Au Metua, Kia Rekareka i ta Kotou Tamariki

“E rekareka to metua tane e to metua vaine.”​—MASELI 23:25.

1. Eaa te ka akariro i te au metua kia kite i te mareka anga i ta ratou au tamariki?

MEI teaa ra te meitaki i te kite anga i tetai rakau ou i te tupu anga e te riro anga ei tetai rakau maroiroi maata tei manea ra e tei meitaki ra ei ngai marumaru​—e maata atu oki me naau i tanu e i utuutu i te reira! Mei te reira katoa oki, te au metua tei utuutu ra i te au tamariki tei tupu akera ei au tavini pakari no te Atua ka kite i te mareka anga meitaki ia ratou ra, mei ta te materi Pipiria e tuatua ra: “E rekareka maata ïa te metua o te tangata tuatua-tika ra; e tei anau i te tamaiti pakari, e rekareka katoa ïa iaia. E rekareka to metua tane e to metua vaine, e tei anau ia koe ra, ka rekareka ïa.”​—Maseli 23:24, 25.

2, 3. (a) Akapeea e raukaʼi i te au metua i te kopae ke i te aue e te mamae? (e) Eaa te umuumuia ra e te rakau ou e pera katoa te au tamariki kia riro mai ei tumu no te mareka anga?

² Inara, kare te tamaiti e riro ua mai ei “tuatua-tika” e kia “pakari.” E maata te tauta anga te umuumuia ra kia kore e riro te aronga ou ra ei tumu no “te aue” e “te mamae oki,” mei te angaanga te raveia ra e akariroanga i tetai rakau meangiti ou ra ei tetai rakau maroiroi maata tei manea ra. (Maseli 17:21, 25) Ei akatauanga, ka rauka i te au rakau pange ra i te akatikatika i te tupu anga te au rakau ou ra e kia maroiroi oki. E mea puapinga maata katoa oki te tamauu putuputuia i te vai, e penei katoa ka tau kia paruruia tetai rakau ou ra kia kore e akakinoia e te manumanu. Te mea openga, ka tauturu te tipupuanga i te au manga maemae ra kia tupu mai ei tetai rakau manea ra.

³ Te akakite maira te Tuatua a te Atua e te umuumuia ra te au apinga mei te terenianga tau i te Atua ra, te tamauu anga ma te vai tuatua mou o te Pipiria ra, te paruru atu anga te au tu akono tau kore ra, e te akoanga aroa ei tipu ke atu i te au tu ravenga anoano koreia ra. Ei oronga anga i teianei au mea anoanoia nei, te raurauia maira te au metua tane kia akono i ta ratou tamariki ra “e apii ra ia ratou kia pakari ma te ako a te Atu ra.” (Ephesia 6:4) Eaa ra te kapitiia atura ki teia?

Akaketaketa i te Au Tuatua a Iehova

4. Eaa ta te au metua ra apainga no ta ratou au tamariki, e eaa te umuumuia ra i mua ake ka raukaʼi ia ratou te akatupu i te reira?

⁴ Te aite anga o “te ako a te Atu ra” ko te akono anga i to tatou manako anga kia aru i to Iehova anoano. Ka tika te au metua, i reira, kia tuku ki roto i te manako o ta ratou tamariki i ta Iehova manako anga i te au mea. Ka tika katoa oki ratou kia aru i ta te Atua ra akatauanga no te orongaanga i te apii anga aroa, me kare tereni akatikatikaanga. (Salamo 103:10, 11; Maseli 3:11, 12) Inara i mua ake ka raukaʼi i te au metua i te rave i teia, ka tika ratou uaorai kia tauru i ta Iehova ra au tuatua, mei ta te peroveta a te Atua ko Mose i akamaroiroi i to Iseraela i taito ra: “E teianei au tuatua [no ko mai ia Iehova] taku e akaue atu kia koe i teianei rā, ei roto i toou ngakau vai ei.”​—Deuteronomi 6:6.

5. I naea e na teea mataara ta te au metua Iseraela ra apii anga i ta ratou tamariki, e eaa te aite anga e kia “apii tamou”?

