E Aaere Tamou Marie i to Iehova ra Aerenga

“E tiaki atu ia Iehova, e akono tikai i tona arataa, e nana koe e akateitei kia rauka ia koe te enua.”​—SALAMO 37:34.

1, 2. Eaa tei o atu ki te aaereanga i to Iehova aerenga no te Ariki ko Davida, e eaa ta te reira e umuumu ra no tatou i teianei tuatau?

“E AKAKITE mai koe kiaku i toku arataa kia aere ra; te apai atu nei oki au i toku vaerua kia koe.” (Salamo 143:8) Te tuatua akaou ra te au Kerititiano ma te ngakau katoa i taua au tuatua a te Ariki ko Davida ra. Te anoano ra ratou ma te ngakau tae kia akamareka ia Iehova e kia aaere i tona aerenga. Eaa te o atura ki teianei? Te aite anga no Davida ra, kia akono i te ture a te Atua. Kua o atu ki te reira te irinakianga ia Iehova kare i te au pirianga ma to te au pa enua. Ae te aiteanga kia tavini tiratiratu ia Iehova, kare i te au atua o te au tangata i te pae maira. E maata atu te o maira no te au Kerititiano, kia aaere i te aerenga o Iehova ra.

² Ko tetai apinga, ko te aaereanga i to Iehova ra aerenga i teianei tuatau e akonoanga i te akarongo i te atinga oko o Iesu Karaiti, ma te akatikaanga iaia ei “te mataara, e te tuatua-mou e te ora.” (Ioane 3:16; 14:6; Ebera 5:9) Te aite anga katoa oki, e akatupuanga “i te ture a te Mesia,” te kapiti ra i te akaarianga i te aroa tetai ki tetai, e maata oki ki te au taeake akatainuia o Iesu. (Galatia 6:2; Mataio 25:34-40) Te aronga te aaere ra i to Iehova arataa te anoano ra i tana au kaveinga e tana au akauenga. (Salamo 119:97; Maseli 4:5, 6) Te akaperepere ra ratou i ta ratou angaanga meitaki maata i te raveanga i te angaanga orometua Kerititiano. (Kolosa 4:17; 2 Timoteo 4:5) Ko te pure tetai tuanga putuputu i to ratou oraanga. (Roma 12:12) E ‘kia matakite i to ratou aerenga, eiaa mei ta te kite kore, mei ta te aronga pakari ra.’ (Ephesia 5:15) Kare ratou e tuku atinga i te au apinga vaerua no te au apinga kopapa no te tuatau poto ua me kare no te au mea navenave o te kopapa nei. (Mataio 6:19, 20; 1 Ioane 2:15-17) No reira oki, ko te tiratiratu kia Iehova e te irinaki iaia e mea puapinga maata. (2 Korinetia 1:9; 10:5; Ephesia 4:24) No teaa ra? No te mea te aiteite ra to tatou turanga ki to Iseraela i taito ra.

Te Umuumuanga no te Irinaki e te Tiratiratu

3. Eaa te tiratiratu, te akarongo, e te irinaki anga ka tauturu ei ia tatou kia aaere ua i to Iehova aerenga?

³ E iti tangata iti ua to Iseraela tei koropiniia ra e te aronga akaoaoa kore mai tei rave ra i te au oroa tau kore i te akamori anga i te au atua itoro ra. (1 Paraleipomeno 16:26) Ko to Iseraela anake tei tavini atu i te Atua mou akara koreia okotai ra, koia Iehova, e kua umuumu aia kia tamou marie ratou i te au turanga rave akono teitei ra. (Deuteronomi 6:4) Mei te reira katoa i teia tuatau nei, e tokoiti ua ake mirioni tangata te akamori nei ia Iehova, e te noo nei ratou i roto i tetai ao e vaitata i te ono pirioni au tangata e tuke roa ra to ratou au turanga e te manako akonoanga mei to ratou. Me tei roto tatou i taua aronga e tokoiti ua akera mirioni, ka tika tatou kia paruru atu i taua mana aere ra na te aerenga tarevake. Akapeea? Na te tiratiratu ki te Atua ko Iehova, te akarongo kiaia, e te irinaki anga ngaueue kore e ka akatupu aia i tana au taputou ka tauturu mai ia. (Ebera 11:6) Na teianei e arai ia tatou i te tukuanga i to tatou irinaki anga i te au apinga manakonakoia e to te ao nei.​—Maseli 20:22; 1 Timoteo 6:17.

