“E Akameitaki ia Iehova, e Taku Vaerua”

“I TE au marama i ou ake nei kua riro mai e mea mataora kore e te rekareka kore taku angaanga orometua,” i na Nancy ei.a No etai ngauru mataiti, kua angaanga ana aia ei painia, ei vaine akakitekite tamou i te tuatua meitaki. Inara, i tuatua mai ei aia: “Kare au e reka ana i tei tupu kiaku. I te akara anga e te oronga nei au i te tuatua Patireia na roto i te tu kare e oraora ana e kare mei te ngakau. Eaa taku ka rave?”

Ka tamanako, katoa, i te turanga o Keith, e tangata pakari i roto i tetai putuputuanga o te Au Kite o Iehova. Mei teaa atura tona poitirere i te rongo anga aia i tana vaine i te tuatua e: “E apinga paa taau e manako ra. I roto i taau pure i oronga, kua akameitaki koe i te kai, noatu rai kare teia i te tuatau kaikai anga!” Kua akatika a Keith e: “Te kite nei au e kua riro taku pure ei au tuatua ua.”

Kare e ekoko anga, kare koe e inangaro i taau au tuatua akapaapaa ki te Atua ko Iehova kia riro mai ei au tuatua pumaana kore e kare e oraora ana. Mari ra, te inangaro ra koe i te reira kia ngakau tae, kia aere mai mei te au manako ngakau ariki tikai. Inara, kare e rauka kia aaoia me kare kia kiritiia te manako ngakau mei te kakau rai. Kia pupu ua mai te reira mei roto tikai i tetai tangata. Akapeea e raukai i tetai kia manako rekareka i te ngakau ra? Te oronga maira a Salamo 103 i te kite oonu kia tatou no teia.

Na te Ariki ko Davida o Iseraela taito i atu i te Salamo 103. Kua akamata aia ma te au tuatua: “E akameitaki ia Iehova, e taku vaerua; e to roto katoa iaku nei, i tona ra ingoa tapu.” (Salamo 103:1) “Te tuatua akameitaki, te tau ra ki te Atua,” i tuatuai tetai tataanga, “te aite anga kia akapaapaa, te akakite ra i te ngakau aroa pakari nona e pera katoa te tu ariki anga.” Kua inangaro i te akapaapaa ia Iehova ma te ngakau ki i te aroa e te ariki anga, kua raurau a Davida i tona meta​—iaia uaorai​—kia “akameitaki ia Iehova.” Inara eaa tei akakeu i teia manako pumaana i roto i to Davida ngakau ki te Atua tana e akamori ra?

Te na ko maira a Davida: “Auraka tona [to Iehova] katoa ra au takinga-meitaki e akangaropoinaia.” (Salamo 103:2) Te manako rekareka anga kia Iehova i te akara anga te piri atura ma te tamanako ariki ua anga i ‘tona au takinga-meitaki.’ Ko teea tikai au raveanga a Iehova ta Davida e manako ra? I te akara anga i te au mea angaia e te Atua ko Iehova ra, mei te rangi ki i te etu i tetai po meitaki, ka rauka tikai i te akaki i te ngakau ma te tu ariki anga ki Tei Anga ra. Kua akakeu oonu tikai te au rangi ki i te etu ia Davida. (Salamo 8:3, 4; 19:1) Inara, i roto i te Salamo 103, kua maara ia Davida i tetai atu angaanga ke a Iehova.

“Akakore [ua a Iehova] i Taau Katoa ra Au Apa”

I teia taramo, kua akakite akaou a Davida i te au raveanga takinga meitaki a te Atua. I te taiku anga ki te mea mua e te mea maata ra, kua imene aia: ‘Te akakore ra a Iehova i taau katoa ra au apa.’ (Salamo 103:3) Kua kite rai a Davida i tona uaorai tu apa ua. I muri ake i te aravei anga te peroveta ko Natana iaia no runga i tona pirianga akaturi kia Bateseba, kua akatika a Davida: “I mua i to aroaro, toou anake ra [e Iehova], i ara ai au nei, e i mua i to mata i rave ei au i teianei kino.” (Salamo 51:4) Ma te ngakau mamae, kua pati akatenga aia: “E aroa mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara. E orei takiri mai koe iaku i toku nei kino; e tamā mai iaku i taku nei ara.” (Salamo 51:1, 2) Mei teaa ra to Davida tu rekareka e kua akakoreia te ara! Ei tangata apa ua, kua rave aia i tetai atu au ara i tona oraanga, inara kare rava aia i kore ana no te tataraara, kua ariki i te ako anga, e kua akatikatika i tona au aerenga. Penei na te akaata anga i te au raveanga takinga meitaki umere a te Atua kiaia i akakeu ia Davida kia akameitaki ia Iehova.

