Akameitakiia to Iehova Ingoa Tapu!
“Ka tuatua toku vaa ma te akapaapaa ia Iehova; e kia akameitaki te tangata ravarai i tona ra ingoa tapu e tuatatau ua atu.”—SALAMO 145:21.
1, 2. (a) Na teea tu ta Satani ra akaaoanga i to te Atua tutara anga? (e) Eaa te au uianga te akatuia maira no Salamo 145:11-21?
KARE e ekoko anga e ko Iehova Tei Ngateitei i te Ao Katoa e pini ua ake. Inara kua tuku a Satani i te akaaoanga i te tuatua tika e te tika o ta te Atua ra tutara anga. (Genese 2:16, 17; 3:1-5) Kua akaapa katoa te Tiaporo i te tu tiratiratu o te au tavini katoa o te Atua i te rangi e i runga i te enua nei. (Iobu 1:6-11; 2:1-5; Luka 22:31) No reira kua akataka a Iehova i te tuatau no te au mea ora kia kite katoatoa e kia akara i te au ua kikino tei tupu no te meameaau i tona tutara anga e kia akaari ratou e tei ea to ratou turanga no runga i teia au maroanga.
2 Te tauturu maira a Salamo 145 ia tatou kia akanoo i te turanga ngaueue kore no to te Atua tutara anga. Na ea? Eaa ta Davida tuatua no to Iehova ra patireia? Akapeea ta te Atua akono i te aronga tutu aere i te reira? Te vai ra te au pauanga ei tauturu i roto ia Salamo 145:11-21.
E Tuatua i to Iehova Tutaraanga Ariki
3. Me e apinga akaperepere na tatou te tutaraanga ariki o Iehova, eaa ta tatou ka rave?
3 E akamanako anga maata na Davida to Iehova ra tutara anga, kua karanga aia: “Ka tuatua ratou i te kaka o toou ra tutaraanga ariki, e ka tuatua ratou i toou ra ririnui, e ei akakite ki te tamariki a te tangata nei taau au angaanga ririnui e te kaka e te manea o toou ra tutaraanga ariki.” (Salamo 145:11, 12, NW) Te tuatua ra te au tangata i te au apinga tei inangaroia ra e ratou. No reira ka tuatua te tangata no tona ngutuare tangata, tona kainga, tana au kai tanu. “E tuku mai te tangata meitaki i te mea meitaki no roto i te putunga meitaki i roto i tona ngakau,” ta Iesu ia i tuatua. (Luka 6:45) Me e apinga akaperepere ki to tatou ngakau to te Atua ra tutaraanga, ka pure ra tatou kia tae mai tona Patireia, e ka tuatua tatou kia etai atu i te tuatua tau te au, e te tuatua tika te ka vai tamou i raro ake i tana tutara. Ka akapaapaa tatou ia Iehova ei te “Ariki mutu kore,” e ka tuatua tatou i te akakite anga i tona ngateitei na roto i te Patireia o te Mesia i roto i nga rima o tana Tamaiti akaperepere, koia a Iesu Mesia. (Apokalupo 15:3, NW; Isaia 9:5, 6) Mei teaa ra te meitaki kia tuatua i te kaka i te rangi o te patireia no to Iehova tutaraanga ariki ra, kare e roa atu ana ka akakiteia mai i te manea o te enua parataito tei akakiia ki te au mea ora e te mataora ma te apa kore ua!—Luka 23:43.
4. Eaa te atianga tau no tatou kia tuatua no to Iehova ra “ririnui,” e akapeea tatou i te akamatutu angaia i te reira angaanga?
