Te Akarongo Maira Ainei te Atua me Pure Koe?

KA IKI tetai tangata akatere angaanga me ka oronga atu aia i tetai mea ki tetai me kare ra ka rave aia uaorai i te reira. Mei te reira katoa, ka rauka rai i te Tutara Ngateitei o te ao katoa e pini ua ake i te akataka i te mamao o tona uaorai pirianga i roto i tetai au mea. Kua apii mai te Tuatua Tapu e kua iki te Atua i te akao mai iaia uaorai i roto i ta tatou au pure e kua akakite mai i reira ia tatou kia oronga atu i te reira kiaia.​—Salamo 66:19; 69:13.

Ta te Atua ikianga i roto i teia au mea te akaari maira i tona uaorai manako maata i roto i te au pure a tana au tavini. Kare aia i akaparuparu i tona iti tangata mei te araveianga atu kiaia ma te au manako e te akono, kua akamaroiroi ra aia ia ratou e: “Auraka e tukutuku i te pure,” “tamou marie tikai i te pure,” “e tuku koe i taau apainga kia Iehova ra,” “e uri i to kotou tumatetenga katoa ki runga [i te Atua].”​—1 Tesalonia 5:17; Roma 12:12; Salamo 55:22; 1 Petero 5:7.

Naringa te Atua kare i inangaro i te akarongo mai i te au pure a tana au tavini, kare rava aia e akapapa i tetai mataara kia tae atu kiaia ma te akamaroiroianga kia rave ua i te reira. Teia i reira te tumu okotai no te irinaki papu tikai e te akarongo maira aia, ta te Atua ikianga kia rauka ua i tona iti tangata i te aravei atu iaia. Ae, te oronga ra aia i te manako ki te au pure tataki tai a tana au tavini.

Auraka e ngaropoina te tika e te akakite marama ua maira te Puka Tapu e te akarongo maira te Atua ki te pure. Ei akaraanga, kua tata te apotetoro ko Ioane e: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) Kua taiku te Ariki ko Davida no te Atua ko Iehova e ko: “Tei akarongo i te pure ra” e te tuatua anga ma te papu tikai e: “Ka akarongo mai aia i toku reo.”​—Salamo 55:17; 65:2.

No reira i te mea e ko te raveanga i te pure kare e ekoko anga e e puapinga to te reira uaorai, te akaari maira te Tuatua Tapu e e maata atu tei kapitiia mai me pure tetai tangata tuatua tika. Te akarongo maira tetai tangata. Te akarongo maira te Atua.​—Iakobo 5:16-18.

Au Pure Tei Akarongoia Mai

Kua ki te Puka Tapu i te au tataanga no tetai au tangata ko ta ratou au pure, ko te tika, kua akarongoia e kua pauia mai e te Atua. Ta ratou kiteanga te akapapu marama ua maira e ko te au puapinga o te pure te aere mamao atura mei te akatikatikaanga e te akakiteanga i to tetai au manako. Te aere mamao atura ratou i ta tetai tangata uaorai au tauta anga kia rotai atu i tana au pure.

Ei akaraanga, i te aravei anga i te parani a Abasaloma kia rave i te taoonga ariki o Iseraela, kua pure te Ariki ko Davida e: “E Iehova e, . . . e akariro koe i te ako a Ahitophela [te tauturu tuatua o Abasaloma] ei neneva”! Kare i te patianga mea ngiti, mei “te ako ta Ahitophela i ako maira . . . riro atura mei te mea e ui ra i te tuatua a te Atua: ko te tu katoa ïa i taua ako a Ahitophela ra.” I muri mai kua kopae a Abasaloma i ta Ahitophela parani i manako no te ninaanga i te Ariki ko Davida. Eaa te tumu? “Kua akakoroia e Iehova e akakore i te tuatua meitaki a Ahitophela, kia apai mai a Iehova i te kino ki runga ia Abasaloma ra.” Marama ua i reira e, kua akarongoia mai te pure a Davida.​—2 Samuela 15:31; 16:23; 17:14.

Mei te reira katoa oki, i muri ake i to Hezekia pureanga ki te Atua kia akaora iaia mei tona maki tei kore i rauka i te rapakau, kua meitaki aia. Kua tupu ainei teia no te manako puapinga kia Hezekia no tei pure aia? Kare rava ia! Ta Iehova tuatua kia Hezekia tei orongaia atu e te peroveta ko Isaia, koia oki: “Kua akarongo au i taau pure, kua kite au i toou roi-mata: i na, ka akaora au ia koe.”​—2 Ariki 20:1-6.

A Daniela, tei pauia mai tana pure i muri mai i tana i tamanako ra, kua akapapuia atu e te angera a Iehova e: “Kua akarongoia taau au tuatua.” Te au pure a tetai au tangata, mei ta Hana, te au pipi a Iesu, e te rangatira anere ko Korenelio, kua pauia mai na roto i tetai au mataara tei kore i rauka mai mei te ravenga tangata anake ua. Te akakite marama ua maira i reira te Puka Tapu e, te au pure tei rotai i te anoano o tei ngateitei ra ka arikiia, akarongoia e ka pauia mai e te Atua.​—Daniela 10:2-14; 1 Samuela 1:1-20; Angaanga 4:24-31; 10:1-7.

Inara akapeea te Atua i te pauanga mai i te au pure a tona au tavini tiratiratu i teia tuatau?

