Noatu e Kua Maaniia ki te One-Pueu, e Opara Ki Mua!

“Kua kite oki aia i to tatou tu; te manako ra aia e, e [“one-pueu,” NW] tatou nei.”​—SALAMO 103:14.

1. Te tika ainei te Puka Tapu i te pae o te raveanga taineti i te karangaanga e kua maaniia te au tangata ki te one-pueu? E akataka mai.

I TE pae kopapa, e one-pueu ua tatou. “E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora.” (Genese 2:7) Teia akatutu anga ngoie ua i te angaia anga te tangata, te rotai ra ki te tika taineti. E tere atu i te 90 au mea katoatoa tei maaniia te kopapa tangata ka kiteaia i roto i te “one-pueu o te enua nei.” Kua karanga tetai tangata apii kemikara e te vaira i roto i tetai kopapa tangata matutu e 65 patene okitene, e 18 patene kapono, e 10 patene aitorotene, e 3 patene naitorotene, e 1.5 patene calcium, e 1 patene phosphorus, te toenga te vaira tetai atu au mea. Noatu e kua tika tikai teia au tamanako anga kare ia i te mea puapinga. Te vaira te tika: “E one-pueu tatou nei”!

2. Eaa taau ka tuatua no runga i ta te Atua anga anga i te au tangata, e no teaa ra?

² Koai atu, i te pae ia Iehova, te ka rauka i te anga i teia au mea ora aka angaanga no roto ua mai i te one-pueu? E tiama ta te Atua au angaanga e te apa kore, no reira na tana ikianga i te anga i te tangata na teia tu kare ia i te tumu no te kopekope. E tikai, no tei rauka i Tei Anga Maata ra i te anga i te tangata mei te one-pueu o te enua nei na roto i tetai tu mataku e te umere ka akamaata ia i to tatou tu ariki no Tona ririnui, tu karape, e te pakari tau kare i kotingaia.​—Deuteronomi 32:4, NW, tataanga i raro ake; Salamo 139:14.

Taui Anga te Au Turanga

3, 4. (a) I te anga anga i te tangata ki te one-pueu, eaa ta te Atua kare i akakoro ana? (e) Eaa ta Davida e tuatua ra ia Salamo 103:14, e akapeea te papaanga tuatua i te tauturu anga ia tatou kia taea teia taopenga anga?

³ E au kotinga to te au mea ora one-pueu. Inara, kare rava te Atua i akakoro ana e kia riro teia ei mea teiaa me kore ei arairai anga tikai. Kare te reira i akakoroia ei akatupu i te akamaroiroi kore me kore te mataora kore. Noatu rai, mei ta te akapapaanga o ta Davida au tuatua ia Salamo 103:14 e akakite ra, tei raro ake te au tangata i te au kotinga te ka akatupu i te akamaroiroi kore e te mataora kore. Eaa ra? I te akarongo kore anga a Adamu raua ko Eva i te Atua, kua apai mai raua i tetai turanga tauiia ki to raua pamiri i te tuatau ki mua. No tei maaniia ki te one-pueu i reira i tupu mai ei te au aerenga ou.a

⁴ Te tuatua ra a Davida, kare no runga i te au kotinga natura te ka rauka ra i te au tangata tiama tei maaniia ki te one-pueu, mari ra no runga i te au ngai paruparu tei akatupuia e te tu tiama kore tei iri maira. No te mea kare rai aia e tuatua no runga ia Iehova e: “Koia tei akakore i taau katoa ra au apa; ko tei akaora i toou katoa ra au maki; Ko tei akaora ia koe i te mate . . . Kare akenei aia i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino.” (Salamo 103:2-4, 10) Noatu e kua maaniia ki te one-pueu, naringa te au tangata tiama i noo akarongo ua, kare rai ratou e tarevake, e ara, e e anoano i te akakore anga ara; e kare katoa ratou e tu i te au maki tei umuumuia ra te rapakauanga. Tei maata rava atu, kare rai ratou e topa ki roto i te vaarua o te mate te ngai e raukaʼi ratou i te akaoki anake uaia mai na roto i tetai tuakaouanga.

