Akariro i te Tuatua a te Atua ei Turama i Toou Arataa
“Taau tuatua . . . e turama no toku nei arataa.”—SALAMO 119:105.
1, 2. I raro i teea au turanga ka turama ai te tuatua a Iehova i to tatou arataa?
KA TURAMA te tuatua a Iehova i to tatou nei arataa me akatika tatou i te reira kia tupu. Kia rekareka ai i taua turama pae vaerua ra, ka anoanoia kia riro tatou ei aronga apii maroiroi i te Tuatua tataia a te Atua e kia akono i ta te reira akoanga. I reira anake rai e rauka ai ia tatou te au manako o te tata taramo: “E lamepa taau tuatua i toku nei vaevae, e turama no toku nei arataa.”—Salamo 119:105.
2 Ka akamanako ana tatou ia Salamo 119:89-176. E maata tikai te akakiteanga i roto i teia au irava nei, tei akanooia ki roto i tetai 11 tuanga! Ka tauturu ratou ia tatou kia noo ki runga i te arataa o te ora mutu kore.—Mataio 7:13, 14.
Eaa ka Pingapingareka ai i te Tuatua a te Atua?
3. Akapeea te Salamo 119:89, 90 i te akaari anga mai e ka rauka ia tatou i te irinaki i te tuatua a te Atua?
3 Ka akatupu te pingapingareka i te tuatua a Iehova i te tu tinamou pae vaerua. (Salamo 119:89-96) Kua imene te tata taramo: “Te akatinamouia ra e Iehova taau tuatua e rimua i te au rangi ra. . . . Kua akatinamou koe i te enua, e te vai marie nei.” (Salamo 119:89, 90) Na te tuatua a te Atua—tana “au ture o te rangi”—i rauka ai i te au apinga o te rangi i te neke meitaki aere ua na roto i to ratou au aerenga takapinipini e i akatinamouia ai te enua e mutu kore ua atu. (Iobu 38:31-33; Salamo 104:5) Ka rauka ia tatou kia irinaki ki te au tuatua ravarai no roto atu i te vaa o Iehova; ta te Atua ka tuatua ka “manuia oki” i te akatupuanga i tona akakoroanga.—Isaia 55:8-11.
4. Eaa ta te pingapingareka no te tuatua a te Atua ka akatupu no tona au tavini tei rokoia e te tumatetenga?
4 Tika anga kua ‘mate te tangata tata taramo i tona tumatetenga anga naringa kare aia e pingapingareka ana i te ture a te Atua.’ (Salamo 119:92) Kare na te au tangata ke ua aia i akatumatetenga; na te au ngati Iseraela aati ture ra tei riri ua iaia. (Levitiku 19:17) Inara kare teia i tamataku ana iaia, no te mea kua inangaro tikai aia i te ture a te Atua tei akamaroiroi iaia. I Korinetia, kua rokoia te apotetoro ko Paulo e “te mate i rotopu i te au taeake pikikaa ra,” tei kapiti mai penei i “te au aposetolo mamaata katoa ra” e kimi ra i tetai akaapaanga nona. (2 Korinetia 11:5, 12-14, 26) Inara, kua ora a Paulo i te pae vaerua no tona pingapingareka i te tuatua a te Atua. No to tatou pingapingareka i ta Iehova Tuatua i tataia e te akono i ta te reira e akakite maira, i rauka ai ia tatou i te aroa i to tatou au taeake. (1 Ioane 3:15) Kare katoa e rauka i te riri o teia ao i te maani ia tatou kia akangaropoina i tetai ua atu au ikuikuanga a te Atua. Kia rave tamou atu rai tatou i tona anoano na roto i te aroa taokotai ma to tatou au taeake ia tatou e akara atura ki mua i te tavinianga rekareka ia Iehova e tuatau ua atu.—Salamo 119:93.
