Ka Rauka te Turanga Puapinga ei Timata i Toou Akarongo

KA RAUKA te turanga puapinga ei timata i te akarongo o tetai tangata tu tika. Na te tautaanga kia puapingaia i te pae kopapa ka arataki atu te reira ki te ngere anga i te akarongo. (1 Timoteo 6:9, 10) Inara ka rauka katoa te turanga puapinga ei timata i te akarongo na tetai mataara ke atu. Me akara tetai tangata tika e e manganui te aronga tika kore te puapinga ra i te pae kopapa iaia e mamae ra, penei ka timataia aia no te aruaru atu i tetai kaveinga atua kore. I na, kua arataki atu teia i etai o to Iehova au tavini kia ekoko i te puapinga o te aruaruanga i tetai oraanga tika!

Kua tupu teia ki te tangata Levi akatangi imene ko Asapha i te tuatau o te tutara anga o to Iseraela ariki ko Davida. Kua atu a Asapha i te au taramo tei taangaangaia i roto i te akamori anga no te katoatoa. I te pae ia Hemana e Iedutuna, kua totou katoa aia, te orongaanga i te akapaapaa anga e te akameitaki anga ki te Atua ko Iehova ma te imene anga. (1 Paraleipomeno 25:1; 2 Paraleipomeno 29:30) Noatu e kua akameitakiia a Asapha, te akaari maira a Salamo 73 e kua riro te turanga puapinga i te pae kopapa o te au tangata kino ei timata anga maata i tona akarongo.

To Asapha Tu Kino

“E takinga-meitaki tikai to te Atua ia Iseraela, i te aronga ngakau mā ra. Kareka au nei, kua vaitata toku vaevae i te paeke; me turori oki toku takainga.” (Salamo 73:1, 2) Na teia au tuatua, kua akatika a Asapha e e meitaki a Iehova ki te iti tangata o Iseraela. Te tika tikai ra te reira i te aronga “ngakau mā ra,” no te mea e anoano to ratou i te oronga i te akono anga anake ua ki te Atua e te tauturu atu i te akatapu anga i tona ingoa tapu. I te mea tei ia tatou te reira tu, ka akameitaki tatou ia Iehova na te tuatua meitaki anga iaia noatu e me te timata pakariia ra tatou e te turanga puapinga o tei kino ra me kore e tetai ua atu turanga ke.​—Salamo 145:1, 2.

Noatu e kua kite a Asapha i to Iehova tu meitaki, kua vaitata tona vaevae i te aere ke atu mei te ara tika. Mei te mea atura te pateretere ra te reira i runga i te ngai vai toka i te tuatau o tetai oro anga roiroi e te mamao. Eaa ra tona akarongo i paruparu ei? Kua akamarama aia: “Iaku i vareae i te aronga neneva, ka kite ei au i te meitaki o te aronga kino ra. Kare oki o ratou e mamae i te matenga: te vai maroiroi rai to ratou ririnui. Te tumatetenga o te tangata nei kare ua ia ratou; kare oki ratou i tairoia mei to etai aronga tangata.”​—Salamo 73:3-5.

Na te turanga puapinga i te pae kopapa o te au tangata tika kore i akariro ia Asapha kia vareae ia ratou. I te akara anga e te rekareka ra ratou i tetai oraanga au ua noatu e te akaputu ra ratou i te apinganui na te au ravenga pikikaa ra. (Akaaite Salamo 37:1.) Noatu ta ratou au angaanga kikino, mei te au akara anga o vao ake kua tinamou ratou. No teaa ra, te akara anga e te tupu ua atura to ratou oraanga ma te kore e au mamae mate kino ra! Ka mate ratou i etai au taime ma te au e te papu ia ratou uaorai, ma te kore e kite anga i tetai anoano i te pae vaerua. (Mataio 5:3) I tetai tua, te mamae ra etai au tavini o te Atua i te pae o te maki mamae ra e te mate, inara kua tauturu aia ia ratou, e tei ia ratou te manakonakoanga umere o te tuakaou anga.​—Salamo 43:1-3; Ioane 5:28, 29.

E manganui te au tangata kino kare o ratou au manamanata i te pae o te turanga matutu tei arai ra ia ratou mei te rekarekaanga i ta ratou putunga kai maata. “Te vai maroiroi rai to ratou ririnui,” te toro ua atura to ratou au kopu. Pera katoa, kare o ratou “tumatetenga o te tangata nei,” kare mei te maata anga o te au tangata ra, kare ratou e anoanoia kia putoto kia rauka mai te au apinga o te oraanga. Kua taopenga a Asapha no te aronga kino e “kare oki ratou i tairoia mei to etai aronga tangata.” Te ora atura ratou i te au timata anga ta te au tangata tu atua e kite ra no te mea te aru ra te reira i ta Iehova au turanga tika i roto i ta Satani ao kino.​—1 Ioane 5:19.

