Tuke Rai Teia Tauturu Apii Pipiria

Ia Tianuare 2021, kua akakite te Pupu Akaaere i tetai tauturu apii Pipiria, ko te puka Oraanga Mataora e Tuatau Ua Atu!a Eaa toou manako i teia puka? Karanga a Matthew, i Canada e: “Rekareka tikai au! Te akakite anga mai te au akoanga e te au vitio te tumu i maaniia ai teia puka, maata ua atu toku rekareka. Inangaro au i te taangaanga viviki i te reira.”

Kua akaari mai te puka Oraanga Mataora e Tuatau Ua Atu! i tetai ravenga ou no te apii i te Pipiria. E kare ko teia ua te tuke i rotopu i te puka ou e te au mea taito. Me taangaanga koe i teia puka neneiia, Oraanga Mataora e Tuatau Ua Atu! e manga tuke rai te reira. Eaa i pera ei, ka akara tatou akapeea te reira te maaniia anga.

E Puka Ou e te Tuke Rai

Teiaa te pepa. Eaa te tumu? Tere atu i te 600 tutu karakara o te puka Oraanga Mataora e Tuatau Ua Atu!, e tai ngauru taime maata atu i te puka Apii ia Tatou! E maata katoa te ngai teatea i roto i te puka ou—kare e tataanga e te tutu—i runga i te au kapi. Te ngai kino i teia nga mea e rua: Me angiangi te pepa, ka kiteaia te tutu i muri ake i tetai kapi, noatu tetai manga ua. Kia kore teia e tupu, kua tamata te au taeake o te International Printing Department (IPD), i Wallkill, New York, Marike, e a au pepa tukeke te taangaanga nei tatou i roto i te ngai neneianga puka. Kua akara meitaki te Kumiti Tataanga o te Pupu Akaaere i te reira e kua iki i te pepa kare e angiangi roa ana. Noatu e 16 patene maata atu te oko i teia pepa i tetai atu tei taangaangaia no te au puka, ka rauka i te aronga apii Pipiria i te tatau meitaki i te au kapi o te Oraanga Mataora e Tuatau Ua Atu! kia kore ratou e tamanataia e te au tutu i tetai tua o te kapi.

Tuke te vaii laminate. E tuke te vaii o te puka ou mei to te au puka no te mea kua tapiriia te reira ki tetai laminate tuke. Kare ko te laminate kanapanapa, mari ra e matte finish, ka manea atu te tutu i te kapi mua. Ka paruru katoa te reira i te puka kia kore e kinokino vave. Inara, te matte laminate e rima taime maata atu te moni i te gloss laminate. No reira kua uriuri kapiti tetai au Opati Betela kia rauka tetai matte finish māmā ake.

Eaa teia au mea oko maata i raveia mai ei? Akakite tetai taeake o te IPD e: “Tamanako atu matou e ka taangaanga putuputuia teia puka, no reira kua inangaro matou kia manea ua te reira.” Karanga a Eduardo, o te Printery Office i te opati Betela Brazil e: “Rekareka tikai matou te kite i ta Iehova akaaerenga te taangaanga anga i te au mea meitaki kia manea ta tatou puka, kia roa te reira, maru te mou anga, e kua taangaanga meitakiia te au moni tauturu.”

Neneianga i te Tuatau o te Maki Kino COVID-19

Kua akamata matou i te nenei i te puka Oraanga Mataora e Tuatau Ua Atu! i roto ia Mati 2021. Kua tupu tetai au manamanata i te tuatau tikai o te maki kino COVID-19. No te mea kua lockdown te au ngutuare Betela, kare te au taeake tauturu no vao mai ia Betela e rauka i te angaanga, e kare rai e meitaki te pati i te au taeake ou kia tavini i Betela. Kare e rava ana te aronga angaanga i tetai au ngai neneianga, e kua akamutuia te reira no te au arai anga a te kavamani.

Eaa tei tupu? Te papa anga te au ngai neneianga, kua tukuia tetai au taeake e te au tuaine mei te au tipatimani tukeke o Betela kia tauturu i te reira. “No to ratou tu akaatinga e te puareinga ua kia apii i te au angaanga ou, kua oti te angaanga,” i na Joel ei o te IPD.

Noatu te au manamanata, e mirioni ua atu puka Oraanga Mataora e Tuatau Ua Atu! tei neneiia. Kua anoanoia tetai au apinga ke no te nenei i teia au puka, te plates, te laminate film, te pepa, te inika, e te tapiri. I roto i te rima marama mua te neneianga, tere atu i te $2.3 mirioni (U.S.) moni i pou no teia au apinga. Ei akaiti mai i te moni ka pou, kua nenei ua matou i te au puka ka anoanoia na te au putuputuanga.

“E Puka Manea Tikai”

Eaa te manako o te au puapii Pipiria e ta ratou aronga apii no teia puka tauturu? Karanga a Paul, e taeake i Australia e: “Reka tikai au i teia puka Oraanga Mataora e Tuatau Ua Atu! rekareka ua atu au te rave i taku au apii Pipiria. Manea tikai te akanoo anga o te puka reka rai te uriuri. Mako tikai te au akakiteanga taka meitaki, te au uianga akakeu i te ngakau, te au vitio, te au tutu, te au tiata, e te au akakoroanga o te tangata apii Pipiria. E puka manea tikai teia tei akakeu iaku kia meitaki atu taku apiipii.”

Karanga tetai tangata apii Pipiria i Marike e: “Reka tikai au i teia puka ou. Ka tauturu te au tutu iaku kia mārama i te au tumu manako puapinga. Pakia tikai toku ngakau e kua akakeuia au kia taangaanga i te reira.” Te apii nei teia tangata apii e rua taime i te epetoma e te aere putuputu nei ki te au uipaanga putuputuanga.

E mirioni ua atu puka Oraanga Mataora e Tuatau Ua Atu! kare i oti ake i te nenei i roto i te au reo tukeke. Kua akatika te Pupu Akaaere i teia taime kia neneiia teia puka ki roto i te 710 reo, e 340 maata atu i te puka Apii ia Matou!

Akapeea teia neneianga me tutakiia? Na roto i te au moni tauturu no te au angaanga i te ao katoa, te aere maira te reira na roto i te donate.jw.org. Meitaki maata no to kotou ngakau aroa, kia rauka teia au tauturu apii Pipiria i te neneiia na te aronga tei inangaro i te apii ia Iehova e kia “ora rai [te] ngakau e tuatau ua atu.”—Salamo 22:26.