5. Akapeea te Ariki ko Asa i te kimi anga ia Iehova?
5 I te akakite anga i ta tatou akamorianga kia Iehova, penei ka pure tatou e: “Noou au nei; akaora iaku, te kimi nei oki au i taau ra au ikuiku anga.” (Salamo 119:94) Kua kimi te Ariki ko Asa i te Atua e kua takore atu i te apoteiti ki vao mei roto ia Iuda. I ko i te putuputuanga maata i te mataiti 15 o te tutara o Asa (963 M.T.N.), kua aere maira te tangata o Iuda ‘kua papau iora ratou i te koreromotu e kimi ia Iehova.’ Ko te Atua “kua kitea oki aia e ratou” e ‘kua oronga mai i te au ia ratou e pini ua ake.’ (2 Paraleipomeno 15:10-15) Kia riro teia akaraanga ei akamaroiroi i tetai ua atu tei aere ke mei te putuputuanga Kerititiano kia kimi akaou i te Atua. Ka akameitaki e ka paruru mai aia i te aronga e taokotai maroiroi akaou maira ki tona iti tangata.
6. Eaa te ravenga ka paruru ia tatou mei te kino pae vaerua?
6 Ka oronga mai te tuatua a Iehova i te pakari te ka paruru ia tatou mei te kino pae vaerua. (Salamo 119:97-104) E pakari maata atu to tatou i te au akauenga a te Atua i to tatou au enemi. Na te akarongo i tana au tuatua akakite e oronga mai i te kite no tatou, e na te ‘akono i tana au ikuiku anga e tauturu ia tatou kia rauka te kite maata atu i to te aronga pakari atu.’ (Salamo 119:98-100) Mei te mea te au tuatua a Iehova e e ‘tongi anga venereka atu i to te meli ki to tatou nei vaa,’ ka rikarika e ka kopae ia tatou i “te au arataa pikikaa ravarai.” (Salamo 119:103, 104) Ka riro teia ei paruruanga mei te kino pae vaerua me aravei tatou i te au tangata akatietie, roto riri, akono kore i te Atua i teia au ra openga.—2 Timoteo 3:1-5.
E Ramepa ki to Tatou nei Vaevae
7, 8. I te akono anga i te Salamo 119:105, eaa te ka anoanoia tatou kia rave?
7 E tumu irinaki mouia te tuatua a te Atua ei turama i te pae vaerua. (Salamo 119:105-112) Noatu me e au Kerititiano akatainuia tatou me ko tatou to ratou au oa o te “mamoe ke atu,” ka akakite tatou e: “E lamepa taau tuatua i toku nei vaevae, e turama no toku nei arataa.” (Ioane 10:16; Salamo 119:105) Mei te ramepa te tuatua a te Atua i te turama i to tatou arataa, kia kore tatou e turori e e inga i te pae vaerua. (Maseli 6:23) Inara, kia akariro tatou uaorai i te tuatua a Iehova ei ramepa no to tatou nei vaevae.
8 Ka anoanoia tatou kia ngaueue kore mei te tangata tata ia Salamo 119. Kua akakoro tikai aia e auraka rava kia tatipake mei te au ikuiku anga a te Atua. “Kua taputou au,” i akakite ei aia, “e e akono au i te reira ra, e akono rai au i te au akatauanga tuatua-tika na [Iehova].” (Salamo 119:106) Auraka rava tatou kia akameangiti mai i te puapinga o te apii putuputu i te Pipiria e te piri ki te au uipaanga Kerititiano.
9, 10. Akapeea tatou i kite ei e ka rauka i tetai aronga tei akatapuia kia Iehova kia ‘tatipake mei tana au ikuiku anga,’ inara ka akapeea e rauka ai teia i te kopae?
9 Kare te tata taramo i ‘tatipake ana mei te au ikuiku anga a te Atua,’ inara ka rauka ua te reira i te tupu ki tetai tangata tei akatapuia kia Iehova. (Salamo 119:110) Kua tatipakeia te Ariki ko Solomona, noatu e mema aia no tetai iti tangata akatapuia kia Iehova e kua tarotai ana i te akamataanga ki te tu pakari orongaia mai e te Atua. “Kua ara katoaia ra aia i taua au vaine ke ra” na te akanauru anga iaia kia akamori i te au atua pikikaa.—Nehemia 13:26; 1 Ariki 11:1-6.