Kare ainei e tu apa ua rai to tatou? (Roma 5:12) Noatu kua aue te apotetoro ko Paulo: “Te rekareka nei oki au i te ture a te Atua i te akonoanga i te tangata i roto ra; Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa. Aue oki au ko te tangata mate maata e! naai au e akaora i teianei kopapa mate?” (Roma 7:22-24) Mei teaa ra to tatou rekareka e kare a Iehova e akono ana i to tatou au tu ara ua! Ka orei rekareka aia i te reira me tataraara tatou e me kimi i te akakore anga ara.

Kua akamaara a Davida iaia uaorai: “Ko [Iehova] tei akaora i toou katoa ra au maki.” (Salamo 103:3) Mei te mea e raveanga akaora akaou te rapakau anga, e maata atu ia i te akakore ua i te raveanga tarevake. Te o maira te akaatea anga i te “au maki”​—te au tupu anga kino o te tarevake o to tatou au tu. I te ao ou nana e maani, ka takore pu tikai a Iehova i te au tupu anga o te ara i te pae kopapa, mei te au maki e te mate. (Isaia 25:8; Apokalupo 21:1-4) Inara, i teia tuatau, te rapakau nei te Atua ia tatou i te au maki i te pae vaerua. No etai, te kapiti maira teia i te akava ngakau kino e te piri anga kino kiaia. ‘Auraka e akangaropoinaia’ i ta Iehova i rave takere no tatou tataki tai i teia ra.

“Akaora [Aia] ia Koe”

Te “akaora [ra a Iehova] ia koe i te mate,” i imene ei a Davida. (Salamo 103:4) “Te mate” ko te vaarua matauia no te tangata ra​—ko Teoro, me kare ko Ade. I mua ake ka riro mai ei ariki ki rungao ia Iseraela, kua kite a Davida iaia uaorai e kua akakinoia e te mate. Ei akaraanga, kua akamou te Ariki ko Saula o Iseraela i te tu riri ta ua ia Davida e kua tauta i te tamate iaia i tetai au atianga. (1 Samuela 18:9-29; 19:10; 23:6-29) Kua inangaro katoa to Philiseti ia Davida kia mate. (1 Samuela 21:10-15) Inara i te au taime ravarai, kua akaora mai a Iehova iaia mei “te mate.” Mei teaa atura to Davida rekareka i te akamaara anga i teia au raveanga a Iehova ra!

Akapeea koe? Kua akamaroiroi ainei a Iehova ia koe i toou au tuatau taitaia me kare te au tuatau ngere anga? Me kare kua kite ainei koe i tetai au atianga e kua akaora aia i te au oraanga o tona Au Kite tiratiratu mei te vaarua o Teoro i to tatou tuatau? Penei kua akakeuia koe na te tatau anga i te au tataanga o tana au raveanga akaora i roto i te au kapi o teia makatini. Kore i reira e akanoo i tetai tuatau no te akamanako ariki anga i teia au raveanga a te Atua mou? Ae, e tikai, e au tumu to tatou pouroa kia rekareka ia Iehova no te manakonakoanga o te tuakaou anga.​—Ioane 5:28, 29; Angaanga 24:15.

Te oronga maira a Iehova kia tatou te ora e tei akariro i te reira kia rekarekaia e te tau ra kia ora atu. Kua akakite te tata taramo e ko te Atua “tei akakorona ia koe i te takinga-meitaki e te aroa.” (Salamo 103:4) I to tatou tuatau inangaro, kare a Iehova e akaruke ia tatou inara ka tauturu mai ia tatou na roto i tana akaaerenga e te aronga pakari akatainuia, me kare te au tiaki, i te putuputuanga. Ka rauka i te reira i te tauturu ia tatou kia akono i te turanga timata anga ma te kore e ngere i to tatou uaorai tu ngateitei e te tu teitei. Te manako maira te au tiaki Kerititiano i te mamoe. Te akamaroiroi ra ratou i tei maki e tei taitaia e kua rave i tei rauka ia ratou kia akaora i te aronga tei topa ra. (Isaia 32:1, 2; 1 Petero 5:2, 3; Iuda 22, 23) Te akakeu ra to Iehova vaerua i teia au tiaki kia tangi aroa e te aroa ua i te anana. E tikai mei te korona rai tona “takinga-meitaki e te aroa” te akakaka ra ia tatou e te oronga maira i te tu teitei kia tatou! Auraka e akangaropoina i tana au ravenga, e akameitaki ua atu tatou ia Iehova e tona ingoa tapu.