No te mea te puapinga ra te aronga kino, kua tuatua ua atu a Asapha no ratou e: “I akapiniiaʼi ratou e te nengonengo mei te pirianganaoa; kua vaiia ratou e te takinga-kino mei te kakau ra. Kua ngenengene to ratou mata i te matu; te inangaro o to ratou ngakau, e mea anga kore ïa. Te aviri ra ratou ma te tuatua kikino; te nengonengo ra ratou i te tuatua takinga-kino ra. Te patoi ra to ratou vaa i te au rangi ra, te aaere ra to ratou arero i te enua katoa nei.”​—Salamo 73:6-9.

Te aao ra te aronga rave kino i te parau ei “pirianganaoa,” e no reira e maata ua atu ta ratou au angaanga ta ua ‘kua vaiia ratou mei te kakau ra.’ Ma te tauta pakari kia tupu i ta ratou uaorai mataara, kua tamataku ratou i tetai pae atu. Kare te au mata o te aronga kino i topa mei te ngere anga i te akamatutu anga mari ra ‘kua ngenengene i te matu,’ tei kitea uaia no te mea no te matu mei te kaikai nunui anga. (Maseli 23:20) No te manuia i ta ratou rave anga akavare kua ‘ngenengene te inangaro o to ratou ngakau, e mea anga kore ïa.’ Te tuatua ra ratou i ta ratou ravenga pikikaa na roto i tetai ‘tu nengonengo’ parau ra. E kua ‘patoi to ratou vaa i te au rangi ra, e te aaere ra to ratou arero i te enua katoa nei.’ Te ngereanga i te tu ngateitei no tetai ua atu i te rangi me kore i te enua nei, te akakino ra ratou i te Atua e te takino ra i te au tangata.

Kare ko Asapha anake ua tei pa pakariia i tana i kite. Kua karanga aia: “E oki rai tona [te Atua] au tangat[a] i ku nei, e te vai i ki ei te kapu tei tatauia no ratou. E te tuatua ra oki ratou, eaa te Atua e kite ei? e e kite aina to Tei Teitei ra?” (Salamo 73:10, 11) Penei ko te aite anga o te aerenga tuatua Epera e no te mea te puapinga ra te aronga kino, i rotopu i to te Atua iti tangata kua rave etai pae i tetai manako tarevake e kua tano ki te turanga tei aite ra ki te aronga kino, te karanga anga e: ‘Kare te Atua e kite i te tupu ra e kare e akakore atu i te kino.’ I tetai tua, te kiteanga i te au tangata kino te rave ra i te kino ma te tu rangatira ua, te aiteia ra ki te inuanga i tetai vai maramara, te akakeu anga i tei tika ra kia ui e: ‘Akapeea te Atua i te tuku ua anga i teia au mea kia aere ua atu? Kare ainei aia e kite ana eaa te tupu ra?’

Te akaaiteanga i teia au turanga ki to te aronga kino ra, kua karanga a Asapha e: “I na, ko te aronga akono kore i te Atua teia, ko tei manuia i teianei ao, te tupu ra i te maata anga ta ratou apinga. E tamā anga puapinga kore tikai toku e toku nei ngakau, e te orei anga oki i toku rima i te apa kore: Kua tairoia ra au e po ua atu te rā, e kua pāpāia kare e popongi e vata.” (Salamo 73:12-14) Kua manako a Asapha e e puapinga kore i te arataki i tetai oraanga tika. Kua puapinga te aronga kino, “te tupu ra i te maata anga ta ratou apinga” na roto i te au ravenga pikikaa. Te akara anga e te ora atura ratou i te akautunga anga no te rave anga tarevake kino rava atu, inara kua mateia a Asapha “e po ua atu te rā”​—mei te taime i ara mai ei aia e tae ua atu ki te taime e akaangaroi ei aia i te po. Kua manako aia e te akatikatika ra Iehova iaia i te au popongi ravarai. I te mea e kare teia e tau ana, kua timata te reira i to Asapha akarongo.

Te Akatikatika Akaou Anga i te Manako

I te kiteanga i te openga e kua tarevake tona manakoanga, kua akakite a Asapha e: “Kia pera oki taku tuatua mei te reira ra, i na! kua pikikaa ïa au i te uki tamariki naau ra. Iaku ra i kimi kia kite au i taua mea nei, e mea pikipiki ïa iaku: Kia aere ra au ki roto i te ngai-tapu a te Atua ra, kite akera au i to ratou openga. Kua tuku tikaia ratou e koe ki te ngai pateka; kua titiri takiriia ratou e koe kia mate rava atu. Perepereta ïa to ratou mate e! i pou takiri roa atu ei ratou i te mataku maata ra. Mei te moemoea kia ara te tangata ra, koia katoa koe, e te Atua; kia tu koe ki runga ra, ka akaviivii roa atu ei koe i to ratou ra tu.”​—Salamo 73:15-20.