10 Kua akanoo “te kimi manu ra,” ko Satani, i te au ereere e manganui. (Salamo 91:3) Ei akatauanga, penei ka titau tetai tangata akamori i mua ana i te akanauru ia tatou kia tatipake mei te arataa o te turama pae vaerua ki roto i te turanga poiri o te apoteiti. I rotopu i te au Kerititiano i Tuatira, te noo ra “tenana vaine ko Iezebela,” penei paa e pupu vaine te apii ra i etai ke i te akamori itoro e te akaturi. Kare a Iesu i akakoromaki ana i taua au tu kino ra, e auraka katoa rai tatou. (Apokalupo 2:18-22; Iuda 3, 4) No reira kia pure tatou no te tauturu a Iehova kia kore tatou e tatipake mei tana au ikuiku anga mari ra kia vai tamou rai ki roto i te turama tu-Atua.—Salamo 119:111, 112.
Akaoraia e te Tuatua a te Atua
11. Kia tau kia Salamo 119:119, mei teaa to te Atua manako no runga i te aronga kino?
11 Me kare rava tatou e aere ke mei tana au akonoanga, ka akaora te Atua ia tatou. (Salamo 119:113-120) Kare tatou e ariki ana i te “au manako puapinga kore ra,” mei ia Iesu kare i ariki i te au Kerititiano tutu ua kare i tae tika te ngakau i teia tuatau. (Salamo 119:113; Apokalupo 3:16) No te mea te tavini nei tatou ia Iehova ma te ngakau katoa, kua riro aia ei ‘akapuanga no tatou’ e ka akaora aia ia tatou. Nana e ‘takatakai ki raro i te aronga ravarai i akaruke i tana ra au akonoanga’ na te ariu anga atu ki te ravenga akavare e te pikikaa. (Salamo 119:114, 117, 118; Maseli 3:32) Te manako maira aia i taua aronga kino mei “te ota”—te au mea viivii tei akaateaia mai mei runga i te au auri puapinga mei te ario e te auro. (Salamo 119:119; Maseli 17:3) Kia akaari ua rai tatou i te inangaro no ta te Atua au tuatua akakite, no te mea kare tatou e inangaro kia kapitiia atu ki te aronga kino i runga i te putunga ota no te akapouanga!
12. Eaa i puapinga ai te mataku ia Iehova?
12 “Te rutetetete nei toku kopapa i te mataku ia koe [Iehova],” i akakite ei te tata taramo. (Salamo 119:120) E mea puapinga te rauka anga ia tatou tetai mataku tau i te Atua, tei akaariia na te kopae anga i tana e patoi ra, kia akaora mai aia ia tatou ei au tavini nona. Kua riro te tu mataku tapunui ia Iehova i te akakeu ia Iobu kia noo i te oraanga tuatua tika. (Iobu 1:1; 23:15) Ka tauturu te tu mataku i te Atua ia tatou kia aruaru atu rai i tetai arataa tei marekaia e te Atua noatu eaa ta tatou ka akakoromaki. Inara, ko te akakoromaki, ka anoanoia te au pure akatenga tei tuatuaia na roto i te akarongo.—Iakobo 5:15.
Pure ma te Akarongo
13-15. (a) Eaa ka rauka ai ia tatou kia akarongo e ka paunaia mai ta tatou au pure? (e) Eaa te ka tupu me kare tatou e kite e eaa te ka tuatua i roto i te pure? (nga) Akatutu mai e akapeea a Salamo 119:121-128 penei i te piri anga atu ki ta tatou ‘ngunguruanga tei kore e tika kia tuatua mai’ i roto i te pure.
13 Ka rauka ia tatou i te pure ma te akarongo e ka angaanga te Atua no tatou. (Salamo 119:121-128) Mei te tata taramo rai, kua papu ia tatou e ka paunaia mai ta tatou au pure. No teaa ra? No te mea te inangaro ra tatou i te au akauenga tu-Atua tei ‘maataʼi i to te auro, i te auro i mā meitaki ra.’ Maata roa atu, te ‘manako nei oki tatou i te au ikuiku anga katoa ra a te Atua ei mea tika anake.’—Salamo 119:127, 128.
14 Te akarongo maira a Iehova i ta tatou au patianga no te mea te pure ra tatou ma te akarongo e te akono meitaki katoa ra i tana au ikuiku anga. (Salamo 65:2) Inara akapeea i tetai au taime me rokoia tatou e tetai au manamanata ngata e kare tatou i kite eaa te ka tuatua i roto i te pure? I reira na ‘te vaerua uaorai e pati i ta tatou ma te ngunguru e kore e tika kia tuatua ra.’ (Roma 8:26, 27) I taua au taime ra, ka ariki ua mai te Atua i te au tuatua tei kiteaia i roto i tana Tuatua ei au pure no to tatou au anoano.