⁵ Na te apii putuputu i te Pipiria, te tamanako anga oonu, e te pure oki e akapapa i te au metua kia rave i ta Mose i akaue i muri akera: “E ka apii tamou tikai koe i te [au tuatua a Iehova] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” Te aite anga o te tuatua Epera tei uriia ra e “apii tamou” koia oki “kia tuatua akaouia,” “kia tuatua taokiokiia,” “kia akataka kokoiia.” E akamanako ana i akapeea ta Mose akaketaketa akaou anga i te umuumu anga kia tuku tamou i ta Iehova au tuatua ki mua ra: “E tākai oki koe i te reira ki runga i to rima ei akairo; e ei tarae ki mua tikai i to mata na. E tata oki i te reira ki runga i te au pou o to are ra, e ki runga katoa i to au ngutupa ra.” Te taka meitaki ra e, te umuumu ra a Iehova i te au metua kia oronga putuputu i te manakoanga aroa, ki ta ratou tamariki ra!​—Deuteronomi 6:7-9.

6. Eaa ta te au metua kia apii tamou ki ta ratou au tamariki, e eaa te puapinga?

⁶ Eaa “teianei au tuatua” a Iehova ta te au metua te ka apii tamou tikai ki ta ratou tamariki? Koi oti ua akera ia Mose i te tuatua mai i tei tapaia ra ko te nga Ture Ngauru ra, kapiti katoa i nga akauenga e auraka e ta ua, auraka e akaturi, auraka e keia, auraka e riro ei kite pikikaa, e auraka katoa e morimori apinga. Ko taua au umuumu anga akono tau ra, pera katoa oki te akauenga kia “inangaro atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa,” ko te reira tikai ta te au metua Iseraela kia apii tamou tikai i ta ratou tamariki. (Deuteronomi 5:6-21; 6:1-5) Kare aina koe e akatika e ko teia te tu apiianga te umuumuia ra no te au tamariki i teia tuatau nei?

7. (a) Kua akaaiteia atu te tamariki ki teaa i roto i te Pipiria? (e) Eaa ta tatou ka akara matatio atu i teianei?

⁷ Kua tuatuaia ki te metua tane ngati Iseraela e: “Ka riro taau vaine i toou ra pae are, mei te vine uua ra; e taau au tamariki i te akapini anga i taau ra kaingakai, mei te olive tupu ou ïa.” (Salamo 128:3) Inara, e kite ei te au metua i te mareka anga i ta ratou “au tamariki” auraka i te mamae ngakau, ka tika ratou uaorai kia manako atu i ta ratou au tamariki i te au ra tataki tai. (Maseli 10:1; 13:24; 29:15, 17) E akara matatio tatou e akapeea ta te au metua tereni anga, tamauu anga i te pae vaerua, te paruru anga, e te apii aroaanga i ta ratou tamariki na tetai mataara te ka akariro ia ratou kia kite i te mareka anga tikai ia ratou ra.

Terenianga Mei te Tamariki Anga Mairai

8. (a) Koai ma i rave ei nga rakau terenianga no Timoteo ra? (e) I naea i akamataʼi te terenianga, e eaa oki te tupu anga?

⁸ E akamanako ana ia Timoteo, mei te mea rai e, kua turuia maira e nga rakau pange terenianga e rua tei ngaueue kore ra te akatupu anga​—koia oki tona metua vaine e tona tupuna vaine katoa. I te mea e tangata Ereni te metua tane o Timoteo ra e i te akara anga e tangata akarongo kore ia, kua riro na tona tupuna vaine ngati Iuda ko Eunike, e tona metua vaine ko Loi, tei tereni i taua tamaiti ra ‘mei tona tamariki anga mairai i te tuatua tapu i tataia ra.’ (2 Timoteo 1:5; 3:15; Angaanga 16:1) Kua tutaki maataia to raua maroiroi i te apiianga ia Timoteo​—noatu rai iaia e pepe ra—​i te “angaanga taka ke i raveia e [Iehova] ra.” (Salamo 78:1, 3, 4) Kua riro mai a Timoteo ei tetai mitinari i te au enua mamao ke ra, penei iaia te vai mapu ua ra, e e tuanga maata tana i te akamaroiroianga i te au putuputuanga Kerititiano mua ra.​—Angaanga 16:2-5; 1 Korinetia 4:17; Philipi 2:19-23.

