to te oraanga me kore kare ra. I nga atianga taki tai, te vai ua ra te pauanga tika anake. E tuatua mou tetai, e e pikikaa tetai mai; kare nga mea e rua i te tuatua mou.
2. Na roto i teea au tu i riro ei a Iehova ei Atua no te tuatua mou, e eaa nga uianga ka uriuriia i teianei?
2 I te atikara i mua ake, kua akara tatou e ko Iehova te Atua o te tuatua mou. Kua kite aia i te tuatua mou o te au apinga ravarai. Ei tukeanga ki tona enemi akavare ko Satani te Tiaporo, e tu tuatua mou to Iehova. Ko tei maata atu, te akakite ua ra a Iehova i te tuatua mou ki tetai ke. Kua raurau te apotetoro ko Paulo ki te au taeake Kerititiano: “Ei aru kotou i te Atua, mei te tamariki akaperepere ra.” (Ephesia 5:1) Ei Au Kite no Iehova, ka akapeea tatou me aru iaia i te tuatua anga e te akono anga i te tuatua mou? Eaa ra i puapinga ai kia rave i te reira? E eaa te akapapuanga tei rauka ia tatou e te ariki maira a Iehova i te aronga e aruaru ra i te aerenga o te tu tuatua mou? Ka akara ana tatou.
3, 4. Akapeea nga apotetoro ko Paulo raua ko Petero i te akatakaanga no runga i te ka tupu i “taua tuatau openga ra”?
3 Te noo nei tatou i roto i tetai tuatau te maata nei te pikikaa i te pae akonoanga. Mei tei totouia e te apotetoro ko Paulo i raro ake i te akauruanga tu-Atua, e maata te tangata i roto i teia “au tuatau openga ra” e tutu akono i te Atua to ratou inara kua pikikaa i tona ririnui. Te patoi ra etai i te tuatua mou, no te “ngakau kino, e te tau koreia.” Pera katoa, “ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” Noatu e te apii ua ra taua aronga ra, kare rava e “rauka [ia ratou] te kite i te tuatua-mou.”—2 Timoteo 3:1, 5, 7, 8, 13.
4 Kua akauru katoaia te apotetoro ko Petero kia tata no runga i te ra openga. Mei tana rai i totou, kare anake te tangata e kopae i te tuatua mou pera katoa te aviri ra i ta te Atua Tuatua e te aronga e akakite ra i te tuatua mou. “I tau ki ta ratou i inangaro,” kua kopae taua aronga aviri i te tikaanga e ko te ao o to Noa tuatau kua tiruvi ia ma te vai, te akanoo anga mai i tetai tutu akaraanga no te akavaanga a te tuatau ki mua. Ta ratou ua i manako ra ka akatupu i te tumatetenga no ratou uaorai me tae mai to te Atua tuatau no te takore i te aronga akono tau kore i te Atua.—2 Petero 3:3-7 akaaiteia NW.
Kite te Au Tavini o Iehova i te Tuatua Mou
5. Kia tau ki te peroveta ko Daniela, eaa te ka tupu i “te tuatau openga ra,” e i akapeea teia totou i te akatupu angaia?
5 I roto i tetai akatakaanga o “te tuatau openga ra,” kua totou te peroveta ko Daniela i tetai tupuanga tuke atu i roto i to te Atua iti tangata— te akaoraora akaou anga i te tuatua mou akonoanga. Kua tata aia: “E manganui te ka oro ki runga e ki raro, e tupu atura te kite i te maata anga.” (Daniela 12:4) Kare te iti tangata o Iehova i akaoripuia me kore i akamatapoia e Tei Akavare maata. Te akarakaraanga na roto i te au kapi o te Pipiria, kua rauka mai ia ratou te kite tuatua mou tikai. I te anere mataiti mua, kua akamarama a Iesu i tana au pipi. “Akamārama atura aia i to ratou ngakau, kia kite ratou i te tuatua i tataia ra.” (Luka 24:45) I to tatou tuatau, kua rave akapera rai a Iehova. Na roto i tana Tuatua, tona vaerua, e tana akaaerenga, kua akariro aia e kia rauka i te au mirioni takapini i te enua kia marama i tei kitea keia e ia—te tuatua mou.