15 Kua ki ua te au Tuatua Tapu i te au pure e te au manako te ka piri atu ki ta tatou ‘ngunguruanga tei kore e tika kia tuatua mai.’ Ei akaraanga, e akamanako ana ia Salamo 119:121-128. Penei ka tau meitaki te mataara i tuatuaia ai i konei ki to tatou au turanga. Ei akatauanga, me te mataku ra tatou ko te takinga kinoia, penei e pati tatou no te tauturu a te Atua na te mataara i rave ei te tata taramo. (Irava 121-123) Penei ka anoanoia tatou kia rave i tetai ikianga ngata. Penei i reira e pure tatou kia tauturu mai te vaerua o Iehova ia tatou kia akamaara e kia akono i tana au tuatua akakite. (Irava 124, 125) Noatu oki e ‘te rikarika ra tatou i te au arataa pikikaa ravarai,’ penei ka anoanoia tatou kia pati ki te Atua kia angaanga no tatou kia kore tatou e tuku ua atu ki tetai au timataanga kia akakore i tana ture. (Irava 126-128) Me tatau tatou i te Pipiria i te au ra ravarai, penei ko taua au irava puapinga ra ka maaraia me pati tatou kia Iehova.
Tauturuia e te Au Tuatua Akakite a Iehova
16, 17. (a) Eaa tatou ka anoano ei i ta te Atua au tuatua akakite, e akapeea to tatou manako no te reira? (e) Akapeea ra to tetai aronga manako no runga ia tatou, inara eaa tikai te mea maata?
16 Kia akarongoia mai i roto i te pure e kia rekareka i te akaperepereanga tu-Atua, ka anoanoia tatou kia akarongo ki te au tuatua akakite a te Atua. (Salamo 119:129-136) I te mea e ngaropoina ana ia tatou, ka anoano tatou i ta Iehova au tuatua akakite vavaria e akaoki maira i tana ikuiku anga e te au akauenga ki roto i to tatou manako. E tika oki, te ariki rekareka nei tatou i te turama pae vaerua e turamaia maira na roto i te au eeuanga ou a te au tuatua a te Atua. (Salamo 119:129, 130) Te mareka katoa nei tatou e te ‘akakakā maira a Iehova i tona mata ki runga ia tatou’ i te arikianga, noatu e ‘te maringi a vai ua nei to tatou roimata’ no te mea te aati ra tetai aronga i tana ra ture.—Salamo 119:135, 136; Numero 6:25.
17 Papu e ka rauka ua atu rai ia tatou ta te Atua akaperepereanga me akono tatou i te tuatua tika o tana au tuatua akakite. (Salamo 119:137-144) Ei au tavini no Iehova, te ariki nei tatou e e tikaanga tona kia akamaara mai kia tatou e e tuatua tika tana au tuatua akakite e kia tuku i te reira ki rungao ia tatou ei au akauenga ka tau tatou kia akarongo. (Salamo 119:138) I te mea kua akarongo te tata taramo i te au akauenga a te Atua, eaa ra aia i karanga ai e: “Iti ua rai au, e te akavaavaaia”? (Salamo 119:141) Te akaraanga, te tuatua ra aia no runga i te mataara e manako maira tona au enemi iaia. Me akono marie tatou i tetai turanga ngaueue kore no te tu tuatua tika, ka akavaavaa paa tetai aronga ia tatou. Inara, ko te mea maata atu koia oki te akara akaperepere maira a Iehova ia tatou no te mea te noo nei tatou kia tau ki te tuatua tika o tana au tuatua akakite.
Tinamou e te Au
18, 19. Eaa te ka tupu mai me akono tatou i ta te Atua au tuatua akakite?