4. Eaa ra te au etene i noo ei “ma te manako akapoiriia”?

⁴ Kua akakite mai te apotetoro ko Paulo e kia peea te tuke o te au Kerititiano mei to te ao nei i tana tataanga: “E teianei, teia taku tuatua, ta te Atu oki taku e akakite atu nei, oti ra ua kotou i te aere i ta tetai papaki etene aerenga, i te akonoanga neneva o to ratou uaorai ngakau, ma te manako akapoiriia, e te taka ke i te ora a te Atua ra no te kite kore i roto ia ratou ra, e te paetaeta oki o to ratou ngakau.” (Ephesia 4:17, 18) Ko Iesu “te mārama mou.” (Ioane 1:9) Ko tetai ua atu te ka kopae ke iaia me kare tei karanga e te irinaki ra iaia mari ra kare e akarongo atu i “te ture a te Mesia” te vaira “ma te manako akapoiriia.” E mamao ke atu mei te aaereanga i to Iehova ra aerenga, kua ‘taka ke ratou i te ora a te Atua ra.’ Noatu akapeea to ratou manako ngakau e e pakari ratou i te aerenga o teianei ao, e ‘akonoanga neneva to ratou’ i to te kite te ka taki atu ki te ora, koia to te Atua ko Iehova ra e Iesu Karaiti oki.​—Ioane 17:3; 1 Korinetia 3:19.

5. Noatu ra te kaka ra te marama tuatua mou i te ao nei, eaa ra te au ngakau e manganui i akarongo kore ei?

⁵ Inara, te kaka nei te marama o te tuatua mou i te ao nei! (Salamo 43:3; Philipi 2:15) “Te kapiki nui nei te pakari ki te ngai atea ra.” (Maseli 1:20) I te mataiti i topa akenei kua akapou te Au Kite o Iehova e tere atu i tetai pirioni ora i te tuatuaanga ki to ratou aronga i te pae mai no runga i te Atua ko Iehova e no Iesu Karaiti. E au anere ua tauatini tei akarongo mai. Inara, ka tau ainei tatou kia poitirere e e manganui ua atu etai ke ra te kore i akarongo mai? Kare. Kua tuatua a Paulo i “te paetaeta oki o to ratou ngakau.” E au ngakau akarongo kore to tetai papaki no te noinoi oki me kare inangaro i te moni. Ko etai atu tei raro i te mana akonoanga pikikaa me kare te manako o teianei ao te totoa maata nei i teia tuatau. No te au tupuanga ngata i te oraanga kua taki atu i te aronga e manganui kia akaariu mai i to ratou mokotua ki te Atua. Ko etai kare e akatika kia akono i ta Iehova ra au turanga akono teitei. (Ioane 3:20) Ka rauka ainei te ngakau o tetai te aaere ra i to Iehova aerenga kia riro kia paetaeta i taua au turanga ra?

6, 7. Noatu rai e aronga akamori ratou i te Atua ko Iehova, i teea au atianga to Iseraela i topa ke ei, e no teaa ra?

⁶ Kua tupu teianei ki to Iseraela i taito ra, mei ta Paulo i akaari maira. Kua taia aia: “Kua riro oki taua au mea ra ei akaraanga na tatou, kia kore tatou e noinoi i te au mea kikino ra, mei ia ratou i noinoi ra. Auraka katoa kotou ei araara idolo, mei tetai papaki o ratou ra; koia oki tei tataia ra e, ‘Kua noo te au tangata ki raro e kai e e inu oki, e kua tu akera ki runga e ura.’ Auraka katoa tatou e akaturi, mei tetai papaki o ratou i akaturi ra, e mate iora e rua ngauru e toru ara i te tausani i te rā okotai ra.”​—1 Korinetia 10:6-8.

⁷ Kua taiku a Paulo na mua i te atianga i to Iseraela akamori anga i tetai punua puakatoro auro i raro ake i te Maunga i Sinai ra. (Exodo 32:5, 6) E akarongo kore tikai teianei ki te akauenga tu-Atua ta ratou i akatika ra kia akono i nga epetoma tokoiti ua i mua akera. (Exodo 20:4-6; 24:3) I reira, kua taiku katoa a Paulo i te tuatau i to Iseraela i tupou ra ki raro kia Baala ma te au tamaine i Moabi ra. (Numero 25:1-9) Kua akatakaia te akamori anga punua puakatoro na te kaikai maata anga, e ‘te uraanga oki.’a Kua rave kapitiia te akamori anga ia Baala na te raveanga ainga tau kore ra. (Apokalupo 2:14) Eaa ra to Iseraela i rave ei i teianei au ara? No te mea kua tuku ratou i to ratou ngakau kia ‘noinoi i te au mea kikino ra’​—me ko te akamori itoro me kare ko te au ravenga kikino tei kapitiia atura i te reira.

