Eaa te Tangata i Mate Ei?

Pauanga a te Pipiria

Aiteite tatou pouroa, e manako ana tatou e eaa rai te tangata ka mate ei, i te tuatau tikai me mate tetai tei akaperepereia e tatou. Karanga te Pipiria e: “To te mate nei tara, ko te ara ïa.”​—1 Korinetia 15:56.

Eaa ra te tangata i ara ai e i mate ei?

Kua mate te nga tangata mua ko Adamu e Eva no te mea kua ara raua. (Genese 3:17-19) Tupu te mate no te mea kua akarongo kore raua i te Atua, inara ko te Atua te “tumu o te ora.”​—Salamo 36:9; Genese 2:17.

Kua iri mai ta Adamu ara ki runga i tana uanga pouroa. Karanga ra te Pipiria: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Ka mate te tangata pouroa no te mea kua ara te katoatoa.​—Roma 3:23.

Akapeea te mate me akakoreia

Taputou mai te Atua e nana e “akakore rava i te mate e tuatau ua atu.” (Isaia 25:8) E kore ei te mate, ka akakore aia i te apinga e akatupu ra i te reira, ko te ara. Ka rave te Atua i teia na roto ia Iesu Mesia, ko te ka “apai ke atu i te ara a to te ao” katoa.​—Ioane 1:29; 1 Ioane 1:7.