18 Te akono anga i te au tuatua akakite a Iehova ka akavaitata te reira ia tatou kiaia. (Salamo 119:145-152) No te mea te akarongo ra tatou ki ta Iehova au tuatua akakite, ka rauka ua ia tatou i reira i te kapiki kiaia ma to tatou ngakau katoa, e ka rauka ia tatou kia tapapa atu e ka akarongoia mai tatou. Penei ka ara mai tatou “kare rai i ao” e ka kapiki atu no tetai tauturu. Tetai taime meitaki tikai tera i te pure! (Salamo 119:145-147) Tei vaitatao katoa nei te Atua kia tatou no te mea te kopae ra tatou i te aronga e aru ra i te kino e te manako ra i tana tuatua ei tuatua mou ra, mei ta Iesu i rave. (Salamo 119:150, 151; Ioane 17:17) Ka akaora to tatou pirianga ma Iehova ia tatou i roto i teia ao pekapeka e ka akaora ia tatou na roto i tana tamakianga maata o Aramakito.—Apokalupo 7:9, 14; 16:13-16.
19 No to tatou akangateiteianga oonu i te tuatua a te Atua, i rauka ai to tatou rekareka i te tu tinamou tikai. (Salamo 119:153-160) ‘Kare tatou i akaruke i ta Iehova au tuatua akakite’ mei te aronga kino rai. Te anoano ra tatou i ta te Atua au ikuiku anga e no reira i tinamou ei i roto i tona aroa takinga meitaki. (Salamo 119:157-159) Te akakeu maira ta Iehova au tuatua akakite i to tatou manako kia maara ia tatou tana au umuumuanga no tatou i roto i tetai au turanga akatakaia. I tetai tua ra, ko ta te Atua au ikuiku anga, e au aratakianga ia, e te ariki ua nei tatou e e tikaanga to Tei Anga mai ia tatou kia arataki ia tatou. Te kite anga e ‘e tuatua-mou te tuatua a te Atua’ e kare e rauka ia tatou i te akaaere takake i to tatou uaorai takainga vaevae, kua ariki rekareka tatou i reira i te akatereanga tu-Atua.—Salamo 119:160; Ieremia 10:23.
20. Eaa i rauka ai ia tatou te “au maata”?
20 Ka apai mai to tatou inangaro no ta Iehova au ture i te au maata no tatou. (Salamo 119:161-168) Kare te takinga kino e keia ia tatou i te ‘au aite koreia o te Atua.’ (Philipi 4:6, 7) No te maata o to tatou ariki rekareka i ta Iehova au tuatua tau te akapaapaa putuputu ua nei tatou ia ratou—‘taki itu i te rā okotai.’ (Salamo 119:161-164) “E au maata to te aronga i inangaro i taau ture,” i imene ei te tata taramo, “kare o ratou e turorianga.” (Salamo 119:165) Me inangaro e me akono tatou tataki tai i te ture a Iehova, kare tatou e akaturoriia i te pae vaerua no ta tetai e rave ra me kore na tetai ua atu mea.
21. Eaa te au akaraanga Tuatua Tapu e akaari maira e kare tatou e inangaro kia turori me tupu ake tetai au turanga ngata i roto i te putuputuanga?
21 E manganui te au tangata i rekotiia e te Pipiria tei kore roa i akatika ana i tetai apinga kia riro ei akaturori anga tinamou ia ratou. Ei akatauanga, kare te tangata Kerititiano ko Gaio i turori ana mari ra kua ‘akono i te tuatua-mou’ noatu to Dioterepe tu akono kore i te atua. (3 Ioane 1-3, 9, 10) Kua ako atu a Paulo i te nga vaine Kerititiano ia Euodia raua ko Sunetuke “kia okotai rai o raua ngakau i te Atu nei,” penei no te au tu ngata tei tupu ki rotopu ia raua. Te akaraanga, kua tauturuia raua kia akaau i to raua manamanata, e kua tavini atu rai raua ia Iehova ma te tiratiratu. (Philipi 4:2, 3) No reira kare tatou e inangaro i te akaturori atu me tupu ake tetai au turanga ngata i roto i te putuputuanga. Kia tamou tatou ki runga i te akono anga i ta Iehova au ikuiku anga, ma te akamaara e ‘ko to tatou nei au aerenga katoa oki tei mua ïa iaia.’ (Salamo 119:168; Maseli 15:3) Kare i reira e apinga e keia ia tatou i te “au maata.”
22. (a) Me akarongo tatou i te Atua, eaa te akameitakianga ka rekarekaia e tatou? (e) Eaa to tatou manako no runga i te aronga tei aere ke mei te putuputuanga Kerititiano?