E mea meitaki e kare a Asapha i vaa ana i tetai kopekope anga, no te tuatuaanga i te ngai atea e e puapinga kore i te tavini ia Iehova penei e e akamaroiroi kore te reira i te au mema akamori o tona ngutuare tangata me kore penei e e takino i to ratou akarongo. Mei teaa atura te meitaki atu i te noo muteki ua e e rave i ta Asapha i rave ra! Kia kite e no teaa ra te aronga kino i ora atu ei i te rave anga tarevake koi mamae ei te aronga tika, kua aere aia ki te ngai tapu o te Atua. Kua riro te reira akanoo anga ei tuku ia Asapha kia manakonako maru ua i rotopu i to Iehova aronga akamori, e kua akatikatikaia tona manako. No reira i teia tuatau, me manamanataia tatou i ta tatou e kite ra, e kimi atu tatou i te au pau anga ki ta tatou au uianga na te pirianga atu ki te iti tangata o te Atua i te mea ka akatakake tatou ia tatou uaorai.​—Maseli 18:1.

Kua kite mai a Asapha e kua tuku te Atua i te aronga kino ki “te ngai pateka.” No te mea te akanooia ra to ratou oraanga takapini i te au mea kopapa, tei roto ratou i te tumatetenga o te kiteanga i tetai paku anga viviki. I te openga, ka autu te mate na roto i to ratou ruaine anga mai, e kare ta ratou apinganui tei rauka kino ua mai e akatinamou i tetai oraanga roa rava atu no ratou. (Salamo 49:6-12) Ka riro to ratou turanga puapinga ei moemoea tei peke viviki ra. Penei e e opukina atu ratou e te ture i mua ake ka itae ei ratou i te turanga ruaine ia ratou e kokoti ra i ta ratou i ruru. (Galatia 6:7) I te mea e kua kopae akakoro tikai ratou i Tei rauka anake i te tauturu ia ratou, kua akarukeia ratou ma te tauturu koreia, ma te kore e manakonakoanga. Me rave a Iehova no te patoi ia ratou, ka manako aia i to ratou “tu”​—to ratou tu teitei e te turanga—​ma te akavaavaa tikai.

E Paruru i Toou Ariu Anga Atu

No tei kore i ariu meitaki atu ki tana i kite, kua akakite a Asapha ma te tika e: “Ka taitaiaʼi toku ngakau, e putaputa akera to roto iaku. Manako kore toku, e te kite kore: mei te puaka ra au i mua ia koe. Ei ia koe rai au; na to rima katau i mou mai iaku. Ka riro rai koe i te arataki iaku i taau ra tuatua, e te openga iora ka apai ei koe iaku ki te [kaka, “NW”].”​—Salamo 73:21-24.

Na te manakoanga i te turanga puapinga i te pae kopapa o te aronga kino ra e te mamae o te aronga tika ka rauka ia i te takino i te ngakau o tetai tangata me kore te akariri tikai iaia. Tei oonu i roto roa​—i tona katu iʼi—​to Asapha taitaia anga no teia turanga kua akatupu ia i te mamae maata. Mei ta Iehova akara anga, kua riro mai aia mei tetai manu manako kore te ariuanga atu ki te tumu o te au manako kopapa ua nei. Inara, ‘ei te Atua ua rai a Asapha tei mou maira i tona rima katau.’ Me tarevake tatou i ta tatou manakoanga inara ka kimi atu i ta Iehova ako anga mei ta Asapha i rave ra, ka apai te Atua ia tatou na te rima ra, no te turu e te arataki ia tatou. (Akaaite Ieremia 10:23.) Na te taangaanga anake anga i tana ako anga e raukaʼi ia tatou i te arataki i tetai tuatau mataora ki mua. Penei ka mamae tatou i te taakama angaia no tetai tuatau, inara ka apai mai a Iehova i tetai akauri anga, ‘te apai anga ia tatou ki te kaka,’ me kore te ngateitei.

Te arikianga i te anoano no te irinaki ki runga ia Iehova, kua tuatua ua atu a Asapha e: “Koai ra toku ki runga i te au rangi ra? kare takiri tetai i te enua nei tei anoanoia e au, mari ra ko koe? Kia paruparu toku kopapa e toku ngakau katoa, ko te tauturu rai o toku ngakau, e taku ra tuanga, ko te Atua ïa, e tuatau ua atu. I na oki, te aronga e taka ke ia koe ra, ka pou ïa: te aronga oki e akaruke ia koe ra, ka tamate ravaia ïa. E mea meitaki ra iaku kia akavaitata atu ki te Atua: kua irinaki au i te Atu ra, ia Iehova, kia akakite rai au i taau katoa ra au angaanga.”​—Salamo 73:25-28.