4 Na te manako ariki e akakeu ia tatou kia tuatua i to Iehova ra “ririnui.” Noatu rai e “kua akateiteiia tona mana,” kare rava aia e rave tarevake i te reira. (Iobu 37:23) I taangaanga aia i tona mana ei anga i te enua e te au tangata e ka akono na te reira e akapou i te aronga rave kino. E atianga to tatou no te tuatua i to te Atua ra ririnui ia tatou e tutu aere ra i te nuti meitaki. E kare ainei tatou e akameitaki e na te akamaroiroi anga a teia Tumu ririnui ia tatou kia rave i teia angaanga? (Isaia 40:29-31) Ae, ei au Kite no Iehova, te akamaroiroiia nei tatou e to te Atua ra ririnui e tona vaerua oki no te angaanga tapu. Na teia tu anake ua i raukai te tutu aere i te tuatua no te Patireia ma te puapinga umere tikai i te ao katoa nei.—Salamo 28:7, 8; Zekaria 4:6.
5. I te mea e aronga tini kare e kite ana i ta Iehova ra “angaanga mana” eaa ta tatou ka tau kia rave?
5 Te vaira te umuumuanga no tatou kia akakite ki te au tamariki a te tangata i te “au angaanga mana” na Iehova, mei ta Iseraela i akakite ki ta ratou tamariki ra i te ravenga a te Atua i te akaora anga ia ratou mei te tuikaa i Aiphiti ra. (Exodo 13:14-16) Te patu ra te au tangata i te au toka akamaaraanga no te au tangata tei manakoia ra e ratou e meitaki ta ratou au angaanga, inara e ia tei kite i te au angaanga mana a te Atua ra? Mei ta tetai tangata apii i tuatua ra: “Te tarai ra ratou i te au angaanga a te aronga toa ki runga i te veo, inara ko te au angaanga kaka a Iehova kua tataia ki runga i te one taatai, e na te tai o te tuatau ra e tama ke atu mei te manako anga o teia tuatau nei.” Kare ra te reira au angaanga i rave keia atu, noatu rai e kare i kiteia e te aronga tini. No reira i ta tatou angaanga mei tera are ki tera are, e ia tatou e apii Puka Tapu ra i te ngutuare, e i etai atu atianga katoa, e akakite totomapu tatou i ta te Atua ra au angaanga mana.
6. (a) No teea atianga i te au mataiti kua topa i akakitea meitakiia mai ei te vaerua totomapu no tatou kia rave i ta tatou angaanga tutu aere? (e) Eaa tikai te tumu maata, tei tuatuaia i te mataiti 1922 no runga i te akakite aere anga i te Patireia?
6 Na te tu totomapu, katoa oki, ka tau tatou kia akakite i te kaka o to te Atua ra tutaraanga ariki. E mea papu e kua kiteia te tu totomapu no te reira angaanga no te Patireia i te 1922 i te tuatua anga a te peretiteni o te Watch Tower Society, koia a J. F. Rutherford ki te uruoaanga i Cedar Point, Ohio, i na ko ra aia: “Mei te 1914 mai kua rave te Ariki kaka i tona mana . . . Kua akamata te patireia o te rangi; te tutara ra te Ariki; te inga ra te patireia o Satani; e au mirioni ua atu te ora nei kare rava e mate. Te irinaki ra ainei koe i te reira? . . . No reira e oki ki te koro, A kotou te au tamariki a te Atua teitei rava ra! Ka tatua i to kotou rakei! Kia tau te manako, kia matakite, e angaanga maroiroi, e kia toa. E au kite mou no te Atu ma te akarongo. E aere ki mua i te tamaki kia riro roa te au tuanga katoatoa o Babulonia ra ei ngai taneaia. E akakitekite i te tuatua kia mamao e kia atea. Ka tau te ao katoa kia kite e ko Iehova te Atua e ko Iesu Mesia te Ariki o te au ariki e koia te Atu o te au atu ra. Ko teia tikai te ra o te au ra katoa. Ina te tutara nei te Ariki! Ko kotou tona au rima rave i te akakitekite aere. No reira e akakite, e akakite, e akakite aere, i te Ariki e tona patireia.”