22 Me akarongo ua rai tatou ia Iehova, ka rauka ia tatou te akameitakianga o te akameitaki ua atu anga rai iaia. (Salamo 119:169-176) Na te noo anga kia rotai ki ta te Atua au akonoanga, kare anake ua tatou e rekareka i te tu tinamou pae vaerua mari ra kia ‘akameitaki ua atu to tatou vaa i ta Iehova akapaapaaanga.’ (Salamo 119:169-171, 174) Teia te akameitakianga maata roa atu ka rauka ia tatou i teia au ra openga nei. Kua inangaro te tata taramo kia ora kia akameitaki ua atu rai ia Iehova, inara na tetai mataara kare i akakiteia mai, kua ‘aere ke aia mei te mamoe ngaro ra.’ (Salamo 119:175, 176) Tetai aronga tei aere ke mei te putuputuanga Kerititiano penei te inangaro ra rai i te Atua e penei te inangaro ra i te akameitaki iaia. No reira kia rave pouroa tatou te ka rauka ia tatou i te tauturu ia ratou kia rauka akaou ia ratou i te kimi i te tu tinamou pae vaerua e i te kite i te rekarekaanga o te akameitaki anga ia Iehova ma tona iti tangata.—Ebera 13:15; 1 Petero 5:6, 7.
Ramepa Tinamou no to Tatou Arataa
23, 24. Eaa te au puapinga taau i rauka mai mei te Salamo 119?
23 Ka puapingaia tatou mei te Salamo 119 na roto i te au mataara tuke tuke. Ei akatauanga, ka tauturu te reira ia tatou kia irinaki maata atu ki runga i te Atua, no te mea te akaari maira te reira e ka rauka mai te ao mou tikai mei te ‘aaere anga na te ture a Iehova.’ (Salamo 119:1) Te akamaara maira te tata taramo ia tatou e ‘e tuatua-mou te tuatua a te Atua mei muatangana mai.’ (Salamo 119:160) Tikaanga ka akamaata atu teia i ta tatou akameitakianga no te Tuatua katoa a te Atua i tataia. Ka riro te maaraara anga no runga i te Salamo 119 i te akakeu ia tatou kia apii i te au Tuatua Tapu ma te maroiroi. Kua pati putuputu ana te tata taramo i te Atua: “E apii mai koe iaku i taau ra au akonoanga.” (Salamo 119:12, 68, 135) Kua pati akatenga katoa aia: “E akakite mai koe kiaku i te akono meitaki e te karape: te irinaki nei oki au i taau ra au akauenga.” (Salamo 119:66) E mea meitaki kia pure tatou na roto i taua mataara rai.
24 Ka tauturu te apiianga tu-Atua kia rauka tetai pirianga vaitata ma Iehova. E tapa putuputu ua ana te tata taramo iaia uaorai e e tavini no te Atua. Te tika, kua tuatua aia kia Iehova na roto i te au tuatua aroa: “Noou au nei.” (Salamo 119:17, 65, 94, 122, 125; Roma 14:8) E akameitakianga tikai kia tavini e kia akameitaki ia Iehova ei Kite nona! (Salamo 119:7) Te tavini ra ainei koe i te Atua ma te rekareka ei tangata tutu i te Patireia? Me koia ia, kia papu e ka turu ua atu rai a Iehova e ka akameitaki ua ia koe i roto i teia angaanga ngateitei me irinaki tamou rai koe ki roto i tana tuatua e kia akatika i te reira ei turama i toou arataa.
Akapeea Koe me Pau?
• Eaa tatou ka pingapingareka ai i te tuatua a te Atua?
• Akapeea te tuatua a te Atua i te akaora anga ia tatou?
• Na roto i teea au mataara e tauturuia ai tatou e te au tuatua akakite a Iehova?
• Eaa to Iehova iti tangata i tinamou ei e i au ei?
[Tutu i te kapi 16]
E tumu te tuatua a te Atua no te turama pae vaerua
[Tutu i te kapi 17]
Me anoano tatou i ta Iehova au tuatua akakite, kare roa aia e manako mai ia tatou ei “ota”
[Au Tutu i te kapi 18]
Me tatau tatou i te Pipiria i te au ra ravarai, penei ka maara ua mai tetai au irava puapinga me pure tatou