Mei ia Asapha rai, kare atu a tatou mari ra ko Iehova te ka rauka ia tatou i te irinaki no te tinamou tika e te pumaana anga. (2 Korinetia 1:3, 4) No reira i te mea e ka morimori atu i ta tetai ua atu apinganui i te enua nei, e tavini tatou i te Atua e te akaputu i te au apinga no te rangi ra. (Mataio 6:19, 20) Te raukaanga tetai turanga marekaia ma Iehova ra e tau te reira ei rekareka anga maata rava atu no tatou. Noatu e ka autu kore to tatou mero ora e te ngakau nei, ka akaketaketa aia ia tatou e ka oronga mai i te tu mou ki to tatou ngakau kare i reira tatou e ngere i te manakonakoanga e te tu manava i roto i te takinokino anga. Te piri anga vaitata ma Iehova e apinga puapinga tikai ia. Te tuku ua anga i te reira ka riro ei tumatetenga no tatou e pera katoa te aronga tei akaruke ra iaia. Mei ia Asapha rai i reira, ka akapiri vaitata tatou ki te Atua e te pei i to tatou manamanata katoatoa ki rungao iaia. (1 Petero 5:6, 7) Te akamaata ra teia i to tatou turanga pae vaerua e ka akakeu ia tatou kia akakite ki tetai pae atu no runga i ta Iehova au angaanga umere.

E Vai Tamou ma te Tiratiratu kia Iehova

Kua manamanataia a Asapha no te mea kua kite aia i te aronga rave kino i te puapingaanga i Iseraela, tona enua kainga. I rotopu i te au tavini tiratiratu o Iehova, te vaira te “aronga kino” tei apa ra i te akapaapaaanga, te akateitei, te ta ua, te akavaavaaanga, e te pikikaa, e tei kopae ra e kua kite te Atua i ta ratou e rave ra. (Salamo 73:1-11) Mei teaa atura te akamatakiteanga! Ei akamareka i te Atua ko Iehova, kia kopae tatou i te akaarianga i te au tu mei te parau, te ta ua, te akavaavaaanga, e te tika kore. Mei ia Asapha rai, kia tau to Iehova au tavini ravarai ‘kia aere ki roto i te ngai-tapu a te Atua ra’ na te akaputuputu tamou anga ma Tona aronga akamori tiratiratu ra. E tikai, e tau te katoatoa tei inangaro ra ia Iehova kia “akavaitata atu ki te Atua,” te irinakianga ki runga iaia no te tauturu ia ratou i roto i te au mamaeanga, noatu eaa ta tetai atu ka tuatua me kore ka rave.​—Salamo 73:12-28; 3 Ioane 1-10.

E tika, penei ka riro te turanga puapinga i te pae kopapa o te aronga rave kino ei timata i to tatou akarongo, mei tei tupu ra kia Asapha. Inara, ka rauka ia tatou i te tamou marie i teia timata anga me akatumu tatou i to tatou oraanga ki runga i ta Iehova angaanga. Ka tutakiia tatou no te raveanga i teia no te mea ‘kare te Atua i tuatua-tika kore, ka akangaro atu ei aia i ta tatou angaanga i rave, e to tatou anoano, i tona ingoa.’ (Ebera 6:10) To tatou au timata anga e “mea ngiti poto māmā” me akaaiteia ki ta tatou tutaki anga. (2 Korinetia 4:17) Noatu etai 70 me kore 80 mataiti o te mamaeanga mei tetai ao noa nei te pati ra i to tatou ngutu ma te muteki me akaaiteia ki te oraanga mataora mutu kore ta Iehova e taputou ra no tona au tavini tiratiratu.​—Salamo 90:9, 10.

Auraka rava tatou e tuku ua i te turanga puapinga o te aronga rave kino tei tuke ra ki to tatou au mamaeanga no te tuatua tika ra kia paruru ia tatou mei te akaarianga i te akarongo koia oki e ua no te vaerua tapu o te Atua. (Galatia 5:22, 23; 1 Petero 3:13, 14) Ka mareka a Satani me kopi tatou i te aronga kino ra, tei puapinga ra i te maata anga o te taime no te mea e aronga rave pikikaa ratou. Inara, ka akangateitei tatou i to Iehova ingoa na te patoianga i te au timata anga no te akaruke i tana au turanga tika. (Zephania 2:3) Auraka tatou e apiapiia i te manuia o te aronga rave kino, no te mea i te maata anga o te taime, ko te turanga puapinga anake ua te ka rauka ia ratou. Eaa i reira te puapinga o te reira? Kare te reira e riro ei akamata i te akaaite ki te turanga puapinga i te pae vaerua tei rekarekaia e te aronga te taangaaanga ra i te akarongo ki roto i te Atu Ngateitei Rava ko Iehova.