5. Eaa ra i kore ei e ngata ia tatou kia marama i te au tuatua a Davida?

⁵ No te tu tiama kore, kua kite pouroa tatou i te au mea ta Davida i tuatua ra. Te kite ua ra tatou i to tatou au kotinga no te mea no te tu tiama kore. Te maromaroaia ra tatou me riro te reira i tetai au taime ei takino i to tatou pirianga kia Iehova me kore ki to tatou au taeake Kerititiano. Te mii nei tatou no tei riro to tatou au tu tiama kore e te au taomi anga o te ao o Satani ei opara ia tatou i tetai au taime ki roto i te turanga puapinga kore. Mei te mea e te vaitata viviki maira te openga ki ta Satani tutara anga, te akakeu ra tana ao i te taomi anga maata ki runga i te au tangata noa nei e ki runga tikai i te au Kerititiano.​—Apokalupo 12:12.

6. Eaa ra etai au Kerititiano ka manako akamaroiroi kore ei, e akapeea a Satani i te autu anga i teia tu?

⁶ Te manako ainei koe e te ngata ua atura te nooanga i tetai oraanga Kerititiano? Kua rongoia ana etai au Kerititiano i te tuatua anga e ko te roa atu o to ratou noo anga ki roto i te tuatua mou ko te maata atu o to ratou tu tiama kore. Inara, te akaraanga, e te ngoie ua ra ia ratou i te kite maata atu i to ratou uaorai au tu tiama kore e to ratou rauka kore anga i te aru i ta Iehova au turanga tiama i te tu ta ratou i inangaro ra. E tika, te akaraanga e e tupuanga matau uaia teia i te au Kerititiano e tamou ra i te tupu i te pae o te kite e te ariki anga i te au umuumu anga tika a Iehova. E mea puapinga e auraka tatou e tuku i tetai ua atu tu kite ua ei akamaroiroi kore ia tatou e tae ua atu ki te kangaanga atu ki roto i te rima o te Tiaporo. I te au anere mataiti i aereia mai kua tauta putuputu aia i te akamaata i te akamaroiroi kore e raukaʼi i te akatupu i te au tavini o Iehova kia akaruke i te akamorianga mou. Noatu ra, na te aroa tae tikai i te Atua, pera katoa te “makitakita maata” i te Tiaporo, i tapu i te maata anga ia ratou mei te rave anga i te reira.​—Salamo 139:21, 22; Maseli 27:11.

7. Na teea tu e riro ei tatou mei ia Iobu ra?

⁷ Inara, penei i tetai au taime ka manako akamaroiroi koreia te au tavini o Iehova. Tetai tumu katoa penei e merengo kore i te au mea ta tatou ka rauka i te rave. Penei ka piri mai te au tika pae kopapa me kore te au pirianga maro ma te au mema o te pamiri, te au oa, me kore te au oa angaanga. No tei akamaroiroi kore tikaiia a Iobu akarongo ra i pati ei aia ki te Atua e: “Naringa koe e akapipini iaku ki te vaarua e, angairi koe e uuna iaku, e kia riro ke toou riri, angairi koe e akataka i te taime noku, ka maara mai ei iaku nei!” I na, me ka opara te au turanga ngata ia Iobu, “kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino,” kia tupu te akamaroiroi kore anga meangiti, kare i te mea poitirere e ka tupu rai kia tatou.​—Iobu 1:8, 13-19; 2:7-9, 11-13; 14:13.

8. Eaa ra te akamaroiroi kore anga i tetai taime ka riro ei ei akairo papu?

⁸ Mei teaa atura te maru i te kite e te akara ra a Iehova i te au ngakau e kare e akangaropoina ana i te au manako meitaki! Kare rava aia e kopae i te aronga tei tauta ra i te akamareka iaia ma te ngakau tae tikai. Te tika, i tetai au taime ka riro te akamaroiroi kore ei akairo papu, te akakiteanga e kare tatou e manako kore ana i ta tatou tavini anga ia Iehova. Mei teia akaraanga, ko tei kare rava e putoto ana ma te akamaroiroi kore penei i te pae vaerua kare aia e kite ana i tona au tu apikepike mei tetai pae ra i kite i to ratou. E akamaara: “Ko te manako ra e te tu ra aia, kia matakite aia ko te inga aea.”​—1 Korinetia 10:12; 1 Samuela 16:7; 1 Ariki 8:39; 1 Paraleipomeno 28:9.

Kua Maani Katoaia Ratou ki te One-Pueu

9, 10. (a) Toai akarongo ta te au Kerititiano ka aru? (e) Akapeea a Mose i te ariu anga atu ki tana tuku anga angaanga?