Te tuatua anga i tana ako iaia uaorai, kua imene te tata taramo ko Davida: “Ko [Iehova] tei akamerengo i toou vaerua ki te meitaki, kia akaouia rai koe mei te aeto ra.” (Salamo 103:5) Te ora ta Iehova e oronga maira koia oki ko tetai e mea merengo e te rekareka. Ina, ko te kite i te tuatua mou e poe uaorai kare e rauka kia akaaiteia atu e e tumu rekareka anga! E akamanako ana e mei teaa te merengo oonu anga i te angaanga ta Iehova i oronga mai kia tatou, koia oki ko te tutu aere anga e te akariro anga i te tangata ei pipi. Mei teaa ra te rekareka i te kite i tetai tei inangaro i te kite i te Atua mou e kia tauturu i te reira kia kite ia Iehova e kia akameitaki iaia! Inara, me ka akarongo mai e me kare tetai i ta tatou ngai, e akameitaki anga mekameka kia kapiti atu ki roto i tetai angaanga te akatapu ra i to Iehova ingoa e te akatika anga i tona tu ngateitei.

Koi rave ua atu i te angaanga akakitekite i te Patireia o te Atua, koai te ka kore e roiroi me kare e paruparu? Inara te akaou ra a Iehova i te tu maroiroi o tona au tavini, te akariro anga ia ratou “mei te aeto ra” e peau maroiroi to te reira e ka rere ki te ngai teitei i te rangi ra. Mei teaa ra to tatou tu rekareka e te oronga maira to tatou Metua aroa i te rangi ra i taua ‘maroiroi akamaata’ e raukai ia tatou i te rave tiratiratu i ta tatou angaanga orometua mei tera ra i tera ra!​—Isaia 40:29-31.

Ei akatutu: E angaanga tamou ta Clara e te akapou katoa ra e 50 ora i te marama tataki tai i roto i te angaanga orometua. I nana ei: “Tetai taime e roiroi ana au, e kua maro au iaku kia aere ki vao i te angaanga tutu aere no te mea kua akanoo au i tetai papaanga no te angaanga ki tetai. Inara me aere au ki vao, kua oraora au.” Penei kua kite ana koe i te maroiroi tei tupu mai mei te turu anga tu-Atua i te angaanga orometua Kerititiano. Kia akakeuia koe kia tuatua, mei ia Davida rai i te au tuatua akamata anga o teia taramo: “E akameitaki ia Iehova, e taku vaerua, e to roto katoa iaku nei, i tona ra ingoa tapu.”

Akaora a Iehova i Tona Iti Tangata

Kua imene katoa te tata taramo: “Te rave rā Iehova i te tuatua-tika, e te tuatua-tau, ki te aronga katoa i takinga-kinoia ra. Kua akakite aia i tona au aerenga kia Mose; tana au angaanga ki te tamariki a Iseraela.” (Salamo 103:6, 7) Papu rai, te manako ra a Davida i te “takinga-kinoia” anga o Iseraela i raro ake i te aronga taomi o Aiphiti i te au tuatau o Mose. Te akamanako anga e akapeea a Iehova i te akakite anga i tana au ravenga akaora anga kia Mose penei kua akakeu i te manako ariki anga ki to Davida ngakau.

Ka akakeuia tatou mei te reira tu ariki anga na te akaataanga i te au raveanga a te Atua ki to Iseraela. Inara auraka tatou e kore e akamaara no runga i te au kite anga o te au tavini o Iehova i teia tuatau, mei tei taikuia i roto i te pene 29 e te 30 o te puka Jehovah’s Witnesses​—Proclaimers of God’s Kingdom. Te au tua tei tataia i roto i te reira e tetai au puka a te Taiate Punanga Tiaki ka rauka ia tatou i te kite e akapeea a Iehova i te tauturu anga i tona iti tangata i to tatou tuatau kia akakoromaki i te tapeka anga, te akapupu anga, te au araianga, te au puakapa tamamae anga, e te au puakapa tavini angaanga. I vai ana te au timata anga i te au enua tamaki, mei ia Burundi, Liberia, Rwanda, e Yugoslavia i mua ana. Me tupu te takinokino anga, kua akamaroiroi to Iehova rima i tona au tavini tiratiratu. Na te akamaara anga i teia au raveanga a to tatou Atua maata, ko Iehova, ka rauka ia tatou tei rauka ia Davida mei te akamanako anga no runga i te tua akaora o Aiphiti.