6. Kua marama te iti tangata o te Atua i teia tuatau i teea au tuatua mou Pipiria?
6 Ei iti tangata no te Atua, kua marama tatou i te au mea e manganui tei kore e rauka ia tatou i te kite. Kua kite tatou i te au pauanga ki te au uianga tei ngata i te au tangata pakari o te ao i te marama no tetai au mareniamu. Ei akaraanga, kua kite tatou i te tumu i vai ei te mamaeanga, te tumu i mate ei te tangata, e te tumu i kore ei e rauka i te tangata te au e te taokotaianga takapini i te koropu. Kua akameitaki katoaia tatou ma tetai orama no runga i ta te tuatau ki mua e mou maira—te Patireia o te Atua, tetai enua parataito, e tetai oraanga ope kore ma te apa kore. Kua kite tatou ia Iehova, ko Tei Teitei Rava. Kua kite mai tatou i tona au tu peretana meitaki kapiti mai ki ta tatou ka tau kia rave e rekareka ei i tana akameitakianga. Te kiteanga i te tuatua mou te akariro ra ia tatou kia kite i tei kore i te tuatua mou. Te taangaanga anga i te tuatua mou te paruru ra ia tatou mei te au tautaanga puapinga kore, te akariro ra ia tatou kia rauka tei meitaki mei te oraanga, e te oronga maira kia tatou i te manakonakoanga meitaki no te tuatau ki mua.
7. Ka rauka iaai ma te au tuatua mou Pipiria, e kare e rauka kiaai ma?
7 Te marama ra ainei koe i te tuatua mou Pipiria? Me koia ia, kua akameitaki puapingaia koe. Me tata tetai tangata tata i te puka, tei matauia ka akatanotano aia i te reira kia reka ia mai e tetai pupu tangata. Kua tataia etai au puka no te aronga apii meitakiia, tetai no te au tamariki, noatu rai tetai atu no te aronga e kite to ratou i roto i tetai au tu angaanga. I te mea te rauka ra te Pipiria i te katoatoa, kua akariro ia te reira e kia maramaia e kia arikiia e tetai tu tangata. Kua akapapa a Iehova i te reira no te aronga tu akaaka, te aronga maru o te enua. Ka opu uaia e taua tu aronga te aiteanga tikai o te Pipiria, noatu mei teaa te tu o ta ratou apiianga, te peu, te turanga o te oraanga, me kore te pupu eteniki. (1 Timoteo 2:3, 4) I tetai tua, kare i orongaia te maramaanga i te tuatua mou Pipiria ki te aronga tei kore i tau, noatu mei teaa te kite tikai ia ratou me kore te meitaki o te apiianga. Te aronga nengonengo, te ngakau parau, kare roa e opu i te au tuatua mou akaperepereia o te Tuatua a te Atua. (Mataio 13:11-15; Luka 10:21; Angaanga 13:48) Ka rauka ua i te Atua i te oronga mai i taua puka.
E Aronga Tu Tuatua Mou te Au Tavini o Iehova
8. Eaa ra a Iesu i riro ei e ko te tumuanga o te tuatua mou?
8 Mei ia Iehova rai, e aronga tu tuatua mou te au Kite tiratiratu nona. Ko Iesu Karaiti, te Kite meitaki roa atu no Iehova, kua akapapu i te tuatua mou na roto i te au mea tana i apii e na roto i tona tu oraanga e i te mate anga. Kua turu aia i te tuatua mou o te tuatua e te au taputou a Iehova. No te reira, ko Iesu te tumu tikai o te tuatua mou, mei tana uaorai i tuatua ra.—Ioane 14:6; Apokalupo 3:14; 19:10.
9. Eaa ta te au Tuatua Tapu e karanga ra no te akakiteanga i te tuatua mou?
9 Kua “ki [a Iesu] i te aroa ua e te tuatua-mou” e “kare katoa e pikikaa o roto i tona vaa.” (Ioane 1:14; Isaia 53:9) Te aru ra te au Kerititiano mou i ta Iesu akaraanga i akanoo i te akono anga i te tu tuatua mou ki tetai ke. Kua ako a Paulo i te au taeake irinaki ra: “Ei tuatua-mou ta te tangata ravarai kia tuatua atu ki tetai.” (Ephesia 4:25) I mua atu, kua tata te peroveta ko Zekaria: “Ei tuatua-mou ta te tangata katoa e tuatua ki tona tangata tupu.” (Zekaria 8:16) E aronga tu tuatua mou te au Kerititiano no te mea te inangaro ra ratou i te akamareka i te Atua. E tu tuatua mou to Iehova e te kite ra i te kino te ka tupu mai mei te pikikaa. No reira, te tapapa tau maira aia i tona au tavini kia akakite i te tuatua mou.