⁹ Te papa ra a Ebera pene 11 i tetai au kite o Iehova i mua ake i te tuatau Kerititiano tei taaanganga i te akarongo ketaketa. Kua pera katoa te au Kerititiano o te anere mataiti mua e te aronga o teia au tuatau. Te au apiianga te ka mou mai mei ia ratou e mea puapinga tikai. (Akaaite ia Ebera 13:7.) Ei akaraanga, noai te akarongo e rauka meitaki atu ei i te au Kerititiano i te aru i to Mose? Kua kapikiia aia kia akakite i te au tuatua akavaanga ki te tutara ririnui rava atu o te ao o tona tuatau, ko Pharao o Aiphiti. I teia tuatau, kia akakite te Au Kite o Iehova i te au akakiteanga akavaanga aiteite ki te akonoanga pikikaa e tetai atu au akaaerenga te patoi ra i to Karaiti Patireia akatumuia.​—Apokalupo 16:1-15.

¹⁰ Te akatupuanga i teia tuku anga kare ia i te angaanga ngoie ua, mei ta Mose i akaari ra. “Koai oki au, ka tae ei au kia Pharao ra, e ka arataki mai ei au i te tamariki a Iseraela mei Aiphiti mai?” i ui ei aia. Te marama ua ra tatou i tona au manako ngakau no tona tu tau kore. Kua manamanata katoa aia e akapeea te au taeake Iseraela i te ariu anga atu: “E i na, kare ratou e akatika mai i taku, kare oki e akarongo mai i toku reo.” Kua akataka i reira a Iehova kiaia e akapeea e raukaʼi iaia i te akapapu i tona mana akaaere, inara e manamanata akaou atu to Mose. Kua karanga aia: “E taku Atu, kare au i te tangata vaa tukatau, mei ia koe rai i tuatua mai ki to tavini nei, e mei muatangana mairai: e reo murare oki.”​—Exodo 3:11; 4:1, 10.

11. Mei ia Mose rai, akapeea tatou te ariu anga atu ki te au apainga teokaratiki, inara na te taangaanga anga i te akarongo, eaa te papu ra ia tatou?

¹¹ I tetai au taime, penei ka manako tatou mei ia Mose rai. Noatu e te kite ra tatou i ta tatou au apainga teokaratiki, penei ka manako tatou e akapeea atu i te akatupu ia ratou. ‘Koai ra au ka aere atu ei ki te au tangata, etai pae e turanga teitei, e turanga puapingaia, me kore e turanga apiiia, e akamata i te apii ia ratou na roto i te au mataara a te Atua? Akapeea to tatou au taeake pae vaerua te ariu anga mai me pau au i te pauanga i te au uipaanga Kerititiano me kore te oronga i te au uriuri anga mei te paata i roto i te Apii Orometua Teokaratiki? Kare ainei ratou e kite i toku au tu tau kore?’ Inara ka akamaara ana, kua vai a Iehova kia Mose e kua akapapa iaia no tana tukuanga angaanga no te mea kua taangaanga a Mose i te akarongo. (Exodo 3:12; 4:2-5, 11, 12) Me aru tatou i te tu akarongo o Mose, ka vai a Iehova i rotopu ia tatou e ka akapapa katoa ia tatou no ta tatou angaanga.

12. Akapeea te akarongo o Davida i te akamaroiroi anga ia tatou i roto i te akamaroiroi kore anga no te au ara me kore te au tarevake?

¹² Ko tetai ua atu tei manako apiapi ra me kore akamaroiroi kore no te au ara me kore te au tarevake te aite ra kia Davida i tona karanga anga e: “Te aaki nei oki au i taku nei ara, e te vai ua nei rai toku kino i mua iaku.” I te patianga kia Iehova, kua karanga katoa a Davida e: “E uuna ke atu koe i to mata i taku nei au ara, e taparapara i toku nei au kino ravarai.” Kare rava aia i tuku ana i te tu akamaroiroi kore kia keia mei iaia ra, te anoano no te tavini ia Iehova. “Auraka koe e tuaru iaku i mua i to aroaro nei, auraka oki e rave ke atu i to Vaerua Tapu iaku nei.” Te taka ua ra e e “one-pueu” a Davida inara kare a Iehova i anga ke ana mei iaia ra, no te mea kua taangaanga a Davida i te akarongo ki roto i ta Iehova taputou e kare e akavaavaa i “te ngakau paruparu, e te aue ra.”​—Salamo 38:1-9; 51:3, 9, 11, 17.

13, 14. (a) Eaa ra tatou ka kore ei e riro mai ei au pipi na te tangata? (e) Akapeea te au akaraanga o Paulo e Petero i te akaari anga mai e kua maaniia rai raua ki te one-pueu?