7. Eaa te manako tau no tatou no ta tatou angaanga ei aronga tutu aere i te Patireia?
7 Mei teaa ra te rekareka kia ‘manako i to te Atua ra ingoa,’ kia akakite kia etai atu i tona ra tutara anga, e kia akakite katoa oki i te Patireia o te Mesia koia tana Tamaiti akaperepere ra! (Malaki 3:16) Ei aronga tutu aere i te Patireia e ei aronga akakitekite aere, te akaperepere nei matou i ta matou angaanga i te tutu aere anga i te tuatua meitaki e te akaariuanga i te au ngakau o etai ke ra ki te Atua, ki te Mesia, e te Patireia. I roto ia tatou, e mea tau kia vai te kaanga i te inangaro i te tuatua kia etai ke no runga i te mekameka kaka o to Iehova ra tutaraanga ariki.—Akaaiteia atu kia Ieremia 20:9.
8. (a) Eaa te akatutu maira i to Iehova tutara anga i teia tuatau nei? (e) Eaa i tau ei kia tuatuaia e e mana to Iehova e “ka tae ïa ki te au uki ravarai”?
8 Ka tau tatou kia akakeuia i te akakitekite i to te Atua ra Patireia ma te tu totomapu maata, no te mea kua tuatua maira a Davida: “Toou tutaraanga ariki, e tutaraanga ariki no te au tuatau mutu kore, e toou ngateitei kua manuia ia i te au uki katoa.” (Salamo 145:13, NW) I te aere ua atu anga te au maaraara anga o te tata salamo ra, no to Iehova tutaraanga ariki kua taui aia i te nauna o mua atu mei “tona” ki “toou,” i te tuatua tikatika atu anga i tana au tuatua no te pure ki te Atua tikai. Pera katoa oki, kare to te Atua tutaraanga ariki mutu kore i monoia ki te Patireia o te Mesia tei akatutu maira i to Iehova tutara anga e tuatau ua atu. Ko te tika e, kia oti te au tangata akarongo ra i te akonoia kia apa kore ua, ei reira te Mesia e oronga atu ei i te Patireia ki tona Metua. (1 Korinetia 15:24-28) No reira te vaira to te Atua mana e “ka tae ïa ki te au uki ravarai.” Ko Iehova te Ariki i to Adamu angaia mai anga ra e ka mana aia ki rungao i te au tangata tuatua tika e mutu kore ua atu.
9. Eaa te ka tau kia tuatuaia no te irava te akamataia ra ma te reta nun i te reo Epera ia Salamo 145?
9 I roto i teia tata salamo akorotiki nei, te akaruke ra te tata anga Matoreti i te irava tei akamataia ra ma te reta Epera e nun. Inara kia tau ki ta te Ereni Septuagint, te Suria Peshitta, e te Ratini Vulgate, te tatauia ra i etai tata anga Epera i ko nei: “E tuatua tika ta Iehova i tana au tuatua ravarai, e e aroa takinga meitaki i tana au angaanga ravarai.” (New World Translation of the Holy Scriptures—With References, putunga tuatua i raro ake.) Kua akatupu te Atua i tana au taputou katoatoa e e “aroa takinga meitaki” tona i te aronga katoatoa te ariki ra i tona tu meitaki.—Iosua 23:14.