8. Eaa ta tatou ka kite mei te au tupuanga ki to Iseraela?

⁸ Kua akakite mai a Paulo e ka tau tatou kia kite mei teianei au ravenga. Kite i teaa? E mea tau kore no tetai Kerititiano kia tupou ki raro ki tetai punua puakatoro auro me kare ki tetai atua Moabi taito ra. Inara ka akapeea oki te akaturi anga me kare te kaikai noinoi anga? E au mea matauia teia i teianei tuatau, e me ka tuku tatou i te inangaro no ratou kia tupu i to tatou ngakau, ka aere mai ratou ki rotopu ia tatou e Iehova ra. Te tupu anga ka riro kia aite mei te mea rai e kua rave tatou i te akamori itoro​—tei akataka keia ra mei te Atua. (Akaaite ia Kolosa 3:5; Philipi 3:19.) E tika, kua taopenga a Paulo i tana tuatua anga no taua au tupu anga ra na te akamaroiroianga i te au taeake akarongo ra: “E rere ke atu i te araara idolo.”​—1 Korinetia 10:14.

Tauturu i te Aaereanga i to te Atua Aerenga

9. (a) Eaa te tauturu e rauka maira ia tatou kia tamou marie ia tatou ki runga i to Iehova aerenga? (e) Eaa tetai tu e akarongo ei tatou i te ‘tuatua i muri ia tatou’?

⁹ Me te tamanako papu ra tatou kia aaere tamou marie i to Iehova aerenga, kare tatou i akarukeia mai ma te tauturu kore. Kua totou a Isaia: “E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.” (Isaia 30:21) Akapeea ‘to tatou taringa’ i te akarongo anga i ‘te tuatua i muri ia tatou’? Kare tetai e akarongo i te reo tikai i teia tuatau nei me kare e rauka tetai tuatua nana tikai mei ko mai i te Atua. Te “tuatua” te akarongoia ra te aere maira kia tatou katoatoa na taua aerenga rai. Te mea mua e te maata oki, te aere maira na roto i te au Tuatua Tapu akauruia, koia te Pipiria, tei roto i reira te au manako o te Atua e te au tataanga no tana au akonoanga ma te au tangata nei. I te mea te akaaroia atu nei tatou i te au ra ravarai ki te au tuatua pikikaa mei te au tumu “tei akataka keia ra i te oraanga no te Atua maira,” no te ora vaerua meitaki, ka tau tatou kia tatau putuputu i te Pipiria e kia akamanako oki i te reira. Na teia e tauturu ia tatou kia kopae ke i te “au mea puapinga kore” e kia ‘apa kore ma te tau tikai i te au angaanga memeitaki katoa ra.’ (Angaanga 14:14, 15; 2 Timoteo 3:16, 17) Na te reira e akamaroiroi ia tatou, e akaketaketa ia tatou, e te tauturu oki ia tatou ‘kia meitaki ei to tatou aerenga.’ (Iosua 1:7, 8) No reira, te raurau maira te Tuatua a Iehova: “E tenana, e akarongo mai iaku, e te au tamariki e; e ao oki to te aronga e akono mai i toku nei au aerenga. E akarongo mai i te ako, kia pakari, auraka rava e anga ke i te reira.”​—Maseli 8:32, 33.

10. Eaa te rua o te tu te akarongo ra tatou i te ‘tuatua i muri ia tatou’?

¹⁰ Te aere katoa maira te ‘tuatua i muri mai ia tatou’ na “te tavini akono meitaki e te pakari,” nana e oronga mai i te ‘kai i te ora mou ra.’ (Mataio 24:45-47) Tetai tu te orongaia mai nei teianei kai na roto i te au puka nenei akatumuia i te Pipiria ra, e i teia au mataiti ua akenei e maata te kai orongaia mai. Ei akatauanga, na roto i te makatini Punanga Tiaki, kua akameitakiia to tatou kiteanga i te au totou ra. I roto i teianei tianara, kua akamaroiroiia mai tatou kia akakoromaki i te angaanga tutu aere e te akariro anga i te tangata ei pipi noatu rai te tupu anga manako kore mai o te tangata, kua tauturuia mai tatou kia kopae ke i te au topaanga i te au vaarua, e kua raurauia mai tatou kia akatupu i te au tu Kerititiano meitaki ra. Mei teaa ra ta tatou akaperepere anga i taua kai i te ora mou ra!