E akamanako katoa ana e akapeea a Iehova i te akaora anga ia tatou mei te teiaa o te ara. Kua oronga mai aia i te “toto o te Mesia ra” kia “mā o to kotou akava-ngakau i te angaanga mate.” (Ebera 9:14) Me tataraara tatou i ta tatou au ara e ka kimi i te akakore anga ara na runga i te tumu o to Iesu maringi anga toto, te akaatea mamao ke ra te Atua i ta tatou au ara mei ia tatou​—“mamao atu e mei te kake anga te ra ki te opuanga ra”​—e ka akaoki mai ia tatou ki tona mareka anga. E akamanako ana i ta Iehova au apinga mei te au uipaanga Kerititiano, te taokotai anga akamaroiroi, te au tiaki i te putuputuanga, te au puka akatumuia ki runga i te Pipiria te rauka ra ia tatou na roto i te “tavini akono meitaki e te pakari.” (Mataio 24:45) Kare ainei e te tauturu ra teia au raveanga a Iehova ia tatou kia akamatutu i to tatou pirianga kiaia? Kua akakite a Davida: “E aroa e te takinga-meitaki to Iehova; kare e riri vave, te maata ra te aroa. . . . Kare akenei aia i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino.” (Salamo 103:8-14) Ka akakeu te akamanako anga no runga i to Iehova tu manako aroa ia tatou kia akakaka iaia e kia akakite ua i tona ingoa tapu.

“E Akameitaki ia Iehova, e Tana Katoa ra Au Angaanga”

Kia akaaite atu ma te tu mate kore o Iehova, te “Atua mutu kore,” e poto ua te “au rā” o te “tangata nei” e tikai​—“ki te ngangaere.” Inara kua akaata ariki ua a Davida e: “Te aroa o Iehova, mei tupua roa mai ïa, e ka tu e rimua ki te aronga i mataku iaia ra, e tana ra tuatua-tika ki te tamariki a te au tamariki; Ki te aronga i akono i tana ra koreromotu, e tei akamaara i tana ra au ikuikuanga e rave ra.” (Genese 21:33; Salamo 103:15-18) Kare e ngaropoina ana ia Iehova te aronga tei mataku iaia. A te tuatau tau, ka oronga aia i te ora mutu kore kia ratou.​—Ioane 3:16; 17:3.

I te akakite anga i tona tu ariki anga no to Iehova taoonga ariki, kua tuatua a Davida: “Kua akamou a Iehova i tona ra terono ki runga i te au rangi; e kua kauraro te au mea katoa nei i tona ra basileia.” (Salamo 103:19) Noatu kua akakite uaia to Iehova taoonga ariki no tetai tuatau na roto i te patireia Iseraela, tei te rangi ra tona terono. No tona taoonga Tei Anga, ko Iehova te Tutara Ngateitei o te ao e pini ua ake e te akono ra i tona anoano tu-Atua i te rangi e te enua nei kia tau ki tona au akakoroanga.

Kua raurau katoa a Davida i te au angera i te rangi ra. Kua imene aia: “E akameitaki ia Iehova, e te au angela nana e, ko tei maata i te ririnui, e kua akono i tana akauenga, i te akarongo anga i tona reo kia tuatua. E akameitaki ia Iehova e tona katoa ra au nuku; te au tavini nona ra, ko tei rave i tana i inangaro ra. E akameitaki ia Iehova, e tana katoa ra au angaanga, i te au ngai katoa ra i tona ra au; e akameitaki ia Iehova, e taku vaerua.” (Salamo 103:20-22) Kare ainei ta tatou akaata anga i ta Iehova raveanga aroa takinga meitaki e akakeu katoa ia tatou kia akameitaki iaia? E tika rava! Ka papu ia tatou kare e ngaro te tangi anga o to tatou reo akapaapaa ki te Atua i roto i te au imene anga maata a te aronga akapaapaa te kapiti maira i te au angera tuatua tika. Kia akapaapaa tatou ma te ngakau katoa i to tatou Metua i te rangi ra, te tuatua meitaki ua anga iaia. E tikai, e manako ngakau tatou i te au tuatua a Davida, “E akameitaki ia Iehova, e taku vaerua.”

[Tataanga Rikiriki i Raro]

[Tutu i te kapi 23]

Kua manakonako a Davida i ta Iehova au raveanga aroa takinga meitaki. Te pera ra ainei koe?