9. Akapeea e raukaʼi kia kite te aronga ou ra i te kopae ke i te au ereere o te noinoi apinga ra?

⁹ Te au metua, eaa to kotou tu ei au rakau pange i te terenianga. Ei akatauanga, te anoano ra ainei kotou i ta kotou au tamariki kia akatupu i tetai manako tau no te au apinga materia nei? Ka tika kotou i reira kia akanoo i te akatauanga tika na te kore e aruaruanga i te au apinga ou ravarai me kare etai atu au apinga kare ra e umuumu tikaia ana noou. Me ka iki koe kia aruaru i te au apinga materia ra, auraka e poitirere me ka aru taau au tamariki ia koe na. (Mataio 6:24; 1 Timoteo 6:9, 10) No reira oki, me kare e tu tika ana te au rakau pange terenianga, ka akapeea i reira e tika tikai ei te tupu anga o te tamariki ra?

10. Ko taai arataki anga te ka tau te au metua ra kia kimi marie, e eaa te tu manako tau no ratou?

¹⁰ Te au metua tei kite ra i te mareka anga i ta ratou au tamariki ka kimi tamou marie i te tauturu tu-Atua kia tereni ia ratou ra, ma te akamanakoanga tamou eaa te au mea meitaki na ta ratou tamariki i te pae vaerua ra. Kua akakite mai tetai vaine e a ana tamariki: “Noatu i mua ake ka anauia mai ta maua tamariki, kua pure putuputu maua kia Iehova kia tauturu mai ia maua kia riro ei nga metua meitaki, na tana Tuatua e arataki, e kia akono i te reira i to maua ora anga.” Kua tuatua katoa aia: “‘Ko Iehova ki mua’ kare ia i tetai takiota tuatua matau uaia mari ra ko te mataara ia i akono ei maua i to maua ora anga.”​—Au Akava 13:8.

Orongaanga Putuputu i te “Vai”

11. Eaa te umuumuia ra e te au rakau ou e te au tamariki katoa oki kia tupu ei?

¹¹ Te umuumu putuputuia ra te vai no te au rakau ou, mei tei akakiteia maira i te meitaki te tupu anga te au rakau i te pae kauvai. (Akaaite ia Apokalupo 22:1, 2.) Ka pera katoa oki te au pepe te tupu ruperupe anga i te pae vaerua me ka putuputu te oronga anga i te vai no te tuatua mou o te Pipiria. Inara ka tau te au metua kia akamanako no runga i te manako anga va o ta ratou tamariki. Penei kia tapotoia mai te au tuatau apiianga putuputu te ka meitaki atu i to te au tuatau roa toko iti ua ra. Auraka e manako akameangiti mai i te puapinga o taua au tuatau tapotoia maira. Te akapou kapiti anga i te tuatau e puapinga maata ia kia akatupu i tetai pirianga i rotopu i te metua e te tamaiti i tetai pirianga te akamaroiroi putuputuia maira i te au Tuatua Tapu ra.​—Deuteronomi 6:6-9; 11:18-21; Maseli 22:6.

12. Eaa te puapinga o te pureanga kapiti ma te au tamariki katoa ra?

¹² Ko tetai o te au tuatau akatakaia ma te au tamariki ka tau ia ei te openga o te ra ra. Te maaraara ra tetai mapu e: “Ka noo toku nga metua i te tapa o to matou roi i te au po ravarai e ka akarongo mai ia matou e tuatua ra i ta matou uaorai au pure.” No te puapinga o te raveanga i teia, kua tuatua mai tetai atu e: “Na te reira i akariro ei ravenga naku te pureanga kia Iehova i te au po ravarai i mua ake i toku aere anga ki te moe.” Me akarongo te au tamariki i to ratou nga metua i te tuatua anga no Iehova i te au ra tataki tai e te pure anga kiaia, kua riro mai aia ei tetai peretana tikai kia ratou. Kua tuatua tetai tangata ou ra: “Ka rauka iaku i te topiri i toku nga mata i te pureanga kia Iehova e ka kite i tetai peretana papa kereni tikai. Na toku nga metua i tauturu iaku kia kite e te akono ra a Iehova i tetai tuanga i te au mea ravarai ta matou e rave ra e te tuatua ra oki.”