11. E akataka mai i te toru o te tu te rauka ra ia tatou te akarongo i te ‘tuatua i muri ia tatou.’

¹¹ Te oronga katoa maira te tavini akono meitaki e te pakari i te kai na roto i te au uipaanga putuputu. Te kapiti ra teianei i te au uipaanga a te putuputuanga, te au uipaanga apa mataiti i te au kotinga, e te au uruoaanga maata atu i te mataiti. Koai te Kerititiano tiratiratu kare ra e manako maata i taua au akaputuputuanga ra? E au tauturu puapinga maata ratou i te turu anga ia tatou i te aaereanga i to Iehova ra aerenga. I te mea e manganui te akapou ra e maata te taime i te angaanga me kare i te apii i te taokotai anga ma te aronga kare ra e piri mai ana i te akarongo, ka riro tikai te taokotai anga Kerititiano putuputu ei akaora anga tikai. Te oronga maira te au uipaanga i tetai tuatau meitaki ‘kia akamaroiroi atu tetai i tetai kia maata te aroa e te angaanga memeitaki ra.’ (Ebera 10:24) Te aroa nei tatou i to tatou au taeake, e te inangaro ra tatou i te taokotaianga ma ratou katoa ra.​—Salamo 133:1.

12. Eaa te tamanako anga papu o te Au Kite o Iehova ra, e akapeea ta ratou akakite anga i te reira i mua ua akenei?

¹² I te akamaroiroi anga na taua kai vaerua ra, kua vaitata i te ono mirioni au tangata i teia tuatau nei te aaere ra i ta Iehova aerenga, e au mirioni ua atu etai te apii ra i te Pipiria kia apii e akapeea te rave anga i te reira. Te maroiroi kore ra ainei ratou me kare te paruparu ra no te tika e e tokoiti ua to ratou numero me akaaiteia atu ma te au pirioni ua atu o te au tangata o te enua katoa? Kare rava ia! Kua papa to ratou manako kia tamou marie i te raveanga i te ‘tuatua i muri ia ratou ra,’ ma te rave tiratiratu anga i to Iehova ra anoano. Ei tetai akakite anga i teianei papaanga manako ki te au tangata, i te 1998/99 “Ta te Atua Tu Oraanga,” au Uruoaanga Tapere e te Pa Enua, kua akakite te au tereketi i te manako me kare anoano na te akatakaanga i to ratou turanga manako ngakau ra. Te aru mai nei te tataanga o taua akatakaanga manako ra.

Akatakaanga Manako

13, 14. Eaa te manako anga tikai no te turanga o te ao nei o te Au Kite o Iehova ra?

¹³ “Ko matou, ei Au Kite o Iehova tei akaputuia ki te Uruoaanga ‘Ta te Atua Tu Oraanga’ te akatika nei ma te ngakau katoa e ko to te Atua aerenga te aerenga meitaki ia no te oraanga. Inara, kua kite matou e te tuke ra te manako ngakau o te maata anga o te tangata i teia tuatau. Kua tamata te taiate tangata i te au manakoanga e manganui, te au apiianga, e te au manako akonoanga kia kite eaa te aerenga meitaki no te oraanga. Na tetai akara tiratiratu anga i te tuatua enua o te tangata e te au turanga o te ao i teia tuatau nei te akakite maira i te tika o te akakite anga tu-Atua tei tataia ia Ieremia 10:23: ‘Kare tei te tangata e aere nei, i te akono i tona uaorai takainga tapuae.’

¹⁴ “I te au ra ravarai te kite nei tatou e maata atu te akapapuanga i te tika o taua au tuatua ra. No te tuanga maata, te manako kore nei te taiate tangata i to te Atua aerenga no te oraanga. Te aruaru ra te au tangata i teia akaraanga tika i to ratou uaorai mata. E kino te au tupu anga​—te akakino anga i te oraanga ngutuare tangata, akarukeanga i te tamariki ma te arataki koreia; te aruaru maataanga i te apinga, tei taopeia ki roto i te puapinga kore e te pekapeka oki; te rave kino neneva e te ta ua oki; e manganui te aronga tei kino; te au pekapeka eteniki e te au tamaki, ma tetai akataka keanga e maata te au oraanga tangata; te raveanga maata i te akaturi, ma te akatupu anga kia maata te maki piri no te ainga tau kore. E tokoiti ua teianei no te au manamanata tini te akakino nei i te aruaru anga i te mataora, te au, e te tinamou oki.