Kare ta Iehova Turu e Kore
10. Akapeea ta te Atua ra ‘turu anga ia tatou’?
10 Kare rava te Ariki Mutu Kore ra e kopae ke i te mate o tona au tavini. No reira a Davida i tuatuaʼi: “Te mou rā Iehova i te aronga katoa e inga ra; kua akatu i te aronga katoa e piko ki raro.” (Salamo 145:14) Mei te tuatau ia Abela mairai, kua turu a Iehova i te aronga akamori Iaia ra. Me akarukeia mai tatou, e manganui te tuatau ka inga tatou i raro ake i ta tatou au apainga. Te ngere ra tatou i te maroiroi i te apai i to tatou au mate katoatoa e pera katoa te takinokino anga te aere maira ki runga ia tatou ei au tangata no te Atua, inara te mou maira a Iehova ia tatou. Ko te tu verepa i te reo Epera tei taikuia i ko nei te akakite maira e ‘te turu tamou maira te Atua ia tatou.’ E mea tau kia akamanako e kua tauturu a Ioane Papetito raua ko ta te Atua uaorai Tamaiti i te akatu i te aronga tei inga ra i te ara. I te tataraara anga teia aronga tatakitai e kua riro mai ei tavini no Iehova, kua rekareka ratou i te akameitakianga umere roa no te tauturu a te Atua ra.—Mataio 21:28-32; Mareko 2:15-17.
11. Na teea mataara ta Iehova ‘akatu anga i te aronga katoa e piko ra ki raro’?
11 E pumaana tikai kia kite e ‘te akatu ra a Iehova i te aronga katoa e piko ra ki raro’ i te au timataanga ke ke ra. Te akarekareka ra aia i te aronga maromaroa i rotopu ia tatou, te akapumaana ra i to tatou te mii ra, e te tauturu ra ia tatou kia tuatua i tana tuatua ma te mataku kore me takinga kinoia mai tatou. (Angaanga 4:29-31) Kare rava aia e tuku kia paruparu tatou i ta tatou au apainga me ka ariki tatou i tana tauturu. (Salamo 55:22) No reira, mei te “tamaine a Aberahama” (NW) tei “mingi rava ki raro” inara kua akaoraia e Iesu tona kopapa, ka tau tatou kia “akakakā i te Atua” me akatu aroa mai aia ia tatou i te pae vaerua. (Luka 13:10-17) Te aronga akatainuia ra tei piko ki raro i te tuikaa anga ia Babulonia kua akameitaki i ta te Atua akatu anga ia ratou ki runga i te mataiti 1919 ra, e no te akatu katoa aia i te “mamoe ke atu” tei ariki ra mei te mataiti 1935 mairai.—Ioane 10:16.
12. Akapeea i tau ei e “te akara nei te mata o te au mea katoa nei” ki te Atua ra?
12 Kare rava a Iehova e akaruke ua i tona au tangata, mei ta Davida e akataka maira i te na ko anga: “Te akara nei te mata o te au mea katoa nei ia koe, e te oronga maira koe i te kai na ratou i te tuatau tikai. Te oora nei koe i to rima, e te akamerengo nei i te kaki o te au mea ora katoa nei.” (Salamo 145:15, 16) Mei te mea rai e te au mata o te au mea ora katoa ra te ariu atura ma te manakonakoanga ki Tei Ngateitei i te Ao Katoa e pini ua ake. Te akara atura te au angera ki te Atua no te oraanga tinamou. E mei te tamaiti e akara atura ki tona metua no te au mea ka anoanoia ra, te akara atura tatou ki to tatou Metua i te rangi ra. Ko te tika oki, te rauka maira te kai na te tangata e te manu katoa no ko mai iaia ra. Kare e rauka i tetai ke atu i te akamerengo i ta ratou e anoano ra. Te oronga atura te Atua kia ratou “i te kai na ratou i te tuatau tau,” koia oki, i te tuatau e anoanoiaʼi ia.