13. Eaa te ka rauka kia kapitiia atu ki te au tuatau apii anga putuputu ra?

¹³ Ei tauturu i te aronga tamariki kia tauru i te vai tuatua mou o te Pipiria, ka rauka i te au metua i te kapiti i te au apinga tau e manganui i roto i te au tuatau apii anga tamou. Kua tuatua nga metua o etai nga tamariki e rua kare i mapu ake: “Kua akamata aua nga tamariki e rua ra i te terenianga kia noo muteki ua i te Are Uipaanga Patireia mei to raua nga epetoma mua o te oraanga ra.” Kua akataka mai tetai metua tane i ta tona ngutuare tangata i rave: “Kua akapapaia e matou te au puka katoatoa o te Pipiria ki runga i etai kati papaanga e kua rave i te tukuanga ia ratou kia papa tikai, kua rave matou katoatoa i ta matou ngai. Kua akara matariki atu nga tamariki i te rave i teia.” E manganui te au ngutuare tangata te kapiti ra i tetai tuatau apii anga poto ua i mua ake me kare i muri ake i te kaikai anga. Kua tuatua tetai metua tane e: “Ko te kaikai anga aiai te tuatau meitaki no matou kia uriuri manako i te irava Pipiria no te au ra tataki tai.”

14. (a) Eaa te au angaanga puapinga i te pae vaerua penei ka tau kia rave kapitiia ma te au tamariki ra? (e) Eaa te kite te vaira i te tamariki no te apiianga?

¹⁴ Te rekareka katoa ra te aronga tamariki i te akarongoanga i te au tataanga Pipiria taka meitaki i roto i te My Book of Bible Stories.a “I te tuatau te ou ra nga tamariki,” ko ta tetai nga tokorua i kite, “ka oti tetai apiianga i te puka Bible Stories ra e i reira ka aoao te tamariki i te au kakau e ka rave i te au tuanga na roto i te tu o tetai nuku poto ua. Kua rekareka ratou i teia e e putuputu te manono anga kia rave kia tere atu i te tua okotai ua i te apii anga ra.” Auraka e manako meangiti mai i te kite o taau tamaiti kia apii! Kua tamou ngakau ua te tamaiti a mataiti i te pene katoa o te puka Bible Stories e kua kite katoa i te tatau i te Pipiria! Te maaraara ra tetai mapu e iaia e vaitata ra i te toru e te apa mataiti, kua putuputu te taka ke iaia i te tuatua i te “au iki anga akavaanga,” inara kua akamaroiroi atu tona metua tane iaia kia rave tamou marie i te tamata anga.

15. Eaa te au apinga te ka tau kia kapitiia atu i te uriuri anga manako ma te tamariki ra, e eaa te akapapu anga e e puapinga to taua au uriuri anga manako ra?

¹⁵ Ka rauka katoa i te au tuatau akatakaia ma taau au tamariki te teateamamao ia ratou kia tua i te vai tuatua mou ma etai ke ra, mei te paupauanga ra i te au uipaanga. (Ebera 10:24, 25) “I ta matou au tuatau akamatau anga, kua pau au na roto i taku uaorai au tuatua,” te maaraara ra tetai mapu. “Kare au i akatikaia kia tatau ua ma te kore e maramaanga.” Kapiti katoa oki, ka rauka kia tereniia te au tamariki kia rave i tetai tuanga meitaki i te angaanga tutu aere. Kua akataka mai tetai vaine tei akonoia ra e nga metua mataku i te Atua: “Kare matou i te aronga aere aru ua ma te kapiti anga i to matou nga metua i ta raua angaanga. Kua kite matou e e tuanga ta matou, noatu me ko te akatangi anake i te oe e te akaruke anga i tetai aenga pepa. Na te teateamamao matakite anga i mua ake i te au angaanga o te openga epetoma ra, kua kite matou eaa ta matou ka tuatua. Kare matou i ara mai i te popongi Maanakai ma te uianga me ka aere matou i te angaanga orometua. Kua kite matou e ka aere matou.”

16. Eaa ra i puapinga maataʼi kia rave tamou marie i te apii ngutuare tangata ma te au tamariki?

¹⁶ Kare e tau kia kore e akaketaketaia te oronga anga putuputu i te vai tuatua mou o te Pipiria ki te tamariki ra, tera te aite anga e puapinga maata to te apii Pipiria i te epetoma tataki tai ma te ngutuare tangata ra. Te karanga ra te metua o nga tamariki e rua e “ko tetai tumu no te akariri i te tamariki ko te kore e rave tamou marie.” (Ephesia 6:4) Kua karanga aia: “Kua iki maua ko taku vaine i tetai ra e te ora e kua akono tiratiratu i te apii a te ngutuare tangata kia tau ki taua papaanga ra. Kare i roa ana kua tapapa mai te tamariki ki taua tuatau ra no te rave i te reira.” Pouroa taua terenianga mei te tamariki ou anga mairai e puapinga maata ia, i te tamou anga i te tika e, ‘Ko te tu o te rakau ou ra, ko te tupu anga katoa ia o te rakau kia pakari mai.’