¹³ Inara, koi akara ei tatou i teia ‘urupu maata kite nei’ ei akamaroiroi anga no te ‘oro tamou marie i teianei oroanga i tukuia mai ki mua ia tatou nei’ kare tatou i akakiteia e kia riro mai ei au pipi na ratou. Kua akakiteia tatou kia aru i te au takainga o ‘Iesu te tumu e te akaoti i to tatou akarongo,’ kare to te au tangata tiama kore​—e kare katoa te au apotetoro akarongo o te anere mataiti mua.​—Ebera 12:1, 2; 1 Petero 2:21.

¹⁴ I tetai au taime kua maitu te nga apotetoro ko Paulo e Petero, e nga poupou i roto i te putuputuanga Kerititiano. “Ko te meitaki oki taku e anoano ra, kare ïa au e rave; kareka te kino anoano koreia, e au ra, ko taku ïa e rave nei,” i tata ei a Paulo. “Aue oki au ko te tangata mate maata e!” (Roma 7:19, 24) No tona tu papu roa kua akakite a Petero kia Iesu e: “Kia maitu te tangata katoa ia koe, kare takiri au nei e maitu!” I te akamatakite anga a Iesu ia Petero e ka uuna aia Iaia e toru taime, kua rere ua a Petero i te patoi atu i tona Pu, te paapaaanga e: “Mate ua atu au ia koe na, kare au e uuna ia koe.” Inara kua uuna atu rai aia ia Iesu, e tarevake tei akatupu ra iaia kia aue maata. Ae, kua maaniia a Paulo raua ko Petero ki te one-pueu.​—Mataio 26:33-35.

15. Noatu te tika e kua maaniia tatou ki te one-pueu, eaa ta tatou tumu no te opara ki mua?

¹⁵ Inara, noatu to ratou au tu apikepike, kua autu tikai a Mose, a Davida, a Paulo, a Petero, e tetai atu mei ia ratou rai. Eaa ra? No te mea kua taangaanga ratou i te akarongo ketaketa ki roto ia Iehova, kua irinaki papu tikai iaia, e kua piri vaitata kiaia noatu te au manamanata. Kua irinaki ratou ki runga iaia no te oronga mai i “te mana maata meitaki.” E kua pera rai aia, te kore anga e tuku ia ratou kia topa roa ma te kore e rapakauia. Me tamou ua tatou i te taangaanga i te akarongo, te papu ra ia tatou e me akavaia tatou, te rotai ra te reira ki te au tuatua: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.” Mei teaa atura i te akakeu anga no te opara atu ki mua noatu te tika e kua maaniia tatou ki te one-pueu!​—2 Korinetia 4:7; Ebera 6:10.

No Tatou Tataki Tai Eaa te Aiteanga o te Maani Angaia ki te One-Pueu?

16, 17. Me tae mai ki te taime akavaanga, akapeea a Iehova i te taangaanga anga i te kaveinga tei akatakaia ia Galatia 6:4?

¹⁶ Na te kite anga i apii i te manganui o te au metua e te au puapii i te kite pakari o te akavaanga i te tamariki me kore te aronga apii i tau ki te tu kite o te aronga tataki tai, kare ki runga i te tango o te au akaaite anga ma te au tamariki me kore te au oa apii. Te rotai ra teia ki tetai kaveinga Puka Tapu tei akakiteia te au Kerititiano kia aru: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”​—Galatia 6:4.

¹⁷ E rotai ei ki teia kaveinga, noatu e te rave atura a Iehova ma tona au tangata ei pupu akaaereia, te akava ra aia ia ratou ei aronga tataki tai. Te karanga ra a Roma 14:12 e: “Ka ope takiri rava tatou i te aaki i te tuatua iaia uaorai i te Atua ra.” Te kite meitaki ra a Iehova i te papaanga to anga o tona au tavini takitai. Kua kite aia i to ratou tu pae kopapa e te manako, to ratou au tu kite, to ratou au maroiroi tei akatuangaia e te au ngai paruparu, te au mea ka rauka ia ratou, pera katoa ko te maata ta ratou ka rauka ei akaari i te au ua Kerititiano. Kua tuatua a Iesu no runga i te vaine takaua tei tuku e rua nga moni meangiti ki roto i te pia moni o te iero e tana akatutu anga o te ua tei ruruia ki runga i te one memeitaki, e nga akaraanga akamaroiroi teia no te au Kerititiano tei taitaiaia ra no te mea te akaaite tau kore ra ratou ia ratou uaorai ki tetai pae atu.​—Mareko 4:20; 12:42-44.