13. Na teea au mataara ta Iehova ra ‘oora anga i tona rima e te akamerengo anga i te kaki o te au mea ora ravarai’?
13 ‘Te oora ra te Atua i tona rima e te akamerengo ra i te kaki o te au mea ora katoa ra.’ (Salamo 104:10-28) E tika te mate ra etai manu no te ngere i te kai. E manganui te au tangata te onge ra no te karapii o tetai papaki, pera te takinokino anga, e te akono tarevake i te au apinga puapinga. Pera katoa oki; kua totou mai a Iesu i te “onge kai” ei tuanga no “te akairo” o tona taenga mai i teia tuatau openga nei. (Mataio 24:3, 7) Inara kare teia au mea i tupu no to Iehova karapii e no te kore ana no te oronga. E tamanako ana i te au tauatini ua atu mirioni o te au mea ora katoa tei angaia ra! Pera katoa oki, te akapapu maira teia tata salamo e i raro ake i te tutara o te Patireia kia ‘kore te tangata e mana ki runga ake i te tangata ei kino nona,’ ka akamerengo te Atua i tei anoanoia no tatou i te pae kopapa e te pae vaerua katoa. (Koheleta 8:9; Isaia 25:6) Noatu rai i teia tuatau nei, kare tatou e tau kia onge no te kai vaerua, no te mea te oronga maira te Atua e maata rava atu i te tuatau tau, na roto i “te tavini akono meitaki e te pakari.” (Mataio 24:45-47; 1 Petero 2:2) I te tuatuaanga no te pae vaerua, ko te au Kite o Iehova te aronga meitaki rava atu tei angaia i runga i te enua nei. Te akaari ra ainei koe i toou ariki anga oonu i te reira au apinga tutaki maata?
Paruru ra a Iehova i te Aronga tei Inangaro Iaia
14. Eaa i tau ei a Davida kia tuatua e “e tuatua-tika ta Iehova i tona katoa ra au aerenga; e te takinga-meitaki i tana katoa ra au angaanga”?
14 Penei no to tatou neneva ‘i akamingi i to tatou mataara’ e kua apai mai i te au tu ngata ki runga ia tatou, inara kare tatou e tau kia akaapa i te Atua no te reira au tu kino. (Maseli 19:3) Kua akakite maira a Davida i te tumu i tana tuatua anga: “E tuatua-tika ta Iehova i tona katoa ra au aerenga; e te takinga-meitaki i tana katoa ra au angaanga.” (Salamo 145:17) E tika ta te Atua katoa au angaanga, e tau, e e tu aroa. Te taka meitaki ra tona aroa i tana oronga anga i te ora na roto i te atinga oko o Iesu. (Angaanga 2:21; 4:8-12) E “tiratiratu a Iehova i tana au angaanga ravarai,” akono meitaki, e aroa, e te kore e akono i te tu o te tangata. Ei aronga “aru i te Atua” e rave tatou i te tika, kia tau, te aroa, te tu akavaavaa kore, e te tiratiratu oki.—Ephesia 5:1, 2; Deuteronomi 32:4; Salamo 7:10; 25:8; Isaia 49:7; Angaanga 10:34, 35.
15. Akapeea tatou i ‘te kapiki atu anga i te Atua ra ma te tika anga,’ e eaa tei tupu no tatou i rave ra i te reira?
15 I te mea e tuatua tika ta te Atua e te tiratiratu, te kikaia atu nei tatou kiaia. Pera katoa oki, te akapapu maira a Davida kia tatou e: “Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore.” (Salamo 145:18) I te papetito angaia ei aronga akarongo akatapuia, kua kapiki tatou i te ingoa o Iehova. (Angaanga 8:12; 18:8; Roma 10:10-15) I te mea kua akavaitata tatou ki te Atua, kua akavaitata mai aia kia tatou. (Iakobo 4:8) Te “kapiki ra [tatou] kiaia ma te pikikaa kore” no te mea te rave ra tatou na te mataara tika, na roto ia Iesu Mesia. Ka akavaitata mai a Iehova me ka akamori tatou i aia “ma te vaerua e te tuatua-mou,” e akakite i te “akarongo pikikaa kore,” e ‘kia ngaueue kore i te akara anga atu i Tei kore i kitea kia akara ra.’ (Ioane 4:23, 24; 1 Timoteo 1:5; Ebera 11:27) Ei reira kare tatou e pure puapinga kore ua me kare e aro atu i te ao o Satani tatou anake ua, mari ra ka tamou tatou i te rekareka i te tauturu na te Atua e tana paruru anga. (Salamo 65:2; 1 Ioane 5:19) Mei teaa ra te reira tu tinamou!