17. Eaa te aiteite ra te puapinga mei te orongaanga i te au tuatua mou o te Pipiria ki te tamariki ra?

¹⁷ E puapinga maata te orongaanga i te au tuatua mou o te Pipiria ki te tamariki ra, inara e aiteite oki te meitaki o te akatauanga a te metua. Te kite ra ainei taau tamariki ia koe i te apiianga, te aereanga putuputu ki te au uipaanga, te raveanga i te angaanga tutu aere, ae, te marekaanga i te rave i to Iehova anoano? (Salamo 40:8) E mea puapinga maata kia pera ratou. E mea meitaki roa, kua tuatua tetai tamaine no tona metua vaine, tei akakoromaki ra i te patoi anga a tana tane e tei akono ra e ono tamariki kia riro ei Au Kite tiratiratu: “Te mea tei akaumere roa ia matou ko te akatauanga a to matou Metua Vaine uaorai​—kua maata atu ta te reira tuatua anga i ta te au tuatua tikai.”

Orongaanga Paruru Anga no te Tamariki

18. (a) Akapeea e raukaʼi i te au metua te oronga i te paruru anga te umuumuia ra no te tamariki? (e) Eaa te tu o te apiianga tei rauka ra i te au tamariki i Iseraela no runga i te au mero kopapa no te anau tamariki?

¹⁸ Kia putuputu rai te umuumuia te paruru anga i te au rakau ou ra i te au manumanu akakino, i roto i teianei akatereanga kino o te au mea nei, te umuumuia ra te paruru anga i te tamariki mei te “au tangata kikino” maira. (2 Timoteo 3:1-5, 13) Akapeea te au metua i te oronga anga i teia paruru anga? Na te tauturu anga ia ratou kia rauka te pakari tu-Atua! (Koheleta 7:12) Kua akaue a Iehova i to Iseraela​—kapiti katoa ta ratou “tamariki”—​kia akarongo atu i te tatauanga i tana Ture ra, tei kapiti katoa ra i te akatika anga i te tu akono i te tika i te ainga e te akono anga tika kore oki. (Deuteronomi 31:12; Levitiku 18:6-24) E putuputu te taiku angaia te au mero kopapa no te akaapu anga i te vaine, kapiti katoa “nga ua tane,” e “nga mero no te ainga.” (Levitiku 15:1-3, 16; 21:20; 22:24, NW; Numero 25:8, NW; Deuteronomi 23:10) No te maata roa te viivii te ao o teia tuatau, ka umuumuia te au tamariki kia kite i te taangaanga tika e te tika kore oki i taua au mero kopapa tei kapitiia ra ki roto i te au mea angaia maira ta te Atua i karanga ra e te “meitaki roa ra.”​—Genese 1:31; 1 Korinetia 12:21-24.

19. Eaa te apiianga tau kia orongaia ki te au tamariki no runga i to ratou au mero kopapa muna ra?

¹⁹ E mea tau no nga metua e rua, me kare tetai tangata tiaki pakari ra, kia akataka atu ki te tamaiti i tona au mero muna ra. Ei reira ka tau ratou kia akakite meitaki atu e kare etai atu tangata e akatikaia kia amiri atu i te reira au mero ra. I te mea e putuputu te aronga rave tau kore i te tamariki i te timata e akapeea te au tamariki i te ariu anga ki te au ravenga kikite, e mea tau kia apiiia te tamaiti kia arai ketaketa e kia tuatua oki, “Ka akakiteia koe e au!” E apii i taau tamariki e ka tau ratou kia akakite no tetai ua atu tei tauta ra kia amiri atu ia ratou na tetai tu te ka akariro ia ratou kia pumaana kore te manako, noatu eaa te au tamataku anga te ka raveia.

Orongaanga i te Akoanga Aroa

20. (a) Akapeea te ako anga i aite ei ki te tipupuanga rara mae ra? (e) Eaa te tupu anga mua o te ako anga, inara eaa te tupu anga openga?