Au Pauanga ki te Au Pure

Te au pure tei taikuia ki runga akenei, kua pau vivikiia, e na roto i tetai au mataara umere e te temeio tikai. E akamanako ra, ine, e i te tuatau o te Puka Tapu, te au pauanga putuputu ki te au pure kare i mama ua i te kiteaia. No te mea kua kapitiia atu ratou ki te orongaanga i te maroiroi e te marama ki te oraanga, i te tauturuanga i te au tavini o Iehova kia mou piri atu ki te mataara tika. Ki te au Kerititiano tikai, te au pauanga ki te au pure kua kapitiia mai ki te au mea o te pae vaerua, kare ki te au angaanga takake me kare ra te au angaanga ririnui.​—Kolosa 1:9.

No reira auraka e taitaia me kare taau au pure e pauia mai na roto i te mataara taau i tamanako me kare taau i anoano. Ei akaraanga, te kore anga e akaatea i tetai timataanga, penei ka iki te Atua i te oronga mai kia koe i “te mana maata meitaki nei” kia rauka te akakoromaki i te reira. (2 Korinetia 4:7; 2 Timoteo 4:17) Auraka rava tatou e akameangiti i te puapinga o te reira mana, auraka katoa tatou e taopenga e kare takiri a Iehova i pau mai i ta tatou au pure.

E akamanako ana i tei tupu ki te Tamaiti a te Atua, ko Iesu Karaiti. I roto i tona manako kia kore e mate mei tetai tangata akakino, kua pure a Iesu e: “E taku Metua, kia tika ia koe ra, e apai ke atu koe i teianei kapu.” Kua akarongoia mai ainei teia pure e te Atua? Ae, mei tei akapapuia mai ia Ebera 5:7. Kare a Iehova i akamama mai i tana Tamaiti mei te mate ki runga i te rakau tamamae anga. Marira, “kua mama maira tetai angela no te rangi mai kiaia, kua akamaroiroi maira iaia.”​—Luka 22:42, 43.

E pauanga viviki e te umere tikai? Ki tetai ia tatou nei, ko te reira tikai ia! Inara kia Iehova, te tumu o te reira mana, kare te reira i te temeio. E mei tona oraanga i mua ana i te rangi, kua matau ua a Iesu, e i tetai au taime i topa i mama mai ana tetai au angera ki te au tangata. No reira kare i riro ei poitirere anga kiaia me mama mai tetai angera kiaia mei te ka tupu kia tatou. Inara, teia angera, papu e kua kite a Iesu i Tona oraanga ki te rangi, kua riro ei tauturu i te akamaroiroi Iaia no te timata anga ki mua.

I te pauanga i te pure a tona au tavini tiratiratu i teia tuatau, te oronga putuputu maira Iehova i te maroiroi tei anoanoia kia rauka te akakoromaki. Teia tauturu anga penei na roto mai i te akamaroiroianga a te au taeake akamori tei kapitiia mai ia tatou. Ka inangaro ainei tetai ia tatou i te kopae i te reira akamaroiroianga, penei te taopenga anga e i te mea kare to tatou au taeake i kite ana i te timataanga tei aiteite ki to tatou, kare ratou i roto i te turanga no te akamaroiroi mai ia tatou? Ka rauka ua ia Iesu i te rave i te reira akaraanga ki te angera tei mama mai kiaia ra. Marira, kua ariki aia i te akamaroiroianga e ei pauanga na Iehova i tana pure e kua rauka iaia te akatupu ma te tiratiratu i te anoano o tona Metua. Ka inangaro katoa tatou i te ariki ua i te maroiroi ta te Atua e oronga maira ei pauanga i ta tatou au pure. E akamaara katoa e ko te reira au tuatau akakoromakianga marie ka putuputu i te aruia mai e te au akameitakianga makorekore.​—Koheleta 11:6; Iakobo 5:11.

Kia Irinaki Papu Tikai e te Akarongo Maira te Atua

Auraka kia ngere i te irinaki papu tikai ki roto i te puapinga o te pure me kare koe e pauia mai i te reira taime rai. Te au pauanga i tetai au pure, mei te tauturu noou uaorai mei te tumatetenga me kare ra no te akamaata atu i te apainga i roto i taau tavinianga ki te Atua, penei ka tiaki atu i te taime tei kite te Atua e kua tano e te meitaki tikai. (Luka 18:7, 8; 1 Petero 5:6) Me te pure ra koe no tetai mea tei manako oonuia e koe uaorai, e tauta ua atu rai, te akaari anga i te Atua i te pakari i toou anoano, toou akakoroanga e ma te tika tikai. Kua akaari a Iakoba i teia tu vaerua, i muri ake i te kukumianga no tetai taime ma tetai angera, kua tuatua aia e: “Kia kore koe e akameitaki mai iaku nei, kare au e tuku ia koe.” (Genese 32:24-32) Kia aiteite katoa to tatou irinaki papu tikai e me pati ua atu rai tatou, ka rauka ia tatou te akameitakianga i te tuatau tau.​—Luka 11:9.

Okotai manako openga. E akameitakianga akaperepereia me akarongo mai te Ngateitei Rava o te ao katoa e pini ua ake. Te akaraanga atu no teia, te akavatavata tika ra ainei tatou me tuatua mai te Atua ko Iehova, i tona anoano no tatou, na roto mai i tana Tuatua? I te apaianga ta tatou au pure ia tatou i te pirianga naoa ki Tei Anga ia tatou, ka inangaro tatou i te oronga atu i te manako oonu i te au mea katoatoa tana ka tuatua mai kia tatou.

[Tutu i te kapi 6]

Te akarongo maira te Atua i te au pure. Te akarongo ra ainei tatou kiaia na roto i tana Tuatua?