16. No teaa e akapeea oki a Iehova i ‘akatikaʼi i te anoano o te aronga i mataku iaia ra’?
16 E tinamou tikai to tatou, e no etai atu au apinga katoa ta Iehova e rave nei no tatou. Kua karanga a Davida: “E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.” (Salamo 145:19) Ka ‘akatika a Iehova i to tatou anoano’ no te mea e akatapu anga oonu to tatou i te Atua e te katoaanga o te mataku kia kore e akamareka kore iaia. (Maseli 1:7) Na to tatou ngakau akarongo i akakeu ia tatou kia akatapu ia tatou uaorai kia Iehova, e ko to tatou tu akono, “Kia akonoia toou anoano.” I te mea nona te anoano kia tutu aere tatou i te tuatua no te Patireia, ka akatupu aia i to tatou anoano kia rave i te reira angaanga. (Mataio 6:10; Mareko 13:10) Na te Atua e ‘akatika i to tatou anoano’ no te mea kare tatou e pure noinoi ana mari ra te pati ra i te au mea tau i tona anoano. Ka oronga mai aia i tei tau ki tona ra anoano e ei meitaki ia no tatou.—1 Ioane 3:21, 22; 5:14, 15; akaaiteia atu kia Mataio 26:36-44.
17. Eaa i papu ei ia tatou e ka akarongo mai te Atua i ta tatou “kapiki no te tauturu”?
17 Ei au Kite tiratiratu no Iehova, ka papu katoa ia tatou e kare e topa ta tatou “kapiki no te tauturu” ki runga i nga taringa turi. Kua akaora te Atua ia Davida i te tumatetenga e kua akaora katoa ia Iesu, tae roa ki te akatuanga iaia mei te mate maira. I raro ake i te takino anga a te enemi, e maata atu oki i te tamaki mai anga a Goga ra, ka papu ia tatou e ka akaora a Iehova ia tatou. (Ezekiela 38:1–39:16) Ko te tika oki, e tetai ua atu tuatau taitaia, mei ia Davida rai ka rauka ia tatou te pure ma te manako papu e: “E aroa mai koe iaku, e Iehova, kua tumatetenga oki au. . . . Kua rongo oki au i te akakino a te tangata tini nei: kua akapiniia au e te mataku e kako roa ake, ia ratou i akaaiteite i te tuatua e rave iaku nei: kua kimi i ta ratou ravenga kia mate au. Kareka au nei, i irinaki ana au ia koe e Iehova: i tuatua ana au e, Ko koe taku Atua.”—Salamo 31:9-14.
18. Akapeea tatou ka puapingaiaʼi i te kiteanga e ka ‘tiaki a Iehova i te aronga katoa te inangaro ra iaia’ mari ra ka ‘akapou i te aronga rave kino ra’?
18 Te papa ra a Iehova i te tauturu ia tatou. Mei ta Davida i tuatua ra: “Te tiaki nei a Iehova i te aronga katoa i inangaro iaia; kareka te aronga kino katoa ra, ka akapouia ïa e ia.” (Salamo 145:20) Ae, me inangaro tatou i te Atua, ka akameitaki aia ia tatou e ka tiaki ia tatou. (Numero 6:24-26) ‘Ka tutaki aia i te aronga nengonengo’ ka paruru ra aia i tona au tavini taakaaka, kare aia e tuku kia tupu tetai apinga ei akakino takiri ia ratou. I te mea tei ia tatou nei a Iehova, e akamaroiroi tatou. (Salamo 31:20-24, Angaanga 11:19-21) ‘Kare e taoonga angaia ei patoi ia tatou nei e manuia.’ (Isaia 54:17; Salamo 9:17; 11:4-7) Ko te apinga ia i tupu ki te aronga tei akapapu i to ratou inangaro no te Atua ei au tavini tiratiratu akatapuia nona ra. Ei pupu ka aere ora ua atu te au Kite o Iehova na roto i “te mate maata” te ka tukuia mai ki runga i te aronga rave kino. (Apokalupo 7:14) Mei teaa ra te akameitakianga e te akaotianga i te maroanga maata no to Iehova tutaraanga ariki i te ao katoa e pini ua ake no te “aronga katoatoa tei inangaro ra iaia”!