15, 16. No runga i to te Atua ra aerenga no te oraanga, eaa te manako papu tei akakiteia mai i te akatakaanga manako ra?

¹⁵ “I te manako anga i te tu mii o te tangata nei e te vaitata anga mai te ‘tamaki o te rā maata o te Atua Mana katoatoa,’ tei tapaia ko Aramakito (Apokalupo 16:14, 16), ko matou ei Au Kite o Iehova te papa nei te manako e:

¹⁶ “Te Mea Mua: Te manako nei matou ia matou uaorai e na te Atua ko Iehova, i te mea kua akatapuia matou tataki tai uaorai kiaia ma te arairai koreia, e ka tamou marie matou i te akarongo ngaueue kore i te oko ta Iehova i oronga mai na roto i tana Tamaiti, ia Iesu Karaiti. Kua papa to matou manako kia aaere i roto i to te Atua aerenga no te oraanga, te tavinianga ei Au Kite nona e te kauraroanga ki tona tu ngateitei mei tei akakiteia mai na roto i te tutara anga o Iesu Karaiti ra.

17, 18. Eaa te turanga te ka tamou marieia e te Au Kite o Iehova no runga i te au turanga akono tau e te taeake anga Kerititiano oki?

¹⁷ “Te Rua: Ka rave ua atu matou i te akono i te tu akono tau teitei e te au turanga vaerua o te Pipiria. Kua manako papu matou kia akakore i te aere i ta te etene aerenga, i te akonoanga puapinga kore o to ratou manako. (Ephesia 4:17-19) Ko to matou manako papu kia vai ma ki mua ia Iehova e auraka ei viivii i teianei ao.​—Iakobo 1:27.

¹⁸ “Te Toru: Ka mou piri tikai matou i to matou turanga Tuatua Tapu ei taeakeanga Kerititiano i te ao katoa nei. Ka tamou marie matou i te turanga neutara ei Kerititiano i roto i te au pa enua, ma te kore e tuku ia matou uaorai kia mou atu ki roto i te ereere no te makitakita te kopu tangata ke, iti tangata ke, me kare eteniki me kare akatataka keanga ra.

19, 20. (a) Eaa ta te au metua Kerititiano ka rave? (e) Akapeea ta te au Kerititiano mou katoatoa ka rave ua atu ei akataka ia ratou uaorai ei au pipi na Karaiti?

¹⁹ “Te A: Ko matou e au metua ra ka apii tamou tikai i ta matou tamariki i to te Atua ra aerenga. Ka akanoo matou i te akatauanga no te ora anga Kerititiano ra, tei kapiti i te tatauanga putuputu i te Pipiria, te apiianga ngutuare tangata, e tetai tuanga ma te ngakau katoa i roto i te putuputuanga Kerititiano e i te angaanga tutu aereanga oki.

²⁰ “Te Rima: Ka tauta matou katoatoa kia tatanu i te au tu tau i te Atua ta Tei Anga mai ia tatou i akakite maira, e ka tauta matou kia aru i tona tu tikai e tona au aerenga oki, mei ta Iesu i rave ra. (Ephesia 5:1) Kua akatika pu matou kia tuku i ta matou au ravenga katoatoa kia akonoia ma te aroa, na reira te akatakaanga ia matou uaorai ei au pipi na Karaiti ra.​—Ioane 13:35.

21-23. Eaa ta te Au Kite o Iehova ka rave ua atu, e eaa ta ratou e irinaki papu ra?

²¹ “Te Ono: Kare e tuku ua ka rave tamou marie rai matou i te tutuanga i te tuatua meitaki o te Patireia o te Atua, te akariro i te tangata ei au pipi, e na matou e apii ia ratou i to te Atua aerenga no te oraanga e ka akamaroiroi atu ia ratou kia rauka te terenianga tere atu i te au uipaanga putuputuanga.​—Mataio 24:14; 28:19, 20; Ebera 10:24, 25.

²² “Te Itu: Ei aronga tataki tai e ei akaaerenga akonoanga, ka rave ua atu matou i te tuku anga i to te Atua ra anoano na mua i to matou au oraanga. Na te taangaanga i tana Tuatua, koia te Pipiria, ei arataki no matou, kare matou e tapae ke ki te pae katau me kare ki te pae kaui, na te reira te akapapuanga e teitei roa atu to te Atua ra aerenga i to te au aerenga o teianei ao. Kua manako papu matou kia aruaru i to te Atua ra aerenga no te oraanga​—kia ngaueue kore e kia tiratiratu oki, i teianei e tuatau ua atu!