10. Eaa ra te tangata i pikikaa ei, e eaa te au tupuanga papu kore?
10 Ki te manganui, i te akaraanga e mea tau ua te pikikaa e rauka mai ei te au meitaki. Te pikikaa ra te tangata kia kore e papaia, kia puapingaia i tetai au ngai, me kore kia rauka te akapaapaaanga o tetai ke atu. Inara, te raveanga i te pikikaa e mea kino ia. Tei maata atu, kare e rauka i tetai tangata pikikaa te tu marekaanga o te Atua. (Apokalupo 21:8, 27; 22:15) Me kiteia tatou ei aronga tuatua mou, ka irinaki mai tetai ke i ta tatou e tuatua ra; te irinaki ra ratou ia tatou. Inara, me mou tatou no te tuatua i tetai manga tuatua pikikaa, ka ekoko mai tetai ke i te tu tuatua mou tikai o ta tatou e tuatua ra a te tuatau ki mua. Te akakite ra tetai materi Aperika: “Te akakino ra tetai manga tuatua pikikaa i te au tuatua mou e tauatini ua atu.” Te karanga ra tetai materi e: “Kare rava e irinakiia tetai tangata pikikaa, noatu me tuatua aia i te tuatua mou.”
11. Na roto i teea mataara i maata atu ei te tu tuatua mou i te akakite ua anga i te tuatua mou?
11 E maata atu te aiteanga o te tu tuatua mou i te akakite ua i te tuatua mou. E tu oraanga ia. Te akataka maira e koai tikai tatou. Te akakite ra tatou i te tuatua mou ki tetai ke kare ua e na roto i ta tatou e tuatua ra pera katoa na roto i ta tatou e rave ra. “Ko koe oki ko tei apii atu i tetai ke ra, kare koe e apii ia koe uaorai?” i ui ei te apotetoro ko Paulo. “Ko koe oki tei ako ua e, auraka e keia, te keia na oki koe? Ko koe oki ko tei karanga e, auraka e akaturi, te akaturi na oki koe?” (Roma 2:21, 22) Me oronga tatou i te tuatua mou ki tetai ke, ka tau tatou kia akono i te tuatua mou i roto i to tatou au aerenga katoatoa. Ka akatupu to tatou tu meitaki no te tuatua mou e te tuatua tika i te akakeuanga ki runga i ta te tangata ariuanga mai ki ta tatou e apii ra.
12, 13. Eaa ta tetai mapu i tata no runga i te tu tuatua mou, e eaa ra te tumu no tona turanga akono teitei?
12 Te marama katoa ra te au mapu i roto i te au tavini o Iehova i te puapinga o te tu tuatua mou. I roto i tetai tataanga tua i te apii, ko Jenny, e 13 mataiti i taua taime ra, kua tata: “E apinga akaperepereia te tu tuatua tika kiaku. Ma te tau kore, kare e maata ana te tangata te akono ra i te tu tuatua tika i teia tuatau. Kua taputou au iaku uaorai e ka akono ua atu au i te tu tuatua tika i roto i toku oraanga. Ka akono au i te tuatua tika noatu e ko te akakiteanga i te tuatua mou kare te reira e akapuapinga viviki mai iaku me kore i toku au oa. Te akapapu ra au e e aronga tuatua tika toku au oa e e aronga te akakite ra i te tuatua mou.”
13 Te tuatua anga no runga i tana tataanga, kua tata te puapii o Jenny: “E mapu ua koe i te tatanu anga i te tu akono ketaketa e te papaanga puapinga. Kua kite au e ka akono koe taau papaanga no te mea kua rauka ia koe i taua tu akamaroiroi.” Na teaa i akatupu i teia tu akono ki teia tamaine apii? I roto i te akamataanga o tana tataanga, kua akakite a Jenny e na tana akonoanga i “akanoo i te au kaveinga no [tona] oraanga.” E itu mataiti i pati mei te taime i tata ei a Jenny i taua tataanga. Mei ta tona puapii i akamanako ra, te akaari ua atura a Jenny i tetai turanga tu akono meitaki i roto i tona oraanga e ko tetai o te Au Kite o Iehova.