18. (a) Eaa ra tatou ka tauta ei kia kite i te aite anga no tatou ei aronga one-pueu tataki tai? (e) Eaa ra te akara matatio va ua anga ka kore ei e akatupu i te taitaia?

¹⁸ E mea puapinga e kia manako tatou i te aite anga o te riro anga mai ei one-pueu i to tatou uaorai turanga tataki tai e raukaʼi ia tatou i te tavini ma te ki katoa. (Maseli 10:4; 12:24; 18:9; Roma 12:1) Na te kite meitaki ua anga i to tatou uaorai au tu apikepike e te au ngai paruparu e raukaʼi ia tatou i te noo ma te kite i te anoano e te au ngai ka rauka i te akameitaki atu. I te akara matatio anga uaorai, auraka rava tatou e akangaropoina i te mana o te vaerua tapu i te tauturuanga ia tatou kia meitaki atu. Na roto i te reira, i angaiaʼi te ao katoa e pini ua ake, i tataiaʼi te Puka Tapu, e i roto i tetai ao te mate atura, i tupu mai ei tetai totaiete ao ou au. No reira te rava ra te ririnui tikai o te vaerua tapu o te Atua ei oronga i te pakari e te maroiroi tei anoanoia no te akono i te tu tika ki te aronga tei pati i te reira.​—Mika 3:8; Roma 15:13; Ephesia 3:16.

19. Kare to tatou maani angaia ki te one-pueu ei kotoe anga no teaa?

¹⁹ Mei teaa atura te pumaana i te kite e te maara ra ia Iehova e e one-pueu tatou! Inara, auraka rava tatou e manako e e kotoe anga tau teia no te aruaru kore me kore te rave anga i te tarevake. Kare roa! Na ta Iehova maara anga e e one-pueu tatou e akaari anga ia o tona tu takinga meitaki oronga uaia. Inara kare tatou e inangaro kia riro mai ei “aronga akono kore i te Atua, ko tei ruri ke i te aroa ua o te Atua ei kanga anga, e kua akakore i te Atu okotai ra i te Atua, i to tatou Atu ia Iesu Mesia ra.” (Iuda 4) No tei maaniia ki te one-pueu kare ia i te kotoe anga kia riro mai ei aronga akono kore i te Atua. Ka tauta tetai Kerititiano i te tamaki i te au inangaro tarevake, te papaanga i tona kopapa e te aratakianga i te reira ei tuikaa, i reira te kopae anga i te “akariri atu i te Vaerua Tapu.”​—Ephesia 4:30; 1 Korinetia 9:27.

20. (a) Na teea au tu e rua ‘kia maata te rave anga i te angaanga a te Atu’? (e) Eaa ta tatou tumu no te manako papu meitaki?

²⁰ I teianei, i te au mataiti openga o ta Satani ao, kare teia i te taime no te akamarie​—i te pae tikai o te tutu aereanga i te Patireia e kare katoa i te pae o te akatupu maata anga atu i te au ua o te vaerua o te Atua. I teia tu e rua, kia “maata” ua atu ta tatou ka rave. Ko teia te taime no te opara ki mua no te mea kua kite tatou e ‘kare ta tatou angaanga i te mea puapinga kore.’ (1 Korinetia 15:58) Ka akamatutu a Iehova ia tatou, kua karanga a Davida nona e: “Kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Mei teaa atura te rekareka i te kite e te tuku ra a Iehova ia tatou uaorai kia piri ki roto i te angaanga maata rava atu tei akaungaia ra te au tangata tiama kore kia rave​—noatu e kua maaniia tatou ki te one-pueu!

[Au Tataanga Rikiriki i Raro]

Ka Rauka Ainei ia Koe i te Akataka?

◻ Eaa te tuke ia Genese 2:7 e Salamo 103:14 i te tuatuaanga no te au tangata e kua maaniia ki te one-pueu?

◻ Eaa ra a Ebera pene 11 i riro ei ei tumu akamaroiroi anga no te au Kerititiano i teia tuatau?

◻ Eaa ra i riro ei ei mea pakari no tatou kia taangaanga i te kaveinga tei akanooia ia Galatia 6:4?

◻ Akapeea e raukaʼi ia Ebera 6:10 e 1 Korinetia 15:58 i te tauturu i te kopae atu i te tu akamaroiroi kore?

[Au Tutu i te kapi 10]

Te aru ra te au Kerititiano i te akarongo o te au taeake akamori, inara te aru ra ratou i te Akaoti o to ratou akarongo, ko Iesu