²³ “Te akanoo nei matou i teianei akatakaanga manako no te mea te tuku nei matou i te irinaki anga ki katoa ki ta Iehova taputou aroa e ko tei rave i to te Atua ra anoano ka vai aia e tuatau ua atu. Te akanoo nei matou i teia akatakaanga manako no te mea te irinaki nei matou e na te akonoanga i te au kaveinga Tuatua Tapu, akoanga, e te akamaroiroi anga ka akariro no te aerenga meitaki o te oraanga i teia tuatau e te akanoo ra i tetai tango meitaki no te tuatau ki mua, kia raukai ia tatou tetai mou anga ngaueue kore ki runga i te oraanga tikai. (1 Timoteo 6:19; 2 Timoteo 4:7e, 8) I runga ravao, ka akanoo matou i teianei akatakaanga manako no te mea te inangaro nei matou i te Atua ia Iehova ma to matou ngakau katoa, te meta, te manako, e te ririnui oki!

24, 25. Eaa te tupu anga i te akatakaanga manako i orongaia ra, eaa te manakoanga papu o te aronga aaere ra i to Iehova ra aerenga?

²⁴ “Te aronga katoatoa tei akaputu mai ki teianei uruoaanga tei akaperepere ra i te akanoo anga no teianei akatakaanga manako, e tuatua AE!”

²⁵ E au anere ua atu te au ngai akaputuputu e te au taitiamu takapini te ao nei kua kapiki maata i te pauanga te katoatoa tei akaputuputu maira ma tetai mangungu maata “AE!” Kare e ekoko anga i te Au Kite o Iehova e ka tamou marie ratou i te aaere i to Iehova aerenga. E irinaki anga ki katoa to ratou ia Iehova e te akarongo oki e ka akatupu aia i tana au taputou. Ka vai tiratiratu ratou kiaia, noatu eaa te ka rokoia mai. E te manako papu ra ratou kia rave i tona anoano.

“No Tatou te Atua Ra”

26. Eaa te turanga mataora o te aronga tei aaere ra i to Iehova aerenga?

²⁶ Te maara ra te Au Kite o Iehova i te akamaroiroi anga a te tata taramo: “E tiaki atu ia Iehova, e akono tikai i tona arataa, e nana koe e akateitei kia rauka ia koe te enua.” (Salamo 37:34) Kare e ngaropoina ia ratou ta Paulo au tuatua akamaroiroianga: “No tatou te Atua ra, ka tika iaai kia māro mai? Ko tei kore oki i akaperepere i tana uaorai Tamaiti, ko tei tuku ua mai iaia no tatou katoa nei, eaa oki aia e kore ei e oronga katoa mai i te au mea ravarai no tatou?” (Roma 8:31, 32) Ae, me ka aaere ua atu tatou i to Iehova aerenga, ka oronga ua mai aia “i te au mea katoa nei ei rave anga na tatou.” (1 Timoteo 6:17) Eaa tetai ngai meitaki atu i to tatou nei​—i te aaereanga i to Iehova ra aerenga, i te pae i to tatou au tungane e te au tuaine akaperepere. Ma Iehova i te pae ia tatou, e manako papu tatou kia vai atu ki reira e kia akakoromaki tae roa ki te openga, ma te irinaki ki katoa e i tana tuatau tau, ka kite tatou i tana akatupu anga i te au taputou openga ravarai tana i tuatua mai.​—Tito 1:2.

[Tataanga Rikiriki i Raro]

Maara Ainei ia Koe?

◻ Eaa te umuumuia ra no tetai Kerititiano kia aaere i to Iehova ra aerenga?

◻ Eaa tatou i tau ei kia tatanu i te irinakianga ia Iehova e te tiratiratu oki iaia?

◻ Eaa te tauturu te vai maira ia tatou e aaere ra i to Iehova aerenga?

◻ E oronga mai i etai au tumu maata no te akataka anga manako tei akanooia i “Ta te Atua Tu Oraanga” au Uruoaanga ra.

[Au Tutu i te kapi 18]

Kua akanooia tetai akatakaanga manako puapinga maata i “Ta te Atua Tu Oraanga” au Uruoaanga Tapere e te Pa Enua