Akakite Mai te Au Tavini o Iehova i te Tuatua Mou
14. Eaa ra i riro ei ei apainga maata atu na te au tavini o te Atua kia turu i tei tika?
14 E tika, penei ka akakite mai tetai ke i te pae mai i te Au Kite o Iehova i te tuatua mou e te tauta ra i te akono i te tuatua tika. Inara, ei au tavini no te Atua, e apainga maata ta tatou no te turu i tei tika. Kua orongaia mai te au tuatua mou Pipiria kia tatou—te au tuatua mou te ka arataki i tetai ki te ora mutu kore. No reira, e apaianga ta tatou no te akakite aere i te kite ki tetai ke. “Ko te tukuia atu te mea maata ra,” i na Iesu ei, “e mea maata katoa te umuumuia atu.” (Luka 12:48) Papu tikai, ‘e maata te umuumuia ra’ no te aronga tei akameitakiia ma te kite akaperepere o te Atua.
15. Eaa te tu mataora taau e kite ra i roto i te oronga anga i te tuatua mou Pipiria ki tetai ke?
15 Te vaira te mataora i roto i te oronga anga i te tuatua mou Pipiria ki tetai ke. Mei te pipi rai a Iesu i te anere mataiti mua, te akakite ra tatou i te tuatua meitaki—tetai tuatua manakonakoanga akapumaana—ki te aronga “kua mate ratou i te roiroi, e kua pueurikiriki keia, mei te mamoe tiaki kore ra” e ki te aronga tei akamatapoiriia e tei akaoripuia e te “tuatua o te au demoni ra.” (Mataio 9:36; 1 Timoteo 4:1) Kua tata te apotetoro ko Ioane: “Kia kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioane 4) Te tu tiratiratu o te “au tamariki” a Ioane—penei ko te aronga tana i oronga atu i te tuatua mou—kua apai mai i te rekareka maata kiaia. Te tupu maira te rekareka kia tatou me kite atu tatou i te tangata i te ariuanga mai ma te arikianga i te Tuatua a te Atua.
16, 17. (a) Eaa i kore ei te katoatoa e ariki i te tuatua mou? (e) Eaa te rekareka taau ka kite ia koe e akakitekite ra i te tuatua mou Pipiria?
16 E tika, kare te katoatoa e ariki i te tuatua mou. Kua tuatua a Iesu i te tuatua mou no runga i te Atua, noatu me kare te reira e rekaia mai. Ki te aronga ngati Iuda tei patoi ra kua tuatua atu aia: “Eaa kotou i kore ei i akarongo mai iaku nei? No te Atua aia ra, ka akono ïa i ta te Atua tuatua: kare kotou i akono, no te mea kare kotou i to te Atua.”—Ioane 8:46, 47.
17 Ko tatou, mei ia Iesu rai, kare e tapupu mei te akakitekite anga i te tuatua mou akaperepereia no runga ia Iehova. Kare tatou e tapapa i te katoatoa kia ariki i ta tatou e akakite ra kia ratou, kare oki te katoatoa i ariki ana i ta Iesu i tuatua atu. Noatu rai, kua rauka ia tatou te rekareka no te kiteanga e te rave ra tatou i tei tika. Te inangaro ra a Iehova no tona aroa takinga meitaki i te tuatua mou kia akakiteia ki te tangata ravarai. Ei aronga kua rauka te tuatua mou, kua riro mai te au Kerititiano ei aronga apai i te marama ki roto i tetai ao poiri. Na te tuku anga i te marama o te tuatua mou kia kaka na roto i ta tatou au tuatua e te au angaanga, ka rauka ia tatou i te tauturu i tetai ke kia oronga i te kaka ki to tatou Metua i te rangi ra. (Mataio 5:14, 16) Te akakitekite ra tatou ki te katoatoa e te patoi ra tatou i ta Satani urianga o te tuatua mou pikikaa ra e te turu ra i ta te Atua Tuatua viivii kore e te kino kore. Ko te tuatua mou ta tatou i kite e te akakite ra ka rauka i te oronga atu i te tu rangatira mou ki te aronga tei ariki i te reira.—Ioane 8:32.
E Aruaru i te Aerenga o te Tu Tuatua Mou
18. Eaa ra e i akapeea a Iesu i te akara mareka anga ia Natanaela?
18 Kua inangaro e kua tuatua a Iesu i te tuatua mou. I roto i tana angaanga orometua i te enua nei, kua akaari aia i te tu mareka anga ki te aronga tuatua mou. No runga ia Natanaela, kua tuatua a Iesu: “Ka akara na i te ngati Iseraela tikai, kare ua e pikikaa o roto iaia.” (Ioane 1:47) Aru maira, ko Natanaela, tei kapiki katoaia e ko Baratolomea, kua ikiia e ko tetai o te 12 apotetoro. (Mataio 10:2-4) Mei teaa atura te tu ngateitei!