²⁰ Ka puapingaia te au tamariki mei te akoanga aroa, mei te rakau tei tipupuia tona au rara kikino. (Maseli 1:8, 9; 4:13; 13:1) Me ka tipu keia te au rara anoano koreia ra, ka akamaroiroiia te tupu anga o etai te meitaki ra. No reira me te manako maata atura taau au tamariki ki runga i te au apinga kopapa me kare te anga atura ki te kapiti anga oa kikino me kare te tamataora anga tau kore ra, te aite ra teia au manako anga tarevake ki te au rara tei tau ra kia tipu keia. Me ka akaateaia atu ratou, ka tauturuia taau tamariki kia tupu i roto i tetai arataki anga i te pae vaerua. I te akamata anga penei kare taua akoanga ra i te mea marekaia, mei te tipu keanga i te au rara tau kore ra penei ka akatupu i etai pekapeka ki tetai rakau ra. Inara ko te tupu anga meitaki no te akoanga ko tetai tupuanga ou i te arataki anga taau e anoano ra i taau tamaiti kia tupu mai.​—Ebera 12:5-11.

21, 22. (a) Eaa te akakite maira e kare te akoanga i te mea mareka kia oronga e kare katoa oki kia rave mai? (e) Eaa ra i tau kore ei kia tapupu te au metua i te orongaanga akoanga?

²¹ Te akatika uaia ra e kare te akoanga i tetai apinga marekaia i te oronga anga me kare i te rauka anga. “Kua akapou taku tamaiti kia maata te tuatau ma tetai mapu ta te aronga pakari i akamatakite maira iaku e kare i te kapiti anga meitaki,” ta tetai metua i akakite mai. “Kua tau au kia rave kia viviki atu i taku i rave ana. Noatu rai e kare taku tamaiti i o atu ki roto i tetai raveanga tarevake kino, kua roa te tuatau i pou kia akatikatika i tona manakoanga.” Kua akakite te tamaiti ra e: “I toku akataka keangaia mai i toku oa meitaki ra, kua mamae tikai au.” Inara kua tuatua katoa mai aia: “E iki anga meitaki teia, no te mea i muri poto akera kua akaateaia atu aia i te putuputuanga.”

²² “Te ako i te apii anga, ko te ara ora ïa,” ta te Tuatua a te Atua i tuatua. No reira noatu akapeea te ngata no te ako anga, auraka e akakore i te reira mei taau au tamariki. (Maseli 6:23; 23:13; 29:17) Ei muri akera, ka akameitaki ratou e i akatikatika atu koe ia ratou. “Te maara nei iaku toku riri anga maata i toku nga metua i toku ra ako angaia,” ta tetai mapu i akakite. “I teianei ka tere roa atu toku riri naringa kare toku nga metua i rave i taua ako anga iaku ra.”

Te Tutaki Tau te Tauta Anga

23. Eaa ra ka puapingaʼi te tauta anga kia tuku i te manako anga aroa ravarai ki te aronga ou ra?

²³ Kare e ekoko anga no te reira, ko te au tamariki tei kiteia ra te mareka anga e te au metua, e pera katoa oki e etai atu ra, ko te tupu anga ia o te manako anga aroa i te au ra tataki tai e manganui. Inara, ko te tauta anga katoa tei tukuia ra kia ratou​—me e tamariki kopapa ratou me kare e aronga i te pae vaerua—​e tau tikai ia te tutaki te ka rekarekaia. Kua akakite mai te apotetoro ko Ioane i teia i tana tata anga: “Kia kite au e, te aere ra taku au tamariki na te tuatua-mou, kare oku e rekareka anga maata atu.”​—3 Ioane 4.

[Tataanga Rikiriki i Raro]

Maara Ainei ia Koe?

◻ Eaa te umuumuia ra no te au rakau ou e te au tamariki oki kia riro ei kia tau ei akapaapaa anga?

◻ Akapeea, e raukaʼi i te au metua te rave anga ei au rakau pange terenianga meitaki?

◻ Eaa te ka rauka kia kapitiia ki te tuatau apii anga ma te au tamariki, e eaa te tau ra kia apiiia ratou kia arai atu?

◻ Akapeea te ako anga i puapingaʼi no tetai tamaiti, mei te tipupuanga rara mae o tetai rakau ra?

[Akameitakianga no te Tutu i te kapi 10]

Courtesy of Green Chimney’s Farm