Tamou i te Akameitaki i to Iehova Ingoa Tapu
19. Eaa to tatou vaa ka tuatuaʼi i te “akapaapaa ia Iehova ra”?
19 Kua akaoti atura Davida i teia salamo rekaia, ma te au tuatua ra: “Ka tuatua toku vaa ma te akapaapaa ia Iehova; e kia akameitaki te tangata ravarai i tona ra ingoa tapu e tuatau ua atu.” (Salamo 145:21) Ei au Kite no Iehova, te ariki ra tatou i to Iehova maata, meitaki, e tona tutaraanga ariki maoraora, tana turuanga puapinga, e te roi kore i te tiaki anga. No reira, mei ia Davida rai, ka tuatua to tatou vaa i te akapaapaa i te Atua. Te akakeuia ra tatou kia akamori iaia anake ua, ma te akameitaki iaia no tana au akameitakianga e manganui, e kia akapaapaa i tona ra “ingoa manea.”—1 Paraleipomeno 29:10-13; Exodo 20:4-6.
20. Ma te akaraanga i te tuatau mutu kore ra, eaa te manako tau no tatou i teianei?
20 I te mea te akameitaki ra a Iehova ia tatou i te au ra tatakitai, kia putuputu katoa tatou i te akameitaki iaia, me kare kia tuatua meitaki nona ra. E tutu totomapu aere tatou i te tuatua meitaki ei akapaapaa i te Atua, ma te akakite atu kia etai ke ra e kare e roa atu ‘ka akameitaki te au tangata ravarai i tona ra ingoa tapu.’ Mei teaa ra te meitaki kia ora i te tuatau e imene akapaapaa ei to te pa enua ravarai—ae, te au mea ora kite ravarai i te ao katoa e pini ua ake—i to tatou Metua i te rangi ra! (Salamo 148:1-13) Kia akameitakiia a Iehova no te akakiteanga mai i tona ingoa e te orongaanga mai kia tatou i te tika kia riro ei au Kite nona. (Salamo 83:18; Isaia 43:10-12) Kia mako to tatou tu akono kia tau no te aronga te mou ra i te reira ingoa kia tapu, e pure katoa oki no te akatapu anga i te reira. (Luka 11:2) E tavini tiratiratu tatou i te Atua ra, kia rongoia mai to tatou reo i roto i tana akatereanga ou, i te imene anga a te aronga te ka akameitaki i to Iehova ra ingoa tapu e tuatau ua atu.
Eaa Taau au Pauanga?
◻ Eaa ta tatou ka rave me e apinga akaperepere na tatou to Iehova ra tutaraanga ariki?
◻ Eaa te akatutu maira i to Iehova tutaraanga ariki i teia tuatau nei?
◻ Akapeea ta Iehova ‘akatu anga i te aronga katoa te piko ra ki raro’?
◻ Na teea au mataara ta te Atua ra ‘oora anga i tona rima e ka akamerengo ei i te kaki o te au mea ora katoa nei’?
◻ Akapeea tatou me akameitaki i to Iehova ra ingoa tapu?
[Tutu i te kapi 17]
I te mataiti 1922 kua akakeu te au tuatua ‘akakite aere i te Ariki e te Patireia’ kua akamaroiroiia te aronga akakitekite aere i te tutaraanga ariki o Iehova kia rave kia maata atu te angaanga