19-21. Akapeea tetai tangata matapo i mua ana i te akameitaki angaia no tona tu tuatua mou mataku kore?
19 Te akakite maira te katoaanga o tetai pene i roto i te puka Pipiria o Ioane i tetai tua no tetai tangata tuatua tika tei akameitakiia e Iesu. Kare tatou i kite i tona ingoa. Ko ta tatou ra i kite e tangata patipati e e matapo mei tona anauanga mai. Kua poitirere tikai te tangata i te akaoki anga mai a Iesu i tona mata kite anga. Kua akarongoia teia nuti no runga i teia rapakauanga temeio e etai o te au Pharisea, e aronga riri i te tuatua mou, tei akatika i rotopu ia ratou uaorai e ko tetai ua atu e akono ra i te akarongo i roto ia Iesu ka tuaruia mei te tunako. Te kiteanga i ta ratou i parani, kua pikikaa te nga metua mataku o te tangata i matapo i mua ana ki te au Pharisea, te tuatua anga e kare raua i kite e i akapeea i rauka ei i ta raua tamaiti i te kite akaou anga me kore koai tei apa no te reira.—Ioane 9:1-23.
20 Kua kapiki akaouia taua tangata i rapakauia ra ki mua i te au Pharisea. Kare i manako ana i te ka tupu, kua akakite mataku kore aia i te tuatua mou. Kua akamarama aia e akapeea aia i te rapakau angaia e na Iesu te reira i rave. Kua umere tikai e kare teia au tangata rongonui e te apii meitaki i irinaki ana e no ko mai a Iesu i te Atua, kua raurau mataku kore te tangata tei rapakauia ia ratou kia ariki i tei kitea uaia: “Naringa teianei tangata kare to te Atua ra, kare rava tana ravenga e tika.” I te kore anga e rauka i te taumaro atu kua akaapa te au Pharisea i te tangata ma te tu akakino e kua titiri atura iaia ki vao.—Ioane 9:24-34.
21 I te kite anga mai a Iesu i teia, kua aere aroa atura aia i te kimi i taua tangata ra. I muri mai i te rave anga i te reira, kua akamaroiroi atu aia i te akarongo tei akaariia e taua tangata matapo i mua ana. Kua akakite ua a Iesu iaia uaorai e ko te Mesia. Mei teaa taua tangata i te akameitaki angaia no te akakitekite anga i te tuatua mou! Papu tikai te iri ra te tu mareka anga tu-Atua ki runga i te aronga e tuatua ra i te tuatua mou.—Ioane 9:35-37.
22. Eaa ra tatou ka aruaru ei i te aerenga o te tu tuatua mou?
22 Te akono maroiroi anga i te tuatua mou e tautaanga ka tau tatou kia akamanako pakari. E mea puapinga ia no te akatupuanga e te akono ua atu anga i te au pirianga meitaki ki te au tangata e te Atua. Kia akono i te tu tuatua mou te aiteanga kia va ua, tika tikai, aravei uaia, e te irinakiia, e ka rauka mai to Iehova tu marekaanga. (Salamo 15:1, 2) Kia kore e akono i te tuatua mou te aiteanga kia akavare ua, irinaki tau koreia, e te pikikaa, e te akatupu ra te reira i to Iehova tu mareka kore. (Maseli 6:16-19) No reira, e akono tamou i te akono i te aerenga o te tu tuatua mou. E tikai, kia aru i te Atua o te tuatua mou, kia kite tatou i te tuatua mou, kia tuatua i te tuatua mou, e kia akono ua atu i te tuatua mou.
Akapeea Koe me Pau?
• Eaa ra tatou ka ariki ua ei e kua kite tatou i te tuatua mou?
• Akapeea tatou me aru ia Iehova i roto i te akakite anga i te tuatua mou?
• Eaa te au puapinga te vaira no te oronga anga i te tuatua mou Pipiria ki tetai ke?
• Eaa ra i puapinga ei kia aruaru i te aerenga o te tu tuatua mou?
[Au Tutu i te kapi 17]
Orongaia mai te tuatua mou Pipiria, te akakite maroiroi ra te au Kerititiano i te reira ki tetai ke
[Au Tutu i te kapi 18]
Te tangata matapo tei rapakauia e Iesu kua akameitaki maataia no te akakitekite i te tuatua mou