Taangaanga Raua i te Pipiria Kia Pau i Taku au Uianga!

TOKU ORAANGA I MUA ANA:

Toku anauia anga, kua noo toku nga metua ki tetai ngai tanutanu i roto i te oire ko Galicia, i te tua tokerau opunga o Paniora. Ko au te a o te au tamariki e varu. E mataora tikai to matou ngutuare tangata. I tera tuatau i Paniora, e mea matau no tetai tamaiti me kore tamaine i roto i te ngutuare tangata kia aere ki te apii a te au orometua, me kore ki te ngai o te au paretenia. I to matou ngutuare tangata, e toru ia matou tei rave i te reira.

I toku 13 mataiti, kua kapiti atu au ki toku tuakana i te ngai o te au paretenia i Madrid. Kare te au paretenia e akaari ana i te tu mataora. Kare ratou e akatupu ana i te au pirianga oa, mari ra kua akanoo ratou i te au ture, e kua pure ratou i te au taime ravarai. I te au popongi mamaiata, e uipa ana matou i roto i te are pure kia akamanako oonu, inara kare e rauka iaku i te rave i te reira. Muri mai, kua imene matou i te au imene pure e kua akono matou i te oroa i roto i te reo Latin. Kare e maata ana taku i marama e kua manako au e e mamao roa te Atua mei iaku. I taua tuatau ra, kare au i tuatua ana ki tetai atu tangata. Me aravei maua ko toku tuakana, ka rauka ua ia maua i te tuatua e, “E akapaapaa ia Maria.” Kua akatika mai te au paretenia ia matou e āpa ora i te au ra no te pukapuka anga i muri ake i te kaikai. E tuke takiri te reira ki te tu mataora o toku ngutuare tangata! Kua maromaroa tikai au e e maata te taime kua mii au.

Noatu kare au i manako e kua vaitata au ki te Atua, kua riro mai au ei paretenia i toku 17 mataiti. Kua rave ua au i taku e anoano ra i te rave, e i muri mai kua akamata au i te manako ekoko e me kua iki rai te Atua iaku kia rave i teia angaanga. E karanga ana te au paretenia e me e manako ekoko toou, ka aere koe ki roto i te pani a Satani! Noatu rai, kare toku manako ekoko e ngaro ana. Kua kite au e kare roa a Iesu i akatakake ana iaia uaorai mei te tangata, mari ra kua apii e kua tauturu aia i etai ke. (Mataio 4:23-25) I toku 20 mataiti anga, kare au e inangaro ana kia riro mai ei paretenia. Te mea poitirere, kua akakite mai te paretenia maata kiaku e me kare au i papu e me ka riro mai au ei paretenia, kia akaruke vave au i teia ngai. I toku manako, penei kua mataku aia e ka riro toku tu ei taui i te manako o tetai atu au paretenia. No reira kua akaruke au.

Te oki anga au ki toku ngutuare tangata, kua marama ua toku nga metua i taku i rave. Inara no te mea kare e ngai angaanga i roto i to matou oire, kua neke au ki Tiamani ki te ngai e noo ra toku tungane. Tei roto aia i tetai pupu no Paniora mai tei irinaki e kia aiteite te turanga o te au tangata katoatoa. Kua mataora au i te kapiti atu ki te aronga tei turuturu i te au tikaanga o te tangata e tei irinaki e kia aiteite te au turanga o te vaine ki te katoatoa. No reira kua piri atu au kia ratou e kua akaipoipo au i tetai mema o teia pupu tangata. Manako au e e angaanga puapinga taku e rave ra, te tuʼa aere anga i ta ratou au puka e te piri atu anga ki ta ratou au mati no te patoi i te aronga mana.

I te taime i aereia, kare au e mataora akaou ana. I toku manako, kare teia aronga e rave ana i ta ratou i tuatua. Kua ririnui toku manako ekoko i te mataiti 1971 te tutungi anga tetai au mapu o teia pupu i te opati no te aronga Paniora i Frankfurt, e kua kā te opati i te ai. Kua rave ratou i te reira kia patoi i te tu tau kore o te aronga mana i Paniora. Inara, kua irinaki au e kare teia i te mataara meitaki kia akaari i to ratou riri.

Te anau anga au i taku tamaiti mua, kua akakite au ki toku tokorua e kare au e aere akaou ki te au uipaanga a teia pupu. Manga maromaroa au no te mea kare toku au oa i roto i teia pupu i atoro mai iaku e taku pepe. Kua akamanako au e eaa tikai te akakoroanga o te oraanga. Me e puapinga ainei kia tauta kia meitaki mai te turanga o te iti tangata?

KUA TAUI TE PIPIRIA I TOKU ORAANGA:

I te mataiti 1976, kua topapa tetai nga tokorua Kite no Paniora mai i to matou ngutupa e kua oronga mai raua i te au puka Pipiria, e kua ariki au i te reira. Te oki mai anga raua, kua ui au i te au uianga no runga i te turanga mamae, te tu papaki tai, e te tu tau kore. Kua poitirere au no te mea kua taangaanga raua i te Pipiria kia pau i taku au uianga! Kua ariki au i tetai apii Pipiria.

I te akamataanga, e reka ana au i te kite i te au manako ou. Inara kua taui te reira i te tuatau i akamata ai maua ko taku tane i te aere ki te au uipaanga i ko i te Are Uipaanga Patireia o te Au Kite o Iehova. I tera taime, e rua a maua tamariki. Kua apai te nga Kite ia matou ki te au uipaanga e kua tauturu ia maua i te akono i te tamariki. I reira, kua tupu toku inangaro no te Au Kite o Iehova.

Noatu rai, e au manako ekoko toku no runga i te au akonoanga. I reira kua aere au ki Paniora i te atoro i toku ngutuare tangata. Kua tauta te teina o toku papa i te tāpu iaku kia kore au e apii i te Pipiria. Inara e maata te tauturu ta te Au Kite o Iehova i oronga mai. Kua pau mai ratou i taku au uianga mei roto mai i te Pipiria, mei ta te Au Kite i Tiamani i rave. No reira, kua iki au kia apii akaou i te Pipiria me oki au ki Tiamani. Noatu kare taku tane i apii akaou i te Pipiria, kare roa au i akamutu ana. I te mataiti 1978, kua papetitoia au ei Kite no Iehova.

KUA PUAPINGAIA AU:

Kua oronga mai te kite tika tikai no roto mai i te Pipiria i te manakonakoanga e te aratakianga i roto i toku oraanga. Ei akaraanga, te akamaroiroi maira a 1 Petero 3:1-4 i te au vaine kia “kauraro marie” ki ta ratou tane, kia akangateitei ia ratou, e kia akatupu i te “ngakau maru e te muteki ua, ko te mea apinga maata ïa ki mua i te aroaro o te Atua.” Kua tauturu teia au kaveinga Pipiria iaku kia akono i taku tuanga ei metua vaine Kerititiano.

I teianei, mei te 35 mataiti i topa. Te mataora nei au i te tavini i te Atua kapiti atu i te taokotaianga taeake i te ao katoa, e no te mea e a aku tamariki e tavini ra ia Iehova.